Служба Пресвятой Владычице нашей Богородице в день памяти иконы ея Дубенския – подано секретарем Комісії

Празднование бывает в Преполовение Пятидесятницы

НА ВЕЛИКОЙ ВЕЧЕРНИ:

Блажен муж, 1-й антифон. 

На «Господи воззвах»:

Стихиры праздника на 4, глас 4. Подобен: Господи, возшед на Крест:

Наста преполовение дней, от спасительнаго начинаемых востания, Пятдесятницею же Божественною печатаемое, и светится светлости обоюду имущее, и соединяющее обоя, и приити славе предъявляющее, Владычняго Вознесения предпочитает. 

Слыша и возвеселися Сион, благовестившуся Христову Воскресению: вернии же его сынове возрадовашася Сего видевше, и омывающа Духом скверну христоубийства: готовится торжествующи, обоих веселое преполовение. 

Приближися Божественнаго изобильное излитие на всех, якоже написася, Духа: предузаконение проповедует преполовившееся, по Христове смерти и погребении и Воскресении, от Него данну сущу учеником, неложному обещанию, Утешителево показующу явление. 

Таже Богородице 4, глас тойже:

Радуйтеся, боголюбцы Дубенския, яко Солнце Правды Христос Бог наш благодатию Своею почи во образе Приснодевы, и милости Своя источает, всем славящим Пречистую Матерь Его пред образом многославным. 

Князей Острожских Утешение велие, людей православных премирная Славо, Богородице Чистая, Благословенная, на Тя упование возлагаем, пред образом Твоим Честным молящеся, яко Спаса родила еси душ наших. 

Приидите, Христолюбцы, возславим Матерь Божию, Иже во иконе Своей Дубенской осеняет чтущих Ю, яко Богородицу и Приснодеву. Воспоем Милости Ея, щедро изливаемии. 

Веселися, земле Волынская, радуйтеся, люди православныя, яко во граде Дубно прозябе источник радости велия, икона Богоматери. Пред нею же молим Царицу Небесе и земли: не остави нас, Дево Чистая, своими присными молитвами. 

Слава, глас 4:

Страстей тьмами обуреваемии, пристанище тихое в Тебе ищут, Богомати Дево, лучами благодати верных просвети, пред честным образом Лика Твоего молим Тя прилежно, Мати Света Невечерняго. 

И ныне, Праздника, глас 6:

Празднику преполовляющуся Твоего, Христе, Воскресения, и Божественнаго пришествия Святаго Твоего Духа, сошедшеся чудес Твоих воспеваем таинства, воньже низпосли нам велию милость. 

Вход с кадилом. Прокимен дня. 

Паремии праздника, и Богородице. 

НА ЛИТИИ

Стихиры храма. И Богородице, глас 8:

Радуйся, Обрадованная благовестием Архангела Гавриила, яко возвести Тебе, Всесвятая, о спасении мира Христом Богом, от Тебе плоть человечу приявшего. 

Пред образом Твоим Честным, Богомати, плач о гресех своих приносящих, Милостию неизреченно и щедро благословляеши. Темже со усердием взываем Сыну Твоему и Богу нашему Господу: молитвами Богородицы, Спасе, спаси нас. 

Силы горния славе Твоей, Дево и Мати, ужасаются. Ныне убо блистанием преиспещренным озарися град Дубно, яко наследие неоценимое даровала людем православным, Чистая, икону Твою. Темже со усердием взываем Сыну Твоему и Богу нашему Господу Иисусу: молитвами Богородицы, Спасе, спаси нас. 

Слава: И ныне. Праздника, глас 8: Преполовившуся празднику, учащу Ти, Спасе, глаголаху иудее: како Сей весть писмена, не учився? Не разумеюще, яко Ты еси Премудрость, устроившая мир, слава Тебе. 

На стиховне стихиры праздника самогласны, глас 1. Иоанна монаха. 

