Последование вечерни во вторник Светлыя седмицы
на Го́споди воззва́х:
поста́вим стихо́в 10, и пое́м стихи́ры воскре́сны и Богородице, гла́с 4:
Животворя́щему Твоему́ Кресту́, непреста́нно кла́няющеся Христе́ Бо́же, тридне́вное Воскре́сние Твое́ сла́вим: те́м бо обнови́л еси́ истле́вшее челове́ческое естество́ Всеси́льне, и и́же на небеса́ восхо́д обнови́л еси́ на́м, я́ко еди́н Бла́г и Человеколю́бец. [ДВАЖДЫ]
Дре́ва преслуша́ния запреще́ние разреши́л еси́ Спасе́, на дре́ве Кре́стнем во́лею пригвозди́вся, и во а́д соше́д си́льне, сме́ртныя у́зы я́ко Бо́г растерза́л еси́. Те́мже кла́няемся е́же из ме́ртвых твоему́ воскре́снию, ра́достию вопию́ще: всеси́льне Го́споди, сла́ва тебе́. [ДВАЖДЫ]
Врата́ а́дова сокруши́л еси́ Го́споди, и твое́ю сме́ртию сме́ртное ца́рство разруши́л еси́: ро́д же челове́ческий от истле́ния свободи́л еси́, живо́т и нетле́ние ми́ру дарова́в, и ве́лию ми́лость. [ДВАЖДЫ]
Прииди́те воспои́м, лю́дие, Ма́терь Све́та Влады́чицу Богоро́дицу во святе́м Ея́ о́бразе Ты́вровском, и́же оби́тель Ле́мешевскую благоле́пно укра́шает, благода́ти струи́ оби́льно источа́ет, сердца́ ве́рных просвеща́ет, да изба́вит ны от тьмы неве́дения, Де́во и Ма́ти Пресвята́я, Еди́на Преблагослове́нная.
А́нгелы и челове́цы, Спа́се, Ма́терь Твою́ велича́ют, зову́ще: просвети́ нас, Цари́це Небеси́, Све́том Тридне́вного Воскресе́ния Христо́ва. Се́рдце бо Твое́ пре́жде про́йде ору́жие, но ны́не ра́дость сие́ напо́лни о Госпо́днем Восста́нии из гро́ба, ея́же и нас правосла́вно Тя чту́щих сопричти́, Де́во и Ма́ти Пресвята́я, Еди́на Преблагослове́нная.
Врата́ ме́дная стерл еси́, Христе́, вере́и а́да сокруша́я, де́вства же врата́ невреди́мы сохрани́л, Го́споди, да сверх естества́ приходя́ в мир сей челове́чеством изба́виши ны сме́рти и тле́ния, я́ко Богоро́дица смире́нием послужи́ла спасе́нию, Де́ва и Ма́ти Пресвята́я, Еди́на Преблагослове́нная.
По сем же вторим первую стихиру Пресвятей Владычице:
Прииди́те воспои́м, лю́дие, Ма́терь Све́та Влады́чицу Богоро́дицу во святе́м Ея́ о́бразе Ты́вровском, и́же оби́тель Ле́мешевскую благоле́пно укра́шает, благода́ти струи́ оби́льно источа́ет, сердца́ ве́рных просвеща́ет, да изба́вит ны от тьмы неве́дения, Де́во и Ма́ти Пресвята́я, Еди́на Преблагослове́нная.
Сла́ва:
Го́споди, е́же от Отца́ Твое́ Рождество́, безле́тно е́сть и присносу́щно: е́же от Де́вы воплоще́ние, неизрече́нно челове́ком и несказа́нно: и е́же во а́д соше́ствие стра́шно диа́волу и а́ггелом его́: сме́рть бо попра́в, тридне́вен воскре́сл еси́ нетле́ние подава́я челове́ком, и ве́лию ми́лость.
И ны́не: Богоро́дичен:
И́же тебе́ ра́ди богооте́ц проро́к Дави́д пе́сненно о Тебе́ провозгласи́, вели́чия Тебе́ Сотво́ршему: предста́ Цари́ца одесну́ю Тебе́, Тя́ бо Ма́терь, Хода́таицу живота́ показа́, без отца́ из Тебе́ вочелове́читися благоволи́вый Бо́г, да Сво́й па́ки обнови́т о́браз, истле́вший страстьми́, и заблу́ждшее горохи́щное обре́т овча́, на ра́мо восприи́м, ко Отцу́ принесе́т, и Своему́ хоте́нию, с небе́сными совокупи́т си́лами, и спасе́т Богоро́дице, ми́р, Христо́с име́яй ве́лию и бога́тую ми́лость.
Вхо́д с кади́лом: Све́те ти́хий: Проки́мен, гла́с 8: Гла́сом мои́м ко Го́споду воззва́х, гла́сом мои́м к Бо́гу, и вня́т ми́. Сти́х: В де́нь ско́рби моея́ Бо́га взыска́х. Сти́х: Отве́ржеся уте́шитися душа́ моя́. Сти́х: Бо́же, во святе́м пу́ть тво́й. И па́ки: Гла́сом мои́м ко Го́споду воззва́х:
ПАРЕМИИ БОГОРОДИЦЕ
Бытия чтение (глава 28):
Изыде Иаков от студенца клятвеннаго и иде в Харрань. И обрете место, и спа тамо: зайде бо солнце, / и взят от камения места того, и положи возглавие себе, и спа на месте оном. И сон виде. И се лествица, утверждена на земли, eяже глава досязаше до небес, и Ангели Божии восхождаху и низхождаху по ней. Господь же утверждашеся на ней, и рече: Аз Бог Авраамов, отца твоего, и Бог Исааков, не бойся: земля, идеже ты спиши на ней, тебе дам ю и семени твоему. И будет семя твое, яко песок земный, и распространится на море, и ливу, и север, и на востоки; и возблагословятся о тебе вся колена земная и о семени твоем. И се Аз с тобою, сохраняяй тя на всяком пути, аможе аще пойдеши. И возвращу тя в землю сию, яко не имам тебе оставити, дондеже сотворити Ми вся, елика глаголах тебе. И воста Иаков от сна своего, и рече: яко eсть Господь на месте сем, аз же не ведех. И убояся, и рече: яко страшно место сие; несть сие, но дом Божий и сия врата Небесная.
Прoрочества Иезекиилева чтение (главы 43 и 44):
Тако глаголет Господь: будет от дне осмаго и прочее, сотворят иереи на олтари всесожжения вашего и яже спасения вашего, и прииму вы, глаголет Адонаи Господь. И обрати мя на путь врат святых внешних, зрящих на востоки, и сия бяху затворена. И рече Господь ко мне: врата сия затворена будут и не отверзутся, и никтоже пройдет сквозе их; яко Господь Бог Израилев пройдет ими, и будут затворена. Яко Игумен сядет в них снести хлеб, по пути Еламских врат внидет и по пути его изыдет. И введе мя по пути врат святых, сущих к северу, прямо храму, и видех, и се исполнь славы храм Господень.
