Скачати версію для друку
Прохання на сугубій єктенії
Невинно страдати о нас изволивый, Христе Боже, и страждущим сострадательно помогаяй, сих младенцев и отроков, невинно страждущих от недуга аутизма (имена), благослови благостию Твоею, да явится на них слава Твоя, рцем вси, Человеколюбче Милостивый, скоро услыши и помилуй. Лик: Господи, помилуй, трижды
Сердцеведче Господи, светом Твоим просвети сердца родителей сих младенцев и отроков, терпением благослови, и на всякую добродетель настави, да благодарят Твое Благоутробие; молимся Ти, Христе Царю, скоро услыши и помилуй.
Молитва
Господи, Иисусе Христе, Боже наш, послужити спасению рода человеческаго изволивый, страшныя Страсти претерпевый, и даже до Креста и погребения снизшедый; Воскресением же тридневным естество человеческое обновивый! Обнови светом Твоим умы и сердца младенцев и отроков (имена), невинно страждущих от недуга аутизма, благослови их, укрепи, утверди и умудри их благодатию Твоею.
Служащих ближним Твоими служителями нарекий, Господи, благослови добродетелию терпения родителей, служащих чадам сим, мудростию Евангелия украси их, уныние отжени, гнев укроти, зависти зачатки искорени, радость духовную и доверие всецелое благой воле Твоей подаждь!
Верою припадаем Ти, Блаже, и приносим молитвы угодника Твоего, преподобнаго и богоноснаго отца нашего Алексия Голосеевскаго; на нем бо Промысл Твой дивный явися, яко благодатию отверзошася уста его, недугом прежде скованныя, и проповеда радость
Воскресения Твоего. Темже, уповающе на Твое благосердие и милость неизреченную, разумеюще глубину любве Твоея и премудрости тайну, благодарение и славу Тебе возсылаем, со Отцем и Святым Твоим Духом во веки веков. Аминь