Иерей: Благослове́н Бог наш, всегда́, ны́не и при́сно и во ве́ки веко́в.
Чтец: Ами́нь.
Сла́ва Тебе́, Бо́же наш, сла́ва Тебе́. Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Чтец: Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й: Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Чтец: Ами́нь. Го́споди, поми́луй (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
ПСАЛО́М 58:
Изми́ мя от враг мои́х, Бо́же, и от востаю́щих на мя изба́ви мя. Изба́ви мя от де́лающих беззако́ние и от муж крове́й спаси́ мя. Я́ко се улови́ша ду́шу мою́, нападо́ша на мя кре́пцыи, ниже́ беззако́ние мое́, ниже́ грех мой, Го́споди. Без беззако́ния теко́х и испра́вих, воста́ни в сре́тение мое́ и виждь. И ты, Го́споди Бо́же сил, Бо́же Изра́илев, вонми́ посети́ти вся язы́ки, да не уще́дриши вся де́лающыя беззако́ние. Возвратя́тся на ве́чер и вза́лчут, я́ко пес, и обы́дут град. Се ти́и отвеща́ют усты́ свои́ми, и меч во устна́х их, я́ко кто слы́ша? И Ты, Го́споди, посмее́шися им, уничижи́ши вся язы́ки. Держа́ву мою́ к Тебе́ сохраню́, я́ко Ты, Бо́же, Засту́пник мой еси́. Бог мой, ми́лость Его́ предвари́т мя, Бог мой, яви́т мне на вразе́х мои́х. Не уби́й их, да не когда́ забу́дут зако́н Твой, расточи́ я́ си́лою Твое́ю и низведи́ я́, Защи́тниче мой, Го́споди. Грех уст их, сло́во усте́н их, и я́ти да бу́дут в горды́ни свое́й, и от кля́твы и лжи возвестя́тся в кончи́не. Во гне́ве кончи́ны, и не бу́дут, и уве́дят, я́ко Бог влады́чествует Иа́ковом и концы́ земли́. Возвратя́тся на ве́чер, и вза́лчут, я́ко пес, и обы́дут град. Ти́и разы́дутся я́сти. А́ще ли же не насы́тятся, и поро́пщут. Аз же воспою́ си́лу Твою́ и возра́дуюся зау́тра о ми́лости Твое́й, я́ко был еси́ Засту́пник мой и Прибе́жище мое́ в день ско́рби моея́. Помо́щник мой еси́, Тебе́ пою́: я́ко Бог Засту́пник мой еси́, Бо́же мой, ми́лость моя́.
ВЕЛИ́КАЯ ЕКТЕНИЯ́:
Диа́кон: Ми́ром Го́споду помо́лимся.
Хор: Го́споди, поми́луй.
Диа́кон: О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе Кири́лле, и о Господи́не и отце на́шем, Блаже́ннейшем митрополи́те Онуфрие, честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О е́же позна́ти глубину́ Любве́ Боже́ственныя роди́телям ча́д си́х стра́ждущих, приводя́ще на па́мять и́х и́стину Пи́сания: «Та́ко бо́ возлюби́ Бо́г ми́р, я́ко и Сы́на Своего́ Единоро́днаго да́л е́сть, да́ вся́к ве́руяй в Него́ не поги́бнет, но и́мать живо́т ве́чный», Го́споду помо́лимся.
О е́же яви́тися Сла́ве и Ми́лости Боже́ственней на́ неви́нно стра́ждущих ча́дах Це́ркви, неду́гом аути́зма истяза́емых, Го́споду помо́лимся.
О е́же Саме́й Десни́це Христо́вой утира́ти сле́зы от ли́ц неду́гующих младе́нцев и отроко́в, утоли́ти бо́ль и́х и сокруше́нных се́рдцем роди́телей их, Го́споду помо́лимся.
О е́же отве́рзти уста́ младе́нцев и отроко́в си́х аути́змом стра́ждущих сло́вом и се́рдцем воспева́ти Сла́ву Бо́гови, Го́споду помо́лимся.
