Затверджено для богослужбового використання
на засіданні Священного Синоду УПЦ
10 квітня 2023 року
СЛУЖБА СВЯТИТЕЛЮ СИЛЬВЕСТРУ, ЕПИСКОПУ КАНЕВСКОМУ
НА ВЕЛИЦЕЙ ВЕЧЕРНИ
Блажен муж, 1-й антифон.
На Господи воззвах: стихиры на 8, глас 1-й:
Святителю Сильвестре Богомудре, Церкве Православныя столпе веры непоколебимый, небесным чином в житии своем сопричастниче и пастырей многих в постижении Премудрости наставниче, земли Киевския славное украшение и Академии освященныя светильниче многосветлый, мы же верою сошедшеся, восхваляем тя любовию, ты же в вечной славе пребывая, моли спастися душам нашим.
Святителю Сильвестре Богоблаженне, земли Волынския грозде благословенный и Церкве Киевския красото неувядаемая, сосуде благодати Божией преисполненный, величаем тя, яко в учении своем богослова изящнаго и пастыря предобраго в житии Евангелие добре проповедавшаго, образом любве и смирения бывшаго. Темже священную твою память достодолжно воспевающе, тебе молимся, моли спастися душам нашим.
Отче святителю Сильвестре, премудрость книжную возлюбив, богословие добре изъясняя, учащимся же в священней Академии Киевстей был еси учителем изрядным, тайны Божия искусно изъясняя и верою правою верных наставляя, путь спасительный к познанию Истинныя Премудрости указуя, тем и пастырей истинных Церкве Христовы нам являя, моли спастися душам нашим.
Святителю Христов Сильвестре, монашествующих добрый наставниче и архиереев славное украшение, житием своим образ кротости и смирения нам явивый, в подвизех яко столп непоколебимый был еси, и яко солнце светозарное, лучами словес твоих озаряя учащих и учащихся в благословенней Академии Киевстей и к истинному познанию Божию приводил еси, темже и ныне непрестанно моли спастися душам нашим.
Слава, глас 6: Святителя предивнаго и богослова великаго, земли Киевския молитвенника теплаго и священныя Академии нашея предстоятеля достойнаго, ныне благочестно восхвалим, той бо веры Православныя наставник явился есть и молитвенник усердный Божия Матере о наследии христоименном бывый, непрестанно Спаса всех молит, во еже спастися душам нашим.
И ныне, Богородичен, глас тойже: Кто Тебе не ублажит, Пресвятая Дево; кто ли не воспоет Твоего Пречистаго Рождества; безлетно бо от Отца возсиявый Сын Единородный, Тойже от Тебе, Чистыя, пройде, неизреченно воплощься, естеством Бог Сый, и естеством быв Человек нас ради; не во двою лицу разделяемый, но во двою естеству неслитно познаваемый. Того моли, Чистая Всеблаженная, помиловатися душам нашим.
Вход. Прокимен дне и чтения три.
Премудрости Соломоновы чтение.
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиися нань, разумеют истину, и вернии в любви пребудут Ему: яко благодать и милость в преподобных Его, и посещение во избранных Его.
Премудрости Соломоновы чтение.
