Акростих акафиста: Славим Константина святаго
Кондак 1
Славы Царем Христом избранный к служению Таин Божественныя Трапезы, угодниче Господень и архипастырю честный священномучениче Константине, венец мученический приявый и в чертог Спасов вшедый, темже непрестанно молишися, да и люди православныя причасниками Горния Славы быти сподобятся. Се бо мы ныне ти взываем: Радуйся, священномучениче Константине, теплый молитвенниче о душах наших.
Икос 1
Лик небесный поет Тя, Христе, и глаголет:”Свят, Свят, Свят Господь Саваоф.” На земли Сла́ва Божия сияет в верных служителех нивы Твоея. От них же звездою многосветлою блистает житие благоче́стное и подвиг иерарха дивнаго Константина, иже живот свой не пощади, проповеда Тя, Боже. Сему угоднику вопием званиями сими:
Радуйся, добрый пастырю Христов,
Радуйся, делателю правды неустанный,
Радуйся, православия Украшение,
Радуйся, крине благоуханный,
Радуйся, столпе смирення,
Радуйся, верных благословение,
Радуйся, ходатаю нашего спасения,
Радуйся, безбо́жных обличение,
Радуйся, священномучениче Константине, теплый молитвенниче о душах наших.
Кондак 2
Апостольскую ревность имея во служении Таин Божиих, трудился еси, сотрудниче Христова вертограда. Егда же сединою украсися глава твоя, от богоборцев поноше́ния и уничижения даже до кончины мученическия приял еси, святителю отче Константине. Ныне же у Божия Престола предстоиши, молитвы любо́вию принося, воспевая Вседержи́телю: Аллилуйя.
Икос 2
Ве́лий Господь наш и велия крепость Его, яже во святы́х дивно туне подается верным. Стада Христова блюстителя, на немже благодать Божия почила есть, священномученика Константина восхвалим пении таковыми:
Радуйся, таинниче Божий,
Радуйся, рабе Христов, благий и верный,
Радуйся, благодатию обогащенный,
Радуйся, града Киева украшение,
Радуйся, преукрашенный смирением,
Радуйся, доблестный воин Небесного Царя,
Радуйся, молитву творя́й со умилением,
Радуйся, благоче́стия светлая заря,
Радуйся, священномучениче Константине, теплый молитвенниче о душах наших.
Кондак 3
Искренне возлюбив паству вверенную ти, отче Константине, изливал еси моления ко Христу о спасении душ человеческих, любо́вию Божиею сильне уязвився, неленостно ходатайствуеши, во еже скорби отъяти и радость водворити, воспевая Вседержи́телю: Аллилуйя.
Икос 3
Малое стадо не убояся грозы безбожия безумного. Се бо Христос стяжа́ Церковь Честно́ю Своею Кровию, и благовестники на ниве Своей возрастил есть. От них же светоч Православия Константин мудростию и стойкостию, аки маяк во тьме гибельней Светом Истины Спасовой светило бысть. Вернии иерарху славному поют сицевая:
Радуйся, Господа всем сердцем возлюбивый,
Радуйся, правдою Божией нечестие низложивый,
Радуйся, житием своим сокровище веры православныя явивый,
Радуйся, безбожных твердыней исповедания Христа удививый,
Радуйся, верных от скорби многажды молитвами твоими избавивый,
Радуйся,словом о Христе веру в сердцах людских пробудивый,
Радуйся, безбожных злочестие презревый,
Радуйся, силою Христовой гонителей одолевый,
Радуйся, священномучениче Константине, теплый молитвенниче о душах наших.
Кондак 4
Константине славне, священномучениче доблий, предстоя Престолу Царя Славы, не преставай молитися о людех притекающих прияти благословение твое, да зовем вси купно с тобою Христу Вседержи́телю: Аллилуйя.