Притчей чтение (глава 9):
Премудрость созда Себе дом и утверди столпов седмь. Закла Своя жертвенная, и раствори в чаши Своей вино, и уготова Свою трапезу. Посла Своя рабы, созывающи с высоким проповеданием на чашу, глаголющи: Иже есть безумен, да уклонится ко Мне. И требующим ума рече: Приидите, ядите Мой хлеб, и пийте вино, еже растворих вам. Оставите безумие и живи будете, и взыщите разума, да поживете, и исправите разум в ведении. Наказуяй злыя приимет себе безчестие, обличаяй же нечестиваго опорочит себе: обличения бо нечестивому раны ему. Не обличай злых, да не возненавидят тебе. Обличай премудра, и возлюбит тя. Даждь премудрому вину, и премудрший будет. Сказуй праведному, и приложит приимати. Начало премудрости страх Господень и совет святых разум: разумети бо закон помысла есть благаго. Сим бо образом многое поживеши время, и приложатся тебе лета живота.
Рце́м вси́: Сподо́би Го́споди в ве́чер се́й: и про́чая.
Стихи́ры на литии́:
Гла́с 5: Прииди́те пресла́вное чу́до ви́дяще, Богоро́дице Де́ве поклони́мся, я́ко Е́ва пе́рвая грехо́м сме́рти вкуси́, Пречи́стая же Мари́я я́ко Е́ва Втора́я Жи́знь подае́т Боже́ственнаго Сы́на Своего́ Кресто́м и Воскресе́нием, его́же ра́достно велича́ем.
Ма́ти Бо́га на́шего, Присноде́во Мари́е, благоуха́ния Честно́е Селе́ние,моля́щихся Ти пред о́бразом Твои́м ди́вным, све́том ве́ры правосла́вныяпросвеща́еши, и ко Све́ту Невече́рнему Христу́ подвиза́еши прийти́, да озари́т ра́достию нетле́нною ду́ши на́ша.
Ра́дуйся, вопие́м Ти, Преблагослове́нная, я́ко из мра́ка неве́дения на́с избавля́ющи, Матери́нскими моли́твами на́с согрева́еши и от хла́да суеты́ жите́йския на́с при́сно покрыва́еши, Влады́чице, и к Сы́ну Твоему́ Христу́ Бо́гу приво́диши, да озари́т ра́достию нетле́нною ду́ши на́ша.
Сла́ва и ны́не, Богоро́дичен, гла́с 5: Све́та Непристу́пнаго Ма́ти Всесла́вная, Ми́лости низпосли́ лю́дем правосла́вным, пред ико́ною Твое́ю, Богоро́дице Всечи́стая, благогове́йно моля́щимся.
На стихо́вне стихи́ра воскре́сна гла́с 4, осмогла́сника:
Го́споди, возше́д на Кре́ст, пра́деднюю на́шу кля́тву потреби́л еси́, и соше́д во а́д, ве́чныя у́зники свободи́л еси́, нетле́ние да́руя челове́ческому ро́ду: сего́ ра́ди пою́ще сла́вим животворя́щее и спаси́тельное Твое́ воста́ние.
Та́же, настоя́щыя стихи́ры Богоро́дицы, гла́с 5:
Ра́дуйся Ма́ти Све́та Невече́рнего, всю́ вселе́нную Све́том И́стины озаря́яй. Огнь у́мный, всяк ум превосходя́й излива́нием благода́ти. Сина́е вторы́й, Законода́вца Бо́га ми́ру пло́тию Ро́ждшая, вся́кого челове́ка в мир прише́дшаго просвеща́яяй и освяща́яй Боже́ственным Сы́ном Твои́м. Пи́щу нетле́нную нам Подаю́щая, Ма́нно спаси́тельная же, я́сно быва́емая, ко и́щущаго тре́бованию, бога́тая вои́стинну и незави́стная, Христо́ва Ма́ти Отрокови́це, излива́ющая ми́рови ве́лию ми́лость.
Сти́х: Освяти́л е́сть селе́ние Свое́ Вы́шний.
Пе́сньми духо́вными ве́рнии, восхва́лим Честне́йшую Де́ву и Ма́ти, Живода́вца и Све́та Пода́теля Христа́ смире́нием Свои́м в мир Вве́дшую, Богоро́дицу Всесла́вную, умы́ Обновля́ющую и Ми́лость Бо́жию Да́рующую, подаю́щи все́м благода́ть незави́стную.
Сти́х: Ре́чная устремле́ния веселя́т гра́д Бо́жий.
Ра́дуйся, Со́лнца Пра́вды Мати Пресвята́я, ве́чное сия́ние Сла́вы ми́ру Ро́ждшая Христа́ Сло́ва, Подаю́щего излия́ние исцеле́ний, вся́кий неду́г отгоня́ющее, слепы́х воззре́ние, и прокаже́нных боже́ственное очище́ние, точа́щее неду́гов вся́кое врачевство́, все́м притека́ющим ве́рно ико́не Твое́й: вели́кая о́бщая цельба́, безме́здная вои́стинну и гото́вая, Ма́ти, источа́ющаго ми́рови ве́лию ми́лость.
Сла́ва: гла́с 5:
Востру́бим празднолю́бцы в пе́снех, воспле́щем све́тле, и возлику́им ра́дующеся, ве́чною све́тлостию наслажда́ющеся: благогове́йно моли́твы принося́ пред честны́м о́бразом Преблагослове́нныя Богоро́дицы, яко Сия́ благода́тию осеня́ет правосла́вно чту́щих Ю́: и́же в неду́зех прие́млют свобожде́ние: и́же в беда́х, кре́пости исполня́ются: слепи́и о́чи, глуси́и благослы́шание, злостра́ждущии исцеле́ние: повсю́ду ве́рным источа́ющую спасе́ние, воспле́щуще си́це воззове́м: присноживы́е то́ки све́та излива́ющая от Светопода́теля Христа́, не преста́й Де́во всегда́ моля́щися о рабе́х Твои́х.
И ны́не: гла́с то́йже: Воскре́сния де́нь:
НА БЛАГОСЛОВЕНИИ ХЛЕБОВ:
Тропарь, глас 1-й: Сокровенныя тайны явление,/ неверных благодатию Крещения просвещение,/людем православным благословение,/ обители Лемешевския украшение,/ икона Твоя, Богоро́дице, показася,/пред нею же взываем Ти, Всесвятая:/ просвети умы наша сиянием благодати, /да избавиши от смерти души наша.
Христо́с воскре́се: три́жды. И отпу́ст.
ПОСЛЕДОВАНИЕ УТРЕНИ В СРЕДУ СВЕТЛЫЯ СЕДМИЦЫ, ЧЕСТВУЯ БОГОРОДИЦУ ВО ОБРАЗЕ ЕЯ ТЫВРОВСКОМ
НА УТРЕНЕ
Сла́ва Святе́й, и Единосу́щней, и Животворя́щей, и Нераздели́мей Тро́ице, всегда́, ны́не и при́сно и во ве́ки веко́в. И нам отвещающим: Ами́нь.
Начинает настоятель, с прочими служители, велегласно настоящий тропарь, глас 5-й: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.
И мы тойжде поем подобне, со сладкопением. Поется же сей тропарь трижды от настоятеля, и трижды от нас.
Таже настоятель глаголет стихи:
Первый стих: Да воскре́снет Бог, и расточа́тся врази́ Его́, / и да бежа́т от Лица́ Его́ ненави́дящии Его́.
