Прохання на сугубій єктенії та молитва о передчасно народжених немовлятах

ПРОШЕНИЯ НА СУГУБОЙ ЕКТЕНИИ:

До́ндеже вре́мя е́сть добро́ твори́ти повеле́вый усты́ апосто́льскими, Го́споди, благослови́ ве́рных Твои́х послужи́ти младе́нцам, изволе́нием Про́мысла Твоего́ пре́жде вре́мене в ми́р прише́дшым в не́мощи и боле́зни, да яви́ши на ча́дех си́х вели́кую и бога́тую Ми́лость Твою́, Всеще́дре Спа́се, мо́лимтися, услы́ши и поми́луй.

Влады́ко Вседержи́телю Христе́, време́н Царю́, не попуска́яй и вла́су с глав рабо́в Твои́х па́сти без произволе́ния Твоего́, вся́ческая обраща́яй ко бла́гу и вся ко спасе́нию приводя́й Всеблаги́м Твои́м Про́мыслом, мо́лим Тя: умы́ и ру́ки ле́карей напра́ви воздви́гнути в сла́ву Твою́ младе́нцев, недоно́шенных во чре́ве матери́нском, да во́зраста разуме́ния дости́гше, и ти́и ку́пно со все́ю Це́рковию благодаря́т Тя́, Промысли́теля и Спаси́теля; рце́м вси: услы́ши и поми́луй.

МОЛИТВА О ПРЕЖДЕВРЕМЕННО РОЖДЕННЫХ МЛАДЕНЦАХ:
(в неделю ближайшую к 17 ноября)

Влады́ко Го́споди Вседержи́телю, роди́выйся от Пречи́стыя Влады́чицы на́шея Богоро́дицы и Присноде́вы Мари́и, я́ко Младе́нец в я́слех возлеги́й, из уст младе́нец хвалу́ воприе́мый; исцеля́яй вся́кий неду́г и вся́кую я́зву, и от сме́рти избавля́яй! Сам, Спа́се, сих младе́нцев, пре́жде вре́мени в мир немощны́х прише́дых веле́нием недове́домым и непости́жным изволе́нием Про́мысла Твоего́, возста́ви от одра́ боле́зни, соблюди́ от вся́каго я́да, вся́кия лю́тости и вся́кия бу́ри сопроти́внаго, и от всех духо́в лука́вых, боле́зни исцели́, и здра́вие и благомо́щие души́ же и те́лу да́руй, и А́нгелы све́тлыми сих огради́, и неврежде́нных от вся́каго зла соблюди́.

Некреще́нныя сподо́би без промедле́ния просвеще́нным бы́ти благода́тию Свята́го Креще́ния и поклони́тися земно́му хра́му Твоему́, его́же угото́вал еси́ во славосло́вие и́мени Твоего́ свята́го!

Ей, Го́споди, от неду́га и сла́бости избавля́юще, огради́ чад сих от ро́пота, презре́ния и не́нависти! Не оста́ви си́рыми неви́нных младе́нцев сих, укрепи́ их, Бо́же, направля́яй на путь И́стины Твоея! Роди́телей сих младе́нцев укрепи́, ле́карей умудри́, служа́щих им наста́ви!

Благослови́, Бо́же, и сохрани́ всех младе́нцев, пре́жде вре́мени рожде́нных, моли́твами Пресвяты́я, Пречи́стыя, Преблагослове́нныя, Сла́вныя Влады́чицы на́шея Богоро́дицы и Присноде́вы Мари́и, хода́тайством преподо́бнаго Стилиа́на Пафлагони́тскаго, чадозасту́пника, святых седми́ отроко́в Ефе́сских, му́ченика Гаврии́ла младе́нца и все́х святы́х, Неизрече́нною Ми́лостию Твое́ю.

Я́ко да и от уст младе́нческих Тебе́ вся́кая сла́ва, че́сть и поклоне́ние воздае́тся со Отце́м и Святы́м Ду́хом, ны́не и при́сно и во ве́ки веко́в. Ами́нь.

Залишити коментар

Ваша e-mail адреса не оприлюднюватиметься. Обов’язкові поля позначені *