Тропар священномученику Інокентію Глас-4
Светоче земли Винницкия, проповедниче Слова Божия, наставниче пастырей и утешение верных, столпе веры и утверждение упования, в любви Христовей пламенеяй и тем сердца наша возгреваяй. Архиерею премудрый, священномучениче отче Иннокентие, моли Христа Бога спастися душам нашим.
Кондак священномученику Інокентію Глас-4
Кровию твоею честною землю обагривый, живот свой за Христа не пощадив, звездо многосвесветлая земли Винницкия, Церкви Православныя украшение, не престаяй молитися о чадех твоих, поющих: Радуйся отче Иннокентие, священномучениче Христов славный.
Молитва священномученику Інокентію (Тихонову), архієпископу Вінницькому.
О преблаженне священномучениче отче Иннокентие, молитвы светильниче земли Винницкия у Престола Божиего!Восхотев орудием Господа быти, от юности своея образ ангельского жития приял еси и благодатию Святаго Духа святительского достоинства сподобился еси. Архиерею Божий, в смуты час стадо Христово соблюл еси, полагая душу свою за овцы своя. Ереси и расколы безстрашно обличая, старых всяко укреплял, юных добре вразумлял, дети научал еси, пастырей ободряя и наставляя. Чашу страданий достойне испил еси и в граде нашем смиренно венец Царства небесного восприял. Ныне с сокрушенными сердцами и верою горячею молимся и просим тя: умоли Владыку Вседержителя даровати граду и стране нашей мир, тишину и покой, умирити враждующих, сохранити люди, отторгнути злобу бесовскую и водворити Любовь Господню. Молитвами твоими, отче, да подаст нам Бог, в Троице славимый, подкрепление веры, слезами покаяния убеленное и Пречистыми Тайнами Тела и Крови Христовых очищенное сердце, освященныя благодатию душу и тело, и да сподобит нас выну славити Отца и Сына и Святаго Духа, и твое милостивное предстательство о нас, ныне и присно и во веки веков. Аминь.