АКАФИСТ ПРЕСВЯТЕ́Й ВЛАДЫЧИЦЕ БОГОРОДИЦЕ ПЕРЕД ЧУДОТВОРНОЮ ЕЯ ИКОНОЮ ИМЕНУЕМОЮ КАССОПИТРА
Краеграсие неседального пения:
ВСЕПЕ́ТАЯ УТЕШЕНИЕ ДАЀТ ЩЕДРО
Кондак 1
Взбра̀нной Сокро́вищнице благода́ти, пра́вду всеце́ло Возлюби́вшей и Возненави́девшей беззако́ние, вся́кую слезу́ от лица́ пра́ведных Отира́ющей брѐнными усты́ воспое́м пе́снь хвале́ния: Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Икос 1
Свет Невечѐрний ви́дети сподо́би нас Твои́ми Матери́нскими моли́твами, Всеблага́я Богоро́дице, обогати́ ны му́дростию, наве́тов клеветни́ческих изба́ви, да пое́м ти благода́рно пе́ние сицево́е:
Ра́дуйся, благода́ти Све́том Сия́ющая.
Ра́дуйся, от мра́ка уны́ния Изыма́ющая.
Ра́дуйся, лжѝвых Посрамля̀ющая.
Ра́дуйся, стре́лы лука́вого Отража́ющая.
Ра́дуйся, от ско́рби Избавля̀ющая.
Ра́дуйся, ра́дости неча́янныя Исполня́ющая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 2
Е́же о Стефа́не испо́лнено бысть Тобо́ю, Чи́стая, смотре́ние све́рх естества́, я́ко о́чи дарова́ны ему́ бы́ша, к ра́дости несказа́нней ю́ношу сего́ привела́ еси́, Де́во Благода́тная, и сей вопие́т Бо́гу сла́дце: Аллилу́йя.
Икос 2
Приидо́ша с ма́терию в ско́рби су́щей в храм Твой в Кассиопе́ю клевето́ю, а́ки тума́ном объя́тый, и непра́ведно ослепле́нный Стефа́н, но не ма́лыя ми́лостыни подая́нием сего́ пра́ведника благослови́ла еси́, оба́че о́чи но́вы с голубы́ми зе́ницами, я́ко не́бо, вме́сто че́рных глаз вы́рваных палаче́м, сотвори́ла еси́ ему́, Ма́ти Неневе́стная Творца́ и Бо́га на́шего. Мы же зря́ще Милосе́рдия Твоего́ пучи́ну, Богоро́дице, вопие́м умиле́нно:
Ра́дуйся, зре́ние Подаю́щая.
Ра́дуйся, вене́ц ра́дости Вью́щая.
Ра́дуйся, ско́рое ско́рбных Утеше́ние.
Ра́дуйся, ди́вное боля́щих Исцелѐние.
Ра́дуйся, дела́ милосе́рдия мно́гажды Сотворя́ющая.
Ра́дуйся, чудеса́ неизрече́нныя Соверша́ющая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 3
Еди́ну Тя в го́ре и ско́рби Уте́шительницу ве́дуще, Богоро́дице Всепе́тая, ма́ти ско́рбная с сы́ном ослепле́нным обрето́ша благода́тно Цели́тельницу и о Тебе́ до сконча́ния дний на земли́ вы́ну пе́ли Бо́гу: Аллилу́йя.
Икос 3
Твой Сын, Богома́ти Пречи́стая, о всех принесе́ Себе́ Же́ртву. Мо́лим Тя, Влады́чице Всесвята́я, к Нему́же хода́тайствуй, да благоприя́тным бу́дет пе́ние Благосе́рдия Твоего́ в чу́де сем ве́лием, е́же смире́нному Стефа́ну сотвори́ла еси́, и слы́шиши ны́не ве́рных хвале́ние сицево́е:
Ра́дуйся, Ми́лости от Бо́га ча́ющих Лобза́ющая.
Ра́дуйся, смире́нных се́рдцем Возвыша́ющая.
Ра́дуйся, осяза́нием оби́димаго Исцели́вшая.
Ра́дуйся, о́чи но́выя сему́ Сотвори́вшая.
Ра́дуйся, Пра́вду Бо́жию Яви́вшая.
Ра́дуйся, от нищеты неправедныя Избавившая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 4
А́нгелов Превы́сшая благода́тию Де́ва десни́цею Свое́ю Пречи́стою глазни́ц изъя́звленных Стефа́новых каса́нием но́выя о́чи сему́ богобоя́зненному юнцу́ сотворя́ет, да во све́те присносу́щнем вопие́т исцеле́нный Христу́ Бо́гу: Аллилу́йя.