Уста праведнаго каплют премудрость: устне же мужей мудрых ведят благодать. Уста мудрых поучатся премудрости, правда же избавляет их от смерти. Скончавшуся мужу праведну, не погибнет надежда. Сын бо праведен раждается в живот, и во благих своих плод правды объимет. Свет праведным всегда, и от Господа обрящут благодать и славу. Язык мудрых добрая свесть, и в сердце их почиет мудрость. Любит Господь преподобная сердца, приятни же ему вси непорочнии в пути. Мудрость Господня просвещает лице разумнаго. Постигает бо желающыя ю, прежде даже разумети ю: и удобь узрится от любящих ю. Утреневавый к ней не утрудится: и бдяй ея ради, вскоре без печали будет. Яко достойных ея сама обходит ищущи: и во стезях ея является им благоприемне. Мудрости никогдаже одолеет злоба. Сих ради и рачитель бых доброты ея: и возлюбих ю, и поисках от юности моея: и взысках невесту привести себе, яко всех Владыка возлюби ю. Таиница бо есть Божия хитрости, и обретательница дел Его. Труды ея, суть добродетели: целомудрию же и разуму та учит, правде и мужеству, ихже потребнее ничтоже есть в житии человеком. Аще же и многаго искусства желает кто, весть древняя, и быти хотящая разсмотрит: Свесть извития словес, и разрешения гаданий: знамения и чудеса проразумеет, и сбытия времен и лет: и всем советник есть благ, яко безсмертие есть в ней, и благославие во общении словес ея. Сего ради беседовах ко Господу и помолихся Ему, и рех от всего сердца моего: Боже отцев, и Господи милости, сотворивый вся словом Твоим, и мудростию Твоею устроивый человека, да владеет бывшими от Тебе тварьми, и да управляет мир в преподобии и правде: даждь ми Твоих престолов приседящую премудрость, и не отлучи мене от отрок Твоих, яко аз раб Твой, и сын рабыни Твоея. Посли ю с небес от святаго жилища Твоего, и от Престола славы Твоея, да сущи со мною научит мя, что благоугодно есть пред Тобою: и наставит мя в разум, и сохранит мя в славе своей. Помышления бо смертных вся боязлива, и погрешительна умышления их.
Притчей чтение.
Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней, и лета живота в деснице ея: в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз премудрость устроих, совет, и разум и смысл аз призвах. Мой совет и утверждение, мой разум, моя же крепость. Аз мене любящыя люблю, ищущии же мене обрящут благодать. Разумейте убо незлобивии коварство, ненаказаннии же прилагайте сердца. Послушайте мене и паки, честная бо реку, и отверзу от устен правая: яко истине поучится гортань мой, мерзки же предо мною устны лживыя. С правдою вси глаголы уст моих: ничтоже в них стропотно, ниже развращенно. Вся права суть разумевающым, и проста обретающым разум. Научу бо вас истине, да будет о Господе надежда ваша, и исполнитеся духа.
На литии стихиры, глас 4-й:
Проповедника веры Православныя, Евангельских истин благоговейнаго исполнителя, богослова великаго и инока искуснаго, тако тя, святителю Сильвестре, песньми возвеличим. Ты бо в житии своем образ нищелюбия являя, приходящия к тебе со любовию приимал еси, тем служение пастырское утверждая, верныя подражати себе подвигл еси. Сего ради ныне просим: моли Всещедраго Бога, да подаст нам велию милость.
Слава и ныне, Богородичен, глас тойже:
Радуйся, Света облаче; радуйся, свещниче светлый; радуйся, ручко, в нейже манна; радуйся, жезле Ааронов; радуйся, купино неопалимая; радуйся, чертоже; радуйся, престоле; радуйся, горо святая; радуйся, прибежище; радуйся, Божественная трапезо; радуйся, двере тайная; радуйся, всем радосте.
На стиховне стихиры, глас 4-й:
Днесь восхвалим святителя премудраго, догматов искуснаго изъяснителя и веры Православныя неленостнаго проповедника, труды своими Церковь добре украсившаго и чада духовныя богословием просветившаго, егоже по достоянию похвалим и сладце тому воззовем: отче наш Сильвестре, моли Христа Бога, да спасет души наша.
Стих: Честна пред Господем смерть преподобных Его.
Торжество ныне совершающе, возвеселися священная Академие Киевская, мнози цвети небеснии возрастившая, от них же и святителя Сильвестра со любовию похваляем, яко богослова многоплоднаго и учителя милостиваго, емуже зовем: святе, моли Христа Бога, да спасет души наша.
Стих: Блажен муж бояйся Господа, в заповедех Его восхощет зело.
Наста память святителя милостиваго, нищих питателя и сирых заступника, многою любовию ближняя озаряющаго и немощи верных кротостию исцеляющаго, по преставлении чада своя не оставляющаго, емуже зовем: преблаженне Сильвестре, моли Христа Бога, да спасет души наша.
Слава, глас 6-й: Апостольския благодати преемника достойнаго и Собора Академии Киевския звезду многосветлую, школу духовную богословием своим пресветло озаряющего и путь к Царствию Небесному право указующаго, приидите, богоноснии, песньми возвеличим, той бо Престолу Спасову предстоя, молит Его, да спасет души наша.
