Служба священномученику Олександру Глаголєву, пресвітеру Київському

Месяца ноемвриа в 12-й день

 

СЛУЖБА СВЯЩЕННОМУЧЕНИКУ АЛЕКСАНДРУ,
ПРЕСВИТЕРУ КИЕВСКОМУ

 

НА ВЕЛИЦЕЙ ВЕЧЕРНИ

 

Блажен муж, 1-й антифон.

 

На Господи воззвах: стихиры на 8, глас 5-й:

 

Радуйся, священномучениче Александре, земли Киевския пастырю добрый и собора святых ея достойный совсельниче! Сего убо сошедшеся, вернии, по достоянию восхвалим. Той бо многоскорбным своим житием, мучения лютая крепко претерпевая, Господа пред мучителями право исповеда и сим престола Божия достиже. Темже ему зовем: отче Александре, со Ангелы моли Троицу Едину о нас, почитающих священную память твою.

 

Радуйся, священномучениче Александре, измлада Господа Единаго всем сердцем возлюбивый и того всем житием своим добре исповедавый. Первопастырю в подвигах подражая, паству в любви искренней добре поучал еси, евреов от смерти лютыя избавляя, и любовию вся приходящия к тебе неленостно поучая, сим и престола Божия достигл еси, идеже со Ангелы моли Троицу Едину о нас, почитающих священную память твою.

 

Радуйся, священномучениче Александре, священныя Академии Киевския славная похвало, учащихся в ней к познанию Божию добре приводя, проповедником христокрасным был еси, верныя вся добре пети право научая, Божия глаголы добре изъяснял еси, тем и во Православии их утверждая. Со Ангелы моли Троицу Едину о нас, почитающих священную память твою.

 

Радуйся, священномучениче Александре, мученическаго лика достойный сопричастниче и священныя Академии Киевския адаманте всекрепкий, житием своим Правую веру добре проповедавший и кровьми истину запечатлевший, тем и Светом благодати Божия добре осиянный, вся чада твоя в познании Премудрости приведый. Со Ангелы моли Троицу Едину о нас, почитающих священную память твою.

 

Слава, глас 8: Веселися ныне земле Киевская, се бо един от пастырей твоих, мучителей безбожных посрамив и Церковь Едину истинную добре исповедав, священныя Академии сокровищем многоценным явися, и учащихся ея в годину лютую Божия Премудрости научая. Темже со Ангелы молит Троицу Едину о нас, почитающих священную память его.

И                   ныне, Богородичен, глас тойже: Царь Небесный за человеколюбие на земли явися, и с человеки поживе, от Девы бо Чистыя плоть приемый и из Нея прошедый с восприятием. Един есть Сын, сугуб естеством, но не Ипостасию. Темже совершенна Того Бога и совершенна Человека воистину проповедающе, исповедуем Христа Бога нашего: Егоже моли, Мати Безневестная, помиловатися душам нашим.

 

Вход. Прокимен дне и чтения три.

 

Деяний святых апостол чтение (глава 4:1-12):

 

Во дни оны, глаголющим апостолом к людем, наидоша на них священницы, и воевода церковный, и саддукеи, жаляще си, за еже учити им люди и возвещати о Иисусе воскресение мертвых; и возложиша на них руки, и положиша их в соблюдение до утрия: бе бо вечер уже. Мнози же от слышавших слово вероваша: и бысть число мужей яко тысящ пять. Бысть же наутрие собратися князем их, и старцем, и книжником во Иерусалим: и Анне архиерею, и Каиафе, и Иоанну, и Александру, и елицы беша от рода архиерейска. И поставльше их посреде, вопрошаху: коею силою, или коим именем сотвористе сие вы? Тогда Петр, исполнився Духа Свята, рече к ним: книзи людстии и старцы Израилевы, аще мы днесь истязуеми есмы о благодеянии человека немощна, о чесом сей спасеся, разумно буди всем вам и всем людем Израилевым, яко во имя Иисуса Христа Назорея, Его_́же вы распясте, Егоже Бог воскреси от мертвых, о Сем сей стоит пред вами здрав. Сей есть камень, укоренный от вас, зиждущих, бывый во главу угла, и несть ни о едином же ином спасения; несть бо иного имене под небесем, даннаго в человецех, о немже подобает спастися нам.

