Егоже краеграсие: ИОАНН ИОСИФА ВОСПЕВАЕТ ДИВНО
Сей акафист есть скромное приношение в похвалу великому подвижнику и молитвеннику Святой горы Афон ХХ века Преподобному Иосифу Исихасту
от недостойного Архимандрита Иоанна (Гончаренко)
Кондак 1
Избра́нный Го́сподом Иису́сом Христо́м в чи́не а́нгельском послужи́ти Ему́,/ из мо́ря жите́йского воздвиза́емого зря напа́стей бу́рею на Го́ру Святу́ю возше́л еси́,/ и Де́вою Богоро́дицею с возлю́бленными ча́дами Ея́ вмене́н,/ Святы́м и Животворя́щим Ду́хом очи́стился и освяти́лся еси́,/ Ны́не же о Го́споде утеша́ешися,/ со а́нгелы и святы́ми блаже́нствуеши и слы́шиши:/ ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Икос 1
О гряду́щей сла́ве твое́й, святы́й уго́дниче Бо́жий, ма́терь твоя́ Мари́я извещена́ бысть Открове́нием от Го́спода. Ве́стник небе́сный начерта́ние и́мени твоего́ сотвори́х в сви́тке таи́нственнем, ре́кше, я́ко сие́ Небе́сному Царю́ Христу́ уго́дно. Мы же с не́ю ра́дости испо́лненнии, я́ко но́ваго моли́твенника церко́внаго обрето́хом, пое́м ти, о́тче:
Ра́дуйся, на служе́ние Бо́гу избра́нный.
Ра́дуйся, цве́те уедине́ния благоуха́нный.
Ра́дуйся, благоче́стия и́ноческого храни́телю.
Ра́дуйся, за́поведей Христо́вых исполни́телю.
Ра́дуйся, благосе́рдный Бо́жий уго́дниче.
Ра́дуйся, усе́рдный по́стниче.
Ра́дуйся, неуста́нный моли́твенниче.
Ра́дуйся, сла́вный подви́жниче.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 2
Арсе́ния Пеще́рника и Исиха́ста Промы́слом Бо́жиим дру́гом ты, о́тче преподо́бне обре́л еси́. С ним же ку́пно еди́ными усты́ и еди́ным се́рдцем воспева́л еси́ Христу́ Бо́гу: Аллилу́иа.
Икос 2
Наставле́ниям му́дрым Дании́ла Катунаки́йского о послуша́нии и отсече́нии своево́лия в мона́шеском де́лании вня́вши, со дру́гом и́скренним во Христе́ Иису́се Арсе́нием во́лю свою́ вве́риша послуша́нию ста́рцу-алба́нцу Ефре́му Катунаки́йскому. И в скиту́ святи́теля Васи́лия Вели́кого подвиза́лся еси́, искуше́ниями и трудо́м иску́с преодоле́в, постриже́ния в вели́кую схи́му удосто́ился еси́, Ио́сифом нарече́н был еси́. О вели́ких духо́вных сверше́ниях твои́х ве́дуще, пое́м ти пе́сни таковы́я:
Ра́дуйся, от растле́ния Бо́гом удержа́нный.
Ра́дуйся, Па́стырем До́брым от ко́злищ несмы́сленных отделе́нный.
Ра́дуйся, Духо́м Святы́м одухотворе́нный.
Ра́дуйся, с праведны́ми вмене́нный.
Ра́дуйся, словеса́ми Писа́ний и святы́х оте́ц наста́вленный.
Ра́дуйся, труда́ми благоче́стия обогаще́нный.
Ра́дуйся, сосу́де благода́тию очище́нный.
Ра́дуйся, ра́бе ве́рный, Бо́гом освяще́нный.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 3
Неприя́зненныя превозмога́я бу́ри, преподо́бне и блаже́нне Ио́сифе, в се́рдце умо́м соверша́л еси́ Спаси́телю песнопе́ние ди́вное: Аллилу́иа.