Икос 4
Осанна Спасу нашему бысть кончина жития твоего в вере, страда́льче, яко не сломися дух твой благодатию укрепленный. Немощь старческая не ослаби веры истовыя, святителю славне. Даже до смерти твоея Христос бисером многоценным бысть сердца твоего. И по кончине телесней Господа славиши, святе. Люди же православныя взывают ти званиями сими:
Радуйся, правду Божию не посрамивый,
Радуйся, пример веры истовыя явивый,
Радуйся, мучителей дерзновением удививый,
Радуйся, буйство безбожных посрамивый,
Радуйся, подвигом твоим упование на Бога гонимых христиан укрепивый,
Радуйся, Церковь земли Киевския святынею твоею украсивый,
Радуйся, Господа словом не предавый,
Радуйся, венец мученический за Христа приявый,
Радуйся, священномучениче Константине, теплый молитвенниче о душах наших.
Кондак 5
Небесного чертога сподобивыйся славным житием твоим, иерарше, любовь свою ко Спасу запечатлел еси, не пощадив живота, не остави ны сирыми, да зовем вси купно Вседержи́телю: Аллилуйя.
Икос 5
Сила Божия в немощи старческой явися, егда не убоялся еси, святителю славне, угнетения от богоборцев дерзостно творимаго. Стоянию
Твоему в вере радуемся, священномучениче, назидаясь оным. Православные людие ти похвалу о Господе воздают званиями сими:
Радуйся, малодушия не явивый,
Радуйся, свет веры твердыя нам показавый,
Радуйся, лихолетия зной достойне прошедый,
Радуйся, любовь Христову и нрав благочестия не растративый,
Радуйся, подвигом твоим упование на Бога гонимых христиан укрепивый,
Радуйся, паству твою светом святости облиставый,
Радуйся, уныние в годы тяжбы от сердец верных отгнавый,
Радуйся, телесную смерть за Христа приявый,
Радуйся, священномучениче Константине, теплый молитвенниче о душах наших.
Кондак 6
Таинниче Божий, священномучениче Константине в ризу светлу Царствия одеяв тя Господь наш Иисус Христос, молим тя, отче, да одеяния студнаго душ своих избавятся людие зовуще о тебе Богу: Аллилуйя.
Икос 6
Аще и молитва наша немощна есть, и жестота сердец наших мерзка, но вемы, яко священномученика Константина подвиг Христа Бога прослави, молитвами святаго ищем Спасово Царствие наследовати. Тем же восхваляем старца и иерарха святаго званиями сими:
Радуйся, твердое упование на Бога возложивый,
Радуйся, душу свою Христу всецело посвятивый,
Радуйся, Церковь не посрамивый,
Радуйся, святостию своею Ю украсивый,
Радуйся, нападки врага спасения победивый,
Радуйся, непоколебимость духа явивый,
Радуйся, паству свою светом благодати Христовой озаривый,
Радуйся, Церковь Православную блюсти в целости учивый.
Радуйся, священномучениче Константине, теплый молитвенниче о душах наших.
Кондак 7
Неистовство попрания святыни, храмов гнусные осквернения, заушения, биения, притеснения от богоненавистников заблуждших терпел еси, священне отче Константине, но и в скорбех и лютых обстояниях взывал еси Христу Богу: Аллилуйя.
Икос 7
Таков нам подобаше Архиерей, незлобием украшенный, молитвою вооруженный, духом всецело пламенеяй. Сего славного священнодействителя Константина поем похвальными словесами:
Радуйся, ум своим в Горняя воспаривый,
Радуйся, жизни сея меру ко благу вменивый,
Радуйся, нечестие безбожия посрамивый,
Радуйся, заблуждение века сего обличивый,
Радуйся, житием своим Богу угодивый,
Радуйся, жаждущих Истины сею напоивый,
Радуйся, боли страждущих сердец утоливый,
Радуйся, за Христа пострадавый.
Радуйся, священномучениче Константине, теплый молитвенниче о душах наших.
Кондак 8
Искаше душа твоя Царства Небесного и предвосхищаше е, правду Божию слагал еси на скрижалях сердца своего, Константине славне. Се бо вернии с тобою взывают Христу Солнцу Правды: Аллилуйя.
Икос 8
Нарекла тя, иерарше добли, паства гонимая отцем своим и пастырем Христовым.Стадо словесных овец не оставил, святе Константине, егда огнь безумства попалил святыни православныя, домы Божия разрушая и оскверняя. Мужество твое велие и верность Христу прославляем званиями сими:
Радуйся, архиерею и мучениче благословенный,
Радуйся, служителю Христов верный,
Радуйся, благодатию приосененный,
Радуйся, благочестием от Бога обогащенный,
Радуйся, сосуд веры Господь сердце твое имеяй,
Радуйся, паству свою благословляяй,
Радуйся, терпению скорбей научаяй,
Радуйся, молитвами твоими недужных исцеляяй.