Пятдесятницы наста дней преполовение, в немже Христос обнажив маловидно Божественную силу, разслабленнаго стягну словом, того от одра возставив, и боголепно чудотворяй в зданном теле, человеком дарова вечный живот, и велию милость. 

Стих: Помяни сонм Твой, егоже стяжал еси исперва. 

Во святилище пришел еси, Премудросте Божия, преполовляющуся празднику, уча и обличая непокоривыя иудеи, фарисеи и книжники, и вопия со дерзновением к ним: жаждай да грядет ко Мне, и пиет воду животную, и не вжаждет во век: веруяй Моей благости, реки потекут из чрева его жизни вечныя. О благости и благоутробия Твоего, Христе Боже наш, слава Тебе!

Стих: Бог же, Царь наш прежде века, содела спасение посреде земли. 

Глас 2: Егда преполовение праздника наста, взыде Иисус во святилище, и учаше непокоривыя иудеи, глаголя: жаждай да грядет ко Мне, и пиет воду животную, вечную, и не вжаждется во век. Веруяй в Мя, реки потекут из чрева его, и имети будет свет животный. 

Слава: И ныне, глас 4: Сердце сокрушенно Христу принесем, моление теплым Приснодевы Славныя. Еяже смирением миру спасение произыде. 

На благословении хлебов тропарь праздника, глас 8:

Преполовившуся празднику, жаждущую душу мою благочестия напой водами, яко всем, Спасе, возопил еси: жаждай да грядет ко Мне и да пиет. Источниче жизни нашея, Христе Боже, слава Тебе дважды. 

Таже тропарь Дубенской иконе, единожды, глас тойже:

Благословен еси, Христе Боже наш, образ бо Матери Своея граду Дубно на заступление даровал еси; Тоя предстательством страну нашу во Православии утверди, лжеучения лукавыя силою Своею потреби, и верныя люди Своя во век века возвыси, Человеколюбче, Слава Тебе. 

УТРЕНЯ

На «Бог Господь» тропарь праздника дважды. Слава: И ныне, Богородице

По 1-й кафизме седален праздника, глас 4: Подобен: Скоро предвари:

Всех сердец помышления ведый, посреде святилища став, взываше лживым, глаголя истину: что ищете убити Мя, животодавца, празднику преполовляющуся, вопия дерзостно? Не на лица зряще суд судите, законопреступницы. 

Слава: И ныне. Глас тойже. 

Богородичен: Всю Тя Бог освяти́, Де́ву До́брую и Непоро́чную в жена́х, проро́ки прообрази́в че́стно, иере́и благослови́в, во свята́я святы́х всели́, А́нгелом воспита́, с Небесе́ пи́щу хлеб подая́. Сам же Преблаги́й, Единоро́дное Бог Сло́во, всели́ся в Тя и пло́тию про́йде из Тебе́. Те́мже Ти покланя́емся и чтим, я́ко вои́стинну и́стинную су́щую Богоро́дицу. 

По 2-й кафизме седален праздника, глас 5: Подобен: Собезначальное Слово:

Владыка всех во храме стоя, празднику преполовившуся Пятдесятницы честныя, евреем беседуя, обличаше яве в дерзновении мнозе, яко Царь сый и Бог, мучительство тех дерзостное: нам же всем дарует за благоутробие велию милость. 

Слава: И ныне. Глас тойже. 

Богородичен: Лю́дие благочести́вии, правове́рнии собо́ри христоимени́тии, приступи́те ве́рно вси, Боже́ственному припа́дающе Бо́жия Ма́тере о́бразу: Та́я бо исцеле́ние боля́щим ра́достно подае́т, уязвля́ет же злосла́вная, я́ко стрела́ от лу́ка, нас всех весели́т светови́дно и благода́тию озаря́ет моли́твами Свои́ми. 

Полиелей. 

Величание: Велича́ем Тя, Пресвята́я Де́во, и чтим о́браз Твой святы́й: от него́же истекает благода́тная помощь всем с ве́рою притека́ющим к нему́. 

