Чин освячення каплиці

ПОСЛЕДОВАНИЕ ОСВЯЩЕНИЯ ЧАСОВНИ

Поставляется столéц, пáволокою покровéнный, и освящéнная водá в сосýде.

Пришéд же архиерéй прéд столéц, полагáет на нéм крéст и Евáнгелие, и начинáет обы́чно.

Протодиáкон: Благослови́, (высоко-) преосвящéннейший влады́ко.

Архиерéй: Благоcловéн Бóг нáш:

Ли́к: Ами́нь.

Протодиáкон: Слáва Тебé Бóже нáш, слáва Тебé.

И пою́т: Царю́ Небécный:

И áбие учинéнный чтéц: Трисвятóе и по Отче нáш: Гóсподи поми́луй, 12. Слáва, и ны́не: Прииди́те, поклони́мся:

Тáже псалóм и бывáет каждéние

Псалóм 133.

Сé, ны́не благослови́те Гóспода, вси́ раби́ Госпóдни, стоя́щии в хрáме Госпóдни, во двóрех дóму Бóга нáшего. В нóщех воздежи́те рýки вáша во святáя и благослови́те Гóспода. Благослови́т Тя́ Госпóдь от Сиóна, сотвори́вый нéбо и зéмлю.

Слáва, и ны́не:

Аллилýиа, аллилýиа, аллилýиа, слáва Тебé Бóже (3)

Протодиáкон: Бóг Госпóдь, и яви́ся нáм, благословéн гряды́й во и́мя Госпóдне.

Сти́х: Исповéдайтеся Гóсподеви, я́ко блáг, я́ко в вéк ми́лоcть Егó.

Сти́х: Обышéдше обыдóша мя, и и́менем Госпóдним противля́хся и́м.

Сти́х: Не умрý, но жи́в бýду и повéм делá Госпóдня.

Сти́х: Кáмень, егóже небрегóша зи́ждущии, сéй бы́сть во главý ýгла: от Гóспода бы́сть сéй, и éсть ди́вен во очесéх нáших.

Ли́к: Бóг Госпóдь, и яви́ся нáм, благословéн гряды́й во и́мя Госпóдне.

И тропáрь хрáма.

Слáва, и ны́не: Обновлéния, глáс 4:

Якоже вы́шния твéрди благолéпие, и ни́жнюю споказáл еси́ красотý святáго селéния слáвы Твоея́, Гóсподи, утверди́ сиé во вéк вéка, и приими́ нáша в нéм непрестáнно приноси́мая Тебé молéния Богорóдицею, всéх Животé и Воскресéние.

[Áще извóлит Архиерéй или́ учинéнный иерéй, возгласи́т проки́мен и чтéт Евáнгелие:

Протодиáкон: Вóнмем. Премýдрость.

Проки́мен, глáс 4: Гóсподи, возлюби́х благолéпие дóму Твоегó / и мéсто селéния слáвы Твоея.

Ли́к: Гóсподи, возлюби́х благолéпие дóму Твоегó и мéсто селéния слáвы Твоея́.

Протодиáкон, сти́х: В цéрквах благословлю́ Тя, Гóсподи.

Ли́к: Гóсподи, возлюби́х благолéпие дóму Твоегó и мéсто селéния слáвы Твоея́.

Протодиáкон: Гóсподи, возлюби́х благолéпие дóму Твоегó.

Ли́к: И мéсто селéния слáвы Твоея́.

Протодиáкон: Гóсподу помóлимся.

Ли́к: Гóсподи, поми́луй.

Архиерéй: Яко свя́т еси́ Бóже нáш, и во святы́х почивáеши, и Тебé слáву возсылáем, Отцý и Сы́ну и Святóму Дýху, ны́не и при́сно и во вéки векóв.

Ли́к: Ами́нь.

Протодиáкон: Вся́кое дыхáние да хвáлит Гóспода.

Ли́к: Вся́кое дыхáние да хвáлит Гóспода.

Протодиáкон: Хвали́те Бóга во святы́х Егó, хвали́те Егó во утвержéнии си́лы Егó.

Ли́к: Вся́кое дыхáние да хвáлит Гóспода.

Протодиáкон: Вся́кое дыхáние.

Ли́к: Да хвáлит Гóспода.

Протодиáкон: И о сподóбитися нáм слы́шанию святáго Евáнгелия Гóспода Бóга мóлим.

Ли́к: Гóсподи поми́луй, три́жды.

Протодиáкон: Премýдрость, прóсти услы́шим святáго Евáнгелия.

Архиерéй: Ми́р всéм.

Ли́к: И дýхови Твоемý.

Архиерéй: От Матфéя святáго Евáнгелия чтéние.

Ли́к: Слáва Тебé Гóсподи, слáва Тебé.

Протодиáкон: Вóнмем.

Евáнгелие от Матфéя, зачáло 20, от полý

Речé Госпóдь: проси́те, и дáстся вáм: ищи́те, и обря́щете: толцы́те, и отвéрзется вáм. Вся́к бо прося́й приéмлет, и ищя́й обретáет, и толкýщему отвéрзется. Или́ ктó éсть от вáс человéк, егóже áще воспрóсит сы́н егó хлéба, едá кáмень подáст емý? Или́ áще ры́бы прóсит, едá змию́ подáст емý? Áще ýбо вы, лукáви сýще, умéете дая́ния блáга дая́ти чáдом вáшим: кольми́ пáче Отéц вáш Небécный дáст блáга прося́щим у Негó.