 

Деяний святых апостол чтение (глава 4:13-22):

 

Во дни оны, видяще иудеи Петрово дерзновение и Иоанново и разумевше, яко человека некнижна еста и проста, дивляхуся: знаху же их, яко со Иисусом беста. Видяще же исцелевшаго человека с нима стояща, ничтоже имяху противу рещи. Повелевше же има вон из сонмища изыти, стязахуся ко друг другу, глаголюще: что сотворим человекома сима? Яко убо нарочитое знамение бысть има, всем живущим во Иерусалиме яве, и не можем отврещися. Но да не более прострется в людех, прещением да запретим има ктому не глаголати о имени сем ни единому от человек. И призва_́вше их, заповедаша има отнюд не провещавати, ниже учити о имени Иисусове. Петр же и Иоанн, отвещавше к ним, реста: аще праведно есть пред Богом вас послушати паче, нежели Бога, судите? Не можем бо мы, яже видехом и слышахом, не глаголати. Они же, призапрещше има, пустиша я, ничтоже обретше, како мучити их, людей ради, яко вси прославляху Бога о бывшем: лет бо бяше множае четыредесяти человек той, на немже бысть чудо сие исцеления.

 

Деяний святых апостол чтение (глава 4:23-31):

 

Во дни оны, отпущена бывша апостола приидоста ко своим и возвестиста, елика к нима архиереи и старцы реша. Они же, слышавше, единодушно воздвигоша глас к Богу и рекоша: Владыко, Ты, Боже, сотворивый небо и землю и море и вся, яже в них; Иже усты Давида отрока Твоего рече: вскую шаташася языцы и людие поучишася тщетным? Предсташа царие земстии, и князи собрашася вкупе на Господа и на Христа Его. Собрашася бо воистину во граде сем на святаго отрока Твоего Иисуса, Егоже помазал еси, Ирод же и Понтийский Пилат, с языки и людьми израилевыми, сотворити, елика рука Твоя и совет Твой преднарече быти. И ныне, Господи, призри на прещения их даждь рабом Твоим со всяким дерзновением глаголати слово Твое, внегда руку Твою прострети Ти во исцеления, и знамением и чудесем бывати именем святым отрока Твоего Иисуса. И помолившимся им, подвижеся место, идеже бяху собрани, и исполнишася вси Духа Свята, и глаголаху слово Божие со дерзновением.

 

На литии стихиры, глас 1-й. Подобен: Небесных чинов

 

Ликуй ныне, священная Академие Киевская, песньми духовными воспой светло пастыря предобраго, душу свою за овцы словесныя мужественно положившаго, поношения и раны за Христа Бога нашего терпеливо приимшаго, сим же и зломудрость вражию погуби, явися адамантом непобедимым.

 

Слава, и ныне, Богородичен, глас 1-й. Самоподобен

 

Небесных чинов радование, на земли человеков крепое предстательство, Пречистая Дево, спаси ны, иже к Тебе прибегающия, яко на Тя упование по Бозе, Богородице возложихом.

 

На стиховне стихиры, глас 4-й:

Благодатию Божиею обильно украше_́нного, пастыря предобраго и заступника о людех крепкаго, приидите, сословие духовное, да восхвалим. Той бо житием своим Евангелие Христово добре проповедав, люди многи к познанию Истинныя Премудрости приведе, и ныне молит Спаса всех, Церковь Едину истинную нам сохранити и спасти души наша.

 

Стих: Священницы Твои облекутся в правду и преподобнии Твои возрадуются.

Христа Единаго возлюбив и Тому Единому пламенне служа, сердце свое Престолом Божиим соделал еси и вся приходящия к тебе любве истинныя научал еси, презрение и злохуления богоборных нивочтоже вменяя, терпеливым и многострадальным явился еси. Сего ради и со Ангелы Святей Троице предстоя, моли спастися душам нашим.

 

Стих: Честна пред Господем смерть преподобных Его.

