Схвалено Синодальною літургічною комісією УПЦ
29 травня 2021 року
ЧИН БЛАГОСЛОВЕНИЯ МЕСТА КУПЛИ
Иерéй: Благоcловéн Бóг нáш:
Ли́к: Ами́нь. Иерéй: Слáва Тебé Бóже нáш, слáва Тебé.
И пóют: Цар́ю небécный:
Трисвятóе и по Отче нáш: Гóсподи поми́луй, 12. Слáва, и н́ыне: Прииди́те, поклони́мся:
Тáже псалóм 90 и бывáет каждéние, псалом:
Живы́й в пóмощи Вы́шняго, в крóве Бóга небéснаго водвори́тся, речéт Гóсподеви: Застýпник мóй еси́ и прибéжище моé, Бог мóй, и уповáю на Негó. Яко Тóй избáвит тя́ от сéти лóвчи и от словесé мятéжна: плещмá Свои́ма осени́т тя́, и под крилé Егó надéешися: орýжием обы́дет тя́ и́стина Егó. Не убои́шися от стрáха нощнáго, от стрелы́ летя́щия во дни́, от вéщи во тмé преходя́щия, от сря́ща и бéса полýденнаго. Падýт от страны́ твоея́ ты́сяща, и тмá одеснyю тебé, к тебé же не прибли́жится: обaче очи́ма твои́ма смóтриши и воздая́ние грéшников ýзриши. Яко Ты́, Гóсподи, уповaние моé: Вы́шняго положи́л еси́ прибéжище твоé. Не прии́дет к тебé злó, и рáна не прибли́жится телеси́ твоемý: я́ко áнгелом Свои́м заповéсть о тебé, сохрани́ти тя́ во всéх путéх твои́х. На рукáх вóзмут тя́, да не когдá преткнéши о кáмень нóгу твою́: на áспида и васили́ска настýпиши, и поперéши львá и зми́я. Яко на Мя́ уповá, и избáвлю и́: покры́ю и́, я́ко познá и́мя Моé. Воззовéт ко Мнé, и услы́шу егó: с ни́м Есмь в скóрби, измý егó и прослáвлю егó: долготóю дни́й испóлню егó и явлю́ емý спасéние Моé.
Слáва, и н́ыне:
Аллилýиа, аллилýиа, аллилýиа,
слáва Тебé Бóже (трижды)
Иерéй: Бóг Госпóдь, и яви́ся нáм, благословéн гряд́ый во и́мя Госпóдне.
Сти́х: Исповéдайтеся Гóсподеви, яко блáг, яко в вéк ми́лоcть Егó.
Ли́к: Бóг Госпóдь, и яви́ся нáм, благословéн гряд́ый во и́мя Госпóдне.
(И дáлее на кáждый сти́х)
Сти́х: Обышéдше обыдóша мя, и и́менем Госпóдним противл́яхся и́м.
Сти́х: Не умрý, но жи́в бýду и повéм делá Госпóдня.
Сти́х: Кáмень, егóже небрегóша зи́ждущии, сéй б́ысть во главý ýгла: от Гóспода б́ысть сéй, и éсть ди́вен во очесéх нáших.
И тропáрь, глáс 2:
Твóрче и Создáтелю вся́ческих, Бóже, делá рук нáших, ко слáве Твоéй начинáемая, Твои́м благословéнием спéшно испрáви, и нас от вся́каго зла избáви, я́ко еди́н всеси́лен и Человеколю́бец.
Слáва и ны́не, Богорóдичен, глáс 2:
Молéние тéплое и стенá необори́мая, ми́лости истóчниче, ми́рови прибéжище, прилéжно вопиéм ти: Богорóдице Влады́чице, предвари́, и от бед избáви нас, еди́на вскóре предстáтельствующая.
[Аще извóлит иерéй, возгласи́т проки́мен и чтéт Евáнгелие:
Иерéй: Вóнмем. Премýдрость.
Проки́мен, глáс 4: Бýди свéтлость Гóспода Бóга нáшего на нас, и делá рук нáших испрáви.
Ли́к: Бýди свéтлость Гóспода Бóга нáшего на нас, и делá рук нáших испрáви.
Иерéй, сти́х: При́зри на рабы́ Твоя́, и на делá Твоя́.
Ли́к: Бýди свéтлость Гóспода Бóга нáшего на нас, и делá рук нáших испрáви.
Иерéй: Бýди свéтлость Гóспода Бóга нáшего на нас.
Ли́к: И делá рук нáших испрáви.
Иерéй: Гóсподу помóлимся.
Ли́к: Гóсподи, поми́луй.
Иерéй: Яко св́ят еси́ Бóже нáш, и во свят́ых почивáеши, и Тебé слáву возсылáем, Отцý и С́ыну и Святóму Дýху, н́ыне и при́сно и во вéки векóв.
Ли́к: Ами́нь.
