Затверджено для богослужбового використання
на засіданні Священного Синоду УПЦ
10 квітня 2023 року
Месяца иулиа в 29 день
Служба святому мученику Даниилу Черкасскому, Млиевскому
Творим бдение
НА ВЕЧЕРНЕ
Поем Блажен муж, первый антифон.
На Господи воззвах поставим стихир 8, глас 4:
Приидите, людие православнии, сердцем и устами воспоим мученика добропобеднаго Даниила, сей бо подвиг исповедничества и страдания совершив, мученическою кровию своею землю Черкасскую освяти, Богу в мире душу предал, и от сущих зде к вечным жилищем преставися, идеже молится о душах наших.
Приидите, вернии, доблестнаго Даниила ныне восхвалим, путь тесный спасительный избравшаго, и за Христом даже до смерти последовавшаго, исповеданием веры апостолом подобника, Православия поборника, мучеников похваление, унии тлетворныя несумненное посрамление.
Приидите, православнии людие, воспоим Даниила достохвальнаго, дарохранительницу благоговейно на руце приявшаго, святыя Тайны от осквернения соблюдшаго, в храме Божием от нечестивых сосуд церковный сокрывшаго, и твердость духа явившаго. Сей муж богомудрый даров от Господа сподобися и ныне молится усердно спастися душам нашим.
Летами не млад, благоговеен к Богу, во всем безпорочен быв, и Млиева первейший ревнитель искренний во благочестии, святый Даниил, руце своя завесою церковною обвив, со страхом и благоговением Престолу Божию приступил есть, во еже святыню церковную сокрыти от волков еретических, Тело Христово терзающих, на Дары Божия и имения церковная посягающих, заблуждения и гордыню нечестивых своим дерзновением обличающе.
В премирная селения дух твой, Данииле мучениче мудре, Христос Бог положи непорочно. Ты бо Православия был еси поборник и за Истину мужески пострадал еси, яко адамант твердый явися. На древе висяще, руце имеяй огнем жегоми, обличал еси нечестие еретическое, увещавающе люди православныя веры отеческия твердо держатися. Темже твое днесь успение празднуем по достоянию, славяще Господа, тя прославльшаго.
Светиши отечеству твоему всегда, славный Данииле мучениче, якоже звезда светлая, покрываеши бо присно сие от пагубы врагов и избавляеши озлобления и бури всякия. Темже радостно приносит ти похвалу земля Черкасская, летнюю память, достоблаженне, совершая, верою же и любовию поя Господа, тя прославльшаго.
Слава, глас тойже: Торжествуй днесь радостно, земле Черкасская, ликуй и веселися, Церковь Божия, празднующи память мученика Даниила Богомудраго, песньми духовными восхваляющи его и вопиющи: Православия исповедниче, не забуди всякую душу к тебе притекающую, но присно моли Христа Человеколюбца, во еже спасти всех нас.
И ныне, Богородичен догматик, глас 4:
Иже Тебе ради Богоотец пророк Давид песненно о Тебе провозгласи величия Тебе Сотворшему: предста Царица одесную Тебе, Тя бо Матерь ходатаицу живота показа, без отца из Тебе вочеловечитися благоволивый Бог, да Свой паки обновит образ истлевший страстьми, и заблуждшее горохищное обрет овча, на рамо восприим, ко Отцу принесет, и Своему хотению, с небесными совокупит силами, и спасет, Богородице, мир, Христос, имеяй велию и богатую милость.
Вход. Прокимен дне и чтения три.
Пророчества Исаиина чтение:
Тако глаголет Господь: вси языцы собрашася вкупе и соберутся князи от них. Кто возвестит сия в них или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину; будите Ми свидетели, и Аз Свидетель, глаголет Господь Бог, и Отрок, Егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляли; сотворю, и кто отвратит то? Сице глаголет Господь Бог, избавляяй вас Святый Израилев.
Премудрости Соломони чтение:
Праведных души в руце Божией, и не прикоснется их мука; непщевани быша во очесех безумных умрети, и вменися озлобление исход их, и еже от нас шествие сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и, вмале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.