Радуйся, священномучениче Константине, теплый молитвенниче о душах наших.
Кондак 9
Ангельския радости и Славы Христовой на небесех сподобился, священномучениче Константине, на земли же тяготы изрядные претерпел еси в старости глубоцей, даже до кончины верен Господу пребыл еси. Ныне же поешь Богу сладце: Аллилуйя.
Икос 9
Славу мира сего во уметы вменил, отче Константине, яко прах и тля сия бысть ти, священномучениче. Премирную же славу Божию, яко драхму утраченную взыскал еси, смирения стяжав достояние. Тем же молитв святительских требуя, взываем ти похвальная сицевая:
Радуйся, столпе смирения,
Радуйся, стяжавый великое терпение,
Радуйся, отгоняяй веры сомнение,
Радуйся, молитвами твоими подаваяй утешение,
Радуйся, верных умиление,
Радуйся, неверных обличение,
Радуйся, испрашиваяй у Бога скорбей утоление,
Радуйся, посылаяй от уныния избавление.
Радуйся, священномучениче Константине, теплый молитвенниче о душах наших.
Кондак 10
Всякое слово похвалы бедно бысть по достоянию восхвалити тя, угодниче Божий Константине славне, житие твое Христа истово прославляет, огнь веры воспаляя в сердцах людских. Богу о тебе, священномучениче, поем: Аллилуйя.
Икос 10
Яко звезда светлая тихим светом Невечернего Света Христа возсия святитель и мученик Христов Константин на тверди Церкви нашея. Егоже восхвалим званиями сими:
Радуйся, исповедниче Христов славный,
Радуйся, Самим Господом на служение избранный,
Радуйся, народ к Боголюбию призываяй,
Радуйся, благословение молящимся тебе подаваяй,
Радуйся, Милости Господни верным посылаяй,
Радуйся, терпети скорби научаяй,
Радуйся, правдою Божиею обогащенный,
Радуйся, подвижниче дерзновенный.
Радуйся, священномучениче Константине, теплый молитвенниче о душах наших.
Кондак 11
Тень смертная безбожия падоша на страну нашу и лихолетие богоборчества Тело Христово претерпело есть. Константин же священномученик богомудрый любовь свою ко Господу исповедал. Темже смерть не победила служителя алтаря сего, поющего Богу: Аллилуйя.
Икос 11
Ангел Церкви Киевския священномученик Константин уничижения претерпе, Бога же возвеличил мирностию своею. В житии благочестие явив, Евангелию следовав до последняго издыхания на земли. Людие православнии ти, отче, похвальные песни поют сицевыя:
Радуйся, от юности Христу посвященный,
Радуйся, святителю благословенный,
Радуйся, смирением преиспещренный,
Радуйся, дерзновения святаго преисполненный,
Радуйся, мучениче сединами мудрости украшенный,
Радуйся, святе, образ незлобия от Господа явленный,
Радуйся, во Христову благодать облаченный,
Радуйся, кающиммся скорый помощниче.
Радуйся, священномучениче Константине, теплый молитвенниче о душах наших.
Кондак 12
Горе ум и сердце вознесл еси, Константине, дольних же не оставляеши сирыми в архипастырских молениях твоих, имиже во Царствии Христовем сподобимся купно вопевати: Аллилуйя.
Икос 12
Облако свидетелей Милостей Христовых Руси Киевския дивным во иерарсех мучеником и святителем Константином украсися. Со усердием присным сей молится Богу. О сем славнем священнодействителе поем Господу сице:
Радуйся, благодатию сердца людския просвещаяй,
Радуйся, слепоту душевную врачуяй,
Радуйся, богатством Любви щедро одаряяй,
Радуйся, к Горнему Царству души наша возводяяй,
Радуйся, скорбных утешаяй,
Радуйся, унылых ободряяй,
Радуйся, недужных Христовым благословением исцеляяй,
Радуйся, о прощении грехов наших неустанный ходатаю.