И ныне, Богородичен, глас тойже: Творец и Избавитель мой, Пречистая, Христос Господь, из Твоих ложесн прошед, в мя оболкийся, первыя клятвы Адама свободи. Темже Ти, Всечистая, яко Божии Матери же и Деве, воистинну вопием немолчно: радуйся, Ангельски, радуйся, Владычице, предстательство и покрове, и спасение душ наших.
На благословении хлебов, тропарь святителю дважды, глас 4-й:
Богословия изряднейший учителю, догматов веры премудрый изьяснителю, юношей во благочестии наставниче и священныя Академии Киевския всетвердое основание, Сильвестре пречудне, моли Христа Бога спастися душам нашим.
И Богородице, Дево: единожды.
НА УТРЕНИ
Тропарь святителя дважды.
Слава и ныне, Богородичен, глас 4-й: Еже от века утаеное и Ангелом несведомое таинство, Тобою, Богородице, сущим на земли явися Бог, в неслитном соединении воплощаем и, Крест волею нас ради восприим, имже воскресив первозданнаго, спасе от смерти души наша.
По 1-м стихословии седален, глас 4-й:
Завету апостола первоверховнаго последуя, не своея корысти искал еси, но любовь Христову в сердце своем стяжавая, Академии Киевския образ добродетелей явился еси, учеником твоим сия богомудренно показуя и Спасу всех верно служа, Егоже и ныне непрестанно моли о спасении душ наших.
Слава, и ныне, глас тойже: Моление теплое приносим Ти, Владычице, и во умилении зовем: не остави рабы Твоя, но милостей Твоих одожди росу благодатную, да от бед избавльшеся, во умилении пение благодарственное принесем Ти, Дево Всепетая.
По 2-м стихословии седален, глас тойже:
На небо лествицею добродетелей возшед, люди многия в правей вере наставил еси, отче наш Сильвестре, догматы Церкве Святыя добре изъяснив, делами благостыни твоея и чудесы доныне являеши свет познания Христова; в Царствии же Небеснем присно пребывая, моли Спаса всех, да пощадит и спасет души наша.
Слава и ныне, глас тойже: Апостольская похвало и мучеников укрепление, святителей величание и пресвитеров благоговейных славо и утверждение, Церкве столпе недвижимый, Дево Всепетая, моления наша скоро приими, отжени от нас всякую напасть и искушение, утоли лютыя на ны скорбей восстания и милостию Твоею от бед избави рабы Твоя.
Полиелей.
Величание: Величаем тя, святителю отче наш Сильвестре, и чтем святую память твою, ты бо молиши о нас Христа Бога нашего.
Избранный псалом:
Услышите сия, вси языцы, внушите, вси, живущии по вселенней. Уста моя возглаголют премудрость, и поучение сердца моего разум. Приидите чада, послушайте мене, страху Господню научу вас. Благовестих правду в Церкви велицей. Истину Твою и спасение Твое рех. Повем Имя Твое братии моей, посреде Церкве воспою Тя. Услыша ти ми глас хвалы Твоея и поведати вся чудеса Твоя. Возненавидех церковь лукавнующих и с нечестивыми не сяду. Яко сохраних пути Господни и не нечествовах от Бога моего. Уста праведнаго поучатся премудрости, и язык его возглаголет суд. Правда Его пребывает в век века. Священницы Твои облекутся правдою, и преподобнии Твои возрадуются. Блажени, живущии в дому Твоем, в веки веков восхвалят Тя.
По полиелеи седален, глас 8-й:
Церкве Православныя богослова новаго, Таин Божиих изъяснителя искуснаго и пастыря милостиваго, превознесем вси богомудраго Сильвестра. Того бо Христос Господь на свещнице Церковнем светло прослави и им же люди многия на покаяние настави. Темже ныне святителя славяще, молим его, да испросит у Человеколюбца Христа спасения душам нашим.
Слава и ныне, Богородичен, глас тойже: Воспеваем Тя, Богородице Мати, Избавителя Мира неизреченно рождшая и ублажаем Тя по достоянию, Ты бо рода человеческаго милостивая Ходатаица и о человецех неленостная Предстательница, моли Сына Своего, Христа Бога нашего, о спасении душ наших.
Степенна, 1-й антифон 4-го гласа. От юности моея.