И на кийждо стих мы поем тропарь весь по единожды: Христо́с воскре́се из ме́ртвых:
Вторый стих: Я́ко исчеза́ет дым, да исче́знут, / я́ко та́ет воск от лица́ огня́.
Тропарь: Христо́с воскре́се из ме́ртвых: единожды.
Третий стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.
Тропарь: Христо́с воскре́се из ме́ртвых: единожды.
Четвертый стих: Сей день, его́же сотвори́ Госпо́дь, / возра́дуемся и возвесели́мся в онь.
Тропарь: Христо́с воскре́се из ме́ртвых: единожды.
Сла́ва Отцу́ и Сы́ну и Свято́му Ду́ху.
Тропарь: Христо́с воскре́се из ме́ртвых: единожды.
И ны́не и при́сно и во ве́ки веко́в. Ами́нь.
Тропарь: Христо́с воскре́се из ме́ртвых: единожды.
Таже настоятель: Христо́с воскре́се из ме́ртвых, / сме́ртию смерть попра́в.
И мы конец: И су́щим во гробе́х живо́т дарова́в.
Таже ектения великая. И по возгласе абие седальны глаголем Богородице:
Седален, глас 2:
Днесь поем песнь Тебе, Всепетой Богородице, мира державному покрову, и прославляем радостно благость твою. Со безплотными, яже Воскресение Христово воспевают, убо молися во еже спастися нам.
Седален, глас 3:
Яко многосветлая луна, показася в честней обители святаго апостола Любве Иоанна святая икона Твоя, Дево Всеславная: светиши бо благодатию чудес в нощи бед сущим и помощь низпосылаеши во спасение душ наших.
Полиеле́й:
Хор: Хвали́те И́мя Госпо́дне, хвали́те, раби́ Го́спода.
Аллилу́иа, аллилу́иа, аллилу́иа.
Благослове́н Госпо́дь от Сио́на, живы́й во Иерусали́ме.
Аллилу́иа, аллилу́иа, аллилу́иа.
Испове́дайтеся Го́сподеви, я́ко Благ, я́ко в век ми́лость Его́.
Аллилу́иа, аллилу́иа, аллилу́иа.
Испове́дайтеся Бо́гу Небе́сному, я́ко в век ми́лость Его́.
Аллилу́иа, аллилу́иа, аллилу́иа.
На полиелее величание:
Величаем Тя, Пресвятая Дево, и чтим образ Твой святый, имже точиши исцеления всем с верою притекающим и просвещаеши Светом веры Православия.
Псало́м избра́нный:
Хор: Помяни́, Го́споди, Дави́да и всю кро́тость его./ Я́ко кля́тся Го́сподеви, обеща́ся Бо́гу Иа́ковлю./ Се, слы́шахом я во Евфра́фе, обрето́хом я в поля́х дубра́вы./ Пресла́вная глаго́лашася о тебе́, гра́де Бо́жий./ Бог посреде́ его́, и не подви́жится./ Кля́тся Госпо́дь Дави́ду и́стиною, и не отве́ржется ея./ От плода́ чре́ва твоего́ посажду́ на престо́ле твое́м./ Я́ко избра́ Госпо́дь Сио́на, изво́ли его́ в жили́ще себе́./ Освяти́л есть селе́ние Свое́ Вы́шний./ Святы́ня и велеле́пота во святи́ле его́./ Свят храм твой, ди́вен в пра́вде./ До́му Твоему́ подоба́ет святы́ня, Го́споди, в долготу́ дней./ Помяну́ и́мя Твое́ во вся́ком ро́де и ро́де.// Благослове́н Госпо́дь во век, и в век ве́ка.
По полиелеи седален, глас 8:Благоговейно обстояще честный образ Матере Света, молитвы Ей яко всеблагой Заступнице усердно принесем. Сию бо Небо одушевленное человеколюбием Господь содела, изливая Тою Свет Невечерний в просвещение и спасение душ наших.
Степе́нна, глас 4:
1 Антифо́н:
Хор: От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.
Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.
Проки́мен и чте́ние Ева́нгелия пра́здника:
Диа́кон: Во́нмем. Прему́дрость во́нмем, проки́мен, глас четве́ртый:
Помяну́ и́мя Твое́/ во вся́ком ро́де и ро́де.
Хор: Помяну́ и́мя Твое́/ во вся́ком ро́де и ро́де.
Диа́кон: Слы́ши, Дщи, и виждь, и приклони́ у́хо Твое́.
Хор: Помяну́ и́мя Твое́/ во вся́ком ро́де и ро́де.
Диа́кон: Помяну́ и́мя Твое́/
Хор: Во вся́ком ро́де и ро́де.
Диа́кон: Го́споду помо́лимся.
Хор: Го́споди, поми́луй.
Иере́й: Я́ко Свят еси́ Бо́же наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор: Ами́нь.
Диа́кон: Вся́кое дыха́ние да хва́лит Го́спода.
Хор: Вся́кое дыха́ние да хва́лит Го́спода.
Диа́кон: Хвали́те Бо́га во святы́х Его́, хвали́те Его́ во утверже́нии си́лы Его́.
Хор: Вся́кое дыха́ние да хва́лит Го́спода.
Диа́кон: Вся́кое дыха́ние.
Хор: Да хва́лит Го́спода.
Диа́кон: Ио сподо́битися нам слы́шанию Свята́го Ева́нгелиа, Го́спода Бо́га мо́лим.
Хор: Го́споди, поми́луй. (Трижды)
Диа́кон: Прему́дрость, про́сти, услы́шим Свята́го Ева́нгелия.
Иере́й Мир всем.
Хор: И ду́хови твоему́.
Иере́й: От Луки́ Свята́го Ева́нгелия чте́ние.
Хор: Сла́ва, Тебе́, Го́споди, сла́ва Тебе́.
Диа́кон: Во́нмем.
(Лк., зач. 4:)
Иере́й: Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, яко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́мь с нею я́ко три ме́сяцы, и возврати́ся в дом Свой.
Хор: Сла́ва, Тебе́, Го́споди, сла́ва Тебе́.
Воскре́сная песнь по Ева́нгелии, глас 6:
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́. ТРИЖДЫ
Псало́м 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.
Глас 6:
Сла́ва Отцу́ и Сы́ну и Свято́му Ду́ху./ Моли́твами Богоро́дицы,/Ми́лостиве, очи́сти// мно́жество согреше́ний на́ших.
И ны́не и при́сно и во ве́ки веко́в. Ами́нь./ Моли́твами Богоро́дицы,/ Ми́лостиве, очи́сти// мно́жество согреше́ний на́ших.
Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.
По 50-м псалме стихира, глас 7:
Прошения исполни рабов Твоих, Тебе, Пресвятая Дево, с верою призывающих. От всякия скорби, недугов и озлобления всех нас свободи, верою православною обогащая, да благодарственно воспеваем Тя, скорую Молитвенницу за христиан боголюбивых.
Диа́кон: Спаси́, Бо́же, лю́ди Твоя́ и благослови́ достоя́ние Твое́…
Хор: Го́споди, поми́луй. (12 раз)
Иере́й: Ми́лостию и щедро́тами … Хор: Ами́нь.