Ли́к: Слáва Тебé Гóсподи, слáва Тебé.]

Протодиáкон: Поми́луй нáс Бóже, по вели́цей ми́лости Твоéй, мóлим Ти ся, услы́ши, и поми́луй.

Ли́к: Гóсподи поми́луй, три́жды.

Прилага́ется и сие́:

Ещé мóлимся о начáльницех и прави́телех грáда сегó (или: вéси сея́) и о всéх во слáву Бóжию потруди́вшихся в созидáнии и благолéпнем украшéнии святы́я часóвни сея́.

Ли́к: Гóсподи поми́луй, три́жды.

Возглáс: Услы́ши ны Бóже Спаси́телю нáш, уповáние всéх концéв земли́ и сýщих в мóри далéче, и ми́лостив, ми́лостив бýди, Влады́ко, о гресéх нáших, и поми́луй ны.

Ми́лостив бо и Человеколю́бец Бóг еси́ , и Тебé слáву возсылáем, Отцý, и Сы́ну, и Святóму Дýху, ны́не и при́сно, и во вéки векóв.

Ли́к: Ами́нь.

И áбие протодиáкон: Гóсподу помóлимся.

Архиерéй же чтéт моли́тву:

Благодари́м Тя, Создáтелю нáш и Промысли́телю жи́зни нáшея, в Трóице слáвимый и покланяемый Бóже, о всéх, яже сотвори́л и твори́ши с нáми! Благодари́м, я́ко николи́же престаéши промышля́я о Цéркви, искуплéнней и утверждéнней чеcтнóю крóвию Гóспода нáшего Иисýса Хриcтá, на вся́кое врéмя подавáя нáм вся́, я́же ко спасéнию полéзная! Благодари́м Тя, я́ко вложи́л во ýм и сéрдце здáтелей хрáмины сея́ благи́й пóмысл и твéрдое намéрение здáние сиé соверши́ти и Тебé посвяти́ти, да прослáвится здé пресвятóе и пречýдное и́мя Твоé!

Гóсподи Бóже нáш, вездé сы́й и вся́ исполня́яй, от и́стинных поклóнников в дýсе и и́стине поклонéние ми́лостивно приéмляй, усéрдно мóлим Ти ся и прóсим: наи́тием Всесвятáго, Благáго и Животворя́щаго Твоегó Дýха да освяти́тся хрáмина сия́ в чéсть и пáмять святáго (имярéк) сооружéнная. Да бýдет онá, благодáтию Твоéю, прибéжище стрáждущим, утешéние скорбя́щим, начáток пути́ и́стиннаго, Тебé благоугóднаго. Да приходя́щии в ню на поклонéние Тебé, получáюще здé проси́мое, поучáются и́стине Твоéй и свои́ми дóбрыми делáми свéтят ми́ру.

Яко да и вси́ мы еди́неми усты́ и еди́нем сéрдцем слáвим пречеcтнóе и великолéпое и́мя Твоé, Отцá и Сы́на и Святáго Дýха, ны́не и при́сно, и во вéки векóв. Ли́к: Ами́нь.

Тáже кропи́т архиерéй часóвню свящéнною водóю глагóлюще:

Освящáется часóвня сия́ окроплéнием воды́ сея́ свящéнныя, во и́мя Отцá, и Сы́на, и Святáго Дýха, ами́нь.

Кли́рицы же кропя́т ю отвнé.

Лю́дие же пою́т настоя́щий тропáрь, глáс 1:

Спаси́, Гóсподи, лю́ди Твоя, и благослови́ достоя́ние Твоé, побéды на сопроти́вныя дáруя, и Твоé сохраня́я Крестóм Твои́м жи́тельство.

Посéм:

Протодиáкон: Премýдрость.

Архиерéй: Пресвятáя Богорóдице, спаси́ нáс.

Ли́к: Честнéйшую херуви́м:

Архиерéй: Слáва Тебé Христé Бóже, Уповáние нáше, слáва Тебé.

Ли́к: Слáва, и ны́не: Гóсподи поми́луй, три́жды. (Высо́ко-) Преосвящéннейший влады́ко, благослови́.

Архиерéй твори́т отпýст по обы́чаю.

Протодиáкон: Господи́ну и отцý нáшему Онýфрию, блажéннейшему митрополи́ту Ки́евскому и всея́ Украи́ны, и господи́ну нáшему (Высóко-) Преосвящéннейшему имярек, егоже есть область, богохрани́мей странé нáшей Украи́не, властéм, вóинству и нарóду ея́, начáльником и прави́телем грáда сего́, (или́: вéси сея),

(áще во учи́лищи: и всéм здé начáльствующим, учáщим и учáщимся:

áще во врачéбнице: и всéм труждáющимся и стрáждущым во врачéбнице сeй),

всéм потруди́вшимся в создáнии и благолéпнем украшéнии часóвни сея́ и всéм правослáвным христиáнам многая лéта.

И поeт ли́к: Многая лéта, три́жды.