Прокимен, глас 4-й: Уста моя возглаголют премудрость, и поучение сердца моего разум.
Стих: Услышите сия вси языцы, внушите вси живущии по вселенней.
Всякое дыхание. Евангелие от Матфеа, зачало 11.
Слава: Молитвами святителя Сильвестра, епископа Каневскаго:
И ныне: Молитвами Богородицы:
По 50-м псалме стихира, глас 6-й:
Светильника многосветлаго на тверди церковней ясно просиявшаго, песньми священными приидите, празднолюбцы, да восхвалим, той бо в Академии Киевской добродетельным житием просия, право верити чад ея добре научив и пастырей крепких миру в годину испытания яви. Сего ради и жизни вечныя на Небеси сподобися, молит о всех память его совершающих.
Канон святителю, егоже краестрочие в тропарех:
Киевскому богослову Сильвестру любовию пою
глас 8-й.
Песнь 1.
Ирмос: Колесницегонителя фараона погрузи чудотворяй иногда Моисейский жезл, крестообразно поразив и разделив море: Израиля же беглеца пешеходца спасе, песнь Богови воспевающа.
Киими похвальными песньми прославим чистаго источника мудрости святителя Сильвестра достохвального? Той бо трудами своими и житием Академию Киевскую украси, с лики святых собора ея песнь Богови воспевает.
Истины Христовы неленостный блюстителю и заповедей Его усердный исполнителю, веру Православную добре хранити поревновав, Церковь едину соборну исповедая, чада своя добре научил еси песнь достойно Богови воспевати.
Единаго Истиннаго Бога возлюбив и тому житием своим добре последуя, образом ангельским облеклся еси и архиерейским саном почтен, высокия подвиги подъял еси, верныя же научая пешешествовати ко Христу и делами своими славу Его воспевати.
Богородичен: Всепетая Мати, Дево Пренепорочная, земных крепкое Предстательство, спаси всех к Тебе прибегающих и, вкупе со угодником Твоим, научи песнь Богови достойно воспевати.
Песнь 3.
Ирмос: Утверждей в начале небеса разумом, и землю на водах основавый, на камени мя, Христе, заповедей Твоих утверди, яко несть свят паче Тебе, Едине Человеколюбче.
Светом благодати Божия свыше осененный, отче преблаженне Сильвестре, земли Киевския пастырю священнейший, приходящия к тебе милосердно приимал еси, аки врач душевный, в скорби их утешая, и сицевыми труды подвизая пети Единаго Человеколюбца.
Каневския земли святителю достохвальне, люди многия Светом Богопознания просветил еси, вся к покаянию и исправлению живота призывая, тем и страху Божию добре наставлял еси, подвизая пети Единаго Человеколюбца.
Огнем любве Божия распалаемь, хлад греховный отгонял еси от чад твоих, иерарше священнейший: тии бо, яко отца и наставника тя почитающе, словесем твоим добре внимаху, да причасницы Царствия Божия явятся, воспевающе Единаго Человеколюбца.
Богородичен: Молитвами Рождшия Тя, Христе Боже, и дивнаго угодника Твоего, верныя скоро избави молитвенным предстательством Всечестныя Матери Твоея, да славим Тя Единаго Человеколюбца.
Седален, глас 4-й:
Учителя мудрейшаго и догматов церковных толковника изряднаго, святителя Сильвестра, иерарха великаго, сошедшеся, восхвалим. Той бо землю Киевскую подвигом жития добре прослави и священную Академию учением богословия дивно украси, тайны Божия прилежно изъясняя, и теми вся ко спасительному познанию приводя. Темже зовем: непрестанно моли, святе, о наследии твоем, о еже дароватися нам утверджению в вере и спасению душам нашим.
Слава и ныне, Богородичен: Богородице Мати Владычице, моление теплое приносим Ти и во умилении взываем: не остави рабы Твоя, но милостей Твоих одожди росу благодатную, да от бед избавльшеся, благодарственное пение воспоем Ти, Дево Всепетая.
Песнь 4.
Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив. Тем с пророком Аввакумом зову Ти: силе Твоей слава, Человеколюбче.