Премудрости Соломони чтение:
Праведницы во веки живут, о Господе мзда их, и попечение их у Вышняго: сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение Свое, и вооружит тварь в месть врагом. Облечется в броня правды и возложит шлем суд нелицемерен. Приимет щит непобедимый преподобие. Поострит же напрасный гнев во оружие; споборет же с Ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли. Внушите, держащии множества и гордящиися от народов языков: яко дана от Господа держава вам, и сила от Вышняго.
На литии стихиры, глас 8:
Мучениче Христов, Данииле достоблаженне, ты на Бога все упование возложил еси, и Той тя прослави во Царствии Небеснем, идеже со святыми сродники нашими, верою, надеждою и любовию Ему угодившими, прославляеши Отца, и Сына, и Святаго Духа, Троицу Единосущную и Нераздельную.
Глас 4:
Жизни и славы тленныя возгнушався, богомудре Данииле, славу и жизнь вечную наследовал еси блаженную. Христа моли прилежно сохранити верность Ему и нам, совершающим православно ныне всесвятую память твою.
Добропобедне мучениче Христов Данииле, волею за Истину пострадал еси, о временных небрегл еси, Небесным ревнуя, смертию своею слепых вождей еретических посрамил еси, ныне со ангелы водворяешися достойно. Сего ради, твою память чтуще, молим: молися Господеви, помиловатися душам нашим.
Глас 5:
Прииди, мучениче Христов Данииле, к нам, твоего требующим милостивнаго посещения, и избави озлобленныя мучительскими прещении и лютаго неистовства еретическаго и буйства раскольников, от нихже гоними есмы. Ущедри убо, перехвальне, и даждь нам ослабу, утоли бурю и угаси еже на ны негодование, Бога моля, подающаго миру велию милость.
Слава, глас 4: Данииле добропобедне, червлеными мученическими ризами, яко виссоном многоценным украсился еси и на брачную вечерю Господню со избранными вшел еси, идеже выну веселяся, не забуди нас, во юдоли плачевней пребывающих, и просящих твоего заступления в день судный.
И ныне, Богородичен, глас 4:
Помози нам в нуждах наших, Мати Христа Бога, Рождшая всех Творца, да вси зовем Ти: радуйся, едино предстательство душ наших.
На стиховне стихиры, глас 2:
Дом Духа Божественнаго, исполненный чистоты и правды, явился еси, Данииле предивне, земли Черкасския духовное украшение, и веры православныя утверждение.
Стих: Праведник яко финикс процветет, яко кедр, иже в Ливане, умножится.
Церкве Божия украшение, защитников Православия славу, мученика Даниила достохвальнаго любовию прославим, вернии, почитающе добродетели и страдания его.
Стих: Насаждени в дому Господни, во дворех Бога нашего процветут.
Царство Небесное, Богоблаженне мучениче Данииле, наследовал еси страданием, и Небесный чертог воистинну, и свет незаходимый.
Слава, глас тойже: Иже в селении Млиеве ктитора храма Успения, Церкве светильника всесветлаго, мученика Даниила предивнаго ныне, в память его сошедшеся, воспоим любовию, вернии.
И ныне, Богородичен, глас тойже:
Радуйся, Всесвятая Богородице, земли Черкасския Преславная Игумение, Слова сопревечнаго блаженное Селение, Небесных и земных дивное Примирение, не престай возносити о нас теплыя моления. Ты бо еси людей православных от ересей тлетворных ограждение.
Тропарь, глас 3:
Яко алавастр мира драгоценнаго, кровь твою принесл еси Христови, волею пострадав за Истину, обличил еси нечестие, Церкве Православныя утверждение и земли Черкасския похваление, Данииле мучениче приснопамятне, Христу Богу молися, даровати нам велию милость.
Ин тропарь, глас 4:
Мучениче преславне Данииле, веры православныя столпе непоколебимый, терпения столпе и благочестия правило, святынь церковных блюстителю богомудрый, за веру истинную страдальче всехвальне, молися ко Господу, землю нашу в Православии сохранити неврежденно, мир умирити и спасти души наша.
