Акафіст Пресвятій Богородиці перед іконою Її Києво-Братською

Затверджено для богослужбового використання
на засіданні Священного Синоду УПЦ
23 листопада 2022 року

Акафист Божией Матери

пред иконой Ея, именуемой «Киево-Братская»

Кондак 1.

Избранней от всех родов Божией Матери и Царице, предивно образ Киево-Братский явившей, от негоже вси с верою благодатную помощь приемше, похвальная возносим пения. Ты же, Мати Милосердная, теплым Твоим ходатайством от всяких обстояний скоро свобождай во умилении сердец Тебе поющих:

Радуйся, милостивая Богородице Дево, Академии Киевския похвало и утверждение.

Икос 1.

Ангелов превысшей и всея твари славнейшей Владычице мира достодолжную песнь принесем о явлении чудныя иконы, еюже обитель святая украшается и земля Киевская Заступницу непреобориму обретает. Мы же, дивящеся чудному Божию о нас Промышлению, воспеваем сице:

Радуйся, Богородице Дево, от всех родов избранная,

Радуйся, Всепетая Мати, паче всех матерей возвеличенная;

Радуйся, Скиние всезлатая, Духом Святым осененная,

Радуйся, Пресвятая Дево, Предвечнаго Совета исполнение;

Радуйся, Отроковице Пречистая, чудес реко приснотекущая.

Радуйся, Госпоже Владычице, неистощимую благодать нам подающая;

Радуйся, милостивая Богородице Дево, Академии Киевския похвало и утверждение.

Кондак 2.

Удивишася людие Вышгородстии о чудном явлении лика Твоего, Мати Всечистая, егоже даровала еси церкви, во имя страстотерпцев Господних нареченней, идеже приходящих к Тебе со мольбою послушала еси, подвизающи Сыну Твоему взывати: Аллилуия.

Икос 2.

Источник исцелений многоценный бысть икона Твоя, Мати Милосердная, к нейже благочестивии людие с верою несумненною прибегающе, славословия Тебе приношаху. Мы же, им подражающе, во смирении зовем Ти сицевая:

Радуйся, народа христоименнаго великое утешение;

Радуйся, храма благоверных князей дивное украшение.

Радуйся, цельбы скоро подающая просящим неленостно;

Радуйся, милость Свою изливающая верным.

Радуйся, Заступнице людей православных;

Радуйся, Покровительнице наша от лет древних.

Радуйся, милостивая Богородице Дево, Академии Киевския похвало и утверждение.

Кондак 3.

Егда агарянское нашествие земля наша претерпе, неистовством злочестия обуреваемая, тогда град и храм Господень сокрушени быша, но Ты убо, Владычице, образ Твой от поругания сохранила еси, благоволивши Ему водами днепровскими Киева достигнути, идеже почитающии Тя от стихии водныя святыню приимше, благодарственно Богу воспеша: Аллилуия.

Икос 3.

Дивимся зело чудному промышлению о иконе Твоей, Мати Дево, якоже сохранила ея в лютом обстоянии, храму бо и граду огнем снедаемым, образ Твой неврежден пребысть, иже водами принесен бысть во град стольный, идеже почитающии Тя принесоша Тебе радостная:

Радуйся, яко Тобою Вышгород прославляется;

Радуйся, яко кийждо от граждан его о Тебе возвеселяется.

Радуйся, икону Свою от поругания избавившая;

Радуйся, чрез нея утешение ниспосылающая.

Радуйся, водныя стихии благословение;

Радуйся, людей православных веселие.

Радуйся, милостивая Богородице Дево, Академии Киевския похвало и утверждение.

Кондак 4.

Ужаса губительнаго и смерти напрасныя Богородица Владычица древле избави единаго от агарян, иже в воде утопаше, и образ Твой яко лодию спасительную обретше, и тако брега достиже, Сыну Твоему благодарственне воззове: Аллилуия.

Икос 4.

Роду человеческому присное заступление еси, Мати Преблагая, емуже милости неоскудные богатно подаеши и к пути спасению наставляеши. Сего ради всяк молящийся Тебе помощь Матернюю приемлет, со благодарением взывая:

Радуйся, агарянину жизнь земную сохраншая;

Радуйся, к жизни вечней путь ему указавшая.

Радуйся, в Евангельских истинах наставляющая;

Радуйся, к познанию Сына Своего приводящая.

Радуйся, Свеще, огнь Божества неопально приемшая;

Радуйся, Мати, в рождестве болезней не познавшая.

Радуйся, милостивая Богородице Дево, Академии Киевския похвало и утверждение.

Кондак 5.

Яко великое сокровище небесное прияша людие земли Киевския святую икону Твою, Владычице Богородице, водами днепровскими чудно принесенную и иноками обители Братския благоговейно приятую. Мы же, дивящеся чудному Промышлению о лике Твоем, всеумиленно взываем Сыну Твоему: Аллилуия.

Икос 5.

Дивное и странное ныне зрим чудо, велие и преславное, како образ Богоматере во град Киев достиже, иноцы же яко сокровище безценное его приемше, во храме поставиша, всеблагоговейно служаще Богородице пениими сими:

Радуйся, Мати Бога Живаго, моления наша скоро приемлющая;

Радуйся, Нескверная агнице, смирением Своим нас научающая.