Поем же канон Пасце со ирмосы на 8, и Богородицы на 6.
Канон, глас 1. Песнь 1.
Ирмос: Воскресе́ния день, / просвети́мся, лю́дие. / Па́сха, Госпо́дня Па́сха, / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.
Припев: Христо́с воскре́се из ме́ртвых.
Очи́стим чу́вствия, и у́зрим непристу́пным све́том Воскресе́ния Христа́ блиста́ющася, и ра́дуйтеся реку́ща я́сно да услы́шим, побе́дную пою́ще.
Припев: Христо́с воскре́се из ме́ртвых.
Небеса́ у́бо досто́йно да веселя́тся, земля́ же да ра́дуется, да пра́зднует же мир, ви́димый же весь и неви́димый: Христо́с бо воста́, весе́лие ве́чное.
Иканон Пресвятой Богородице перед иконой Ея «Тывровская», глас 4: [Песнь 1 Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.]:
Припев: Пресвята́я Богоро́дице, спаси́ нас.
Мати Присносущнаго Света и Отчия Премудрости, умудри неразумие мое и просвети мя на пение и молитву пред святою иконою Твоею, Тывровскою нареченною.
Припев: Пресвята́я Богоро́дице, спаси́ нас.
Обретшии сокровище радуются, темже и мы, имуще Тя, Всецарице, милосердия сокровище Небесное и неиждиваемое, воспеваем, радующеся, Твоя чудеса.
Сла́ва Отцу́ и Сы́ну и Свято́му Ду́ху.
Лицу Твоему, — предрече Давид,— помолятся богатии людстии; исполняющуся сему, вкупе с богатыми и мы, добродетельми убозии, молимся Тебе, Дево, пред ликом Твоим, Преблагослове́нная.
И ны́не и при́сно и во ве́ки веко́в. Ами́нь.
Якоже очи раб в руку господий своих, тако очи наши устремлени суть к Тебе и к образу Твоему, Всеблагая Владычице, сиянием Славы Горния облиставающему неверных и ко Христу приводя и в Православии утверждающи благодатно.
Катавасия оба лика вкупе: Воскресе́ния день: И последи: Христо́с воскре́се: трижды.
Песнь 3
Ирмо́с: Прииди́те, пи́во пие́м но́вое, не от ка́мене непло́дна чудоде́емое, но нетле́ния исто́чник, из гро́ба одожди́вша Христа́, в Не́мже утвержда́емся.
Христо́с воскре́се из ме́ртвых.
Ны́не вся испо́лнишася све́та, Не́бо же, и земля́, и преиспо́дняя: да пра́зднует у́бо вся тварь воста́ние Христо́во, в Не́мже утвержда́ется.
Христо́с воскре́се из ме́ртвых.
Вчера́ спогребо́хся Тебе́, Христе́, совостаю́ днесь воскре́сшу Тебе́, сраспина́хсяТебе́ вчера́, Сам мя спросла́ви, Спа́се, во Ца́рствии Твое́м.
(Ирмос: Твоя песнословцы, Богородице, Живый и Независтный Источниче, лик Себе совокупльшия, духовно утверди, в Божественней Твоей славе венцев славы сподоби.)
Припев: Пресвята́я Богоро́дице, спаси́ нас.
Воззри на убогих, Марие Преблагослове́нная, и виждь благоутробно пред иконою Твоею предстоящих и Тя с верою призывающих, да причастницы Милости Христовой соделаются.
Припев: Пресвята́я Богоро́дице, спаси́ нас.
От рук девицы бедныя даровася дар многоценный земле Винницкой — образ Твой, Всепетая, многославный, хорунжий бо куплю сотвори, яже ста сокровенныя славы явлением.
Сла́ва Отцу́ и Сы́ну и Свято́му Ду́ху. Крепость даруй нам, Чистая, да творим волю Сына Твоего со благоговением и любовию, укрепляеши бо рабы Твоя яко Матерь Всесильнаго Бога нашего.
И ны́не и при́сно и во ве́ки веко́в. Ами́нь. Спасительный щит подаждь нам, Госпоже, Твое благословение Материнское и просвещение Светом Сы́на Твоего, имже началозлобнаго побеждающе коварства, венцев славы сподобимся.
Катавасия оба лика вкупе: Прииди́те, пи́во пие́м но́вое: И последи: Христо́с воскре́се: трижды.
Ектения малая.
Кондак, глас 8-й
А́ще и во гроб снизше́л еси́, Безсме́ртне, но а́дову разруши́л еси́ си́лу, и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся! и Твои́м апо́столом мир да́руяй, па́дшим подая́й воскресе́ние.
Икос
Е́же пре́жде со́лнца Со́лнце, заше́дшее иногда́ во гроб, предвари́ша ко у́тру и́щущия я́ко дне мироно́сицы де́вы, и друга́ ко друзе́й вопия́ху: о други́ни, прииди́те, воня́ми пома́жем Те́ло живоно́сное и погребе́ное, плоть Воскреси́вшаго па́дшаго Ада́ма, лежа́щую во гро́бе. И́дем, потщи́мся, я́коже волсви́, и поклони́мся, и принесе́м ми́ра я́ко да́ры, не в пелена́х, но в плащани́це обви́тому, и пла́чим, и возопии́м: о Влады́ко, воста́ни, па́дшим подая́й воскресе́ние.
Седален Богородице,глас 8-й:
Приснославный Свет, и живо́тный, / согла́сно восхва́лим благода́ти прося́ще; / на ки́йждо бо день источа́ет исцеле́ния, / я́ко Солнце Правды осиява́ет ны Богородица Сыном Своим Христом Богом. / Те́мже по до́лгу приступа́юще с любо́вию, / ве́рно почерпе́м от Ико́ны Владычицы Всепетой / неисчерпа́емое здра́вие, вои́стинну безсме́ртное, / изображе́ние озаря́ющее ве́рно благочести́вых сердца́; / устна́ми возопии́м, / Ты еси́ ве́рных утеше́ние.
Песнь 4
Ирмо́с: На Боже́ственней стра́жи богоглаго́ливый Авваку́м да ста́нет с на́ми и пока́жет светоно́сна А́нгела, я́сно глаго́люща: днесь спасе́ние ми́ру, я́ко воскре́се Христо́с, я́ко всеси́лен.
Христо́с воскре́се из ме́ртвых.
Му́жеский у́бо пол, я́ко разве́рзый де́вственную утро́бу, яви́ся Христо́с; я́ко челове́к же, А́гнец нарече́ся; непоро́чен же, я́ко невку́сен скве́рны, на́ша Па́сха, и я́ко Бог и́стинен, соверше́н рече́ся.
Христо́с воскре́се из ме́ртвых.
Я́ко единоле́тный а́гнец, благослове́нный нам вене́ц Христо́с, во́лею за всех закла́н бысть, Па́сха чисти́тельная, и па́ки из гро́ба кра́сное пра́вды нам возсия́ Со́лнце.
Христо́с воскре́се из ме́ртвых.
Богооте́ц у́бо Дави́д пред се́нным ковче́гом скака́ше игра́я, лю́дие же Бо́жии святи́и, образо́в сбытие́ зря́ще, весели́мся Боже́ственне, я́ко воскре́се Христо́с, я́ко всеси́лен.