Икос 3
Ио́сифе сла́вне, бре́мя наста́внического креста́ подъя́л еси́, егда́ ста́рец Ефре́м ко Го́споду преста́вися. С бра́том во Христе́ Арсе́нием окормле́ния духо́внаго жа́ждуща, стра́нствования и скита́ния Свято́ю Горо́ю предприя́ли есте́, в кали́ву то́кмо к зиме́ приходя́ща. Сия же ме́стом жития́ ва́шего избранна́ бысть. Мы, воспыла́ти дерзнове́нною любо́вию ко Христу́ Бо́гу моли́твами твои́ми хотя́ще, старче́ свя́те, поем ти сице:
Ра́дуйся, благоче́стия о́бразе.
Ра́дуйся, нача́льство, я́ко служе́ние прия́вший.
Ра́дуйся, Бо́гу во́лею порабо́тивыйся.
Ра́дуйся, я́ко в нача́льстве твое́м Христо́ва смире́ния подо́бие явля́ется.
Ра́дуйся, я́ко того́ ра́ди поко́й душа́м на́шим обрета́ется.
Ра́дуйся, о лю́дех до́брое моле́ние возноси́вый.
Ра́дуйся, на де́моны му́жественно ополчи́выйся.
Ра́дуйся, а́нгельскаго ликостоя́ния приобщи́выйся.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 4
От Боже́ственнаго зла́ка воспита́нный, Ио́сифе ста́рче, Афо́нская похвало́, пре́лести духо́в лука́вых избе́гнул, на высоту́ доброде́телей ре́вностию возше́д, дом Ду́ха Свята́го се́рдце свое́ устро́ил еси́. Богоро́дицею возлю́бленный, мона́хов пра́вило! Моли́твами твои́ми, преподо́бне, упра́ви нас на путь ми́рен, да зове́м с тобо́ю Бо́гу: Аллилу́иа.
Икос 4
Строй мона́хов в виде́нии созерца́ше, отче Ио́сифе, до́блих во́инов Христо́вых, иму́щих на брань поити́ с по́лчищами де́монов. Военача́льник мона́хов ти предложе́ние соде́ла посреде́ передовы́х во́инов ста́ти, ты же сие́ соде́лал еси́. По виде́нии сем возведе́ на тя, о́тче, лю́тую и неми́рную брань враг ро́да челове́ческаго, се́ти своя́ расставля́я, но по́мощию Бо́жиею ты победи́л еси́ нападе́ния диа́вольские мно́гажды изрыга́емые. Дивя́щеся твоему́ упова́нию на Бо́га непоколеби́мому вопие́м ти, преподо́бне:
Ра́дуйся, смире́нием ду́шу свою́ облачи́вый.
Ра́дуйся, упова́ние на Христа́ положи́вый.
Ра́дуйся, по́двигами диа́вола посрами́вый.
Ра́дуйся, посто́м и моли́твами се́рдце свое́ украси́вый.
Ра́дуйся, по́лчища де́монския в бе́гство обрати́вый.
Ра́дуйся, благода́тныя дарова́ния стяжа́вый.
Ра́дуйся, моли́твы непреста́нное кади́ло.
Ра́дуйся, а́нгелов собесе́дниче.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 5
Ио́сифе блаже́нне о́тче наш, Боготе́чно вознесы́йся к Небеси́ неизрече́нное ви́дел еси́ в Раи́ и пение всесладча́йшее слы́шал еси́: Аллилу́иа.
Икос 5
Фимиа́м прия́тный Христу́ Бо́гу бысть житие́ твое́ многотру́дное, преподо́бне о́тче Ио́сифе! У́мное де́лание, моли́тва непреста́нная, сокруше́ние серде́чное, пост благоуго́дный Го́сподеви, со сном боре́ние, стра́сти ле́ности низложе́ние. Все сие́ воздвиза́ет пе́ти тя благогове́йно:
Ра́дуйся, Це́ркви украше́ние.
Ра́дуйся, печа́тию благода́ти запечатле́ние.
Ра́дуйся, пустыннолю́бного жития́ соверше́ние.
Ра́дуйся, прозя́бший благоче́стие от росы́ Ду́ха Свята́го, кри́не.