Обитель Братская тобою – игуменом своим, аки бисером вседрагим, украшена бысть и иноцы ея, взирая на ангелоподобное твое житие, желания и стопы своя ко блаженному пристанищу направляли суть, непрестанно воспевающе: силе Твоей слава, Человеколюбче.
Глаголавый о дивных делах Божиих, богословом новым явился еси, вкупе же и пастырем милостивым, братию, юже собрал еси, христоподобно возлюби и медом учений твоих добре напитал еси, во еже право следовати путем Господним, взывающе: силе Твоей слава, Человеколюбче.
Образу Богородицы Киево-Братския в молении ежедневно служа, молитвы пред ним о чадех твоих неленостно творил еси. Да Покровом Девы ограждаеми, сподобимся и ныне козней века сего избавитися, со святыми купно воспевающе: силе Твоей слава, Человеколюбче.
Богородичен: Солнце Правды, в лето Безлетнаго родила еси нам, Дево Богородице, Свет спасения и Источник нетления, миру явившая, вкупе с достойным молитвенником нашим, умоли Господа Вседержителя, просветити падшее человеческое естество, еже звати: силе Твоей слава, Человеколюбче.
Песнь 5.
Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма окаяннаго? Но обрати мя, и к свету заповедей Твоих пути моя направи, молюся.
Лавры Печерския преподобным отцем в подвизех достойнаго сподвижника, нищету возлюбившаго и в ней до смерти пребывшаго, воспеваем тя, помощи просяще: не остави, священноначальниче, нас твоего попечения, наставляя всех на пути заповедей Господних.
Обильно молитвою и добродетельным житием украшен, богословом истинным показался еси, святителю, тайны Божия добре изъяснял еси, сам Словом Евангелия Христова просвещаяся, единую истинную Премудрость нам яви, наставляя нас на путь заповедей Господних.
Воистину наставником доблим показался еси, святе отче Сильвестре, даже доныне ученицы последовати тебе в любомудрии подвизаеши и юныя премудрости книжной изобильно обучаеши; темже сердца их светом веры просвети и на пути Господни настави.
Богородичен: Ублажаем Тя, Богородице, Мати Преблагословеннаго, Покрове и Ограждение наше, верою служащих Тебе и в бедах сущих не отрини, но, молитвами святителя Твоего, спаси всех и к деланию заповедей Господних направи.
Песнь 6.
Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.
Силою Божиею укрепляемь, благословенную Академию Киевскую добре возрастил еси, сердца юныя боговедению неленостно поучая, право богословствовати умно сподвигл еси, непрестанно взывающе к Богу спасения своего.
Иерусалима новаго гражданине достойный, ты простым житием великое служение совершил еси, мнози пастыри Церкве Христовы достойно наставил еси, да купно с лики святых всегда взывают к Богу спасения нашего.
Лика апостольскаго подражателя благодатнаго, юных Академии наставника изряднаго, сонм святых во дни гонения Церкве Христовы достойно воспитавшаго, тя, святе, прославляем и со лики святых взывая Богови спасения нашего.
Богородичен: Всепетая Мати, Дево Богородице, Света Незаходимаго неизреченно родшая, предстательством священноначальника нашего, подаждь нам чадами света Сына Твоего быти, да купно с лики святых усердно воззовем к Богу спасения нашего.
Кондак, глас 4-й:
Евангельскаго жития достойнаго исполнителя и благочестия непоколебимое правило восхвалим, ты светом учений богословия просветил еси Академию Киевскую, и днесь ти, первостоятелю наш, любовию воспеваем и восклицаем светло: радуйся, Сильвестре, учителю всечудный.
Икос:
Сошедшеся днесь, вси вернии, восхвалим по достоянию молитвенника неусыпнаго, земли Киевския светильника и священныя Академии первостоятеля, богословца великаго святителя Сильвестра, егоже песньми возвеличим громогласно. Той бо в подвизех преподобным отцем Печерским благочестно подражал есть с ними венец нетленный от Пастыреначальника Христа обрете. Емуже по достоянию взываем сице: Радуйся, пастырю милостивый, многия люди от бед избавивый; радуйся, любовию твоею на путь покаяния тех наставивый. Радуйся, земли Киевския бисере вседрагий; радуйся Каневския страны адаманте крепкий. Радуйся, Академию Киевскую трудами богословия украсивый; радуйся, учащимся в ней Евангельскаго жития стезю указавый. Радуйся, Сильвестре, учителю всечудный.