 

Человеколюбие в житии своем добре проповедая, евреов многих от погубления лютаго избавил еси, свирепеющим врагом злобою на тыя, мир и любовь в сердце их возвращая, сим и веру Православную добре утверждал еси, воистинну праведником мира быв, и в Царство Божие за милосердие восшел еси, моли спастися душам нашим.

 

Слава, глас 6-й: Проповедника Слова Божия неленостнаго и красноречия духовнаго учителя искуснаго, священныя Академии Киевской первостоятеля в годину испытаний крепкаго, и учащихся ея наставника достойнаго, иже пастырей земли нашей многих воспита, имиже и Церковь украси, вся ухищрения лукаваго посрамляя и в едином лице со святыми пребывая, молит спастися душам нашим.

 

И                   ныне, Богородичен, глас тойже: Творец и Избавитель мой, Пречистая, Христос Господь, из Твоих ложесн прошед, в мя оболкийся, первыя клятвы Адама свободи. Темже Ти, Всечистая, яко Божии Матери же и Деве, воистинну вопием немолчно: радуйся, Ангельски, радуйся, Владычице, предстательство и покрове, и спасение душ наших.

 

На благословении хлебов, тропарь священномученику, дважды, глас 4-й:

 

Дивнаго воспевающе Александра священномученика, во умилении тому зовем: молитвами твоими, всечудне, сохрани от всякаго зла землю нашу и избави от бед и скорбей люди твоя, память твою священнолепне совершающия.

 

И Богородице, Дево: единожды.

 

НА УТРЕНИ

 

Тропарь святителя дважды.

 

Слава и ныне, Богородичен, глас 4-й: Еже от века утаеное и Ангелом несведомое таинство, Тобою, Богородице, сущим на земли явися Бог, в неслитном соединении воплощаем и, Крест волею нас ради восприим, имже воскресив первозданнаго, спасе от смерти души наша.

 

По 1-м стихословии седален, глас 4-й:

 

От юности своея Богу ревностно послужив, пастырем добрым земли Киевския явился еси, люди многия пути спасительному наставляя, слово Божие в сердца их обильно влагал еси, и Царствию Небесному достигнути помогал еси. Сего ради со Ангелы, ныне пребывая, моли о чадех, память твою достодолжно совершающих.

 

Слава, и ныне, глас тойже: Богородице, Мати всех, всех приходящих к Тебе благодатныя помощи Своея не отрини, вся находящия на ны стрелы лукаваго скоро избави, и призри на скорбное обстояние чад Твоих, вонми молению нашему и Своим предстательством, благодатный ответ на Судищи Христове нам испроси.

 

По 2-м стихословии седален, глас 4-й:

 

Многоскорбное житие пожив, правую веру и Церковь Едину истинную добре исповедав, гонения безбожных претерпевая, кротостию, смирением и всеми добродетельми сети тех низлагая, тем и священную Академию Киевскую подвигами жития прослави, от ветр времени злых и поругания сохраняя, учащимся в ней в постижении Премудрости помогая, и вся приходящая к честней иконе твоей, не оставляя: моли спастися душам нашим.

 

Слава, и ныне, глас тойже: Поюще преславная чудеса Твоя, Богородице, радуйся тебе поем, Державная Заступнице наша, землю Киевскую молитвами Архангела Божия и святаго Твоего не остави, от нашествия иноплеменных и междоусобиц избави, люди вся в мире и единомыслии соблюди и благодатный ответ на Страшнем Судищи Христове нам испроси.

 

Полиелей.

 

Величание: Величаем тя, священномучениче Александре, и чтем честная страдания твоя, яже за Христа претерпел еси.

 

Псалом избранный:

 

Бог нам Прибежище и Сила, Помощник в скорбех, обретших ны зело. Господи, воздвигни силу Твою и прииди, во еже спасти нас. Глаголах о свидениих Твоих пред цари и не стыдяхся. Вси языцы обыдоша мя, и именем Господним противляхся им. Тебе ради умерщвляемся весь день, вменихомся яко овцы заколения. Крепость моя и пение мое Господь и бысть мне во спасение.