Псалом избранный: Помяни́, Го́споди, Дави́да и всю кро́тость его. Я́ко кля́тся Го́сподеви, обеща́ся Бо́гу Иа́ковлю. Пресла́вная глаго́лашася о тебе́, гра́де Бо́жий. Бог посреде́ его́, и не подви́жится. Кля́тся Госпо́дь Дави́ду и́стиною, и не отве́ржется ея. От плода́ чре́ва твоего́ посажду́ на престо́ле твое́м. Я́ко избра́ Госпо́дь Сио́на, изво́ли его́ в жили́ще себе́. Освяти́л есть селе́ние Свое́ Вы́шний. Святы́ня и велеле́пота во святи́ле его́. Свят храм твой, ди́вен в пра́вде. До́му Твоему́ подоба́ет святы́ня, Го́споди, в долготу́ дней. Помяну́ и́мя Твое́ во вся́ком ро́де и ро́де. Благослове́н Госпо́дь во век, и в век ве́ка. 

По полиелеи седален, глас 4:

О, Всеблагослове́нная Богоро́дице Влады́чице, Богоизбра́нная Отрокови́це, све́тлое проро́ческое сбытие́, апо́стольская похвало́, и му́ченическое испове́дание и ве́нче, А́нгелы чти́мая и челове́ческими ро́ды многопе́тая, и всего́ ми́ра вожделе́нная Помо́щница, изба́ви рабы́ Твоя́ осужде́ния бу́дущаго и е́зера о́гненнаго, еди́на Благослове́нная. 

Сла́ва: И ныне. 

Богородичен, глас тойже: Пречи́стая Твоя́ ико́на, Богоро́дице Де́во, врачевство́ всему́ ми́ру духо́вное, к не́йже прибега́юще, Тебе́ поклоня́емся и почита́ем, и лобыза́ем, и чтим, исцеле́ний благода́ть почерпа́юще от нея́, и неду́г теле́сных, и душе́вных страсте́й Твои́ми моли́твами свобожда́емся. 

Антифоны степенны, глас 4: От юности моея. 

Прокимен Богородице, глас 4: Помяну имя Твое во всяком роде и роде. 

Стих: Лицу Твоему помолятся богатии людстии. 

Евангелие: от Луки 4 зачало. 

Воскресение Христово видевше, единожды. 

Псалом 50. И стихира, глас 6:

Я́ко порфи́рою ца́рскою и ви́ссом, ико́ною Твое́ю и Твоего́ Сы́на, Богоро́дице, Це́рковь Бо́жия просвети́вшися, красу́ется чудесы́. Днесь явле́нием вся созыва́ет пра́здновати, па́че сия́ния со́лнечнаго благода́тию Свята́го Ду́ха блиста́ющися, на боля́щих и неду́жных исцеле́ния исто́чники источа́ющи и всем да́рующи бога́тую ми́лость. 

Каноны: праздника и Богородице. Катавасия – ирмос второго канона. 

Канона праздника, господина Феофана, глас 4, егоже краестрочие сие: Преполовение праздников превеликих похвалю. 

Песнь 1. 

Ирмос: Моря чермную пучину, невлажными стопами, древний пешешествовав Израиль, крестообразными Моисеовыма рукама, Амаликову силу в пустыни победил есть. 

Велия яже паче ума, Владыко, Божественнаго Твоего воплощения, благодеяния сияют нам, дарове же и благодати, и Божественныя светлости, благодатно истекающия. 

Пришел еси, Христе, светлости Божества испущая, праздника посреде явленно: праздник бо радостный спасаемых еси, и спасения нашего ходатай. 

Премудрость, правда, Господи, и избавление у Бога Ты был еси нам, от земли к небесной преводя высоте, и Дух Божественный даруя. 

Плоть Твоя истления во гробе не виде, Владыко, но яко составися кроме семене, тления не прият, последованию естества, пресущественно не работавшая. 