Икос 4
Я́же Свет Ро́ждшая Боже́ственный и Преве́чный Христа́ Бо́га, Богоро́дице, разреши́ мглу прегреше́ний на́ших, да у́зрим Сла́ву Нетле́нную Сы́на Твоего́, взыва́ющии Ти, Влады́чице Чи́стая, такова́я:
Ра́дуйся, де́в Велича́ние.
Ра́дуйся, ма́терей при́сное Ра́дование.
Ра́дуйся, Сокруши́теля главы́ зми́я Ро́ждшая.
Ра́дуйся, осужде́ния дре́вняго род наш Изба́вльшая.
Ра́дуйся, Неувяда́емый Цве́те Де́вства.
Ра́дуйся, Кри́не се́льный Чистоты́.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 5
Ускоря́ющая благоутро́бно в ско́рбех и обстоя́ниих на по́мощь к на́м гре́шным и се́рдцем сокруше́нным, но упова́ние на Ми́лость Твою́ иму́щим, Богоро́дице, при́сно явля́ешися и ве́рнии вы́ну благода́рно пою́т о Тебе́ Сы́ну Твоему́ и Бо́гу: Аллилу́йя.
Икос 5
Твоя́ ико́на, «Кассопи́тра» глаго́лемая, немерца́емо сия́ет, Богоро́дице Де́во, и ве́сь ми́р благода́тно озаря́ет, прогоня́ющи вся́кое вра́жие де́йство си́лою Бо́жиею, от нея́ исходя́щею. Те́мже ра́дуемся мы́, гре́шнии, иму́ще таковы́й зало́г Твоего́ к на́м благоволе́ния, и Тебе́, Всесвята́я Де́во, благода́рственно взыва́ем:
Ра́дуйся, Ча́ше утеше́ния духо́внаго Преиспо́лненная.
Ра́дуйся, ра́дость благода́тную Излива́ющая.
Ра́дуйся, Светоно́сная Се́не Небе́сная Сия́ющая.
Ра́дуйся, де́вственная ликостоя́ния Услажда́ющая.
Ра́дуйся, го́рняго ми́ра Украше́ние.
Ра́дуйся, до́льняго ми́ра Заступле́ние.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 6
Еди́на обрела́ еси́ благода́ть сугу́бую, обнови́ нас се́ю, Всесвята́я Влады́чице, да досто́йны бу́дем пра́ведно воспе́ти благода́ти Пода́телю Бо́гу: Аллилу́йя.
Икос 6
Широка́ зело́ за́поведь Сы́на Твоего́, Всесвята́я Де́во и Ма́ти. Коль возлюби́х зако́н Го́спода Иису́са, Стефа́н клевето́ю, я́ко паути́ною опови́тый, весь день поуче́ние его́ бысть. Сего́ ра́ди от сете́й вра́жиих изба́вила еси́ о́наго ю́ношу пре́жде здра́вие пресла́вно пода́вши, посе́м же и бога́тством его́ же одари́ла еси́ моли́твами Твои́ми, Чи́стая. Мы же, дивя́щеся бы́вшим благодея́ниям ве́лиим, пое́м Ти сицева́я:
Ра́дуйся, ве́рных кре́пкое Упова́ние.
Ра́дуйся, к блаже́нному житию́ Воззва́ние.
Ра́дуйся, ру́ку по́мощи Твоея́ оби́димым Простира́ющая.
Ра́дуйся, безнаде́жным наде́жду Да́рующая.
Ра́дуйся, наги́х ми́лостивно Одева́ющая.
Ра́дуйся, За́поведи Сы́на Твоего́ исполня́ти Повелева́ющая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 7
Еди́но проси́х от Го́спода, е́же жи́ти ти в дому́ Госпо́дни, Стефа́не, и ми́лостыни подая́нием пита́тися, я́ко слепцу́ вы́ну. Но взыска́л еси́ Ми́лость ве́лию и неизрече́нную, е́же зре́ти ти красоту́ Госпо́дню и посеща́ти храм святы́й Его́, благода́рно взыва́юще о Пречи́стыя Богоро́дицы благодея́нии чуде́снем Бо́гу Всеще́дрому: Аллилу́йя.