Радуйся, священномучениче Константине, теплый молитвенниче о душах наших.
Кондак 13
О, священномучениче Константине, пастырю добрый пажити Христовой, не престай молитися Спасу Вседержителю, да обрящем спасение многоценным ходатайством твоим пред Престолом Божиим и во веки зовем: Аллилуйя. (сей кондак читаем трижды, затем 1-й икос и 1-й кондак)
Икос 1
Лик небесный поет Тя, Христе, и глаголет:”Свят, Свят, Свят Господь Саваоф.” На земли Сла́ва Божия сияет в верных служителех нивы Твоея. От них же звездою многосветлою блистает житие благоче́стное и подвиг иерарха дивнаго Константина, иже живот свой не пощади, проповеда Тя, Боже. Сему угоднику вопием званиями сими:
Радуйся, добрый пастырю Христов,
Радуйся, делателю правды неустанный,
Радуйся, православия Украшение,
Радуйся, крине благоуханный,
Радуйся, столпе смирення,
Радуйся, верных благословение,
Радуйся, ходатаю нашего спасения,
Радуйся, безбо́жных обличение,
Радуйся, священномучениче Константине, теплый молитвенниче о душах наших.
Кондак 1
Славы Царем Христом избранный к служению Таин Божественныя Трапезы, угодниче Господень и архипастырю честный священномучениче Константине, венец мученический приявый и в чертог Спасов вшедый, темже непрестанно молишися, да и люди православныя причасниками Горния Славы быти сподобятся. Се бо мы ныне ти взываем: Радуйся, священномучениче Константине, теплый молитвенниче о душах наших.
Молитва священномученику Константину, митрополиту Киевскому
Влады́ко Го́споди Бо́же наш, неизрече́нным Твои́м промышле́нием и мно́гою благода́тию предуставля́я святы́я Своя́, предви́дивый из мла́да богоуго́дное житие́ избра́нного во иера́рсех, ди́внаго в му́ченицех, святи́тельство свя́то, всесожже́ние слове́сное, и́стиннаго Ева́нгелию Христо́ву после́дователя просла́вил еси́. Те́мже по предуве́дению до́браго твоего́ изволе́ния, тебе́, святи́телю Константи́не, Бог устро́и путь страда́ния, во е́же сообра́зну ти бытии́ Сы́ну Его́ сме́ртию, и пролия́ти свяще́нную кровь твою́, Ему́же от ю́ности после́довал еси́, ле́гкий яре́м Христо́в на ра́ме свое́м поне́сл еси́, и сме́ртную от рук богобо́рческих испи́в ча́шу. Подвигополо́жник же Христо́с Бог ви́дяй по́двиг страда́ния твоего́, я́ко всепло́дие же́ртвенно прия́л тя в вы́шния оби́тели, иде́же со дерзнове́нием предстоя́ и в ли́це святы́х возводя́ся, священному́чениче Константи́не, помина́й нас недосто́йных и моли́ изба́витися от враг ви́димых и неви́димых и получи́ти благода́ть от Го́спода, Ему́же со Отце́м и Святы́м Ду́хом сла́ва, честь и поклоне́ние, во ве́ки. Ами́нь.
Тропарь, глас 3:
Це́ркве Ру́сския сто́лпе непоколеби́мый, / благоче́стия пра́вило, /жития́ ева́нгельскаго о́бразе, / священному́чениче Константи́не, /
Христа́ ра́ди пострада́вый да́же до кро́ве, / Его́же моли́ усе́рдно, /я́ко Нача́льника и Соверши́теля спасе́ния, /Русь Святу́ю утверди́ти в Правосла́вии // до сконча́ния ве́ка.
Кондак, глас 2:
Восхва́лим, ве́рнии, изря́днаго во святи́телех /и сла́внаго в му́ченицех Константи́на, /Правосла́вия побо́рника и благоче́стия ревни́теля, /
Земли́ Ру́сския кра́сное прозябе́ние, /и́же страда́нием Небесе́ дости́же, /
и та́мо те́пле мо́лит Христа́ Бо́га / спасти́ся душа́м на́шим.
Величание:
Велича́ем тя, священному́чениче Константи́не, и чтим честна́я страда́ния твоя́, я́же за Христа́ претерпе́л еси́.