НА УТРЕНИ
По 1-м стихословии седален, глас 6:
Благочестия рачителю, унии зловредныя посрамителю, святыни церковныя от осквернения соблюл еси, мучениче Данииле. Темже Спас мира прият тя в Чертог Свой, сего ради память твою с верою почитаем, досточудне.
Слава и ныне, Богородичен, глас 6:
Безпомощным крепость, Ты воистинну Пречистая Богомати, отсюду смиреннии Тобою возвышаемся, о Тебе высоце держимся: всем Ты еси покров и к Богу Ходатаица.
По 2-м стихословии седален, глас 4:
Яко адамант крепкий противостал еси ярости безбожных, досточудне Данииле, мучения нивочтоже вменив, Господа имуще Помощника, на Негоже Единаго упование во всем житии твоем возложше.
Слава и ныне, Богородичен, глас 4:
О, Всепетая Богородице Владычице, мучеников исповедание и похвало, Ангелы славимая и человеки воспеваемая, и всего мира вожделенная Помощнице, избави Церковь Православную всякаго обстояния, Едина Благословенная.
Величание:
Величаем тя, святый мучениче Данииле, и чтим честная страдания твоя, яже за Христа претерпел еси.
Псалом избранный:
Бог нам Прибежище и Сила, Помощник в скорбех, обретших ны зело. Господи, воздвигни силу Твою и прииди, воеже спасти нас. Глаголах о свидениих Твоих пред цари и не стыдяхся. Вси языцы обыдоша мя и Именем Господним противляхся им. Тебе ради умерщвляемся весь день, вменихомся, яко овцы заколения. Крепость и пение мое Господь и бысть мне во спасение.
По полиелее седален мученика, глас 4:
Заточение и страдания лютыя за Христа и Церковь Православную от нечестивых на земли претерпев, мучениче Данииле, ныне жизни вечныя радостне у Престола Божия наслаждаешися и молишися непрестанно о душах наших.
Слава, глас 8: Кровь излиял еси за Христа Бога и жертву благоприятну себе привел еси. Тем, дерзновение имея к Нему, прилежно молися о верою и любовию совершающих честную память твою, Данииле достоблаженне.
И ныне, Богородичен, глас тойже:
Тя надежду, прибежище и Предстательницу обретше, вернии, к Тебе притекаем и прилежно вопием: помилуй, Богородице, на Тя уповающия и прегрешений оставление нам испроси молитвами Твоими, Пречистая.
Таже степенна, 1-й антифон 4 гласа: От юности моея:
Прокимен, глас 4: Возвеселится праведник о Господе и уповает на Него.
Стих: Услыши, Боже, глас мой, внегда молитимися к Тебе.
Всякое дыхание: Евангелие от Матфея, зачало 36.
Слава: Молитвами святаго мученика Даниила:
И ныне: Молитвами Богородицы:
Помилуй мя, Боже:
Стихира самогласна, глас 6:
Память мученика Даниила вернии людие духовно празднуют, Небеса радуются и земли Черкасския концы торжествуют. Того молитвами мир Церкви Православней даруй, Господи, и душам нашим велию милость.
Канон на 14: Богородице на 6, и святому на
8, егоже краегранесие:
ГОСПОДИ, СПОДОБИ НАС ДАНИИЛА ВОСПЕВАТИ. Глас 6.
Песнь 1
Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.
Господи Боже, очисти чувства и просвети наш ум, и сподоби достойно прославляти святаго мученика Даниила, и, взирающе на страдания и кончину, подражати вере его.
Осуждение неправедное, клеветы и страдания за Христа, яко дар благодатный, приял еси, Данииле достославне, паче же узы и убиение мужественне претерпел еси: ничтоже бо возможе разлучити тя от любве Христовой.
Славную память твою вси поем, Данииле всеблаженне, имамы тя молитвеника крепкаго к Богу. Темже молим: воздежи чистии твоя руце и испроси нам у Господа благодать в заповедех Его неуклонно ходити и веру православную твердо хранити.
Богородичен: Похвало и Венчание мучеником, Богородице Дево Преславная, на Тя бо страдалец Даниил в муках велиих надежду возложив, победно пучину лютых мучений пройде. Ныне и нам, предстоящим в храме славы Твоея, одожди милости Твоя пребогатыя.
