Служба на честь Києво-Братської ікони Божої Матері

Месяца июня во 2 день

Служба Пресвятой Богородице ради чудотворного образа Ея
«Киево-Братскаго»

НА ВЕЛИЦЕЙ ВЕЧЕРНИ

Блажен муж, первый антифон.

На «Господи воззвах» стихир 6, во глас 8.

Приидите, людие земли Киевския, купели Днепровския плоде благословенный, роде избранный, царское священие, купно с ангельскими воинствами воспоим Царицу Небесе и земли, и от сердца принесем Ей молитвы и прошения, да от бед избавление приемлем, со Архангелом вопиюще: Благодатная, радуйся с Тобою Господь.

Приидите, наследницы Владимира преславнаго, пения и молитвы принесем Всемилостивой Владычице Богородице, в дивном образе ея Киево-Братстем, имже от напастей свобождаемся и от скорби всякия невредимы пребываем, темже, лик Ея пречудный лобызающе, с Гавриилом взывати дерзаем: Благодатная, радуйся с Тобою Господь.

Приидите, Христовы ученицы, песнь всеумиленную воспоим Царице Деве Богородице, и в молитвах прославим Тоя преславный образ, имже земля Киевская светом благодатным просвещается, и людие во истинней вере наставляются, и всякая тварь, обновляема, воспевает Ти пение Архангельское: Благодатная, радуйся с Тобою Господь.

Ины стихиры, глас 2.

Днесь воспоим христолюбивии людие, дивное промышление о нас Пресвятыя Богородицы, почтим икону Ея, в Вышгороде явленную и по водам днепровским в Киев пришедшую, яко сокровище многоценное обители Братстей дарованную, богомудрым инокам и учащимся покров и заступление. Темже, молимся, и нас теплым Твоим попечением сохрани, и спаси души наша, яко милостивая Владычица.

Днесь Академия Киевская преславныя песни Приснодеве Богородице приносит, Еяже образ светло почитающе, во умилении сердец взывает сице: Мати Божия, Владычице Всепетая, молитвами Твоими сохрани нас и просвети умы и сердца всех зде учащих и учащихся, да купно со всеми святыми прославим великия милости Твоя, милостивая Владычице.

Днесь радости исполняются лицы Небесныя и веселия вечнаго причастницы быти сподобляются земнороднии, се бо Дева Владычица Богородица, Покровом милости Своея осеняет Академию Киевскую и от всякия напасти избавление подает неотступно всем учащим и учащимся, да, Божественную Премудрость постигающе, сынове Света явятся, со всеми святыми Твоя милости воспевающе, милостивая Владычице.

Слава и ныне, глас 6.

Кто не воспоет Тя, Дево Богородице, Премудрости Ипостасныя Всепетая Мати, ангелов утешение и земных попечение! Благодатию Сына Твоего просвети умы и сердца наша, радости Начало и благих Насадительнице, жизни исправление и царственный Покрове, да купно с лики ангельскими пети Тебе сподобимся: радуйся, Благодатная, Господь с Тобою.

Вход. Прокимен дня и чтения три.

Бытия чтение.

Изыде Иаков от студенца клятвеннаго и иде в Харрань. И обрете место, и спа тамо: зайде бо солнце, и взят от камения места того, и положи возглавие себе, и спа на месте оном. И сон виде. И се лествица, утверждена на земли, eяже глава досязаше до небес, и Ангели Божии восхождаху и низхождаху по ней. Господь же утверждашеся на ней, и рече: Аз Бог Авраамов, отца твоего, и Бог Исааков, не бойся: земля, идеже ты спиши на ней, тебе дам ю и семени твоему. И будет семя твое, яко песок земный, и распространится на море, и ливу, и север, и на востоки; и возблагословятся о тебе вся колена земная и о семени твоем. И се Аз с тобою, сохраняяй тя на всяком пути, аможе аще пойдеши. И возвращу тя в землю сию, яко не имам тебе оставити, дондеже сотворити Ми вся, елика глаголах тебе. И воста Иаков от сна своего, и рече: яко eсть Господь на месте сем, аз же не ведех. И убояся, и рече: яко страшно место сие; несть сие, но дом Божий и сия врата Небесная.

Пророчества Иезекиилева чтение.

Тако глаголет Господь: будет от дне осмаго и прочее, сотворят иереи на олтари всесожжения вашего и яже спасения вашего, и прииму вы, глаголет Адонаи Господь. И обрати мя на путь врат святых внешних, зрящих на востоки, и сия бяху затворена. И рече Господь ко мне: врата сия затворена будут и не отверзутся, и никтоже пройдет сквозе их; яко Господь Бог Израилев пройдет ими, и будут затворена. Яко Игумен сядет в них снести хлеб, по пути Еламских врат внидет и по пути его изыдет. И введе мя по пути врат святых, сущих к северу, прямо храму, и видех, и се исполнь славы храм Господень.