О е́же низпосла́ти рабо́м Свои́м и́мярек ду́ха прему́дрости и ра́зума и всади́ти в сердца́ их страх Боже́ственный, Го́споду помо́лимся.
О е́же посети́ти рабо́в Свои́х родителей и́мярек благода́тию Свята́го Ду́ха, и исполнити их терпения, Го́споду помо́лимся.
О сро́дницех их и зна́емых, пла́чущих и боле́знующих, ча́ющих Христо́ва утеше́ния, и о е́же прия́ти моли́твы их и воздыха́ния, Го́споду помо́лимся.
О избáвитися и́мже и нaм от вся́кия ско́рби, гне́ва и нýжды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор: Тебе́, Го́споди.
Иере́й: Я́ко подобает Тебе́ всякая слáва, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор: Ами́нь.
БОГ ГОСПО́ДЬ, ГЛАС 4:
Диа́кон: Бог Госпо́дь, и яви́ся нам, благослове́н Гряды́й во И́мя Госпо́дне.
Стих 1: Испове́дайтеся Го́сподеви, я́ко благ, я́ко в век ми́лость Его́.
Хор: Бог Госпо́дь, и яви́ся нам, благослове́н Гряды́й во И́мя Госпо́дне.(И далее на каждый стих)
Стих 2: Обыше́дше обыдо́ша мя, и И́менем Госпо́дним противля́хся им.
Стих 3: Не умру́, но жив бу́ду, и пове́м дела́ Госпо́дня.
Стих 4: Ка́мень, Его́же небрего́ша зи́ждущии, Сей бы́сть во главу́ у́гла, от Го́спода бысть Сей, и есть ди́вен во очесе́х на́ших.
ТРОПА́РЬ, ГЛАС 4:
Хор: Ско́рый в заступле́нии еди́н сый, Христе́,/ ско́рое свы́ше покажи́ посеще́ние стра́ждущим рабо́м Твои́м,/ исполни их Твоего благословения,/ приведи́ их ко спасению,/ и воздви́гни к жи́зни ве́чной в любви́ к Тебе́,/ во е́же пе́ти Тя и сла́вити непреста́нно,// моли́твами Богоро́дицы, еди́не Человеколю́бче.
Сла́ва Отцу́ и Сы́ну и Свято́му Ду́ху:
ТРОПА́РЬ, ГЛАС 1:
А́нгеле земны́й и челове́че небе́сный,/ во оби́телех Ки́евских потруди́выйся,/ и в пу́стынь Голосе́евскую всели́лся еси́,/ ста́рче Алекси́е, преподо́бне о́тче на́ш:/ поще́нием, моли́твами и благода́тию Боже́ственною просвети́вся,/ духо́вная твоя́ ча́да к жи́зни ве́чней наста́вивый./ И ны́не, име́я дерзнове́ние ко Святе́й Тро́ице,/ неду́ги разли́чныя врачу́еши/ с ве́рою притека́ющих к ра́це моще́й твои́х,// да́руя ми́р и спасе́ние душа́м на́шим.
И ны́не и при́сно и во ве́ки веко́в. Ами́нь.
Влады́чице, прими молитвы раб Твоих и избави ны от всякия нужды и печали.
Диакон: Во́нмем. Прему́дрость.
ЧТЕЦ: ПРОКИ́МЕН, ГЛАС ШЕ́СТЫЙ: Спаси́, Го́споди, лю́ди Твоя́,/ и благослови́ достоя́ние Твое́.
Хор: Спаси́, Го́споди, лю́ди Твоя́,/ и благослови́ достоя́ние Твое́.
Чтец: К Тебе́, Го́споди, воззову́, Бо́же мой, да не премолчи́ши от мене́.
Хор: Спаси́, Го́споди, лю́ди Твоя́,/ и благослови́ достоя́ние Твое́.
Чтец: Спаси́, Го́споди, лю́ди Твоя́,/
Хор: И благослови́ достоя́ние Твое́.
Диакон: Прему́дрость.
Чтец: К Римляна́м посла́ния свята́го апо́стола Па́вла чте́ние.
Диакон: Во́нмем.