Припев: Пресвята́я Богоро́дице, спаси́ нас.
Тропарь: Лику́ют вси челове́цы и А́нгелы,/ всегда́ согла́сно вопию́ще на Небеси́ и на земли́, Влады́чице, ра́дуйся Деви́це,// ра́дости бо Рождество́м Твои́м вся́ческая испо́лнила еси́.
Припев: Пресвята́я Богоро́дице, спаси́ нас.
Тропа́рь: Ра́дость, Всесвята́я,/ со стра́хом Ти вопию́щих ра́дости сподо́би,/ Ма́ти су́щия ра́дости, избавля́ющи скорбе́й вся́ческих,// и всех поми́луй, к Тебе́ прибега́ющих.
Сла́ва Отцу́, и Сы́ну, и Свято́му Ду́ху.
Тропа́рь: Диви́т, Пренепоро́чная, и ужаса́ет всяк слух стра́нно чу́до Боже́ственнаго Твоего́ Рождества́:/ ка́ко Херуви́мскаго Творца́ зачала́ еси́?/ Ка́ко огнь нестерпи́мый во утро́бе носи́ла еси́?/ Ка́ко Су́щую Жизнь пло́тию облекла́ еси́ и Живо́т всему́ ми́ру родила́ еси́,// Бо́га ку́пно и челове́ка?
И ны́не и при́сно и во ве́ки веко́в, ами́нь.
Богоро́дичен: Под кров Твой, Де́во Госпоже́, прибега́ем вси ро́ди челове́честии:/ просвети́ ны све́том Рождества́ Твоего́, гре́шныя рабы́ Твоя́,/ моля́щияся приле́жно и кла́няющияся пречи́стей Твое́й ико́не,// прося́ще от Тебе́ прия́ти вели́кия ми́лости.
Катавасия оба лика вкупе: На Боже́ственней стра́жи: И последи: Христо́с воскре́се: трижды.
Песнь 5
Ирмо́с: У́тренюем у́треннюю глубоку́, и вме́сто ми́ра песнь принесе́м Влады́це, и Христа́ у́зрим, пра́вды Со́лнце, всем жизнь возсия́юща.
Христо́с воскре́се из ме́ртвых.
Безме́рное Твое́ благоутро́бие а́довыми у́зами содержи́мии зря́ще, к све́ту идя́ху, Христе́, весе́лыми нога́ми, Па́сху хва́ляще ве́чную.
Христо́с воскре́се из ме́ртвых.
Присту́пим, свещено́снии, исходя́щу Христу́ из гро́ба, я́ко жениху́, и спра́зднуим любопра́зднственными чи́нми Па́сху Бо́жию спаси́тельную.
Припев: Пресвята́я Богоро́дице, спаси́ нас.
Тропа́рь: Неве́рных иуде́ев благоча́дных ве́рою Ты́, Мари́е, соде́лала еси́ и непло́дныя ду́ши показа́ла еси́, Богороди́тельнице, веселя́щихся доброде́тельми многопло́дно. Кто́ у́бо не изуми́тся, Де́во, вели́чию Твоему́?
Припев: Пресвята́я Богоро́дице, спаси́ нас.
Тропа́рь: Чу́дно украси́ся ико́на Твоя́, Присноде́во, и па́че луче́й со́лнечных освеща́ет все́х благода́тию Твое́ю, Пречи́стая. Кто́ у́бо не восхва́лит Тя́, на небеси́ и на земли́ сла́вимую!
Припев: Сла́ва Отцу́, и Сы́ну, и Свято́му Ду́ху.
Тропа́рь: Све́та Невмести́маго Христа́ Ма́ти не вмести́лася еси́ в ску́дней тра́пезной до́ма Михаи́ла хору́нжего, Свет Твой, Богоро́дице, излия́ся ми́ру всему́ Ми́лостию и Щедро́тами.
Припев: И ны́не и при́сно и во ве́ки веко́в, ами́нь.
Тропа́рь: Блаже́нна еси́ Ле́мешевская оби́тель сла́вная, ико́ною бо обогати́лася еси́ Ты́вровскою всечестно́ю.
Катавасия оба лика вкупе: У́тренюем у́треннюю глубоку́,: И последи: Христо́с воскре́се: трижды.
Песнь 6
Ирмо́с: Снизше́л еси́ в преиспо́дняя земли́, и сокруши́л еси́ вереи́ ве́чныя, содержа́щия свя́занныя, Христе́, и тридне́вен, я́ко от ки́та Ио́на, воскре́сл еси́ от гро́ба.
Христо́с воскре́се из ме́ртвых.
Сохрани́в це́ла зна́мения, Христе́, воскре́сл еси́ от гро́ба, ключи́ Де́вы не вреди́вый в рождестве́ Твое́м, и отве́рзл еси́ нам ра́йския две́ри.
Христо́с воскре́се из ме́ртвых.
Спа́се мой, живо́е же и неже́ртвенное заколе́ние, я́ко Бог Сам Себе́ во́лею приве́д Отцу́, совоскреси́л еси́ всеро́днаго Ада́ма, воскре́с от гро́ба.
Припев: Пресвята́я Богоро́дице, спаси́ нас.
Тропа́рь: Во зе́млех ки́евской, волы́нской и подо́льской чудотво́рный Тво́й о́браз просла́вися, и ны́не вси́ уста́ми Помо́щницу Ди́вную велича́ют.
Припев: Пресвята́я Богоро́дице, спаси́ нас.
Тропа́рь: Ка́ко на Тво́й многосве́тлый о́браз а́з, недосто́йный, воззрю́, Влады́чице, нечи́стыми очесы́ мои́ми?
Припев: Сла́ва Отцу́, и Сы́ну, и Свято́му Ду́ху.
Тропа́рь: Ико́на Твоя́, Де́во, показа́ся исто́чник чуде́с, от него́же жа́ждущии снабдева́ются изоби́льно.
Припев: И ны́не и при́сно и во ве́ки веко́в, ами́нь.
Тропа́рь: Испо́лнила еси́ благода́ти иногда́ первопи́санную Твою́ ико́ну, Госпоже́ Де́во Богоро́дице,/ и ны́не та же благода́ть и́стинствует сия́нием ве́ры чуде́с, я́ко тоя́ ра́ди первопи́санныя,// ко спасе́нию ве́рно к Тебе́ по Бо́зе прибега́ющим.
Катавасия оба лика вкупе: Снизше́л еси́ в преиспо́дняя земли́,: И последи: Христо́с воскре́се: трижды.
ЕКТЕНИЯ МАЛАЯ
Кондак, глас 5-й:
Смирение Твое, Всесвятая Влады́чице, /дольних в горняя воздвизает, /неверных страха исполняет,/ заблу́ждших ко Христу Свету Истины обращает, /благодатную помощь верным низпосылает/. Се бо пред иконою Твоею Тывровскою молящиися исцелений сподобляются,/ вопиюще: Радуйся, Пресвята́я Богородице Дево, Славы Божия дивное Сияние.