Песнь 7.
Ирмос: Божия снизхождения огнь устыдеся в Вавилоне иногда: сего ради отроцы в пещи радованною ногою, яко во цветнице, ликующе пояху: благословен еси, Боже отец наших.
Тесный путь жития избрав, в жизнь вечную шествовал еси, всеблаженне отче наш Сильвестре, и книжное любомудрие в житии едино избрал еси, тайну Троицы Святыя добре изъясняя, подвизал еси вся ученики своя пети Творцу и Содетелю всяческих: благословен еси, Боже отец наших.
Руце твои воздевая о Академии Киевстей у лика Богородицы в обители Братстей, за стадо твое тепле молился еси, из юношей простых пастырей мужественных Церкве Христовы добре соделовая, сподвигл еси вся пети: благословен еси, Боже отец наших.
Услыши ныне чад твоих, Сильвестре отче наш, к милостивому ходатайству твоему прибегающих, и сохрани присно в благолепии Академию твою, юже возлюбил еси, да вси в ней со любовию во веки воспевают: благословен еси, Боже отец наших.
Богородичен: Лику Твоему смиренно служаще, Богородице Владычице, подаждь скорое утешение рабом Твоим, от бед избавление и наветов вражиих свобождение, да купно со святителем Сильвестром, Сыну Твоему, Христу Богу нашему, благодарственно воспоем: благословен еси, Боже отец наших.
Песнь 8.
Ирмос: Седмерицею пещь Халдейский мучитель Богочестивым неистовно разжже, силою же лучшею спасены сия видев, Творцу и Избавителю вопияше: отроцы благословите, священницы воспойте, людие превозносите во вся веки.
Юноши благочестивии, ихже Академия твоя, святителю, добре воспита, на пажити церковней пастырями добрыми явишася. Сии же, во дни гонения, Христа Бога нашего достойно исповедаху, многия к познанию Истины приводяще, ныне же с лики святых на Небеси взывают: отроцы благословите, священницы воспойте, людие превозносите во вся веки.
Богу добре послужив, Егоже Единаго в житии возлюбил еси, во время оно дух твой в руце Его предавый, и по преставлении своем Академию молитвенным предстательством не оставил еси, купно с сонмом святых ея воспевая песнь сличную: отроцы благословите, священницы воспойте, людие превозносите во вся веки.
Троичен: Обновление духа и мрачного жития нашего подаждь, Триипостастный Господи, молитвами святаго угодника Твоего и всесильною Твоею благодатиею Академию Киевскую, учащия и учащияся в ней, направи ко спасению и наук благих приятию, да вкупе со святыми наставники своими воспевают: отроцы благословите, священницы воспойте, людие превозносите во вся веки.
Богородичен: Всемилостивая Владычице Богородице, в житии зело согрешающих, по милости Твоей не отрини, но подаждь скорое исправление, предстательством угодника Твоего, любовию взывающаго: отроцы благословите, священницы воспойте, людие превозносите во вся веки.
Поем Честнейшую:
Песнь 9.
Ирмос: Ужасеся о сем небо, и земли удивишася концы: яко Бог явися человеком плотски, и чрево Твое бысть пространнейшее небес. Тем Тя Богородицу Ангелов и человек чиноначалия величают.
Истинно явился еси молитвенник о нас пред Богом, святителю отче наш Сильвестре, ныне же трудами своими вся учащияся богословию души добре напитай и вся благопотребная к познанию добре подавай: сего ради похвальная да воспоют ти, Господа величающе.
Юродиевую мудрость века сего посрамивый, в сердца юныя зерно богопознания и веры Православныя добре насаждая, тем и пастырей достойных словесных овец на пажити служения своего адамантами крепкими являеши, подвизая их пети и Господа величати.
Предстоящих святому образу твоему и на поклонение к нему приходящих не остави твоея благостныя помощи, святителю. Учащим подаждь мудрость, учащимся помощь в постижении богоименного книжнаго знания, всем же, яко в житии, тако и ныне болезни уврачуй, скорби утиши, и вся благопотребная подаждь, да благодарственно вси Господа величаем.