РИМ., ЗАЧ.88 (ГЛ.5, СТ.1-10)
Чтец: Бра́тие, оправди́вшеся ве́рою, мир и́мамы к Бо́гу Го́сподем на́шим Иису́с Христо́м, И́мже и приведе́ние обрето́хом ве́рою во благода́ть сию́, в не́йже стои́м, и хва́лимся упова́нием сла́вы Бо́жия. Не то́чию же, но и хва́лимся в ско́рбех, ве́дяще, я́ко скорбь терпе́ние соде́ловает, терпе́ние же иску́сство, иску́сство же упова́ние, упова́ние же не посрами́т. Я́ко любы́ Бо́жия излия́ся в сердца́ на́ша Ду́хом Святы́м да́нным нам. Еще́ бо Христо́с су́щым нам немощны́м, по вре́мени за нечести́вых у́мре. Едва́ бо за пра́ведника кто у́мрет, за блага́го бо не́гли кто и де́рзнет умре́ти. Составля́ет же Свою́ любо́вь к нам Бог, я́ко еще́ гре́шником су́щым нам, Христо́с за ны у́мре. Мно́го у́бо па́че, оправда́ни бы́вше ны́не Кро́вию Его́, спасе́мся Им от гне́ва. А́ще бо врази́ бы́вше примири́хомся Бо́гу сме́ртию Сы́на Его́, мно́жае па́че примири́вшеся спасе́мся в животе́ Его́.
Иерей: Мир ти.
Чтец: И ду́хови твоему́.
Диа́кон: Прему́дрость.
Чтец: Глас четве́ртый: Аллилу́ия, аллилу́ия, аллилу́ия.
Хор: Аллилу́ия, аллилу́ия, аллилу́ия.
Чтец: По́мощь моя́ от Го́спода, сотво́ршаго не́бо и зе́млю.
Хор: Аллилу́ия, аллилу́ия, аллилу́ия.
Чтец: Изведи́ из темни́цы ду́шу мою́.
Хор: Аллилу́ия, аллилу́ия, аллилу́ия.
Диа́кон: И о сподо́битися нам слы́шанию Свята́го Ева́нгелиа, Го́спода Бо́га мо́лим.
Хор: Го́споди, поми́луй. (Трижды)
Диа́кон: Прему́дрость, про́сти, услы́шим Свята́го Ева́нгелия.
Иере́й: Мир всем.
Хор: И ду́хови твоему́.
Иерей: От Матфе́я Свята́го Ева́нгелия чте́ние. (Мф., 72 зач., XVII, 14-23.)
Хор: Сла́ва, Тебе́, Го́споди, сла́ва Тебе́.
Диакон: Во́нмем.
Иерей: Во вре́мя о́но, челове́к не́кий приступи́ ко Иису́су, кла́няяся Ему́ и глаго́ля: Го́споди, поми́луй сы́на моего́, я́ко на но́вы ме́сяцы бесну́ется и зле стра́ждет, мно́жицею бо па́дает во огнь и мно́жицею в во́ду. И приведо́х его́ ко ученико́м Твои́м, и не возмого́ша его́ исцели́ти. Отвеща́в же Иису́с рече́: о, ро́де неве́рный и развраще́нный, доко́ле бу́ду с ва́ми? Доко́ле терплю́ вам? Приведи́те Ми его́ се́мо. И запрети́ ему́ Иису́с, и изы́де из него́ бес, и изцеле́ о́трок от часа́ того́. Тогда́ присту́пльше ученицы́ Иису́сови еди́ному, ре́ша: почто́ мы не возмого́хом изгна́ти его́? Иису́с же рече́ им: за неве́рствие ва́ше. Ами́нь бо глаго́лю вам, а́ще и́мате ве́ру я́ко зе́рно гору́шно, рече́те горе́ сей: прейди́ отсю́ду та́мо, и пре́йдет, и ничто́же невозмо́жно бу́дет вам. Сей же род не исхо́дит, то́кмо моли́твою и посто́м.
Хор: Сла́ва, Тебе́, Го́споди, сла́ва Тебе́.
