Затверджено для богослужбового використання
на засіданні Священного Синоду УПЦ
23 травня 2023 року
Канон, певаемый о убиенном православнем воине
Глас 6.
Песнь 1.
Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.
Припев: Упокой, Господи, убиенного воина.
Бездну Милосердия Твоего яви, Христе Спасе, душу сего воина упокоевая в селениях праведных, яко Человеколюбец.
Припев: Упокой, Господи, убиенного воина.
Утиши, Господи, слезы материнския и рану сердечную исцели, душу сего воина упокоевая в селениях праведных, яко Человеколюбец.
Припев: Слава Отцу, и Сыну, и Святому Духу.
Боже Милостивый, стенания жены скорбящия о почившем не презри, сего воина упокоевая в селениях праведных, яко Человеколюбец.
Припев: И ныне, и присно, и во веки веков. Аминь.
Богородичен: Преславная Владычице Богородице, Премудрость и Слово Отчее Рождшая, моли Сына Твоего и Бога, да подаст венец победный преставльшемуся, сего воина упокоевая в селениях праведных, яко Человеколюбец.
Песнь 3.
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Припев: Упокой, Господи, убиенного воина.
Победителю диавола, ада разорителю, Господи, душу свою за други положившаго сего воина Небесных благ сподоби, презирая вся его согрешения.
Припев: Упокой, Господи, убиенного воина.
Ороси, Боже, сердце отца ратника, очи телесныя сомкнувшаго, росою утешения, и Небесных благ сего воина сподоби, презирая вся его согрешения.
Припев: Слава Отцу, и Сыну, и Святому Духу.
Дому, сродникам и другом и сослужителем утешением буди, Христе Спасе, и Небесных благ сего воина сподоби, презирая вся его согрешения.
Припев: И ныне, и присно, и во веки веков. Аминь.
Богородичен: Щит и покров буди, Преблагословенная Владычице, души преставльшагося, и умоляюще Сына Твоего Небесных благ сего воина сподобити, презирая вся его согрешения.
Седaлен, глaс 6:
Воистинну любовь жертвенна, за отчизну на брань подвизающа, старцев, чад и жен от нашествия супостатов защищати, якоже рече Писание: больши сея любве никтоже имать, да кто душу положит за други своя. Темже, Христе Боже, воина преставльшагося, раба Твоего [или: преставльшуюся, рабу Твою] упокой, яко Человеколюбец.
Слава, и ныне: Богородичен: Всесвятaя Богородице, во время живота моего не остaви мене, человеческому предстaтельству не ввери мя: но Сама заступи, и помилуй мя.
Песнь 4.
Ирмос: Христос моя сила, Бог и Господь, честная Церковь Боголепно поет, взывающи, от смысла чиста о Господе празднующи.
Припев: Упокой, Господи, убиенного воина.
Идеже, Христе, веселящихся есть жилище, и глас ангельского воинства безплотнаго, воина сего душу во обителех вечныя радости учини, Владыко Человеколюбче.
Припев: Упокой, Господи, убиенного воина.
Ущедри Твое создание, благостыни сподоби воина сего душу, и во обителех вечныя радости учини, Владыко Человеколюбче.
Припев: Слава Отцу, и Сыну, и Святому Духу.
В руце Твои приими, Господи, воина сего душу и во обителех вечныя радости учини, Владыко Человеколюбче.
Припев: И ныне, и присно, и во веки веков. Аминь.
Богородичен: Простри руце Твои, Приснодево и Мати, к Сыну Твоему и Богу нашему, моляше: воина сего душу во обителех вечныя радости учини, Владыко Человеколюбче.
Песнь 5.
Ирмос: Божиим светом Твоим, Блаже, утреннюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Припев: Упокой, Господи, убиенного воина.
Услыши, Господи, глас мой, имже воззвах, и помилуй душу плотию уснувшаго воина, иже на Тя упование, Христе, возлагает сердечно.
Припев: Упокой, Господи, убиенного воина.
Не отврати лица Твоего и не уклонися гневом от раба Твоего, иже на Тя упование, Христе, возлагает сердечно.
Припев: Слава Отцу, и Сыну, и Святому Духу.
Аще ополчися на сего лютых полк, не убояся воин доблий, иже на Тя упование, Христе, возлагает сердечно.
Припев: И ныне, и присно, и во веки веков. Аминь.
Богородичен: Умоли Сына Твоего, Пренепорочная Мати, да паче снега убелит душу почившаго воина, иже на Него упование возлагает сердечно.
Песнь 6.
Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Припев: Упокой, Господи, убиенного воина.
Господи Боже наш, от бездны отчаяния избави сродников к Тебе преставльшагося воина, и сего в селениях райских ныне упокой.
Припев: Упокой, Господи, убиенного воина.
Боже всякого утешения, умири сердца сродников, друзей и ближних христианина, душу свою за них положившаго, и к Тебе преставльшагося воина в селениях райских ныне упокой.
Припев: Слава Отцу, и Сыну, и Святому Духу.
Господи Иисусе Христе, смерти Победителю, ада темного Разорителю, страха всякаго избави соратников вернаго, очи своя закрывшаго, к Тебе же преставльшагося воина в селениях райских ныне упокой.
Припев: И ныне, и присно, и во веки веков. Аминь.
Богородичен: Мати Чистейшая, Преблагословенная Богородице Дево, умири боль сердечную матери сего воина и воззови молитвою Победителю смерти Христу: к Тебе преставльшагося, Сыне Мой, в селениях райских ныне упокой.