 

По полиелеи седален, глас 8-й:

 

Наставника                     премудраго            и           проповедника                          Истин            Евангельских         крепкаго,

образом жития своего Первопастырю добре подражавша, священныя Академии Киевской первостоятеля достойнаго, священномученика Александра сошедшеся достойно да ублажим. Той бо в годину лютую Господа добре исповедав, мучений не убоявся, сим и обителей Вечных достиже, идеже со Ангелы хвалит Троицу Единосущную.

 

Слава и ныне, Богородичен, глас тойже: Радуйся, Препрославленная Богородице Дево, всякий бо род человеческий имать Тя Предстательницу непостыдну, во смирении зовуще: непрестанно моли Спаса всех, да избавит верныя своя от наветов сопротивных, и рая онаго сподобит воспевающих Тя.

 

Степенна, 1-й антифон 4-го гласа. От юности моея:

 

Прокимен, глас 4-й: Господь Заступник мой и прибежище мое, Бог мой, и уповаю на Него.

 

Стих: Яко на Мя упова и избавлю и, покрыю и, яко позна Имя Мое. Всякое дыхание. Евангелие от Матфея, зачало 36. Слава: Молитвами священномученика Александра: И ныне: Молитвами Богородицы:

 

По 50-м псалме стихира, глас 6-й:

 

Страдальца Христова крепкаго и заступника людей предобраго, проповедника истин Евангельских преславнаго и молитвенника о земли Киевской неусыпнаго, священномученика Александра почтим, той бо талант Богом данный добре преумножив, ученики многи Христу приведе, и с сонмом святых предстоя на Небеси, молит спастися душам нашим.

 

Канон Богородице на 6, и священномученику канон на 8, егоже краестрочие в тропарех:

 

Мужественному в подвизех Александру воспою. Глас 8-й.

 

Песнь 1.

 

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

 

Молитвами, Господи, священномученика Твоего, отверзи моя немощная уста, да воспою достодолжно пресвитера Киевскаго и предстоятеля священныя Академии, Александра богомудраго, той бо от беззаконных много претерпев, козни лукавого добре победил есть.

Узилище и страдание возлюбив, вся временная нивочтоже вменяя, паству Твою истинному боговедению добре научая и Церковь Едину истинную спасительную проповедая, за сие бо от неверных много пострадав, ухищрения их добре победил есть.

 

Жительство Академическое возлюбив, учащим и учащимся быв наставником предобрым, Евангельския истины изъясняя и красноречию добре научая, да вся временная суемудрия посрамят, козни лукавого о Господе побеждающе.

 

Богородичен: Егоже без семени зачала еси и Единаго родила еси, Богородице Марие, моления чад Твоих приими, и просящих милостей Твоих не презри, и вся люди в мире сохрани, Мати Всепетая.

 

Песнь 3.

 

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

 

Слово Божие в сердце своем храня, всеусердным Того служителем явился еси, паству твою от волков лютых добре сохранял еси, истины Божия усердно проповедая и ко спасению вся приводя, взывая: Господь прибежище наше и утверждение.

 

Темница хладная раем сладости соделася, яко в ней молитвою и постом ветхаго человека побеждая, всего себе Сладчайшему Христу предав, наследником святых соделася, со Ангелы Ему предстоя, взывая: Господь прибежище наше и утверждение.

 

Винограда Христова розга благословенная, обильный плод принесшая, кротостию и любовию вся добре научая, скорбящих утешая, буих усмиряя, грешников на путь покаяния наставляя, подвизая неленостно взывати: Господь прибежище наше и утверждение.

 

Богородичен: Единая Надежда отчаяных и обремененных грехи многими, Всесвятая Владычице, буди нам Путеводительницею в житии нашем, да к тихому пристанищу достигнем, молитвенным предстательством Твоим.

 

Седален, глас 3:

 

Наставник всеизрядный священныя Академии Киевской явился еси, отче наш Александре, Слово Божие всепремудре изъясняя, тем и в Православии учащихся в ней достойно наставляя, тьму безбожия несумненно истребил еси и ко служению достойному пастырей добре готовил еси. Темже вся поющая тебе в мире сохрани и Царствия Небеснаго достигнути помози, да с лики святых воспоют Троицу Единосущную в Едином Божестве.