Икос
Ликуют радостно ныне иноцы православные и народ боголюбивый о Богородице Всесвятей плоть давшей Воскреси́вшему па́дшаго Ада́ма Христу Спасителю. Се бо от образа чудотворного Преблагословенныя Приснодевы Марии обильно благодать проистекает, немощная врачующи и оскудевающая восполняющи. Во обители, юже Царица Небесная благословила иконою Своею, похвала приносится Чистой сицевая:
Радуйся, Пречиста́я Дево, Светом Невечерним мира озарение.
Радуйся, Всеславная Царице Небесная, верным благословение.
Радуйся, Богородительнице, Рождеством Твоим даровшая всем Воскресение.
Радуйся, Мати Живота, Давшего миру нетление.
Радуйся, Диадимо Многоценная, творению Божию Прекрасное Украшение.
Радуйся, Всесвята́я Богородице, неверных ко Христу обращение.
Радуйся, Приснодево, Сыном Твоим Подающая миру спасение.
Радуйся, Богородице Владычице, скорби утоление.
Радуйся, Мати Милостивая, подающая недугов исцеление.
Радуйся, Богоизбранная Отроковице, многосуетным людем Дающая утешение.
Радуйся, Владычице Радостотворная, Отгоняющая отчаяние.
Радуйся, Пресвята́я Богородице Дево, Славы Божия дивное Сияние.
Затем поем во глас 6-й:
Воскресе́ние Христо́во ви́девше, поклони́мся Свято́му Го́споду Иису́су, еди́ному безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты бо еси́ Бог наш, ра́зве Тебе́ ино́го не зна́ем, и́мя Твое́ имену́ем. Прииди́те, вси ве́рнии, поклони́мся свято́му Христо́ву Воскресе́нию: се бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́. (Трижды.)
Воскре́с Иису́с от гро́ба, я́коже прорече́, даде́ нам живо́т ве́чный, и ве́лию ми́лость. (Трижды.)
Песнь 7
Ирмо́с: О́троки от пе́щи изба́вивый, быв Челове́к, стра́ждет я́ко сме́ртен, и Стра́стию сме́ртное в нетле́ния облачи́т благоле́пие, еди́н благослове́н отце́в Бог, и препросла́влен.
Христо́с воскре́се из ме́ртвых.
Жены́ с ми́ры богому́дрыя в след Тебе́ теча́ху, Его́же я́ко ме́ртва со слеза́ми иска́ху, поклони́шася ра́дующияся Живо́му Бо́гу, и Па́сху та́йную Твои́м, Христе́, ученико́м благовести́ша.
Христо́с воскре́се из ме́ртвых.
Сме́рти пра́зднуем умерщвле́ние, а́дово разруше́ние, ино́го жития́ ве́чнаго нача́ло, и игра́юще пое́м Вино́внаго, еди́наго благослове́ннаго отце́в Бо́га, и препросла́вленнаго.
Христо́с воскре́се из ме́ртвых.
Я́ко вои́стинну свяще́нная и всепра́зднственная сия́ спаси́тельная нощь, и светоза́рная, светоно́снаго дне воста́ния су́щи провозве́стница: в не́йже безле́тный Свет из гро́ба пло́тски всем возсия́.
Припев: Пресвята́я Богоро́дице, спаси́ нас.
Тропа́рь: Иуде́ю Свято́е Писа́ние чту́щему, стра́хом объя́ту бы́вшу недове́домым,/ сия́ние Сла́вы Бо́жия я́влено бы́сть от о́браза Твоего́ Богоро́дице, /сей же краве́ц-жидови́н возопи́ недоуме́нно, я́ко лик вид изменя́ше. /По́зде же в алтаре́ свята́го Никола́я во гра́де Ты́врове святы́ня поста́влена бысть, / чудесы́ мно́гими просла́вися:/ те́мныя, хромы́я и про́чия неду́жныя Богома́ти исцеля́ла еси́ и ны́не посеща́еши ны Ми́лостями мно́гими, /да возвесели́мся о Тебе́ раби́, Сы́ну Твоему́ вопию́ще:// оте́ц на́ших Бо́же, благослове́н еси́.
Припев: Пресвята́я Богоро́дице, спаси́ нас.
Тропа́рь: Боже́ственныя Твоея́ ико́ны свято́е явле́ние, Богоро́дице Де́во,/ я́ко светоза́рное возсия́ нам со́лнце, пресла́вных чуде́с лучи́ пуща́ющи,/ тьмы лю́тых обстоя́ний отгоня́ющи,// свяще́нными Твои́ми, Влады́чице, предста́тельствы, / да возвесели́мся о Тебе́ раби́, Сы́ну Твоему́ вопию́ще:// оте́ц на́ших Бо́же, благослове́н еси́.
Припев: Сла́ва Отцу́, и Сы́ну, и Свято́му Ду́ху.
Тропа́рь: Безоче́сным сла́дкое зре́ние дае́тся, глухи́м слы́шание,/ немы́м благоглаго́лание, хромы́м хожде́ние, прокаже́нным очище́ние,/ де́монствуемым целому́дрие и в боле́знех су́щим разли́чных исцеле́ние// осене́нием Пречи́стыя Твоея́, Богоро́дице, ико́ны,/ да возвесели́мся о Тебе́ раби́, Сы́ну Твоему́ вопию́ще:// оте́ц на́ших Бо́же, благослове́н еси́.
Припев: И ны́не и при́сно и во ве́ки веко́в, ами́нь.
Тропа́рь: Неусы́пную, Чи́стая, и Богоприя́тную иму́щи моли́тву,/ и непреодоле́емую держа́ву кре́пости,/ враго́в Це́ркви де́рзость, я́же на ны, разори́/ и вы́я их под но́зе правосла́вному наро́ду на́шему низложи́,/ да возвесели́мся о Тебе́ раби́, Сы́ну Твоему́ вопию́ще:// оте́ц на́ших Бо́же, благослове́н еси́.
Катавасия оба лика вкупе: О́троки от пе́щи изба́вивый: И последи: Христо́с воскре́се: трижды.
Песнь 8
Ирмо́с: Сей нарече́нный и святы́й день, еди́н суббо́т царь и госпо́дь, пра́здников пра́здник, и торжество́ есть торже́ств: во́ньже благослови́м Христа́ во ве́ки.
Христо́с воскре́се из ме́ртвых.
Прииди́те, но́ваго виногра́да рожде́ния, Боже́ственнаго весе́лия, в наро́читом дни Воскресе́ния, Ца́рствия Христо́ва приобщи́мся, пою́ще Его́ я́ко Бо́га во ве́ки.
Христо́с воскре́се из ме́ртвых.
Возведи́ о́крест о́чи твои́, Сио́не, и виждь: се бо приидо́ша к тебе́, я́ко богосве́тлая свети́ла, от за́пада, и се́вера, и мо́ря, и восто́ка ча́да твоя́, в тебе́ благословя́щая Христа́ во ве́ки.
Пресвята́я Тро́ице, Бо́же наш, сла́ва Тебе́.
О́тче Вседержи́телю, и Сло́ве, и Ду́ше, треми́ соединя́емое во Ипоста́сех Естество́, Пресу́щественне и Пребоже́ственне, в Тя крести́хомся, и Тя благослови́м во вся ве́ки.
Припев: Пресвята́я Богоро́дице, спаси́ нас.