Икос 7
Но́вое зна́мение милосе́рдия Твоего́ яви́ла еси́, Влады́чице, в чуде́снем прославле́нии святы́я ико́ны Твоея́ Кассопи́тры, не то́кмо боголю́бцам Керки́ры, но и все́м правосла́вным христиа́ном, в ни́хже благогове́йно честву́ется сея́ ико́ны Твоея́ изображе́ние, да вси́ Тебе́ зову́т:
Ра́дуйся, Де́вства Дне Незаходи́мый.
Ра́дуйся, Чистоты́ Све́те златоза́рный.
Ра́дуйся, Звездо́, путь нам во тьме Указу́ющая.
Ра́дуйся, матери́нския сердца́ му́дро Утеша́ющая.
Ра́дуйся, в ра́дость печа́ль ве́лию Приводя́щая.
Ра́дуйся, ну́жды на́ша ско́ро ко престо́лу Бо́жию Вознося́щая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 8
Ико́на Твоя́, Пречи́стая Де́во, оби́тель на́шу ны́не украша́ет и вся́ ве́рныя утеша́ет зна́меньми Твоея́ ми́лости, ея́же не лиши́ и на́с смире́нных, по до́лгу Тя́ воспева́ющих, и вопию́щих чуде́с Творцу́ Бо́гу: Аллилу́йя.
Икос 8
Естества́ уста́вы побежда́ются, Всесла́вная Де́во, Твои́ми многомо́щными моли́твами, Ты бо мно́гажды оста́вленных врача́ми в ру́це Свои́ прие́млеши и здра́вие всеце́лое подае́ши благода́тно бла́гостию Матери́нскою. Се бо ве́рнии взыва́ют Ти пе́сни похва́льныя:
Ра́дуйся, Мо́лние, тьму на́шу Освеща́ющая.
Ра́дуйся, грехи́ людски́я слеза́ми Пречи́стыми Омыва́ющая.
Ра́дуйся, на Стра́шнем Суди́ще Христо́вом за нас Заступа́ющая.
Ра́дуйся, ве́рным Свои́м ча́дом ве́чную ра́дость Уготовля́ющая.
Ра́дуйся, пла́чущим наде́жду и утеше́ние Даю́щая.
Ра́дуйся, Свет Неугаси́мый во тьме су́етней Возже́гшая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 9
Дарова́ла еси́, Пресвята́я Богоро́дице, благода́ть изоби́льную пречи́стому Твоему́ о́бразу, его́же в зало́г благоволе́ния Твоего́ лю́дем правосла́вным оста́вила еси́, пою́щим всех благи́х Пода́телю Бо́гу: Аллилу́йя.
Икос 9
А́гнца Боже́ственнаго Ро́ждшая и Возрасти́вшая на́м Кла́с Живота́, Богоро́дице и Де́во Пресла́вная, не оста́ви на́с, гре́шных, Свои́м Попече́нием о ро́де христиа́нском, к Сы́ну бо Твоему́ ру́це Чи́стии простира́еши, я́ко зане́ не отврати́тся от Тебе́, но испо́лнит вся́ проше́ния Твоя́, Ма́ти на́ша Люби́мая. Се же мы припаде́м ко о́бразу Твоему́ ди́вному, пою́ще Ти си́це:
Ра́дуйся, гре́шных Ми́лующая.
Ра́дуйся, пра́ведных Благословля́ющая.
Ра́дуйся, стра́ждущим по́мощь Посыла́ющая.
Ра́дуйся, безча́дных по моли́тве рожде́нием ча́д Одаря́ющая.
Ра́дуйся, всежела́тельное зре́ние Возвраща́ющая.
Ра́дуйся, де́монския полки́ Побежда́ющая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 10
Егда́ ору́жие про́йде се́рдце Твое́, ви́дящи Сы́на Твоего́ ви́сяща на Кресте́ и стра́ждуща на́с ра́ди гре́шных, Ма́тернии страда́ния претерпе́ла еси́ Богоро́дице. Пред ико́ною Твое́ю чудотво́рною со стра́хом Бо́жиим и тре́петом Да́р утеше́ния прие́млющи, ма́терей мно́жество благода́рно Бо́гу воспева́ют: Аллилу́йя.
Икос 10
Таре́ль с глаза́ми че́рными узре́вше, раска́яхся прави́тель, я́ко клеветы́ наве́там преда́хся, и проще́ние у исцеле́нного Стефа́на, я́ко у неви́ннаго, проси́л бых и мно́гия да́ры тому́ препо́дал бога́тно. Та́кожде огра́ду хра́ма Всесвяты́я, и́же Кассиопе́е обнови́л есть, иде́же воспева́ют Цари́це Небе́сней пе́сни такова́я:
Ра́дуйся, ра́дость неча́янную Подаю́щая.