Канон Богородице, глас 8. 

Песнь 1

Ирмос: Воду прошед яко сушу, и египетскаго зла избежaв, изрaильтянин вопияше: избaвителю и Богу нашему поим. 

Прииди́те, верных собо́ри, собери́теся в пречестны́й храм Всенепоро́чныя Влады́чицы, и возопи́йте, уми́льно моля́щеся, к честно́му Дубенскому о́бразу Богоро́дицы взира́юще: Безневе́стная, хва́лящия Тя спаси́. 

Тя, Всенепоро́чная, имамы Ходатаицу о спасении нашем и Утешение велие. Сего ради уми́льно моля́щеся пред честным о́бразом Дубенским Твоим взываем: Безневе́стная, хва́лящия Тя спаси́. 

Неве́ста Бо́жия была́ еси́, Богороди́тельнице, Сего́ бо Сло́во преве́чное, теле́сне родила́ еси́ нам: Сего ради уми́льно моля́щеся, пред честным о́бразом Твоим во граде Дубно, взываем: Безневе́стная, хва́лящия Тя спаси́. 

Песнь 3

Ирмос: Веселится о Тебе Церковь Твоя Христе, зовущи: Ты моя крепость Господи, и прибежище, и утверждение. 

Вод животворных Церкви источники отверзл еси, аще кто жаждет, усердно да приходит и пиет, вопия, Блаже. 

От земли убо на небо вознестися, проявленно глаголал еси: с небесе же Духа послати обещал еси Святаго. 

Ирмос: Естеством животворяй, и от Девы родивыйся Господь, всем верным дарова безсмертие, яко Благоутробен. 

Богородице канон:

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желaний крaю, верных утверждение, едине Человеколюбче. 

Просвети́, Влады́чице, ду́ши на́ша заре́ю Боже́ственною, па́че ума́ благода́тию Твое́ю, и незави́стный дар пода́ждь ми воспе́ти Тя, я́ко Помо́щницу челове́ческому существу́, Препе́тая Богородице, верным заступле́ние. 

Твою́, Богома́ти, всечестну́ю и чудотво́рную ико́ну лю́ди земли Дубенския стяжа́вше, я́ко сте́ну неруши́му, мо́лятся Ти, на враги́ побе́ду дарова́ти оте́честву на́шему, Богородице, верным заступле́ние. 

Херуви́мов и серафи́мов превы́шши яви́лася еси́, Богоро́дице: Ты бо Еди́на прия́ла еси́ Невмести́маго Бо́га в Твое́м чре́ве, Нескве́рная: те́мже Тя ве́рнии вси пе́сньми, Чи́стая, ублажа́ем, Богородице, верным заступле́ние. 

Кондак, глас 5:

Града Дубно Заступницу усердную, и страны нашея Воеводу непобедимую песньми днесь воспоим, похвалы достойныя Царице Небесней принесем, пред Пречистым Ея образом со слезами возопоим: Радуйся, Благодатная Богородице Дево, Господь с Тобою. 

Икос: Радование Ангелом приимшая, и Радость Рождеством Твоим, Пречистая Дево, миру давшая, заступи, спаси и сохрани люди православныя, Тя величающих званиями сими:

Радуйся, Милости мира Явление. 

Радуйся, ослепленных прозрение. 

Радуйся, немощным дающая исцеление. 

Радуйся, смиренных благословение. 

Радуйся, Дево, Чистоты Прозябение. 

Радуйся, Богородице, уныния Потребление. 

Радуйся, скорби Избавление. 

Радуйся, Похвало Дубенская, верным Утешение. 

Богородице седален, глас 4. Подобен: Удивися Иосиф:

Людие боголюби́вии, прииди́те в сре́тение образа Пречистыя, Похвалы рода князей Острожских: се бо прихо́дит Де́ва, всех проро́ков превы́шши, честны́м Свои́м о́бразом, Жизнода́теля ми́ру на рука́х име́ющи, град Свой сохраня́ти стра́ждущий, раскольников де́рзость низложи́ти, вообрази́тися всем Храни́тельница тверда́, держа́ва и огражде́ние ве́рно моля́щимся. 