Притчей чтение.

Премудрость созда Себе дом и утверди столпов седмь. Закла Своя жертвенная, и раствори в чаши Своей вино, и уготова Свою трапезу. Посла Своя рабы, созывающи с высоким проповеданием на чашу, глаголющи: Иже есть безумен, да уклонится ко Мне. И требующим ума рече: Приидите, ядите Мой хлеб, и пийте вино, еже растворих вам. Оставите безумие и живи будете, и взыщите разума, да поживете, и исправите разум в ведении. Наказуяй злыя приимет себе безчестие, обличаяй же нечестиваго опорочит себе: обличения бо нечестивому раны ему. Не обличай злых, да не возненавидят тебе. Обличай премудра, и возлюбит тя. Даждь премудрому вину, и премудрший будет. Сказуй праведному, и приложит приимати. Начало премудрости страх Господень и совет святых разум: разумети бо закон помысла есть благаго. Сим бо образом многое поживеши время, и приложатся тебе лета живота.

На литии стихиры, глас 6.

Твоего изображения явлением, Владычице, Вышгород славный украшается, сияет чудесы и исцелении, воды днепровскими к земли Киевстей странно принесенным образом чудотворным, к немуже людие усердно притекают, и помощь изобильно приемлют. Темже Тебе припадаем и, лобызая образ Твой, умильно вопием: мир душам нашим даруй, яко Благосердная Мати.

Слава, и ныне, глас тойже.

Что ныне зрим о Тебе, Владычице Мати Божия? Светло показуеши всему миру Господа Христа, Иже исцели древнюю язву Адамову, и печаль Евы на радость преложи, порази бо главу древняго змия, человекоубийцы искони диавола, и к Царствию Божию приведи избранныя Своя. Темже Тебе, яко Матери Божией, умильно вопием: спаси души наша яко Благая.

На стиховне стихиры, глас 4.

Веселися днесь светло, Академия Киевская, любовию почитающе честный образ Богоматери, источающий нам великия и богатыя милости, имиже от напастей свобождаемся, и от всякия скорби невредимы пребываем, темже припадающе к нему во умилении взываем: Владычице, просвети нас светом Сына Твоего.

Стих: Слыши Дщи, и виждь, и приклони ухо Твое.

Призри, Всемилостивая Богородице, на чад Твоих, и испроси нам у Сына Своего и Бога нашего просвещение разума к полезному научению мудрости, и помраченный наш ум, Владычице, просвети светом Сына Твоего.

Стих: Лицу Твоему помолятся богатии людстии,

Списанию предивнаго лика Твоего благоговейно предстояще, яко живей Ти сущей с нами, молитвы и ходатайства приносим: не остави нас, Владычице, милостию Своею, но от бед избави чада Твоя, разве бо Тебе иныя помощи не вемы, Владычице, просвети нас светом Сына Твоего.

Слава, и ныне, глас 5.

Пение достодолжное и благодарение смиренное приносим Ти, Владычице, яко посетила еси град наш явлением чудотворныя иконы Твоея Киево-Братския. Укрепи ны в прехождения бурнаго моря житейскаго, пристанища же Сына Твоего достигнути сподоби, и избави ны от муки в день Судный.

На благословении хлебов тропарь, глас 4.

Днесь притецем, вернии, к чудотворному образу Божия Матере, во граде Вышгороде посиявшему, и в Киево-Братский монастырь волнами днепровскими чудесно принесенному, иже многия чудеса и знамения яви. И нас, грешных, не отрини, о Владычице, усердно молящих Ти ся, но сохрани ны, якоже древле, покровом Твоим, да явимся наследницы жизни вечныя.

НА УТРЕНИ.

По первом стихословии седален, глас 2.

Моления наша приими, Мати Всепетая, Божественная Скиние Слова, к Тебе, Богородительнице, взываем: сохрани Лавру Печерскую, в нейже списанием образа Своего пребываеши, и Академию в единомыслии и твердей вере соблюди, ейже Покровительница нареклася еси.

Слава, и ныне, тойже.

По втором стихословии, седален, глас 1.

К Твоему Пречудному Образу во умилении припадающе, моления и молитвы приносим, Всечистая: отжени от нас всякия напасти и искушения, утоли лютыя скорби, и милостию Твоею от бед избави рабы Твоя.