Иерéй: Вс́якое дыхáние * да хвáлит Гóспода.
Ли́к: Вс́якое дыхáние * да хвáлит Гóспода.
Иерéй: Хвали́те Бóга во свят́ых Егó, хвали́те Егó во утвержéнии си́лы Егó.
Ли́к: Всякое дыхáние * да хвáлит Гóспода.
Иерéй: Вс́якое дыхáние.
Ли́к: Да хвáлит Гóспода.
Иерéй: И о сподóбитися нáм сл́ышанию святáго Евáнгелия Гóспода Бóга мóлим.
Ли́к: Гóсподи поми́луй, три́жды.
Иерéй: Премýдрость, прóсти усл́ышим святáго Евáнгелия.
Иерéй: Ми́р всéм.
Ли́к: И дýхови Твоемý.
Иерéй: От Матфéя святáго Евáнгелия чтéние.
Ли́к: Слáва Тебé Гóсподи, слáва Тебé.
Иерéй: Вóнмем.
Евáнгелие от Матфéя, зачáло 20 от полý:
Речé Госпóдь: проси́те и дáстся вам, ищи́те и обря́щете, толцы́те и отвéрзется вам. Всяк бо прося́й приéмлет, и ищя́й обретáет, и толкýщему отвéрзется. Или кто есть от вас человéк, егóже áще воспрóсит сын егó хлéба, едá кáмень подáст емý? Или́ áще ры́бы прóсит, едá змию́ подáст емý? Аще ýбо вы, лукáви сýще, умéете дая́ния блáга дая́ти чáдом вáшым, кольми́ пáче Отéц ваш Небéсный даст блáга прося́щым у Негó.
Ли́к: Слáва Тебé Гóсподи, слáва Тебé.]
Протодиáкон: Поми́луй нáс Бóже, по вели́цей ми́лости Твоéй, мóлим Ти ся, усл́ыши, и поми́луй.
Ли́к: Гóсподи поми́луй, три́жды.
Ещé мóлимся о Господи́не и отцé нáшем блажéннейшем митрополи́те (имярéк), и о господи́не нáшем высокопреосвящéннейшем митрополи́те (или́ архиепи́скопе, или́ преосвящéннейшем епи́скопе) (имярéк), и о всéй во Христé брáтии нáшей.
Ли́к: Гóсподи поми́луй, три́жды.
Еще мóлимся о богохрани́мей странé нáшей, властéх и вóинстве éя, да ти́хое и безмóлвное житиé поживéм во вс́яком благочéстии и чистотé.
Ли́к: Гóсподи поми́луй, три́жды.
Прилагáем и сиé:
Ещé мóлимся о благословéнии мéста сегó и труждáющихся зде рабóв Бóжиих (имярéк), чающи́х умножéния щедрóт, яко плодóв дóбрых от честных трудов своих.
Ли́к: Гóсподи поми́луй, три́жды.
Возглáс: Усл́ыши ны Бóже Спаси́телю нáш, уповáние всéх концéв земли́ и сýщих в мóри далéче, и ми́лостив, ми́лостив бýди, Влад́ыко, о гресéх нáших, и поми́луй ны.
Ми́лостив бо и Человекол́юбец Бóг еси́, и Тебé слáву возсылáем, Отцý, и С́ыну, и Святóму Дýху, н́ыне и при́сно, и во вéки векóв.
Ли́к: Ами́нь.
Иерéй: Гóсподу помóлимся.
Ли́к: Гóсподи поми́луй
Иерéй чтéт моли́тву:
Гóсподи Бóже Вседержи́телю, Воздая́телю всеми́лостивый всем прáво кýплю дéющим, прорóком твои́м реки́й, я́ко мéрило прáведное и вес вéрный ти угóдна суть, при́зри ны́не на молéния нáша и благослови́ мéсто сиé и рабóв твои́х (имярéк), соблюди́ их в вéре правослáвней, во вся́ком благочéстии и чистотé, да преуспéют во исполнéнии зáповедей твои́х, украси́ их мýдростию христиáнскою, испóлни земны́х твои́х блáг, и во всéх дéлех дóбрых содéйствуй, от вся́каго зла невреди́мы сохрани́, благословля́я кýплю сию́, и ненавéтну жи́знь их соблюди́ и изоби́льно вся благáя твоя́ твои́м благословéнием на пóльзу подавáяй.
Яко Бог ми́лости, и щедрóт, и человеколю́бия еси́, и тебé слáву возсылáем, Отцý и Сы́ну и Святóму Дýху, ны́не и при́сно и во вéки вéков.
Ли́к: Ами́нь.
Тáже кропи́т иерéй свящéнною водóю глагóлюще: Благословляется мéсто си́е окроплéнием вод́ы сея свящéнныя, во и́мя Отцá, и С́ына, и Святáго Дýха, ами́нь.
Посéм отпýст по об́ычаю.