Слава: И ныне. Седален праздника, глас 8. Подобен: Премудрости Слова:

Стоя посреде святилища, преполовляющуся божественно празднику, жаждай, взывал еси, да грядет ко Мне и пиет: пияй бо от сея Божественныя Моея воды, реки из чрева источит велений Моих, а иже верует в Мя, посланнаго от Божественнаго Родителя, со Мною прославится. Сего ради вопием Ти: слава Тебе Христе Боже, яко богатно излиял еси воды Твоего человеколюбия рабом Твоим. 

Песнь 4

Ирмос: Вознесена Тя видевши Церковь на Кресте, солнце праведное, ста в чине своем, достойно взывающи: слава силе Твоей Господи. 

Растерзав смерти врата силою Твоею, пути жизни сказал еси, безсмертия же двери отверзл еси, верою зовущим: слава силе Твоей, Господи. 

Преполовение всех и конец имеяй, и начала, яко безначален, обдержай, стал еси посреде вопия: Божественных, богомудрии, приидите, даров насладитеся. 

Яко Бог и всех имеяй власть, яко силен державу низложив смерти, послати обещался еси, Христе, Духа Святаго, от Отца происходящаго. 

Богородичен: Даеши богатно благодать Тебе поющим, и из Тебе рождшагося превечнаго Слова, Мати неискусобрачная, прегрешений оставление сим просящи, Пречистая. 

Богородице канон:

Ирмос: Услышах, Господи, смотрения Твоего тaинство, разумех дела Твоя и прослaвих Твое Божество. 

Не́бо одушевле́но, еди́на Богома́ти, Свет ве́лий прие́мши, вся просвеща́ющи, тьму держа́щих бед разжени́ и нас Вы́шняго прича́стия сподо́би. 

Преподобного Иова умиление бысть образ Твой, Пречистая, иже множеством Милости Христовой во граде Дубно возсия, душе старца восходом в Горняя явилася, Богомати, и нас Вы́шняго прича́стия сподо́би. 

Неве́ста Бо́жия была́ еси́, Богороди́тельнице, Сего́ бо Сло́во Преве́чное, теле́сне родила́ еси́ нам: и в Небе́сныя обители благодатно взошла еси, Всенепорочная. 

Песнь 5

Ирмос: Ты Господи мой, Свет в мир пришел еси. Свет Святый, обращаяй из мрачна неведения, верою воспевающих Тя. 

Божественных праздников преполовения достигше, совершенное божественною добродетелию обучитися потщимся, богомудрии. 

Яко воистинну священное настоящее торжество, преполовение: превеликих бо праздников корень и светится обоюду. 

Богородичен: Ум архангельский не может разумети Твое неизреченное из Девы и пречистое рождество, Спасе Многомилостиве. 

Богородице канон:

Ирмос: Просвети нас повелении Твоими, Господи, и мышцею Твоею высокою Твой мир подaждь нам, Человеколюбче. 

Же́зл Ааро́нов прозябла́ еси́, зло́бный же ко́рень исто́ргнула еси́, Де́во Богоневе́стная, Жизнода́теля ро́ждши ми́ру, Его́же моли́ сему́ гра́ду спасти́ся от мно́гих напа́стей. 

Православия Украшение, Богома́ти Всеславная, и граду Дубно изряднейшее Благословение во иконе Твоей. Христа Бога моли́ сему́ гра́ду спасти́ся от мно́гих напа́стей. 

Богородичен: Преди́вныя Твоея Милости от иконы пречестны́я, кра́сная чудеса яви́ша, Всечи́стая, недугов неисцельных избавление многажды даровала в Дубно. Христа Бога моли́ сему́ гра́ду и всему миру спасти́ся от мно́гих напа́стей. 