 

Слава, и ныне, Богородичен: Нашего спасения Ходатаица и Покров Пречистый еси всем с верою к Тебе припадающим, Владычице Всепетая, вся люди Твоя на путь спасения настави и рая онаго сподоби, Дево, непрестанно хвалящия Тя.

 

Песнь 4.

 

Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.

 

Огня истребляющаго и злаго поругания избавил еси, святе отче, евреов, егда охладе любовь в сердцах соотечественников твоих, ты же, человеколюбие проявляя, вся тыя от погибели избавил еси, призывая пети вся: слава силе Твоей, Господи.

 

Милость и любовь источая всем приходящим к тебе, отче Александре, ближняя вся возлюбил еси и дети еврейския от погибели избавлял еси, истинность веры нашея в житии являя, жизнь в годину лютую за други положити не убоявся, призывая пети вся: слава силе Твоей, Господи.

 

Ужасов времене не убоявшеся, в малую церковь твою всех приходящих с любовию евангельскою приимал еси, кров и пропитание и вся на потребу подавающе, паче же и люди иноверныя Христового любовию обымал еси, забралом крепким бывый, призывая пети вся: слава силе Твоей, Господи.

 

Богородичен: Всех скорбящих Радосте и обидимых Заступнице, и алчущих Питательнице, странных Утешение, обуреваемых Пристанище, больных Посещение, немощных Покров и Заступнице, Жезле старости, Мати Бога Вышняго, Ты еси Пречистая, потщися, молимся, спастися рабом Твоим.

 

Песнь 5.

 

Ирмос: Ты, Господи, мой Свет, в мир пришел еси, Свет Святый, обращаяй из мрачна неведения верою воспевающия Тя.

 

Престолу Троицы ныне предстоя, отче Богомудре, не забуди чад твоих, ихже священная Академия Киевская добре воспита, на пажити церковней служение свое благочестно совершати, не остави и вся ны, в памяти твоей ныне любовию воспевающих тя.

 

Обители Горния достигл еси, святе отче Александре, скорби многия претерпевая. Священную Академию всем сердцем возлюбив, с тою в горниле испытания прошел еси, и всем учащим и учащимся адамантом всекрепким явился еси, духом укрепляюще вся воспевающия тя.

 

Да ликовствует ныне священная Академия Киевская, воспитавшая достойныя гражданы Иерусалима Вышняго, се бо угодник Христов Александр, тесным путем скорбей и бед Царствия Небеснаго достиже, сим и школу духовную прослави, к Небеси управляя вся любовию воспевающих его.

 

Богородичен: Владычице Всепетая, Мати Всеблагая, находящих на ны злых скоро избавляя Покровом благости Твоея, огради от враг видимых и не видимых, да избавльшеся от них, любовию воспеваем Тя.

 

Песнь 6.

 

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.

 

Истину Христову добре проповедая, уз и темниц не убоявся, веру правую и Церковь Единую мужественно исповедал еси, мучителей злоухищрения посрамив и тело отдав на мучение, сим и исповедание свое запечатлея, пострадав зело даже до крове.

 

Земле Киевская, ныне возвеселися, прославляющи память угодника своего, се бо един от молитвенников твоих, паству свою возлюбив, священную Академию добре сохрани, Евангельски гонимым в скорбях помогая, за сие пострада зело даже до крове.

 

Единаго Бога в сердце возлюбив и малую церковь добре взрастив, тую всю евангельским путем настави и на помощь требующим сподвиже, сего ради и апостолькия славы сподобися, за сие бо пострада зело даже до крове.

 

Богородичен: Храм и Ковчег одушевленный, Кадильницу всезлатую и Лествицу, Юже Иаков виде, воспеваем Тя, Богородице Дево. Ты же пение от чад Твоих приими и муки вечныя избави, молитвенным предстательством угодника Твоего, пострадавшаго зело даже до крове.

 

Кондак, глас 2:

 

Адаманта веры всекрепкаго и предстоятеля священныя Академии Киевския в годину лютую твердаго, благодатию Божиею обильно осененнаго, и служителя Церкве Христовы всеизряднаго, иже кровию своею ризы души убелив, священнострадалец явися. Темже, память его воспевающе, зовем: предстательством твоим во Православии ны утверди, священномучениче Александре всечестне.