Ра́дуйся, млеко́м любви́ Боже́ственныя на́с Напоя́ющая.
Ра́дуйся, печа́ли и ско́рби в ра́дость Претворя́ющая.
Ра́дуйся, Ма́терними щедро́тами на́с Посеща́ющая.
Ра́дуйся, на́шу скве́рну чистото́ю Твое́ю Очища́ющая.
Ра́дуйся, еле́ем ми́лости Твоея́ на́с Утеша́ющая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 11
Ще́дроутеше́ния Подаю́щая, Ма́ти Христа́ Жизнода́вца, сподо́би моли́твами Твои́ми ны в селе́ниях ра́дости воспева́ти Ему́ при́сно: Аллилу́йя.
Икос 11
Едѝному Даропода́телю и Щедро́т Исто́чнику Бо́гу плоть Дарова́вшая и све́рх естества́ Присноде́вою до Рождества́, в Рождестве́, и по Рождестве́ пребыла́ еси́, Неве́сто Неневе́стная. Те́мже чуде́с ре́ки источа́еши ве́рным неоску́дно, прие́млюще воззва́ния благода́рныя:
Ра́дуйся, хлад уны́ния Отгоня́ющая.
Ра́дуйся, Ра́дость ми́ру Да́рующая.
Ра́дуйся, от бед Твое́ю Бла́гостию Соблюда́ющая.
Ра́дуйся, слепоту́ душе́вную и теле́сную Врачу́ющая.
Ра́дуйся, бога́тством Наделя́ющая.
Ра́дуйся, очерне́нных клевето́ю пра́вдою Убеля́ющая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 12
Дево Всесвята́я и Ма́ти Бо́га на́шего, дары́ Ми́лости Тобо́ю продава́емые по́мощи ча́ющим кто изчести́ возмо́жет? О сем мно́жестве вопие́м о Тебе́ Христу́ Бо́гу сла́вно: Аллилу́йя.
Икос 12
Ра́дости исто́чник ико́на Твоя́, Богоро́дице, яви́ся, я́ко и́стово пред не́ю Тебе́ моля́щиися благода́тныя утеше́ния прие́млют. Никто́же же от сих с ве́рою предстоя́щих то́щим от Твои́х Ми́лостей быва́ет, то́кмо благода́рно взыва́ют си́це:
Ра́дуйся, печа́льных Утеша̀ющая.
Ра́дуйся, щедро́ты ве́рным Посыла̀ющая.
Ра́дуйся, надѐжду иму́щих на Тя Пита́ющая.
Ра́дуйся, от врат сме́ртных неисце́льных к жи́зни Возвраща́ющая.
Ра́дуйся, сострада́ния к стра́ждущим Преиспо́лненная.
Ра́дуйся, почита́ющих Тя жи́зни ве́чныя Сподобля́ющая.
Ра́дуйся, Всепе́тая Де́во Богоро́дице, упова́ющих на Тя ще́дро Благословля̀ющая.
Кондак 13
О, Пресла́вная и Преблагослове́нная Влады́чице Богоро́дице, очи́сти ум на́ш и се́рдце чи́сто сотвори́ нам, да сподо́бимся узре́ти Свет Невечѐрний Христа́ Бо́га на̀шего и при́сно пе́ти Ему́ о Тебе́: Аллилу́йя, Аллилу́йя, Аллилу́йя. (сей кондак чтем трижды, посем 1-й икос и 1-й кондак)
Тропарь, глас 3-й:
Слез матери́нских избавле́ние,/ клеветы́ лихи́я плодо́в го́рьких отъя́тие и милосе́рдия ве́лие явле́ние/ ико́на Твоя́, Всепе́тая Богоро́дице, показа́ся. / Пред не́ю же Тебе́ моле́ния прино́сим,/ ча́юще духо́вную ра́дость прия́ти // и нело̀жное Утеше́ние.
Кондак, глас 4 -й:
Упова́ние христиа́н непосты́дное, /печа́ли ди́вное избавле́ние,/ чистоты́ серде́чныя дарова́ние, /оче́с духо́вных отверзе́ние,/ Ма́ти Неневе́стная и Сердобо́льная,/ моли́ Христа́ Бо́га //спасти́ся душа́м на́шим.