Песнь б

Ирмос: Пожру Ти со гласом хваления Господи, Церковь вопиет Ти, от бесовския крове очищшися, ради милости от ребр Твоих истекшею кровию. 

Преполовение Пятдесятницы наста днесь, отсюду Божественныя убо Пасхи, Божественнейшею светлостию озарившееся, отонудуже Утешителевою благодатию сияющее. 

Глаголал еси в храме, Христе, предстоя иудейским собором Свою славу открывая, и предъявляя сродство к Родителю. 

Богородичен: Буди ми предстательница, и стена нерушимая, от мирских мя соблазнов избавляющая, едина Богородительнице, и божественным светолитием освещающая. 

Богородице канон:

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя. 

От Тебе́, Богома́ти, истече́ пото́к сла́дкий, вся напая́я лю́ди, душ измыва́я скве́рны, Богоро́дице Влады́чице, спаси́ всех, покланя́ющихся ве́рно честно́му о́бразу Твоему́. 

В печа́лех утоление находят ве́рнии, моля́щиися Тебе, Приснодево, в скорбных обстояниях люди радость обретают. Темже, Богоро́дице Влады́чице, спаси́ всех, покланя́ющихся ве́рно честно́му о́бразу Твоему́. 

Ма́терь всеи́стинную Бо́жию Тя вси зна́ем, Е́юже естество́ же́нское изба́вльшеся, Всенепоро́чная, о Христе́ предпострада́, доброде́тели же вся́кия благоче́стно бысть испо́лнено. Темже, Богоро́дице Влады́чице, спаси́ всех, покланя́ющихся ве́рно честно́му о́бразу Твоему́. 

Кондак праздника, глас 4. Подобен: Вознесыйся:

Празднику законному преполовляющуся, всех Творче и Владыко, к предстоящим глаголал еси, Христе Боже: приидите и почерпите воду безсмертия. Темже Тебе припадаем и верно вопием: щедроты Твоя даруй нам, Ты бо еси Источник жизни нашея. 

Икос: Оляденевшую мою душу прегрешений беззаконьми, теченьми Твоих кровей напой, и покажи плодоносну добродетельми: Ты бо рекл еси всем, еже приходити к Тебе, Слове Божий Всесвятый, и воду нетления почерпати, живую же и очищающую грехи, поющих славное и Божественное Твое востание, подая, Благий, с высоты сшедшую воистинну учеником Твоим Духа крепость, Тебе Бога ведущим: Ты бо еси источник жизни нашея. 

Песнь 7

Ирмос: В пещи Авраамстии отроцы персидстей, любовию благочестия паче, нежели пламенем опаляеми взываху: благословен еси в храме славы Твоея Господи. 

Крепостию, Спасе, смертную разорь силу, стезю жизни показал еси человеком, благодарно Тебе зовущим: благословен еси в храме славы Твоея, Господи. 

Плоть носяща видяще, не разумеша собори еврейстии Слове Тя Божий, но мы Тебе воспеваем: благословен еси в храме славы Твоея, Господи. 

Богородичен: Вышняго освященное божественное селение, радуйся! Тобою бо дадеся радость, Богородице, вопиющим: благословена Ты в женах еси, Пренепорочная Владычице. 

Богородице канон:

Ирмос: От Иудеи дошедше отроцы, в Вавилоне иногдa, верою Троическою плaмень пещный попрaша, поюще: отцев Боже, благословен еси. 

Согрешихом, Христе, но не отступихом от Тебе и иного не вемы, разве Тебе, не предаждь нас до конца Матере Твоея мольбами; отец наших Боже, благословен еси. 

Ра́дуйся, ра́дуйся, Пресвята́я Одиги́трие, проше́ния на́ша к по́льзе нам исполня́ющи, веру православную в чистоте блюсти научаеши, о прощении грехов людских Христа умоляеши, Емуже взываем: отец наших Боже, благословен еси. 