Песнь 3
Ирмос: Тебе, на водах повесившаго всю землю неодержимо, тварь, видящи на лобнем висима, ужасом многим содрогашеся, несть свят, разве Тебе, Господи, взывающи.
Облеклся еси во вся оружия Божия и возмогл еси стати противу кознем диавольским, Данииле достоблаженне. Ныне же, яко победитель, в радости небесней пребываеши, несть свят, разве Тебе, Господи, взывающи.
Данииле, мучениче добропобедне, яко овча непорочное, предал еси себе пострадати усердно, подобяся Христу, нас ради плотию пострадавшему и страсти отгнавшему. Ныне же в радости небесней пребываеши, страдальче, несть свят, разве Тебе, Господи, взывающи.
Иерусалима Вышняго взыска душа твоя, к немуже неуклонно в житии твоем шествуя, соделался еси гражданином Небеснаго Отечества, Данииле всечестне. Ныне же в радости небесней пребывеши, несть свят, разве Тебе, Господи, взывающи.
Богородичен: Сокровище неистощимое дарований Тя имуще, Владычице, Радосте всех скорбящих, независтныя дары от Тебе утешений вси приемлем купно с мучеником Даниилом, иже в радости небесней пребывает, несть свят, разве Тебе, Господи, взывающи.
Седален, глас 4:
Воспевают тя православных соборы, Данииле мучениче блаженне, яко правду возлюбльшаго и Христу верность даже до смерти показавшаго, и чаяние воскресения мертвых утверждающаго.
Слава, и ныне, Богородичен, глас тойже:
О, Всепетая Богородице, Владычице, мучеников похвало и славо, ангелы восхваляемая и человеки воспеваемая, избави Церковь Православную от всякаго злаго обстояния, Едина Благословенная.
Песнь 4
Ирмос: Услыша пророк пришествие Твое, Господи, и убояся, яко хощеши от Девы родитися и человеком явитися, и глаголаше: услышах слух Твой и убояхся; слава силе Твоей, Господи.
Православным людем образ верности Христу явил еси, Данииле досточудне, Божественною любовию распалаемь, не убоялся еси темницы и заточения, ниже от нечестивых иереев лютаго мучения, но вся мужественне терпел еси, поюще: слава силе Твоей, Господи.
Отверглся еси суемудреннаго мира, истиннаго учения церковнаго твердый хранителю, святый мучениче Данииле, и даже до Голгофы последовал еси Подвигоположнику твоему Христу Богу, поюще: слава силе Твоей, Господи.
Данииле всеславне, нечестивых мучителей посрамил еси и дерзновенно исповедал еси веру истинную Православную, в нейже и нас утверди, да молитвами твоими даже до смерти сподобимся Господа исповедати и Ему присно пети: слава силе Твоей, Господи.
Богородичен: О, Всепетая Дево Марие, роди христианстии песньми почитают Сына Твоего Пребожественнаго, любовию поюще: слава силе Твоей, Господи.
Песнь 5
Ирмос: Божиим светом Твоим, Блаже, утреннюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Благонравие стяжавше, святый мучениче Данииле, и страдания, яко дарование Божие приемше, венцем нетленным украсился еси, земли Черкасския похвало, правило веры православныя и образ исповедания нам являюще.
Истинным светом Христовым осиян был еси, Данииле Богомудре, во страданиях страшных от иереев нечестивых, правило веры православныя и образ исповедания нам являюще.
Неправедно тлетворныя ереси проповедники оклеветаша тя, Данииле всечестне, в темницу заключиша и на страшныя муки за Христа и Церковь осудиша. Ты же, святе, даже до смерти непобедимь пребыл еси, правило веры православныя и образ исповедания нам являюще.
Богородичен: Ангелов Царице, Ты еси Похвало и Венчание мучеником, на Тя бо страдалец честный Даниил в муках велиих надежду возложил еси, Богородице, правило веры православныя и образ исповедания нам являюще.