Тропа́рь: Ра́дуйся, су́щая ра́досте всего́ ми́ра,/ со Арха́нгелом Гаврии́лом вопие́м Ти, Богоро́дице;/ ра́дуйся, вмести́лище Невмести́маго;/ ра́дуйся, Благода́тная, носи́ло Божества́ всего́;/ ра́дуйся, Ада́мово воззва́ние, с Тобо́ю Госпо́дь, и Тебе́ ра́ди с на́ми, спаса́я нас,// Его́же пое́м и превозно́сим во ве́ки.
Припев: Пресвята́я Богоро́дице, спаси́ нас.
Тропа́рь: Ко́рень Иессе́ев освяще́нный, ко́рень греха́ на́шего исто́ргнула еси́;/ же́зл Ааро́нов процве́тший, Жизнода́теля цве́та израсти́вши Христа́;/ ста́мно манноприе́мная, сме́рти всю си́лу сокруши́ла еси́/ и в поро́ду жи́зни возвела́ еси́ род челове́ческий:// те́мже Тя пое́м, до́брых вино́вную.
Припев: Благослови́м Отца́, и Сы́на, и Свята́го Ду́ха, Го́спода.
Тропа́рь: Что́ воздади́м Тебе́, Всеблага́я, за благода́ть мно́гую,/ ю́же яви́ла еси́ на́м, дарова́в ико́ну Твою́, бога́тство свяще́нное?/ То́кмо бре́нными усты́ хвалу́ приноси́ти дерза́ем: // те́мже Тя пое́м, до́брых вино́вную.
Припев: И ны́не и при́сно и во ве́ки веко́в, ами́нь.
Тропа́рь: Ко́ль мно́гая е́сть о́браза Твоего́ благода́ть, Госпоже́!/ Ико́на Твоя́, Де́во и Богоро́дице, показа́ся исто́чник чуде́с,/ от него́же жа́ждущии снабдева́ются изоби́льно,/ неве́рные же ве́ру обрета́ют и во Христа́ Воскре́сшаго облека́ются:// те́мже Тя пое́м, до́брых вино́вную.
Катавасия оба лика вкупе: Сей нарече́нный и святы́й день: И последи: Христо́с воскре́се: трижды.
Песнь 9
Припев: Вели́чит душа́ моя́ воскре́сшаго тридне́вно от гро́ба, Христа́ Жизнода́вца.
Ирмо́с: Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́. Лику́й ны́не, и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.
Припев: Христо́с но́вая Па́сха, же́ртва жива́я, А́гнец Бо́жий, взе́мляй грехи́ ми́ра.
О Боже́ственнаго, о любе́знаго, о сладча́йшаго Твоего́ гла́са! С на́ми бо нело́жно обеща́лся еси́ бы́ти до сконча́ния ве́ка, Христе́: Его́же, ве́рнии, утвержде́ние наде́жды иму́ще, ра́дуемся.
Припев: А́нгел вопия́ше Благода́тней: Чи́стая Де́во, ра́дуйся! И па́ки реку́: ра́дуйся! Твой Сын воскре́се тридне́вен от гро́ба, и ме́ртвыя воздви́гнувый; лю́дие, весели́теся.
О Па́сха ве́лия и свяще́ннейшая, Христе́! О му́дросте, и Сло́ве Бо́жий, и си́ло! Подава́й нам и́стее Тебе́ причаща́тися в невече́рнем дни Ца́рствия Твоего́.
Богородицы подобны:
Первый лик: Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Твой бо Сын воскре́се тридне́вен от гро́ба.
Све́т всяк превосхо́дит, Отрокови́це Чи́стая, / от ико́ны Твоея́ свет, / я́ве да́рующий свобожде́ние неду́гов лю́тых, / и душа́м вся́кое здра́вие, / я́ко па́че естества́ излива́емый.
Вторый лик: Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Твой бо Сын воскре́се тридне́вен от гро́ба.
Све́т всяк превосхо́дит, Отрокови́це Чи́стая, / от ико́ны Твоея́ свет, / я́ве да́рующий свобожде́ние неду́гов лю́тых, / и душа́м вся́кое здра́вие, / я́ко па́че естества́ излива́емый.
Таже первый лик: Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Твой бо Сын воскре́се тридне́вен от гро́ба.
Реши́тель неду́гов но́вый Фаво́р, / от ико́ны Твоея́ свет, Де́во, зрим вси: / о́чи бо прие́млет огня́, / вси же здра́вие при́сно к животу́ прие́млем.
Вторый лик: Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Твой бо Сын воскре́се тридне́вен от гро́ба.
Здра́вия и́щущии притецы́те во оби́тель апо́стола Любве́ / Отрокови́ца бо Де́ва жи́тельствует зде во ико́не Ты́вровской. / Лику́й и весели́ся ве́рных мно́жество / си́це, я́коже подоба́ет, / и́же бо прии́дет ко хра́му монастыря́ ве́рою, / воздая́ние проше́ний прие́млет.
Таже первый лик: Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Твой бо Сын воскре́се тридне́вен от гро́ба.
Согла́сно, Де́во, Тебе́ блажи́м ве́рнии: ра́дуйся, две́ре Госпо́дня; ра́дуйся, гра́де одушевле́нный; ра́дуйся, Ея́же ра́ди нам ны́не возсия́ свет из Тебе́ рожде́ннаго из ме́ртвых Воскресе́ния.
Вторый лик: Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Твой бо Сын воскре́се тридне́вен от гро́ба.
Весели́ся и ра́дуйся, Боже́ственная две́ре Све́та: заше́дый бо Иису́с во гроб возсия́, просия́в со́лнца светле́е, и ве́рныя вся озари́в, Богора́дованная Влады́чице.
Таже оба лика, сошедшеся вкупе, поют припев: Вели́чит душа́ моя́ / Воскре́сшаго тридне́вно от гро́ба, / Христа́ Жизнодавца.
И ирмос: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
И тропарь: Христо́с воскре́се: трижды. ЕКТЕНИЯ МАЛАЯ.
Ексапостиларий, самогласен:
Пло́тию усну́в, я́ко мертв, Царю́ и Го́споди, тридне́вен воскре́сл еси́, Ада́ма воздви́г от тли, и упраздни́в смерть: Па́сха нетле́ния, ми́ра спасе́ние. (Трижды.)
Подобен Богородице:
Исто́чник еси́ вои́стинну Све́та Непристу́пнаго, Влады́чице, / просвеща́еши у́бо тьму грехо́вную и отгоня́еши неду́ги душ и теле́с лю́тыя, / осене́нием Твои́м еди́ным то́кмо, / свет спасе́ния Христа́ излива́ющи.
На хвали́тех, поста́вим стихи́ 8. И пое́м стихи́ры воскре́сны, гла́с 4:
Кре́ст претерпе́вый и сме́рть, и воскресы́й из ме́ртвых Всеси́льне Го́споди, сла́вим Твое́ Воскре́сние.
Кресто́м Твои́м Христе́, от дре́вния кля́твы свободи́л еси́ на́с, и сме́ртию Твое́ю естество́ на́ше му́чащаго диа́вола упраздни́л еси́: воста́нием же Твои́м ра́дости вся́ испо́лнил еси́. Те́мже вопие́м Ти́: воскресы́й из ме́ртвых Го́споди, сла́ва Тебе́.