Троичен: О, Троице Святая, Несозданная, Безначальная, Соприсносущная, Отче, Сыне и Душе Святый, молитвенное воздыхание раба Твоего услыши и не остави нас в годину испытания, от всякия находящия на ны беды скоро свобождай, да избавльшеся от тех благодарно Тя величаем.
Богородичен: Юница Нескверная, Духом Святым осененная, всесильною Твоею молитвою сохрани в должном благостоянии Академию Киевскую, юже образом Своим украсила еси, и Покровом от искушений защити, да купно с ликом святых ея Господа величаем.
Светилен, глас 4-й:
Проповедника веры Православныя на пажити священныя Академии Киевския добре потрудившагося и богословие зело украсившаго, догматы добре изъяснившаго и многия к истинному познанию приведшаго, приидите ублажим Сильвестра святителя Каневскаго, емуже во смирении рцем: души наша просвети и к Богу приведи всех любовию почитающих память твою.
Слава и ныне, Богородичен: Огнем любве Твоея, Мати Всепетая, согревай души и сердца наша, да от хлада грехов и мраза страстей скоро избавльшеся, со святителем Сильвестром и всем Собором богоносных отец наших славим величия и милости Твоя, вопиюще: радуйся, Благодатная Богородице Дево.
На хвалитех стихиры на 4, глас 5-й:
Радуйся, святителю Сильвестре, воздержания монашескаго светлое зерцало, ты бо любовь в сердце своем слагая, ближняя ею облагоухал еси, и пастырем милостивым бывый, вся приходящия к тебе, от погибели и заблуждения охраняя, всем благотворения подавал еси, тем и чрез милосердие неизреченное Христос тебе прослави, Егоже моли, святе отче, спастися душам нашим.
Радуйся, достоблаженне отче Сильвестре, земли Киевския преславное украшение, подвигом жития своего на путь покаяния и исправления мнози наставивый, и силою Божиею в служении укрепляемь, на гору высоку добродетелей возшедый, люди светом Евангелия просветив, к познанию Истины их привождая. Ныне же Света Божественнаго наслаждаяся, моли спастися душам нашим.
Радуйся, Богоносе отче Сильвестре, Академии Киевския преславное украшение, богослове и защитителю ея изрядный, догматов мудрый изъяснителю. Ты бо Троицу Единосущную боголепно проповедуя, в Дусе огненне пламенел еси, и ныне юныя умы светом Премудрости Христовы осени, моли спастися душам нашим.
Радуйся, достоблаженне отче Сильвестре, в радости Господней днесь светло пребываяй, не забуди чад твоих, яже мудренно в Академии Киевстей собрал еси. Темже Светом Христовы Премудрости их умы просвети и пастырями добрыми на ниве служения соделай, да оныя овцы словесныя по образу твоему ко Господу приведут, взывающе тебе: моли спастися душам нашим.
Слава, глас 6-й: Ревностнаго служителя у Престола Спасова, Евангелия неленостнаго проповедника, земли Киевския молитвенника неустаннаго и Академии нашея достойнаго первостоятеля, приидите, христоноснии людие, светло да воспоим, той бо богомудрым своим житием, путь спасительный нам показует, богословие великое в умы насаждая и тем правоверие утвержая, емуже зовем: моли о наследии Твоем Триединаго Бога, во еже спастися душам нашим.
И ныне, глас тойже: Богородице, Ты еси лоза истинная, возрастившая нам Плод живота, Тебе молимся, молися Владычице со святыми апостолы и святителем Сильвестром помиловати души наша.
Славословие великое, тропарь и Богородичен его. Ектении и отпуст.
НА ЛИТУРГИИ
Блаженны на 8, от канона песнь 3-я и 6-я.
Прокимен, глас 4-й: Уста моя возглаголют премудрость, и поучение сердца моего разум. Стих: Услышите сия вси языцы, внушите вси живущии по вселенней.
Апостол ко Евреем, зачало 335.
Аллилуарий, глас 2-й: Уста праведнаго поучатся премудрости, и язык его возглаголет суд. Стих: Закон Бога его в сердце его, и не запнутся стопы его.
Евангелие от Иоанна, зачало 35.
Причастен: В память вечную будет праведник, от слуха зла не убоится.
13