Слава, и ныне, тойже.

Полиелей.

Величание: Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Или сие: Достойно есть величати Тя, Богородице, честнейшую Херувим и славнейшую без сравнения Серафим.

Псалом избранный:

Помяни, Господи, Давида и всю кротость его. Преславная глаголашася о Тебе, граде Божий. Яко избра Господь Сиона, изволи его в жилище Себе. Освятил есть селение Свое Вышний. Святыня и велелепота во святиле Его. Свят храм Твой, дивен в правде. Дому Твоему подобает святыня, Господи, в долготу дний.

По полиелеи седален, глас 8.

Радуйся и ликуй Киеве богоспасаемый, се бо Владычица в дивном образе Своем Киево-Братском тебе водами достиже. О, Госпоже, Безневестная Мати, благослови люди Твоя и веселия исполни сердца нас, песни и пения духовныя приносящих Ти, ко благому и полезному учению направи ны, и в Православии утверди, рабы бо Твоя спасаеши присно от всяких лютых.

Антифоны степенны 4 гласа: От юности моея.

Прокимен, глас 4. Помяну имя Твое во всяком роде и роде.

Стих: Лицу Твоему помолятся богатии людстии.

Всякое дыхание. Евангелие Луки, зачало 4: Во дни оны, воставши Мариам.

Слава, Молитвами Богородицы. И ныне, Молитвами Богородицы.

По 50-ом псалме, стихира, глас 6.

Кто ны укрепит и ободрит, грехами отягченных и в житейском мори потопляемых? Токмо Ты, о Госпоже Владычице! Сего ради умильно вопием Ти: направи умы и сердца наши ко просвещению, Академию Киевскую заступи всемощным Твоим ходатайством, скорое поможение и Матерний покров даруй всем нам, не презри нас в падениих наших, но сохрани и спаси, яко Мати Милосердная.

Канон Богородице, егоже краестрочие в тропарех:
Радуйся, Богородице, Академии похвало.

Глас 4.
Песнь 1.

Ирмос. Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Радостию сердца и души наполняюще, приидите празднолюбцы, в песнех возвеличим Академии нашея Похвалу, воспевающе Тоя чудеса.

Ангельскими чинми достойно воспеваемая, Всеблагословенная Владычице, в дивном образе Своем Киево-Братском град Вышгород прославила еси, Киев же украсила еси, идеже людие Богоименнии радующеся поют Твоя чудеса.

Древле от варварского нашествия образ Твой, Богородице, сохранися, имже и единого от агарян ко Христу привела еси. И нас Сыну Твоему вечно соедини, воспевающих Твоя чудеса.

Ужаса губительного агарянина избавила еси образом Своим, спасение ему в водах днепровских подающи и от потопления избавляющи, к жизни нестареемой призвав, идеже со Ангелы воспевает Твоя чудеса.

Песнь 3.

Ирмос. Твоя песнословцы, Богородице, живый и независтный Источниче, лик себе совокупльшия, духовно утверди, в божественней Твоей славе венцев славы сподоби.

Источниче милостей неоскудеваемых, Владычице Всепетая, смиренное моление Тебе приносим и просим всеусердно: не остави град наш, иже с благоговением прият образ Твой, яко сокровище богатное, но присно гражданы его заступи и венцев славы сподоби.

Собрание иноков прият Тя во обитель Богоявленскую, идеже словеса похвальная и пения всеумильная благоволила прияти, милости Своя на Тя Богородицу право исповедующих изливающи, и венцев славы сподобляющи.

Языками Ангельскими воспеваема еси, Богородице Дево, мы же на земли молим Тя прилежно: щедротами Твоими вся ны от искушений и бед свободи, и в божественней Твоей славе венцев славы сподоби.

Богоразумием и истиною просвети души наша, о Богомати, Ты бо, аще и поругания образа Твоего от нечестивых претерпела еси, обаче от рода человеческаго не отвратилася еси, ко спасению его приводящи и венцев славы сподобляющи.

Седален, глас 4.

Моление теплое приносим Ти, Владычице, и во умилении взываем: не остави рабы Твоя, но милостей Твоих одожди росу благодатную, да от бед избавльшеся, благодарственное пение воспоем Ти, Дево Всепетая.

Песнь 4.

Ирмос. Седяй в славе на Престоле Божества во облаце легце, прииде Иисус пребожественный, нетленною дланию и спасе зовущия: слава, Христе, силе Твоей.

Одигитрие Всеславная, наставников радование и учащихся во обители Твоей в богословии укрепление, молитвы Спасу и Господу пети научающая зовущих: слава, Христе, силе Твоей.