Ра́дуйся, неве́рующих я́вное обличе́ние.
Ра́дуйся, наде́ющихся на Бо́га до́брое утвержде́ние.
Ра́дуйся, гра́де, верху́ горы́ стоя́й и изоби́луяй вы́шними добро́тами.
Ра́дуйся, сокро́вищнице, богатя́щая на́с духо́вными би́серы.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 6
Афо́нскою Игу́мениею Богоро́дицею соу́з святы́й и соверше́нный моли́твы Пеще́рников дво́ицы Ио́сифа и Арсе́ния на верши́не Святы́я Горы́ одобре́нный ве́дуще, пое́м умиле́нно Христу́ Бо́гу о свети́льниках сих: Аллилу́иа.
Икос 6
Ви́дя житие́ и по́двиги твоя́ смире́ния испо́лненные, святы́й уго́дниче Бо́жий Ио́сифе, мно́жество подви́жников о́крест тебе́ собра́шася, и та́ко бра́тство мона́шеское созида́ся. В нем же кро́вный брат твой Афана́сий бысть, и по ду́ху ти сродни́ся. С ним и мы воспева́ем ти любо́вию:
Ра́дуйся, вмести́лище все́х сокро́вищ Госпо́дних.
Ра́дуйся, раздая́телю коему́ждо на по́льзу даро́в духо́вных, я́же прия́л еси́ от Го́спода.
Ра́дуйся, сто́лпе, пу́ть пра́вый хотя́щим обрести́ его́ указу́ющий.
Ра́дуйся, щедро́тами духо́вными гобзу́ющий.
Ра́дуйся, многоле́тне свя́то подвиза́выйся.
Ра́дуйся, от суеты́ мирски́я отказа́выйся.
Ра́дуйся, Христа́ Бо́га ра́бе благи́й.
Ра́дуйся, нивы Госпо́дней де́лателю до́брый.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 7
Откры́ Госпо́дь Бог обоня́ние ученико́м твои́м: Харала́мпий Дионисиа́тский и Ефре́м Филофе́йский, стра́цы благогове́йные чу́вствоваша арома́т Иису́совой моли́твы, тобо́ю Ио́сифе твори́мыя, и уразуме́ша, я́ко благоуха́ет не то́кмо челове́к моли́тву де́ющий, но и ме́сто, иде́же он стои́т, ороша́я вся, о́крест его́, вну́тренния и вне́шния чу́вства. Ты бо ре́кл еси́: «Благоуха́ние есть И́мя Христо́во». О сем же сла́дце пое́м: Аллилу́иа.
Икос 7
Сла́дость Христо́ву показа́в схимона́ху Ио́сифу Ватопе́дскому, обеща́л еси́ сему́ подви́жнику пре́жде посла́ти посы́лку, вопроси́л еси́ сего́: «Ви́диши ли, ка́ко сла́док Христо́с? Ны́не ты позна́л еси́, каково́ есть приле́жно тобо́ю проси́мое. Труди́ся же, о́тче, во е́же соде́лати сию́ благода́ть свое́ю, да не похи́тит ея́ небреже́ние». Мы же, дивя́щеся Ми́лости сей, вопие́м ти пе́ние похва́льное:
Ра́дуйся, ра́дости и́стовыя посла́ние.
Ра́дуйся, до́брое христиа́н увещава́ние.
Ра́дуйся, благо́е и́нокам назида́ние.
Ра́дуйся, Христа́ взыска́ние.
Ра́дуйся, Любо́вию се́рдца пита́ние.
Ра́дуйся, сподо́бивыйся Бо́га позна́ния.
Ра́дуйся, бога́тым мира сего́ до́брое вразумле́ние.
Ра́дуйся, ни́щим и тру́дником благо́е утеше́ние.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 8
Пропове́дал еси́ пусты́ннически, Блаже́нне Ио́сифе, кро́ви отда́ние для Ду́ха стяжа́ния с пе́нием: Аллилу́иа.