ЕКТЕНИЯ́ СУГУ́БАЯ:
Диа́кон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор: Го́споди, поми́луй. (Три́жды, на каждое прошение)
Диа́кон: Еще́ мо́лимся о Вели́ком Господи́не и Отце́ на́шем Святе́йшем Патриа́рхе Кири́лле, и о Господи́не и отце на́шем Блаже́ннейшем митрополи́те Онуфрие, и о всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Неви́нно страда́ти о нас изво́ливый, Христе́ Бо́же, и стра́ждущим сострада́тельно помога́яй, сих младе́нцев и отроко́в, неви́нно стра́ждущих от неду́га аути́зма (имена), благослови́ бла́гостию Свое́ю, да яви́тся на них сла́ва Твоя́, рцем вси, Человеколю́бче Ми́лостивый, ско́ро услы́ши и поми́луй.
Сердцеве́дче Го́споди, све́том Твои́м просвети́ сердца́ роди́телей сих младе́нцев и отроко́в, терпе́нием благослови́, и на вся́кую доброде́тель наста́ви, да благодаря́т Твое́ Благоутро́бие; мо́лимся Ти, Христе́ Царю́, ско́ро услы́ши и поми́луй.
Иере́й: Услы́ши ны, Бо́же, Спаси́телю наш, упова́ние всех конце́в земли́, и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны: Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор: Ами́нь.
Диа́кон: Го́споду помо́лимся.
Хор: Го́споди, поми́луй.
Иере́й: Го́споди, Иису́се Христе́, Бо́же наш, послужи́ти спасе́нию ро́да челове́ческаго изво́ливый, стра́шныя Стра́сти претерпе́вый, и да́же до Креста́ и погребе́ния снизше́дый; Воскресе́нием же тридне́вным естество́ челове́ческое обнови́вый! Обнови́ све́том Твои́м умы́ и сердца́ младе́нцев и отроко́в (имена), неви́нно стра́ждущих от неду́га аути́зма, благослови́ их, укрепи́, утверди́ и умудри́ их благода́тию Твое́ю. Служа́щих бли́жним нареки́й Твои́ми служи́телями, Го́споди, благослови́ доброде́телию терпе́ния роди́телей, служа́щих сим ча́дам, му́дростию Ева́нгелия украси́ их, раздражи́тельность и па́губу гне́ва укроти́, за́висти зача́тки искорени́, пода́ждь ра́дость духо́вную и дове́рие всеце́лое благо́й во́ле Твое́й, Бо́же! Ве́рою припа́даем Ти, Бла́же, и прино́сим моли́твы уго́дника Твоего́, преподо́бнаго и богоно́снаго отца́ на́шего Алекси́я Голосе́евскаго; на нем бо Про́мысл Твой ди́вный яви́ся, я́ко благода́тию отверзо́шася уста́ его́, неду́гом пре́жде скова́нныя, и пропове́да он ра́дость Воскресе́ния Твоего́. Те́мже, упова́юще на Твое́ благосе́рдие и ми́лость неизрече́нную, разуме́юще глубину́ любве́ Твоея́ и прему́дрости та́йну, благодаре́ние и сла́ву Тебе́ возсыла́ем, со Отце́м и Святы́м Твои́м Ду́хом во ве́ки веко́в.
Хор: Ами́нь.
Диа́кон: Прему́дрость.
Иерей: Пресвята́я Богоро́дице, спаси́ нас.
Хор: Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,// су́щую Богоро́дицу Тя велича́ем.
Иерей: Сла́ва Тебе́, Христе́ Бо́же, Упова́ние на́ше, сла́ва Тебе́.
Хор: Сла́ва, и ны́не. Го́споди, поми́луй. (Трижды) Благослови́.
ОТПУ́СТ:
Иерей: Христо́с и́стинный Бог наш, моли́твами Пречи́стыя Своея́ Ма́тере, си́лою Честна́го и Животворя́щаго Креста́, моли́твами свята́го великому́ченика и целителя Пантелеи́мона, преподо́бного и богоносного отца нашего Алекси́я Голосе́евского и всех святы́х, поми́лует и спасе́т нас, я́ко Благ и Человеколю́бец.
Хор: Ами́нь.