Гроздие всеславнии великаго вертограда Господня явишася ученицы школы Братския, иже молитвою пред образом Твоим в богословии просвещаеми, верных пети научили суть: слава, Христе, силе Твоей.

Огненосную твердость духа и крепость веры якоже и древле подаждь, Владычице, всем, образу Твоему предстоящим и молитвы Сыну Твоему и Богу нашему приносящим: слава, Христе, силе Твоей.

Раем воистину явися обитель Твоя, Богомати Пречистая, в нейже чада Твоя Евангельских заповедей и апостольских проповеданий восприемницы явишася, во вся концы земли в благовестии изшедше, песнь победную Господеви взывающе: слава, Христе, силе Твоей.

Песнь 5.

Ирмос. Ужасошася всяческая о божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Огнем любве Твоея распали сердца наша, Дево Владычице, всеумиленно пред образом Твоим молящимся, Ты бо еси Покров и заступление людем христоименитым, всем воспевающим Тя мир подающая.

Духа Премудрости помози стяжати рабом Твоим, Мати Чистая, якоже иногда образу ангельскому поревновавшим, и во святительстве Богови поработавшим, веру укрепи в сердцах наших, всем воспевающим Тя мир подающая.

Израстила еси, Мати Бога Живаго, в школе Братстей святители богомудрыя со иноки преславными, от нихже мнози вернии учение спасительное приемше, Тя воспеша, мир им подающую.

Церкве Христовы служителем и нивы Господней делателем Ты еси присное заступление, Дево Преславная, иже усердно Безлетнаго Сына Твоего проповедают, Тя же воспевают, мирови мир подающую.

Песнь 6.

Ирмос. Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

Евангельскими словесы просвети ны, Владычице, да сих явимся проповедницы и, апостолом последствующе, сподобимся явитися усердными делателями вертограда Христова, Рождество Его от Тебе прославляюще.

Академии Киевския Ты еси велие сокровище, учащих и учащихся духом Премудрости обогащающи и сердца боговедением просвещающи, да постигше всеусердно Премудрость богословия, от Тебе Рождшагося Бога прославляют.

Красноплетенными пении Тя, Богородице, архиереи ныне похваляют, священницы со монахи покланяются, ученицы же молитву творят, и вси вернии от Тебе Рождшагося Бога немолчно прославляют.

Адамантовы крепости и силы непреоборимыя исполни рабы твоя, Владычице, да противоставше искушениям мира, победители его ходатайством Твоим явятся, и песньми победными от Тебе рождшагося Бога восславят.

Кондак, глас 4.

Заступнице усердная и Помощнице христиан православных, сокровище неиждиваемое верных, украшение Академии Киевския, призри на ны, образ Твой чтущия, буди нам Мати и Ходатаица, и научи нас творити спасительныя заповеди Божественнаго Сына Твоего, Христа Бога нашего.

Икос: Образу Твоему честному днесь предстояще и зряще Тя, Всемилостивую Богородицу, Вместилище Невместимаго и Преславнейшую Херувим, Купину неопалимую и всеорошенное Руно, Лествицу Небесную и Гору несекомую, непроходимая Врата и Свиток богописанный, недоумением одержими есмы, обаче благодатию Твоею укрепляеми, во умилении дерзаем взывати: Мати и Заступнице, научи нас творити спасительныя заповеди Божественнаго Сына Твоего, Христа Бога нашего.

Песнь 7.

Ирмос. Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Достодолжно память Твою совершающе, Всесвятая Дева Богородице, смиренно просим милости и щедрот Академии нашей от Христа Бога, Иже Един препетый отцев Господь и Бог благословенный.

Единогласно насельницы обители сея ныне радуются в торжестве Твоем, Пречистая, светло прославляюще образ Твой Киево-Братский, Сыну же Твоему поюще: препетый отцев Господь и Бог, благословен еси.

Мудрости неоскудеваемыя исполни Тя ныне почитающих и образ Твой прославляющих, подающи вся потребная к научению, да истинно богословствовати навыкше, Христу воспоют: препетый отцев Господь и Бог, благословен еси.

Имущи списание пречуднаго лика Твоего, Всепетая, школа духовная богатства исполнися духовнаго, наставники со ученики пети Спасу подвизающи: препетый отцев Господь и Бог, благословен еси.

Песнь 8.

Ирмос. Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Исповедание Тебе приносяще, яко Деве и Богородице, Тебе зовем всеумиленно: да благословит Христос богомудрыя архиереи и наставники наша, со любовию научающия Господа воспевати и превозносити Его во вся веки

Пчелы богословия, Дево Пренепорочная, явила еси наставники наша, медом учений своих юных наслаждающия и глад мысленный утоляющия, да в просвещении умов наученнии, Господа сладце делы своими воспоют и превознесут Его во вся веки.