 

Икос:            Ликуй    светло, земле         Киевская          и               священная          Академие                     духовная, светящаяся подвигами новомучеников твоих, се бо крепкий в мучениях предстоятель ея во время лютое явися, подвигами богословия и человеколюбия просия, яко звезда многосветлая, путь спасения верным указующая, сим и подвизая чад своих пети: Радуйся, многия люди на путь покаяния наставивый; радуйся, сих и Евангелие добре исполняти научивый. Радуйся, священныя Академии Киевския прекрасное украшение; радуйся, учащим и учащимся ея славное заступление. Радуйся, Бога и Церковь Его паче всего возлюбивый; радуйся, беззаконных и буих на путь правый наставивый. Радуйся, священномучениче Александре всечестне.

 

Песнь 7.

 

Ирмос: В пещи авраамстии отроцы персидстей, любовию благочестия паче, нежели пламенем, опаляеми, взываху: благословен еси в храме славы Твоея, Господи.

 

Евангелие Христово добре проповедал еси, богословам великим подражая, вся тайны Божия добре изъяснял еси, труды своими священную Академию Киевскую добре прослави, и чад ея истинному богопознанию научи, взывая: благословен еси в храме славы Твоея, Господи.

 

Киев славный подвигами твоими украшается, понеже ты пастырем ревностным был еси, вся люди его светом веры просвещая, и любовию Христовою сердца их озяряя, путем спасительным наставил еси, воспевати же вся научая: благословен еси в храме славы Твоея, Господи.

 

Смирен быв еси и кроток, первостоятелем предним духовныя Академии Киевския, святителем Сильвестру и Василию в подвизех подражал еси и богословие добре излагая, учащихся право научал еси, взывати: благословен еси в храме славы Твоея, Господи.

 

Богородичен: Архангельски глаголем Тебе, Чистая: радуйся, Благодатная Богородице Дево, мир и вся благопотребная людем Твоим подаждь, умиленно зовущим Сыну Твоему: благословен еси в храме славы Твоея, Господи.

 

Песнь 8.

 

Ирмос: Руце распростер, Даниил львов зияния в рове затче; огненную же силу угасиша, добродетелию препоясавшеся, благочестия рачители отроцы, взывающе: благословите, вся дела Господня, Господа.

 

Непоколебимым во исповедании явился еси, в заключении всю тягость заточения претерпевая, поношения и биения многия приемля, вся козни лукаваго любовию Божиею побеждал еси, подвизая вся пети: благословите, вся дела Господня, Господа.

 

Духом Господеви пламенея и ревностно служа, со страдальцы многими в темнице Лукьяновской пребывал еси, единым ликом Христа твердо исповедая, сени страха пред мучителями не яви, подвизающе вся пети: благословите, вся дела Господня, Господа.

 

Троичен: Равночестнаго Отца и Сына и Святаго Духа песненно почтим, Естество Едино, Ипостаси же Три прославим, Троицу Несозданную, Собезначальную, Сопрестольную и Всеблагую, вкупе со священномучеником Александром воспоем взывая: благословите, вся дела Господня, Господа.

 

Богородичен: Утроба Твоя Бога нам роди, Богородице Дево, темже от всех родов Избранную и в песнех Возвеличенную, сошедшеся прославим, Сынови же Ея с любовию воспоем: благословите, вся дела Господня, Господа.

 

Песнь 9.

 

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.

 

Вышняя славы сподобися и нетленный венец от Христа прияв, вкупе со Ангелы, Престола Агнца достигл еси, идеже с лики мученик предстоиши, пение наше не отрини, яко страдальца непобедимаго и священника Бога Вышняго тя величающих.

 

Отцем и заступником всем требующим был еси, милость и любовь подавая, за сие бо Христос и прослави тя, яко вернаго служителя Своего, путем истинным следовати всех призывающаго, разум же и душу Евангельским словом просветил еси всех, тя величающих.

 

Троичен: Скорое утешение подаждь чадом Твоим, Троице Всеблагая, Отче, Сыне и Святый Душе, вся поющая Тебе молитвами угодника Твоего от злых обстояний избави, мир Церкви и стране нашей даруй, Царствия Небеснаго достигнути сподоби, да со ангелы и святыми Тя величаем.