Песнь 6
Ирмос: Житейское море, воздвизаемое зря, напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Святый мучениче Данииле, что тя наречем? Цвет ли духовный, яко добродетельми процвел еси? Грозд ли винограда Иисусова, яко кровь мученическую источил еси? Не престай молитися о нас, любовию чтущих память твою.
Данииле всеславне, во исполенние совета благочестивых сограждан твоих благоговейно приял еси сосуды церковныя купно со хранимыми в них Таинами святых Тела и Крови Христовых и сохранил еси я от поругания. Ныне же соблюди, святе, архиереи, священники и вся люди в Православии, и не престай молитися о нас, любовию чтущих память твою.
Аще и огнем жегом и во главу усечен был еси, и сия поруганию и позору предана бысть, обаче во Христе живот вечный приял еси, Данииле добропобедне. Ныне же Пасхи велия и священнейшия истее причащаешися в невечернем дни Царствия Его. Веры апостольския хранителю, не престай молитися о нас, любовию чтущих память твою.
Богородичен: На Тебе исполнися пророчество Симеоново и оружие про́йде душу Твою. Темже мучеником и исповедником Стена Нерушимая и Помощь присно бываеши, Богомати Всечистая, и Покров и соблюдение чтущих страдальцев Христовых святую память.
Кондак, глас 4:
Страдальче достоблаженне Данииле, сохранивый от поругания Тайны Божественныя, сохрани ныне молитвами твоими землю нашу [Черкасскую] от всякаго зла, еретическое и безбожное угаси восстание и мир подаждь людем православным, молитвенниче всеславне и богомудре.
Икос: Ангельскому лику днесь совокупим гласы своя и во умилении восхвалим предивнаго угодника Божия и ревностнаго мученика за веру, вопиюще: Радуйся, небесных ликов похвало радостная; радуйся, христиан православных песнь сладостная. Радуйся, столпе недвижимый благочестия; радуйся, всеславное посрамление злочестия. Радуйся, всякую правду исполняющий; радуйся, лжу и неправду потребляющий. Радуйся, сопричастниче вечныя радости; радуйся, приятилище божественныя сладости. Радуйся, святый мучениче Данииле, молитвенниче всеславне и богомудре.
Песнь 7
Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже, отец наших.
Изукрашенный добродетельми и благочестием богат сый, мученик Даниил Млиевский в земли Черкасстей преславно просияв, Христу поет благоговейно ныне: благословен еси, Боже, отец наших.
Исповедал еси Православие мужественне, отложив страх мучения от злых отступников, Данииле славне, Христа Единаго возжелев, Емуже ныне поеши: благословен еси, Боже, отец наших.
Любовию страстворился Христу, возлюбившему тя, Данииле, и Тому последовал еси, во страданиих Ему православно поя: благословен еси, Боже, отец наших.
Богородичен: Архангелово благовещение прияла еси, и паче ума и естества Бога родила еси, Неискусомужная Марие, чтущия Тя от враг видимых и невидимых избави. Ты бо еси земли отцев наших Держава необоримая.
Песнь 8
Ирмос: За законы отеческия блаженнии в Вавилоне юноши, предбедствующе, царюющаго оплеваша повеление безумное и, совокуплени, имже не сваришася огнем, Державствующему достойную воспеваху песнь: Господа пойте, дела, и превозносите во вся веки.
Верою просияв, незлобием и правдою украсился еси, Ангелом счислился еси, славне мучениче Данииле, нас воздвизая взывати: Господа пойте, дела, и превозносите Его во вся веки.
Отроком неопальным древле в пещи подобне, Христос в пещи искушений душу твою сохрани неврежденну, Данииле многославне, и ныне, яко венценосец, взываеши: Господа пойте, дела, и превозносите Его во вся веки.
Светоносный твой праздник, Данииле достославне, исполняет радости и веселия духовнаго, благоухания же и просвещения тя имущих заступника и Богу вопиющих: Господа пойте, дела, и превозносите Его во вся веки.
Троичен: Пресвятая Троице, Боже наш, Тя пою, яко Единицу естеством, в триех Ипостасях Единаго Создателя, и радуяся зову: Господа пойте, дела, и превозносите Его во вся веки.