Кондaк, глaс 8:
Со святыми упокой Христе, дyшу раба Твоего, идеже несть болезнь, ни печaль, ни воздыхaние, но жизнь безконечная.
Икос: Сaм Един еси Безсмертный, сотворивый и создaвый человека, земнии убо от земли создaхомся, и в землю тyюжде пойдем, якоже повелел еси создaвый мя и рекий ми: яко земля еси и в землю отидеши, аможе вси человецы пойдем, надгробное рыдaние творяще песнь: Аллилyиа.
И пaки: Со святыми упокой Христе, дyшу раба твоего, идеже несть болезнь, ни печaль, ни воздыхaние, но жизнь безконечная.
Песнь 7.
Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.
Припев: Упокой, Господи, убиенного воина.
Венчаяй сего воина неувядаемым и нетленным венцем жизни и безсмертия, Господи, презри его грехи и сподоби пети: благословен еси, Боже отец наших.
Припев: Упокой, Господи, убиенного воина.
Тесный путь самоотвержения избравшаго и подвиг ратный совершившаго воина восприяти место покоя душевного сподоби, идеже праведнии песнь поют: благословен еси, Боже отец наших.
Припев: Слава Отцу, и Сыну, и Святому Духу.
Облецы, Владыко, душу воина почившаго светлою ризою радости, упованием препояши чресла его и сподоби Победителю смерти Христу взывати: благословен еси, Боже отец наших.
Припев: И ныне, и присно, и во веки веков. Аминь.
Богородичен: Молитвами Твоими, Всеблагая Богородице, сохрани душу воина новопреставленнаго от сетей диавольских, мытарства облегчи и сподоби сего сыновне пети: благословен еси, Боже отец наших.
Песнь 8.
Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.
Припев: Упокой, Господи, убиенного воина.
Аще и тело воина сего во гробе возлежит, но победы венцем украшено есть, душею же сей умно взывает: Тя превозношу, Христе, во веки .
Припев: Упокой, Господи, убиенного воина.
Якоже пшеничное зерно, зашед в недра земная, возстанет же класом славным в день Господень ратник, иже взывает: Тя превозношу, Христе, во веки .
Припев: Благословим Отца, и Сына, и Святаго Духа, Господа.
Троичен: Воспеваем, Слове, Тебе, всех Бога, со Отцем и Святым Твоим Духом, и славим Божественную державу Твою, взывающе: Тя превозносим, Пресвятая Троице, Боже наш, во вся веки.
Припев: И ныне, и присно, и во веки веков. Аминь.
Богородичен: Блажим Тя, Богородице Чистая, и почитаем тридневное погребение и Воскресение Сына Твоего и Бога нашего верно, поюще и превозносяще Тя во веки .
Песнь 9.
Ирмос: Бога человеком не возможно видети, на Него же не смеют чини Ангельстии взирати; Тобою бо, Всечистая, явися человеком Слово воплощенно, Его же величающе, с Небесными вои Тя ублажаем.
Припев: Упокой, Господи, убиенного воина.
Мати зрящи во гробе чадо свое, слезами лице омакает горце, но со упованием твердым молитву о воине сем возносит: Царствие Небесное даруй, Христе Боже, почившему.
Припев: Упокой, Господи, убиенного воина.
Мати моя, не терзайся рыданьми, воин вопиет, аще и уязвлен есмь смертию плотски, но духом жив есмь и потребу имам оставления грехов, и молитв о душе моей чаю сицевых: Царствие Небесное даруй, Христе Боже, почившему.
Припев: Слава Отцу, и Сыну, и Святому Духу.
Глубиною мудрости вся строяй, Господи Дароподателю, даждь прегрешений оставление и помилуй душу воина новопреставленнаго молитв ради церковных: Царствие Небесное даруй, Христе Боже, почившему.
Припев: И ныне, и присно, и во веки веков. Аминь.
Богородичен: Жизнь рождшая, Пренепорочная Чистая Дево, утоли слезы скорбящих сродников и собратий и подаждь мир, яко Благая, и молитися научи о воине почившем Сыну Твоему: Царствие Небесное даруй, Христе Боже, почившему.
Апостол к Ефесеем, зачaло 233.
Братие, возмогайте во Господе и в державе крепости Его, облецытеся во вся оружия Божия, яко возмощи вам стати противу кознем диавольским, яко несть наша брань к крови и плоти, но к началом и ко властем и к миродержителем тмы века сего, к духовом злобы поднебесным. Сего ради приимите вся оружия Божия, да возможете противитися в день лют и вся содеявше стати. Станите убо препоясани чресла ваша истиною, и оболкшеся в броня правды, и обувше нозе во уготование благовествования мира, над всеми же восприимше щит веры, в немже возможете вся стрелы лукаваго разжженныя угасити, и шлем спасения восприимите, и мечь духовный, иже есть глагол Божий.
Евангелие от Иоaнна, зачaло 51.
Рече Господь Своим учеником: якоже возлюби Мя Отец, и Аз возлюбих вас, будите в любви Моей. Аще заповеди Моя соблюдете, пребудете в любви Моей, якоже Аз заповеди Отца Моего соблюдох и пребываю в его любви. Сия глаголах вам, да радость Моя в вас будет и радость ваша исполнится. Сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя. Вы друзи Мои есте, аще творите, елика Аз заповедаю вам. Не ктому вас глаголю рабы, яко раб не весть, что творит господь его, вас же рекох други, яко вся, яже слышах от Отца Моего, сказах вам. Не вы Мене избрасте, но Аз избрах вас и положих вас, да вы идете и плод принесете, и плод ваш пребудет, да егоже аще просите от Отца во имя Мое, даст вам.