Радуйся, пришествием Твоим Киев возвеселившая;

Радуйся, люди к познанию Сына Своего призывающая.

Радуйся, обители Братския украшение;

Радуйся, иноком богобоящимся покров и заступление.

Радуйся, милостивая Богородице Дево, Академии Киевския похвало и утверждение.

Кондак 6.

Явилася еси Хранительница крепкая всем, Тебе усердно молящимся, Богородице Владычице, темже сословие иноческое прият во обитель Братскую и во храме Богоявленстем постави честный образ Твой, яко сокровище вседрагое, моления непрестанно приносяще Тебе, имаши бо дерзновение велие ко Господу молитися о нас, научающи пети Сыну Твоему и Богу нашему: Аллилуия.

Икос 6.

Воспеваем чудеса твоя, Богородице Мати, яже чрез икону Твою во обители Братстей всем приходящим к ней и дерзновенно просящим неотступно подавала еси. Мы же, разумеюще дивное Твое о нас промышление, благодарственно взываем тебе сице:

Радуйся, всем приходящим к Тебе скорую помощь дарующая;

Радуйся, Матерним покровом всех приходящих к Тебе покрывающая.

Радуйся, болящим исцеление скоро подающая;

Радуйся, скорбящим и обремененным утешение посылающая.

Радуйся, иноков богоразумных ко ангельскому житию наставляющая;

Радуйся, Царствия Сына Твоего достигнути им помогающая.

Радуйся, милостивая Богородице Дево, Академии Киевския похвало и утверждение.

Кондак 7.

Видяще людие дивное промышление о них Пречистыя Богородицы, яко милости от лика Своего подает всем требующим, Помощницу обретоша Ю в болезнех и нестроениих. Ты же, Мати Пречистая, и в предняя не отврати лица Твоего от христоименнаго народа, обильныя милости изливающе нам, непрестанно взывающим Рожденному из Тебе: Аллилуия.

Икос 7.

Заступница усердная явилася еси, Пресвятая Владычице, понеже во время бедственных и скорбных обстояний людие благочестивии, приемше икону Твою, стогнами киевскими пронесоша, и тако болезни и поражения совершенно укротишася. Мы же, благодать и помощь Твою видяще, взываем достодолжно:

Радуйся, граду нашему крепкое забрало;

Радуйся, людям благочестивым скорое поможение.

Радуйся, яко Тобою отгоняется скорбное рыдание;

Радуйся, яко Тобою подается истинное радование.

Радуйся, образом Твоим град Твой освятившая;

Радуйся, вся грады христианския Своею милостию не оставляющая.

Радуйся, милостивая Богородице Дево, Академии Киевския похвало и утверждение.

Кондак 8.

Молящимся Тебе путь к познанию премудрости показала еси, Мати истинныя Премудрости, темже и училищу благочестия во обители Братстей явилася еси покров и ограждение. Того ради учащим и учащимся была еси помощь в постижении богоименнаго знания, да Богови вси православно воспоют: Аллилуия.

Икос 8.

Слышаша наставницы и ученицы в обители Братстей, яко икона Твоя чудеса подает всем, с верою пред нею молящимся и во смирении Тебе взывающим, хвалами Тя прославляюще, радостными гласы неленостно воспеваху. Темже и мы купно с ними лик составивше, Тебе поем сице:

Радуйся, наставником умы просвещающая;

Радуйся, младых знаниями богатящая.

Радуйся, притекающим к Тебе верный покрове;

Радуйся, избавительнице от диавольския лести.

Радуйся, во Православии богословцев утверждающая;

Радуйся, во благочестии верных укрепляющая.

Радуйся, милостивая Богородице Дево, Академии Киевския похвало и утверждение.

Кондак 9.

Ветии многовещании не возмогают должно воспети Тя, Мати Божия, всякий бо земный смысл несмыслен бывает пред Тобою, яко Родительница еси Творца всяческих, человеки вся к Себе приведшаго, в веселии вопиющих Ему: Аллилуия.

Икос 9.

Возрастила еси святители богомудрыя и пастырие добрыя в Братстей обители на пажити Божественней, лик же святых отец и наставников наших, духовныя ароматы приемше, мир учением Евангельским своим облагоухали суть; мы же купно с ними со благодарением взываем Тебе сицевая:

Радуйся, архиереев славных предивная Похвало;

Радуйся, пресвитеров кротких необоримая Заступнице.

Радуйся, иноков ангельскому житию научающая;

Радуйся, христоименитым людем грехи истребляти помогающая.

Радуйся, наставников и учеников мудрое укрепление;

Радуйся, верных преславное утешение.

Радуйся, милостивая Богородице Дево, Академии Киевския похвало и утверждение.

Кондак 10.

Дивно сохранися образ Твой, Богородице Дево, во время лютое, егда обитель Братская разорися и вси, в ней бывшии, расточишася. Ты же, о Богомати, икону святую Твою от поругания избавивши, во время же благопотребно паки людем возвратила еси, ихже и подвизаеши пети Богу: Аллилуия.