МОЛИТВА КО ПРЕСВЯТЕ́Й ВЛАДЫЧИЦЕ БОГОРОДИЦЕ ПЕРЕД ЧУДОТВОРНОЮ ЕЯ ИКОНОЮ ИМЕНУЕМОЮ КАССОПИТРА
О, Преблагослове́нная Влады́чице Богоро́дице и Присноде́во Мари́е, ма́терей нело̀жное Утешѐние и Ра́дости неча́янныя Неоску́дный Исто́чниче, смирѐнным сердца́м благода́ть изоби́льно Подаю́щая! Испроси́ у Боже́ственного Сы́на Твоего́, Спаси́теля и Бо́га на́шего Го́спода Иису́са Христа́, да не помяне́т грехо́в и беззако́ний на́ших, но да изба́вит ду́ши на́ша от уст непра́ведных и от язы́ка льсти́ваго, и отверзе́ние оча́м на́шим мы́сленным пода́ст, е́же ви́дети блага́я и благодари́ти за Ми́лости, Твои́ми святы́ми моли́твами, Богома́ти, быва́емыя на нас, и сла́вити Его́ со Отце́м и Святы́м Ду́хом, ны́не и при́сно и во ве́ки веко́в. Ами́нь.
МОЛИТВА ОБ ИЗБАВЛЕНИИ ОТ КЛЕВЕТЫ
КО ПРЕСВЯТОЙ ВЛАДЫЧИЦЕ БОГОРОДИЦЕ ПЕРЕД ЧУДОТВОРНОЮ ЕЯ ИКОНОЮ ИМЕНУЕМОЮ КАССОПИТРА
О, Пресвята́я Влады́чице Богоро́дице, христиа́н правосла́вных Упова́ние Непосты́дное! Моли́твами Твои́ми те́плыми изба́ви ны от наве́тов вра́жиих и клеветы́ челове́ческия, и́же стесня́ет се́рдце, осла́бу и охла́ду доброде́телем вдае́т, да сохрани́м за́поведи Сы́на Твоего́ и Бо́га на́шего Го́спода Иису́са Христа́. Моли́, Всеми́лостивая Влады́чице Богоро́дице, а́ще и прие́млем уда́ры напра́сныя, я́же, а́ки мраз плоды́ земны́е в по́ру весе́ннюю, ду́шу бо́лию уязвля́ют, да не остано́вимся в недоуме́нии и преспе́яние в доброде́лании и и́стовую ра́дость обря́щем, благодаря́ще и хва́ляще Твое́ свято́е и неусы́пное Хода́тайство во ве́ки веко́в. Ами́нь.
******************************************************
Сказание об иконе Божией Матери Кассопитра (греч. Κασσωπίτρα)
Празднование: 8 мая, 21 ноября, день принесения в обитель–….. .
Чудотво́рная икона Пресвятой Богородицы Кассопитра (греч. Κασσωπίτρα) прославилась в 1530 году на острове Керкира. В то время, когда остров находился под венецианским господством, там безвинно пострадал благочестивый юноша Стефан. По приговору судьи он был оклеветан и ослеплён за преступление, которого не совершал. С тех пор Стефана, неспособного передвигаться самостоятельно, водила за руку его мать. На северо-востоке острова, в 18 милях от столицы находилось когда-то небольшое приморское поселение Кассиопея, на месте которого стоял знаменитый храм, посвящённым Пресвятой Богородице. Стефан решил отправиться в этот храм, остаться при нём и просить милостыню. Поклонившись находящемуся в церкви чтимому образу Божией Матери «Неувядаемый цвет» и горячо помолившись Ей, они с матерью остались ночевать в храме. Ночью Стефан почувствовал, как кто-то коснулся рукой его лица и стал ощупывать пустые глазницы. Внезапно прямо перед собой он увидел Женщину в ослепительном сиянии. Она предстала пред ним ненадолго и исчезла. А Стефан обрёл зрение, только глаза у него стали теперь голубыми, тогда как до казни они были чёрными. Со слезами радости мать и сын благодарили Пресвятую Богородицу за Её скорое вмешательство и помощь.
Весть о чудесном исцелении Стефана быстро разнеслась по острову. Правитель спросил палача, действительно ли тот вырвал глаза у юноши. В доказательство палач показал правителю пару лежащих в тазу черных глаз. Пригласив Стефана к себе, правитель просил у него прощения и, желая возместить его страдания, богато одарил. Также он обновил ограду святого храма Пресвятой Богородицы в Кассиопее.
Отеческой заботой священноигумена Киевского Свято-Благовещенского монастыря, что в Бортничах, архимандрита Варлаама в обитель принесен точный список образа Кассопитра. Перед иконой православные люди молятся о всяких нуждах, в особенности, об избавлении от клеветы, а также о здравии очес и хорошем зрении.