Икос 8
Еди́но на потре́бу избра́в, востекл еси в Вертогра́д Всесвяты́я Де́вы на Святу́ю Го́ру Афо́н. Та́мо в по́двигах свя́то пожи́в, спасе́ния ве́чного во Христе́ дости́гл еси́, и ликовству́юще с го́рними си́лами, слы́шиши пе́ния от нас гре́шных приноси́мыя:
Ра́дуйся, свети́льниче благода́ти незаходи́мый.
Ра́дуйся, глубино́ непроходи́мая даро́в духо́вных.
Ра́дуйся, высото́ неудобозри́мая виде́ний высо́ких.
Ра́дуйся, нра́вов преподо́бных сосу́де.
Ра́дуйся, ко́рене благоро́днаго дре́во всепло́дное.
Ра́дуйся, благоче́стия киннамо́не благово́нный.
Ра́дуйся, я́ко презре́л еси́ ле́сть мирску́ю.
Ра́дуйся, све́точе безмо́лвия.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 9
Воспита́л еси́ смиренному́дренную и самоотве́рженную бра́тию, преподо́бне о́тче Ио́сифе, от тле́на грехо́внаго и пристра́стнаго изба́влен и свобожде́н бы́вше, и непреста́нному моли́твенному де́ланию сих обучи́в, неле́ностно у́мно воспева́л с ни́ми Бо́гу: Аллилу́иа.
Икос 9
Апо́стольскою ре́вностию и любо́вию воспыла́в, Но́ваго Челове́ка Христа́ призыва́л еси́ непреста́нною моли́твою, преподо́бне и блаже́нне Ио́сифе, Началовождю́ Спасе́ния на́шего Сему́ Иису́су рабо́тая с ра́достию. Того́ ра́ди воспева́ем тя зва́ниями си́ми:
Ра́дуйся, лю́тых нападе́ний отгна́ние.
Ра́дуйся, у́мныя моли́твы де́лателище.
Ра́дуйся, де́ятельнаго жи́тельства сокро́вище.
Ра́дуйся, сосу́де многоце́нный дохнове́ния Уте́шителева.
Ра́дуйся, я́ко превозше́л еси́ преде́лы тле́ния.
Ра́дуйся, я́ко взира́еши на Сла́ву Бо́жию.
Ра́дуйся, зря́й Свет Боже́ственный.
Ра́дуйся, Бо́га ви́дяй и от Него́ ви́димый.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 10
Е́же за ны́ Ломи́мое, Те́ло Христо́во, и, я́же за на́с Излива́емую, Кро́вь Госпо́дню во оставле́ние грехо́в цени́ти научи́л еси́, преподо́бне о́тче Ио́сифе, и со благодаре́нием ве́лиим пе́ти Бо́гу: Аллилу́иа.
Икос 10
Твое́ бра́тство пе́ние приноси́ло Богоро́дице единоду́шно со А́нгелами, преподо́бне и блаже́нне о́тче Ио́сифе, и с Пресла́вною Матероде́вою Триеди́наго Бо́га просла́ви. Коего́ждо из бра́тий се́рдце сокруше́нно ста́, я́ко ре́кл еси́, свя́те: «Вся́каго моля́щегося и не ка́ющегося или́ моли́тва прекрати́тся, или́, моля́сь, впаде́т сей челове́к в пре́лесть». Дерзнове́ние моли́твы, прия́тное Бо́гу, ча́юще получи́ти молитвами твои́ми, ста́рче, взыва́ем тебе́ си́це:
Ра́дуйся, до́браго по́двига вождю́.
Ра́дуйся, и́стинныя ве́ры утвержде́ние.
Ра́дуйся, злочести́вую горды́ню облича́яй.
Ра́дуйся, правосла́вное смиренному́дрие возноша́яй.
Ра́дуйся, я́ко тобо́ю красоту́ благоче́стия позна́хом.
Ра́дуйся, я́ко тобо́ю суету́ мирску́ю в себе́ попра́хом.
Ра́дуйся, кре́ст лише́ний во́лею подъя́вый.