Икос 10.

Спасти хотя люди избранныя твоя, Дево Пренепорочная, даровала еси Лавре Печерстей и Академии Киевской списание дивнаго лика Своего, от негоже помощь источаеши всем, мольбы и моления пред ним творящим и сицевую хвалу Тебе воздающим:

Радуйся, образ Свой от огня преславно избавившая;

Радуйся, лик Свой в утешение Академии Киевстей даровавшая.

Радуйся, Лавры Печерския прекрасное украшение;

Радуйся, Академии Киевския преславное заступление.

Радуйся, во храме Твоем образом Своим почивающая;

Радуйся, предстоящих Тебе благодатию Сына Твоего обогащающая.

Радуйся, милостивая Богородице Дево, Академии Киевския похвало и утверждение.

Кондак 11.

Храм Академии Киевския образом Твоим яко бисером многоценным украшается, и его, яко дар велий, чествует усты хвалебными, благодарения Тебе возносяще, Сынови же Твоему смиренно вопиюще: Аллилуия.

Икос 11.

Всяк приходящий к образу Твоему, Мати Божия, помощь скорую премлет: наставницы мудрости и терпения испрошают, отроцы о тщании во учении молят, всяк же верный кийждо о нуждах своих просит. Темже вкупе велий сонм составльше, благочестно поем Тебе, о Богородице, таковая:

Радуйся, наставником в труде богословия поможение;

Радуйся, отроком во учении духовном умное просвещение.

Радуйся, архиереев православных истинное укрепление;

Радуйся, пастырей всечестных радостное увеселение.

Радуйся, монашескаго лика в подвизех скорое поспешение;

Радуйся, всего народа христианскаго надеждо и ограждение.

Радуйся, милостивая Богородице Дево, Академии Киевския похвало и утверждение.

Кондак 12.

Всяк, взирающий на списание лика Твоего, Мати Пречистая, утешен и услышан бывает, всяко бо слышиши молитвы с верою чистою молящихся Тебе в школе сей духовней. Обаче и оставившим Академию Твою и на пажити духовней на служение Сыну Твоему и Богу нашему трудящимся Помощница скорая бываеши. Мы же благодатную помощь Твою ведуще, глаголем Сыну Твоему: Аллилуия.

Икос 12.

Воспеваем Божественную благодать, изливаемую от образа Твоего Киево-Братского, Богородице Дево, яже изобильно источаеши на духовныя чада Твоя, ихже Академия Киевская воспита: ниединаго же от них на ниве служения безпомощна оставляеши, но мудрость от Сына Своего подаеши, и от злых наветов сохраняеши, дерзновение пастырское подающи. Благодаряще Тя, Мати Всечистая, дерзаем вопити Тебе таковая:

Радуйся, Покрове людям, Сыном Твоим данный;

Радуйся, Храме Пресвятый, Богом зданный.

Радуйся, яко благодать Божия с ликом Твоим пребывает.

Радуйся, яко образ Твой в Лавре Печерской чудеса доднесь источает.

Радуйся, Стено Нерушимая всем, Тебе верно молящимся.

Радуйся, Избавительнице от бед всех, о Сыне Твоем подвизающихся.

Радуйся, Милостивая Богородице Дево, Академии Киевския похвало и утверждение.

Кондак 13.

О, Всепетая Мати, неизреченно рождшая Господа нашего Иисуса Христа! Приими ныне глас моления нашего, помилуй зде учащих и учащихся, не забуди иноков обители Твоея, и спаси всех, со благоговением к Тебе притекающих и радостно Тебе ради поющих Богови: Аллилуия.

Сей кондак глаголется трижды, и паки икос 1 и кондак 1.

Икос 1.

Ангелов превысшей и всея твари славнейшей Владычице мира достодолжную песнь принесем о явлении чудныя иконы, еюже обитель Богоматере украшается и земля Киевская Заступницу непреобориму обретает. Мы же, дивящеся чудному Божию о нас Промышлению, воспеваем сице:

Радуйся, Богородице Дево, от всех родов избранная,

Радуйся, Всепетая Мати, паче всех матерей возвеличенная;

Радуйся, Скиние всезлатая, Духом Святым осененная,

Радуйся, Пресвятая Дево, Предвечнаго Совета исполнение;

Радуйся, Отроковице Пречистая, чудес реко приснотекущая.

Радуйся, Госпоже Владычице, неистощимую благодать нам подающая;

Радуйся, милостивая Богородице Дево, Академии Киевския похвало и утверждение.

Кондак 1.

Избранней от всех родов Божией Матери и Царице, предивно образ Киево-Братский явившей, от негоже вси с верою благодатную помощь приемше, похвальная возносим пения. Ты же, Мати Милосердная, теплым Твоим ходатайством от всяких обстояний скоро свобождай во умилении сердец Тебе поющих:

Радуйся, милостивая Богородице Дево, Академии Киевския похвало и утверждение.

Залишити коментар

Ваша e-mail адреса не оприлюднюватиметься. Обов’язкові поля позначені *