Прохання додаткові на сугубій єктенії
Из уст святы́х оте́ц Со́лнцем пра́вды нарече́нный, Христе́ Бо́же, при́зри на младе́нцев и отроко́в, и́хже детьми́ со́лнца нарека́ют, имя рек, и яви́ на ча́дех сих ми́лости Своя́ неоскудева́емыя, да уве́дят вси сла́ву Твою́, и да реку́т: се вои́стинну де́ти Христо́вы; мо́лимтися, услы́ши и поми́луй.
О ни́хже мо́лим Тя, Спа́се, ороси́ благода́тию сердца́ чад и отроко́в сих, укрепля́я их здра́вие душе́вное и теле́сное; ми́лостивно услы́ши, Бла́же, и ско́ро поми́луй.
Се аз и ча́до, е́же ми даде́ Бог — вложи́ сицево́е разуме́ние, Спа́се, в умы́ роди́телей дете́й сих, сердца́ их любо́вию нелицеме́рною исполня́я, науча́я му́дрости, избавля́я уны́ния и ропта́ния, обогаща́я терпе́нием ве́лиим; мо́лимтися, Ще́дре и Человеколю́бче, услы́ши и поми́луй.
Молитва
Сердцеве́дче Бо́же, та́инственно бытие́ ми́ра из небытия́ устро́ивый во́лею Твое́ю, Со́лнце положи́вый на тве́рди небе́сней и повеле́вый тому́ тепло́м и све́том зе́млю до́бре согрева́ти и освеща́ти. Ты же па́че любо́вию Свое́ю все мирозда́ние сохраня́еши, пита́еши и возгрева́еши, Го́споди; плачь в ра́дость обраща́еши, вре́тище ско́рби мно́гажды растерза́еши и препоясу́еши весе́лием ве́рных Твои́х. Ве́дуще, я́ко упова́ющаго на Тя ми́лость обы́дет, про́сим: заступи́, спаси́ и сохрани́ от вся́каго зла́го обстоя́ния младе́нцев и отроко́в сих, и́же детьми́ со́лнца нарека́ются, и сла́ву Твою́ яви́ на ни́х.
Я́ко Ты еси́ ра́дование и весе́лие ча́д Твои́х, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.