Ра́дуйся, то́й на́м носи́ти посо́бствуяй.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 11
Да́же до сме́рти теле́сныя твоея́ поще́нием, бде́нием и трезве́нием о ученика́х и́ночествующих и о всех ча́ющих моли́тв твои́х святы́х подвиза́лся еси́, Ио́сифе, благогове́йно поя́ Бо́гу: Аллилу́иа.
Икос 11
И́же Богоро́дицу возлюби́вый, Ио́сифе преподо́бне, именова́л еси́ Ея́ Не́жною свое́ю Ма́терию, вели́кое мно́жество да́ров благода́тных от Цари́цы Не́ба и земли́ прие́мше, открове́ний ди́вных и явле́ний умиле́нных от Нея́ прия́л еси́. Те́мже в ве́лий и святы́й день Успе́ния Преблагослове́нной Владычицы́, я́ко ча́до люби́мое, в Черто́г Царства Небе́снаго призва́н бых, иде́же слы́шиши воззва́ния земноро́дных сицева́я:
Ра́дуйся, во Уде́ле Богоро́дицы посели́выйся.
Ра́дуйся, на па́жити Присноде́вы труди́выйся.
Ра́дуйся, рабо́м ве́рным Ея́ Сы́на яви́выйся.
Ра́дуйся, во святы́й день Успе́ния Влады́чицы к Бо́гу преста́вивыйся.
Ра́дуйся, со а́нгелами возра́довавыйся.
Ра́дуйся, Ма́терию Бо́жией о Го́споде возлю́бленный.
Ра́дуйся, Богоро́дицею просвеща́емый.
Ра́дуйся, засту́пниче пред Бо́гом правосла́вными жела́емый.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 12
Восхоте́в облещи́ся Све́том Христа́, боже́ственною пламене́я любо́вию, взыва́л еси́, Блаже́нне Исиха́сте Ио́сифе, Ему́ со умиле́нием: Аллилу́иа.
Икос 12
Наставле́ния твоя, Ио́сифе ста́рче преблаже́нне, я́ко многоце́нный би́сер ве́рным бы́сть. Се́ бо возроди́л еси́ уче́ние об у́мной моли́тве в годи́ну упа́дка духо́внаго. Науча́л еси́ сему́ де́ланию мона́хов и в миру́ живу́щих, со ученики́ свои́ми ста́рцами благогове́йными — Ефре́мом Филофе́йским, Ио́сифом Ватопе́дским, Харала́мпием Дионисиа́тским, Ефре́мом Катуна́кским, — непреста́нно моля́ся: «Го́споди, Иису́се Христе́, Сы́не Бо́жий, поми́луй мя гре́шнаго». Сего́ ра́ди лю́дие правосла́вные пою́т ти похвалы́ сия́:
Ра́дуйся, бу́яя упраздня́яй мудрова́ния.
Ра́дуйся, низлага́яй лю́тыя лука́вого на ны восста́ния.
Ра́дуйся, Це́ркве све́тлая звездо́.
Ра́дуйся, заре́ пра́вды, но́щи преше́дшей, возсия́вшая.
Ра́дуйся, де́лателю до́брый, де́лавый благоче́стно в вертогра́де духо́внем.
Ра́дуйся, тяготу́ и ва́р жития́ ра́ди Го́спода охо́тно поне́сший.
Ра́дуйся, я́ко сего́ ра́ди победи́л еси́ истле́ние.
Ра́дуйся, благи́й ра́бе и ве́рный, вше́дый в ра́дость Го́спода своего́.
Ра́дуйся, Исиха́сте Ио́сифе,/ но́вый афо́нский пусты́нниче и мона́хов наста́вниче.
Кондак 13
О, подвиза́ющихся безмо́лвием и́ноков похвало́, преподо́бне о́тче Ио́сифе, научи́ ны воспева́ти досто́йно Пресвяте́й Трои́це песнь хвале́бную: Аллилуиа, аллилуиа, аллилуиа.
Кондак сей чте́тся трижды и па́ки глаго́лем икос 1 и кондак 1.