 

Богородичен: Песнь священную сию приими, Мати Дево, юже человечестии усты со архангельскими чинми воспевают Ти, Владычице, прегрешений наших оставление даруй и обителей Вечных Сына Твоего нас сподоби, да с ликом святых Тя величаем.

 

Светилен, глас 4-й:

 

Огнем славы        Божия        озаренный,        достославный                            священномучениче Александре, ты бо труды своими Церковь Божию прославив пастырей священныя Академии Киевской добре воспитал еси, яже и суемудрие века сего в годину испытания испраздниша и победители явишася, с нимиже предстоя Престолу Спасову, моли о душах наших.

 

Слава и ныне, Богородичен: Юже нашего спасения Ходатаицу, града нашего и Академии Киевской Заступницу усердную, приидите, христоименнии, прославим, понеже молитвами Ея от вражиих наветов мы избавлени быхом и Покровом от злых обстояний свобождени, да со благодарением зовем Ей: радуйся Владычице, Дево Богородице, Стено и Отрадо наша.

 

На хвалитех стихиры на 4, глас 8-й:

 

Приидите, празднолюбцы, воспоем крепкаго угодника Христова и богослова мудраго во дни гонения, духовныя Академии Киевской предстоятеля достойнаго, святым ея Сильвестру и Василию в научении Богоименнаго знания подобника, учащимся путь к познанию Премудрости верно указующаго, тем и собора святых ея достойнаго всельника, сице память его творяще, глаголем: моли, святе, о наследии твоем, память твою любовию совершающих.

 

Приидите, чада церковныя верныя, лик единый составим и умильная пения принесем, Собора святых отец духовныя Академии Киевской всельника новаго, подвигом же древних мученик подобника, священномученика Александра прославим, гонения многая от безбожных зело претерпевшаго, школу духовную в упразднении ея не оставившаго, пастырей многих Церкви достойно воспитавшаго, с нимиже и мы песнь воспевающе, глаголем: моли, святе, о наследии твоем, память твою любовию совершающих.

 

Приидите, Христовы ученицы, прославим мученика крепкаго, узы и темничное заточение мужественно претерпевшаго, пастыря земли Киевския предобраго, Евангельского благовестия неустанного проповедника, вся любовию своею покрывающаго, емуже песнь воспевающе глаголем: моли, святе, о наследии твоем, память твою любовию совершающих.

 

Приидите, христоименитии людие, песньми духовными почтим праведника великаго, человеколюбие ко всем имевшаго, во дни нестроения гражданскаго евреов от погибели горькия избавившаго, тем и жизни многия трудами своими сохраньшаго и сим пастырем истинным явися, сице память его совершающе, глаголем: моли, святе, о наследии твоем, память твою любовию совершающих.

 

Слава, глас 8-й: Красуйся днесь светло, земле Киевская, и веселися Академия духовная, торжествуй Церковь Православная, почитающи память священнострадальца крепкаго, Александра богомудраго, иже вся земная мудрования оставив, Церковь Едину истинную возлюби, кровию исповедание свое утверди, паству свою добре сохрани научая вся ко истинному Боговедению ныне, со Ангелы Престолу Вышнему предстоя, молит Спаса о чтущих святую память его.

 

И                   ныне, глас тойже: Владычице, приими молитвы раб Твоих и избави нас от всякия нужды и печали.

 

Славословие великое, тропарь и Богородичен его. Ектении и отпуст.

 

НА ЛИТУРГИИ

 

Блаженны на 8, от канона песнь 3-я и 6-я.

 

Прокимен, глас 7: Честна пред Господем смерть преподобных Его.

 

Стих: Что воздам Господеви о всех, яже воздаде ми.

 

Апостол к Римляном, зачало 99.

 

Аллилуия, глас 6: Священницы Твои облекутся в правду, и преподобнии Твои возрадуются.

 

Стих: Бог нам прибежище и сила, Помощник в скорбех, обретших ны зело.

 

Евангелие от Луки, зачало 106.

 

Причастен: В память вечную будет праведник, от слуха зла не убоится.