Богородичен: Заблуждающим Наставнице, Ма́ти Де́во, соблюди нас от всякого зла, чтущих святый образ Твой. 

Песнь 8

Ирмос: Руце распростер Даниил, львов зияния в рове затче: огненную же силу угасиша, добродетелию препоясавшеся, благочестия рачители отроцы, взывающе: благословите вся дела Господня Господа. 

Красен из гроба востав, Божества славою украшен, апостолом Твоим, Господи, явился еси, Духа обещаяся тем послати действо, вопиющим: благословите вся дела Господня Господа. 

Умертвив ада яко Бог живоначальнейший, всем источил еси живот вечный, егоже ныне воображают явственнее, светоносных дней сих радости, вопиющим: благословите вся дела Господня Господа. 

Лучи, яко Солнце, Христе, правды явився, миру послал еси апостолы Твоя, носящия Тебе свет непостижимый, и неведения мглу очищающия и вопиющия: благословите вся дела Господня Господа. 

Богородичен: Се ныне оскуде яве от Иудина племене князь и вождь: Ты бо, Всенепорочная, родила еси, прежде обещанное чаяние языков, Христа Бога, Емуже поем: благословите вся дела Господня Господа. 

Богородице канон:

Ирмос: Царя Небеснаго, Егоже поют вои Ангельстии, хвалите и превозносите во вся веки. 

Града Дубно Диадимо, Богомати и Дево, крепость и держава буди рабом Твоим, да славим Тя во веки. 

Ущедри народ православный, Марие Всесвятая, дарами Милости Христовой, да славим Тя во веки. 

Троичен: Пресу́щественная Тро́ице, во Еди́нице покланя́емая, возми́ бре́мя от мене́ тя́жкое грехо́вное, и я́ко благоутро́бна, молитвами Богородицы спаси мя, да славлю Тя во веки. 

Честнейшую не поем. 

Песнь 9

Ирмос: Камень нерукосечный от несекомыя горы Тебе Дево, краеугольный отсечеся, Христос, совокупивый разстоящаяся естества. Тем веселящеся, Тя Богородице величаем. 

Новому и чистому жительству, от Христа научившеся, сие даже до конца сохранити полезно вси потщимся яко да Святаго Духа пришествие восприимем. 

Ты мое смертное, Жизнодавче, обложением безсмертия, и нетления благодатию облек, Спасе, совоскресил еси, и Отцу привел еси, временную мою разрушив брань. 

В небесное паки житие звани бывше, ходатайства силою истощившагося даже и до рабия образа, и нас вознесшаго, Сего достойно возвеличим. 

Богородичен: Яко корень, источник и вину нетления, Тебе, Дево, вси вернии уведевше, похвалами почитаем: Ты бо ипостасное безсмертие нам источила еси. 

Богородице канон:

Ирмос: Воистину Богородицу Тя исповедуем, спасеннии Тобою, Дево чистая, с безплотными лики Тя величaюще. 

Веселися, граде Дубно, Свет бо возсия невещественный от иконы Пречистыя Богоматери, мглу греховную потребляющий, сего ради благодарно Христа величаем. 

Радости Иовли причастнии Милостию Твоею, Отрадою поборников Православия Острожских наслаждаемся, людие вернии, во образе Божия Матери Дубенския, сего ради благодарно Христа величаем. 

Моление с благоговением и страхом Божиим принесохом Ти, Богома́ти и Присноде́во, яко фимиам прими сие, да благодарно о Тебе Христа величаем. 

Ексапостиларий праздника. Подобен: Небо звездами:

Чашу имеяй неистощимых даров, даждь ми почерпсти воду во оставление грехов, яко содержимь есмь жаждею, Благоутробне едине Щедре. 

Слава: И ныне. Светилен, глас 2-й:

Видимыми и невидимыми враги окружаемии, к Тебе, Дево Всеславная, зовем: побори борющия ны, мирное житие и спасение устрояюще чтущим Тя во святей иконе Твоей. 