Тропарь, глас 1:
Пусты́ни Афо́нския цве́те благоуха́нный,/ дре́вним единонра́вный подви́жниче,/
Пла́менный ревни́телю моли́твы непреста́нныя,/ благода́ти и́стинный послу́шниче,/ Го́спода всем се́рдцем возлюби́вый,/ Ио́сифе преподо́бне, мона́хов наста́вниче,/ моли́ Христа́ Бо́га Спаси́теля душ на́ших// от сна ле́ности воздви́гнути нас к покая́нию.
Ин тропарь, глас 5:
Преподо́бне о́тче Ио́сифе,/ Го́споду и Богоро́дице свя́то послужи́в,/ в Бо́гом обетова́нную в Раи́ / но́вую зе́млю под Не́бом но́вым возше́л еси́,/ и нам, недосто́йным вселе́ния в сих,// письмены́ твои́ми и моли́твами спасти́ся помози́.
Кондак, глас 8:
Вы́шния доброде́тели Бо́гом науче́нный,/ о́браз был еси ученико́м твои́м,/ воздержа́нию, смире́нию, наипа́че же послуша́нию тех наставля́я,/ и, я́ко па́стырь, ста́ду своему́ предходя́,/ до́бре ше́ствовати путе́м жесто́ким пусты́ннаго жития́ научи́л еси́./ Те́мже ублажа́ем тя, Ио́сифе преподо́бне,/ моли́ Христа́ Бо́га проще́ние дарова́ти/ чту́щим любо́вию святу́ю па́мять твою́.
Величание
Ублажа́ем, ублажа́ем тя,/ преподо́бне о́тче и Ста́рче Ио́сифе, Исиха́сте Афо́нский,/ и чти́м святу́ю па́мять твою́,/ наста́вниче безмо́лвствующих мона́хов// и собесе́дниче у́мный А́нгелов.
МОЛИТВА
О, преподо́бне и богоно́сне о́тче Афо́нский Ио́сифе Исиха́сте! Свети́льниче, о не́мже не восхоте́ Бо́г, да под спу́дом пребыва́ет, но да на све́щнице всенаро́днаго зре́ния и поклоне́ния поста́вится. Ве́тхаго челове́ка в себе́ умертви́вый, и, во Христе́ воскре́снув, со Христо́м и во Христе́ пожи́ти на земли́ возмо́гл еси́, и в Ца́рствие Небе́сное возше́л еси́ ко Престо́лу Бо́жию.
Поще́нием стро́гим в житии́ суро́вом пеще́рном отше́льнически труди́лся, нощны́ми бде́ниями, для сна не возлега́нием, но кра́тким отдохнове́нием и непреста́нным у́мным де́ланием Бо́гу служи́л и благоугоди́л еси́, взыва́я: «Го́споди Иису́се Христе́ Сы́не и Сло́ве Бо́жий, Богоро́дицею поми́луй мя́ гре́шнаго!»
Ста́рче святы́й, со сподви́жником ве́рным твои́м Арсе́нием Пеще́рником схимона́хом ма́лое ста́до ученико́в и после́дователей, си́лою и дара́ми благода́тными вели́кое, собра́в и возрасти́в, наста́вил еси́ де́лание исиха́стское на Святе́й Горе́ по тебе́ продо́лжити и преумно́жити. И́миже мона́шество по́длинное, иско́нное зде́ возроди́л еси́, Афо́н ны́нешний устро́ив и просла́вив в Похвалу́ Пресвяты́я его́ Игу́мении Влады́чицы Всесвяты́я Богоро́дицы. Ея́ же предста́тельством и моли́твами твои́ми, сподо́би нас гре́шных и немощны́х да́ра покая́ния, да благоче́стно житие́ земно́е проше́дше, возмо́жем досто́йне с тобо́ю ку́пно сла́ву и хвалу́ возноси́ти Пресвяте́й Тро́ице Единосу́щней и Неразде́льней, поя́ Отца́, и Сы́на, и Свята́го Ду́ха Пара́клита ны́не, и при́сно, и во ве́ки веко́в. Ами́нь.