Облаком щедрот любве Твоея, Мати Всепетая, покрый всех, учение зде во умудрении подавших и со тщанием сие приявших, тии бо во вся концы под Покровом Твоим изшедше, верных неленостно взывати научают: Господа пойте, дела, и превозносите Его во вся веки.

Хвала апостолов Ты еси и мучеников укрепление, святителей величание и Церкве столп недвижимый, затворников собеседнице и пресвитеров славо, Дево Всепетая, благослови ныне всех, образу Твоему всечестному предстоящих, и пети сподоби: Господа пойте, дела, и превозносите Его во вся веки.

Песнь 9.

Ирмос. Всяк земнородный да взыграется, Духом просвещаемь, да торжествует же безплотных Умов естество, почитающее священное торжество Богоматере, и да вопиет: радуйся, Всеблаженная Богородице, чистая Приснодево.

Воспеваем величие Твое, Всемилостивая, проповедующе милости и щедроты, яже изобильно чрез списание образа Твоего во храме Твоем изливаеши всем, приходящим к Тебе и во умилении зовущим: радуйся, Всеблаженная Богородице, чистая Приснодево.

Академия Киевская Тобою хвалится, во смирении молитву творящи и всех святых в ней прославльшихся к Тебе приводящи, яко Небесных заступников и предстателей наших, купно с ними зовущи: радуйся, Всеблаженная Богородице, чистая Приснодево.

Троичен: Лику апостольскому подражающе, труды приносим Ти, Безлетне Отче, по слову Сына Твоего Евангелие в Дусе Святом благовествующе, Матери же Божией вопиюще: радуйся, Всеблаженная Богородице, чистая Приснодево.

О, Всепетая Мати, неизреченно рождшая Господа Иисуса, во Ипостаси Своей Бога и Человека неизменно миру явившаго, прими ныне глас моления нашего и помилуй всех иноков обители Твоея, учащих и учащихся, со благоговением к Лику Твоему прибегающих и радостию поющих: радуйся, Всеблаженная, Богородице, чистая Приснодево.

Светилен, глас 4.

Светом Сына Твоего просвети, Богородице Дево, очи всех, образу Твоему Киево-Братскому припадающих и умиленно просящих, да молитвами Твоими во Свете Тихом водворимся и вкупе с небесными заступники Академии нашея и со всеми святыми наследницы жизни вечныя явимся.

На хвалитех стихиры 4, глас 4.

Красуйся богонасажденный вертограде Премудрости Божественныя, Академие преславная во граде Киеве, осеняемая образом Всемилостивыя Владычицы, на негоже взирати дерзаем и мольбы приносим: Мати Всепетая, немощствующия наша души посети, во время испытаний направи ны на пути мирныя, и соблюди нескверными, и соделай достойными Царствия Сына Твоего Христа Бога нашего. (дважды)

Воспоем в песнех духовных предивное явление Богоматери, и со умилением взирая на образ Ея святый, возопиим; о, Дево, Госпоже и Владычице, в любомудрии учащихся возращающая и к истинному богопознанию приводящая, возвышающая падшее к чертогу Горнему, подай мир и тишину ко благому совершению, Ангельскими лики хвалимая и человеческими усты возносимая, исходатайствуй нам благий ответ в день Судный.

Днесь праздник честен и день веселия наста, явление Киево-Братского образа Твоего, воньже хваления Ти приносим и велиим гласом взываем: избави от всякого обстояния вся обители и грады христианския, Ты бо еси мира скорая Помощница, многия бо чудеса изливающи от дивнаго лика Своего. Вертоград Твой удобри и милости неоскудныя у Сына Своего испроси, ко спасительному разумению научения во славу Церкви Православныя, Богомати, сподоби.

Слава, и ныне, глас 2.

Украсила еси чертог Свой, Чистая, явлением чудного списания лика Своего, да ликует Лавра Печерская и срадуется ей Академия Киевская, под покровом Богоматери добрый плод произрастившая: архиереи и пастыри, иноки же и бельцы, воспитавшиися зде в Православии и твердей вере. Простри длани Своя и не остави нас, всегда надеющихся на Тя, прошения наша к полезному исполни и лета живота нашего Твоим поможением сохрани, Тя бо едину Наставницу и Заступницу нашу величаем.

Славословие великое, тропарь, ектении и отпуст.

НА ЛИТУРГИИ

Служба вся Богородицы