Богородичен: Единосущное Слово Отца Небеснаго, Адамово избавление от кровей Твоих девственных воплотися, Дево Марие Чистая, Егоже славословяще зовем: Господа пойте, дела, и превозносите Его во вся веки.
И поем Честнейшую.
Песнь 9
Ирмос: Бога человеком невозможно видети, на Негоже не смеют чини ангельстии взирати, Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.
Воздаяние подвигов и трудов твоих, богомудре, обрел еси, Небесное Царство, в немже ликуя, верою творящих вашу священную память поминай, всеславне мучениче Данииле.
Агнцу Божию подобяся, вземлющему грехи мира, сам себе на заколение вольное, яко агнец, дал еси, и венец нетленный от Сего приял еси, Данииле добропобедне.
Трисолнечныя благодати зарею сияя, светло твой праздник творящих озари и страстнаго омрачения демонскаго избави, Данииле преславне.
Богородичен: Истиннаго Света приятелище утроба Твоя бысть, Просвещающаго мир, Богорадованная; темже молим Тя: светлу зарю подаждь нам, Богоневесто, мольбами Даниила доблестнаго.
Светилен:
Света преумнаго зарею просвещаемь Даниил, в нощи гонений безбожных яко светильник Христов многосветлый страданьми своими землю нашу просвети и тьму нечестия в ней разсея. Егоже ныне в песнех ублажаем.
Слава, и ныне, Богородичен:
Стена необоримая и Покров всемощный мучеником явилася еси, Пресвятая Дево. Буди и нам во всяцем испытании крепкая Помощница, Церковь Православную добре сохраняюще.
На хвалитех стихиры 4, глас 4:
Радуйся, святый сродниче наш, земли Черкасския прозябение, Данииле, Небеснаго Иерусалима гражданине, приносим ти похвалы сия и со умилением взываем: путеводи нас ко спасению, наставляюще к нелицемерному покаянию. Да твоею помощию и заступлением, добродетельно в мире поживше, Царствия Небеснаго сподобимся.
Нечестивии иереи оклеветаху тя, святый мучениче Даниииле, и в темницу ввержен был еси, но даже до кончины мученическия православие твердо исповедал еси, адаманте неколебимый. Настави и нас на недвижимом камени заповедей Господних стояти и верность Церкви в обстояниях добре сохраняти.
Данииле всеславне, дерзновенно исповедал еси веру истинную Православную, в нейже и нас утверди, да молитвами твоими сподобимся даже до смерти Господа исповедати и Царствия Небеснаго сподобимся.
Яко лампада всесветлая, освещающая путь к Небесному Отечеству и отгоняющая всякую тьму еретическаго злочестия, в земли Черкасстей воссиял еси, мучениче Данииле. Темже молитвами твоими и нас в Православии утверди, да возможем Господа нелестно славословити и Царствия Небеснаго сподобимся.
Слава, глас 8: Приидите, мучениколюбцы вси, благочестно воспоим славнаго мученика ктитора Даниила, в земли Черкасстей пострадавшаго. Сей бо, течение добре совершивше и веру Православную сохраньше, нечестивых иереев униатских козни сокруши, и от мира сего временнаго к вечному покою преставися, идеже сладости райскаго блаженства наслаждается и Престолу Божию предстоит, прославляюще Троицу Единосущную и Нераздельную.
И ныне, Богородичен, глас тойже:
Владычице, прииими молитвы раб Твоих и избави нас от всякия нужды и печали.
НА ЛИТУРГИИ
Блаженны от канона, песни 3-я и 6-я.
Прокимен, глас 7: Возвеселится праведник о Господе и уповает на Него.
Стих: Услыши, Боже, глас мой, внегда молити ми ся к Тебе.
Апостол: Послание к Тимофею, зачало 292.
Аллилуиа, глас 4: Праведник яко финикс процветет, яко кедр, иже в Ливане, умножится.
Стих: Насаждени в дому Господни, во дворех Бога нашего процветут.
Евангелие: от Иоанна зачало 52.
Причастен: В память вечную будет праведник, от слуха зла не убоится.