Твои́м Кресто́м Христе́ Спа́се, наста́ви на́с на и́стину Твою́, и изба́ви на́с от се́тей вра́жиих, воскресы́й из ме́ртвых, возста́ви ны́ па́дшыяся грехо́м, просте́р ру́ку Твою́ Человеколю́бче Го́споди, моли́твами святы́х Твои́х.
Оте́ческих Твои́х не́др не разлучи́вся, Единоро́дный Сло́ве Бо́жий, прише́л еси́ на зе́млю за человеколю́бие, Челове́к бы́в непрело́жен, и Кре́ст и сме́рть претерпе́л еси́ пло́тию, безстра́стный Божество́м: воскре́с же из ме́ртвых, безсме́ртие по́дал еси́ ро́ду челове́ческому, я́ко еди́н Всеси́лен.
И Богородицы стихиры, глас 2. Подобен: До́ме Евфра́фов:
Стих: Хвали́те Его́ на си́лах Его́, / хвали́те Его́ по мно́жеству вели́чествия Его́.
Свет спасения возсия от иконы Богородицы / милость всем немощству́ющим; / присту́пим ве́рою, благода́ть почерпе́м.
Стих: Хвали́те Его́ во гла́се тру́бнем, / хвалите Его́ во псалти́ри и гу́слех.
Икона Пресвятыя Владычицы, яко Луна многосветлая сиянием Боголепным озаряет обитель Лемешевскую, / приступа́ющим любо́вию, исцеле́ний подае́т / излия́ние неисчерпа́емое.
Стих: Хвали́те Его́ в тимпа́не и ли́це, / хвали́те Его́ во стру́нах и орга́не.
Укрепля́ет ду́ши свет Де́выя, / и́же в скве́рнах страсте́й, / притеце́м ко Отрокови́це, и сим просвети́мся.
Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния, / вся́кое дыха́ние да хва́лит Го́спода.
Подсве́чник Всезлаты́й, и ма́нна незави́стная / из Пречи́стыя утро́бы, мир осиява́ет Влады́кою Христом, / да просвети́мся сия́нием Чистоты́ Неизрече́нныя.
Та́же стихи́ры па́схи с припе́вы и́х:
Стихиры Пасхи, глас 5-й.
Стих: Да воскре́снет Бог, и расточа́тся врази́ Его́.
Па́сха свяще́нная нам днесь показа́ся: Па́сха но́ва, свята́я, Па́сха та́инственная, Па́сха всечестна́я, Па́сха, Христо́с Изба́витель; Па́сха непоро́чная, Па́сха вели́кая, Па́сха ве́рных; Па́сха, две́ри ра́йския нам отверза́ющая, Па́сха, всех освяща́ющая ве́рных.
Стих: Я́́ко исчеза́ет дым, да исче́знут.
Прииди́те от виде́ния, жены́ благове́стницы, и Сио́ну рцы́те: приими́ от нас ра́дости благове́щения Воскресе́ния Христо́ва; красу́йся, лику́й и ра́дуйся, Иерусали́ме, Царя́́ Христа́ узре́в, из гро́ба, я́́ко Жениха́, происходя́́ща.
Стих: Та́ко да поги́бнут гре́шницы от лица́ Бо́жия, а пра́ведницы да возвеселя́́тся.
Мироно́сицы жены́, у́тру глубоку́, предста́вша гро́бу Живода́вца, обрето́ша А˜нгела, на ка́мени седя́́ща, и той провеща́в им, си́це глаго́лаше: что и́щете Жива́го с ме́ртвыми? Что пла́чете Нетле́ннаго во тли? Ше́дше пропове́дите ученико́м Его́.
Стих: Сей день, его́же сотвори́ Госпо́дь, возра́дуемся и возвесели́мся вонь.
Па́сха кра́сная, Па́сха, Госпо́дня Па́сха! Па́сха всечестна́я нам возсия́́. Па́сха! Ра́достию друг дру́га обы́мем. О Па́сха! Избавле́ние ско́рби, и́бо из гро́ба днесь, я́́ко от черто́га, возсия́́в Христо́с, жены́ ра́дости испо́лни, глаго́ля: пропове́дите апо́столом.
Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.
Воскресе́ния день, и просвети́мся торжество́м, и друг дру́га обы́мем; рцем: бра́тие! и ненави́дящим нас, прости́м вся Воскресе́нием, и та́ко возопии́м: Христо́с воскре́се из ме́ртвых, сме́ртию смерть попра́в, и су́щим во гробе́х живо́т дарова́в.
Христо́с воскре́се из ме́ртвых, сме́ртию смерть попра́в, и су́щим во гробе́х живо́т дарова́в. (Трижды)
Ектении и обы́чный отпу́ст. И лити́а вне́ оби́тели. Часы́ же по обы́чаю па́схи.
На литурги́и антифо́ны па́схи, проки́мен апо́стола, гла́с 6: Помяну́ и́мя Твое́ во вся́ком ро́де и ро́де. Сти́х: Слы́ши дщи́ и ви́ждь, и приклони́ у́хо твое́. И прокимен, глас 3, песнь Богородицы:
Вели́чит душа́ Моя́ Го́спода, и возра́довася дух Мой о Бо́зе, Спа́се Мое́м.
Апо́стол дея́ний: зача́ло 5: Рече́ Пе́тр к лю́дем: И Богородицы,
Послание к филипписием, зачало 240: Бра́тие, сие́ да му́дрствуется в вас:
Аллилу́иа, гла́с 2: Вели́чит душа́ моя́ Го́спода, и возра́довася ду́х мо́й о бо́зе спа́се мое́м. Сти́х: Я́ко призре́ на смире́ние рабы́ своея́, се́ бо от ны́не ублажа́т мя́ вси́ ро́ди. Ева́нглие от Иоа́нна, зача́ло 4: Стоя́ше Иоа́нн: И Богородицы,
Евангелие от Луки, зачало 54: Во вре́мя о́но, вни́де Иису́с в весь не́кую.
Поем задостойник Пасхи.
Прича́стный: Те́ло Христо́во: И Богородице: Ча́шу спасе́ния прииму́, / и и́мя Госпо́дне призову́. / Аллилу́иа, трижды.
Егда же настоятель глаголет: Со стра́хом Бо́жиим и ве́рою приступи́те. Мы вместо, Благословен грядый во имя Господне: поем: Христо́с воскре́се: единожды. Настоятель глаголет: Спаси́ Бо́же лю́ди Твоя́: И мы: Христо́с воскре́се: единожды. Егда же изглаголет иерей: Всегда́ ны́не и при́сно: И мы: Христо́с воскре́се: единожды. Посем ектениа. Вместо же, Буди имя Господне: и вместо псалма, Благословлю Господа: поем: Христо́с воскре́се: дванадесять, и множае: дондеже анафора от игумена раздастся. Таже настоятель, Благослове́ние Госпо́дне на вас: Лик: Ами́нь. Посем настоятель вместо, Слава Тебе Христе Боже: поет: Христо́с воскре́се из ме́ртвых, / сме́ртию смерть попра́в. И лик: И су́щим во гробе́х живо́т дарова́в. Посем настоятель глаголет отпуст со Крестом по обычаю.