На хвалитех стихиры праздника 3. Глас 4. Подобен: Яко добля:

Премудрость, и сила, Отчее сияние, Слово присносущное и Сын Божий, во святилище прииде плотию, и учаше иудейския люди, жестокия и неблагодарныя, и удивляхуся премудрости богатству, вопиюще: откуду весть писмена, ни от когоже учився?

Книжником затыкаше уста, иудеи обличаше Мессиа Господь, вопия к ним: не на лице законопреступницы, яко неправеднии судите, в субботу бо Аз разслабленнаго воздвигнух. Темже Господь субботы есмь и закона, что ищете Мене убити, умершия воздвигшаго?

Навуфеа камением побиша, лютии и законопреступнии, иудейское собрание неблагодарное: Исаию же пилою древяною растроша, в кал мудраго Иеремию ввергоша, Господа же на Крест вознесше взываху: храм разоряяй, спаси Себе, и уверуем. 

Таже Богородице 3, глас тойже:

Предстоя́т Ти, Госпоже́ Богоро́дице, пред Твои́м, Пречи́стая, о́бразом, архиере́ев сосло́вие и вси лю́дие, мона́си и прости́и, ве́дуще Тя вои́стинну Помо́щницу си́льну и непобеди́му, моле́ния Тебе́ приноси́ти от всея́ души́ подвиза́ют и поуща́ют на моли́тву к Бо́гу, тре́бующе Твоея́ по́мощи, да простре́ши богоно́сныя Твоя́ ру́ки и умо́лиши за мир. Вонми́ и услы́ши, Влады́чице, и пода́ждь утеше́ние рабо́м Твои́м, до́ндеже не одоле́ют ны грехи́ на́ша тя́жкия и лю́тыя: Твоея́ бо всегда́ тре́буем вси по́мощи. 

Гора́ еси́ вели́кая и пресла́вная, па́че горы́ Сина́йския, Богоро́дице. Она́ бо, не терпя́ше сни́тия сла́вы Бо́жия, во о́бразех и се́нех, огне́м возгара́шеся, и гро́ми и мо́лнии та́мо бы́ша. Ты Боже́ственный огнь сущ, Бо́жие Сло́во во чре́ве Твое́м неопа́льно носи́ла еси́ и от сосе́ц Твои́х млеко́м пита́ла еси́ ма́нием Нося́щаго вся. И Ма́тернее дерзнове́ние к Нему́ иму́щи, помози́, Влады́чице, ве́рно пра́зднующим Твой честны́й пра́здник и не забу́ди, ми́лостивно посеща́юще, прия́ла бо еси́ от Бо́га дар стро́ити и покрыва́ти христоимени́тое ста́до, рабы́ Твоя́. 

Я́ко звезда́ многосве́тлая, взы́де во граде Дубно Твой о́браз, Богома́ти, озари́ ско́рби тьмо́ю одержи́мых, и преще́ния враг изба́ви, и, вся тех се́ти разруши́в, яви́ся Предста́тельница кре́пкая, ору́жие непобеди́мое на враги́ ми́ру всему́: из Тебе́ бо всех Влады́ка плоть прии́м, вся челове́ки обожи́. 

Слава, И ныне. Глас 4: Анатолиа:

Просветившеся братие, Воскресением Спаса Христа, и достигше преполовения праздника Владычня, приискренно сохраним заповеди Божия, да достойни будем и Вознесение праздновати, и пришествие получити Святаго Духа. 

НА ЛИТУРГИИ

На Литургии, блаженна праздника, песнь 3-я, на 4: и Богородицы, песнь 6-я, на 4. 

По входе тропарь праздника, и Богородицы. Слава, кондак, праздника: И ныне, Богородицы.

За Достойно: Чужде матерем девство:

Прокимен, Апостол, Аллилуиа, Евангелие и причастны: прежде праздника, таже Богородицы.

Залишити коментар

Ваша e-mail адреса не оприлюднюватиметься. Обов’язкові поля позначені *