Акафіст святому мученику Даниїлу Черкаському, Мліївському

АКАФИСТ

 

святому мученику Даниилу, Черкасскому, Млиевскому.

 

 

 

Кондак 1.

 

Избранный мучениче и веры Православныя исповедниче, Данииле всеславне, прими ныне недостойных устен немощное пение и молитвами твоими утверди и настави люди православныя, во еже пети ти: Радуйся, святый мучениче Данииле, подвигом своим веру нашу утверждающий.

 

Икос 1

 

Ангельскому лику днесь совокупим гласы своя и во умилении восхвалим предивнаго угодника Божия и ревностнаго мученика за веру, вопиюще:

 

Радуйся, небесных ликов похвало всерадостная,

Радуйся, христиан православных песнь всеславная;

Радуйся, столпе недвижимый благочестия,

Радуйся, всеславное посрамление злочестия;

Радуйся, радуйся всякия правды исполненый;

Радуйся, лживую неправду потребляющий;

Радуйся, сопричастниче вечныя радости,

Радуйся, приятилище божественныя сладосте;

 

Радуйся, святый мучениче Данииле, подвигом своим веру нашу утверждающий.

 

Кондак 2

 

Видя Всеблагий Господь чистоту сердца твоего и праведное житие, Данииле всеславне, призва тя к подвигу мученическому, да житием и подвигом утвердиши люди веру православную хранити и Господу усердно воспевати: Аллилуиа.

Икос 2

 

Разум просветил еси слышанием Слова Божия и утвердил еси на стезях заповедей Господних стопы твоя, преславне, сего ради образ благочестия всем, живущим в Млиеве явился еси, Данииле досточудне, темже прими от нас похвалы сия:

Радуйся, правило веры и благочестия,

Радуйся, образе кротости и смирения;

Радуйся, от юности во благочестии воспитанный,

Радуйся, на путь доброделания измлада наставленный;

Радуйся, душевредныя страсти поправый,

Радуйся, добродетельми душу свою украсивый;

Радуйся, бронею правды облеченный,

Радуйся, венцем благочестия увенчаннный;

Радуйся, святый мучениче Данииле, подвигом своим веру нашу утверждающий.

Кондак 3

Силою Божественною воистину оболчен был еси, Данииле всеславне, егда во исполенние совета благочестиваго сограждан твоих, благоговейно приял еси сосуды церковныя купно со хранимыми в них Таинами святых Тела и Крови Христовых и сохранил еси я от поругания, со умилением моляся и поя Богу: Аллилуиа.

 

Икос 3

 

Имуще разум, просвещен благодатию Святаго Духа, со благоговением приял еси Честныя Тайны Христовы и сохранил еси я от поругания нечестивых, сих же совети посрамил еси и даже до смерти противоборстовал еси словом и подвигом своим. Темже, мучениче всетвердый, от православных христиан похвалы сицевыми воспеваешися:

Радуйся, всесильною Десницею Господнею укрепляемый,

Радуйся, светом лица Божия выну озаряемый;

Радуйся, благодатию Господнею осененный,

Радуйся, Божиих дарований исполненный;

Радуйся, Святыя Троицы пречистое селение,

Радуйся, ангельскаго жития уподобление;

Радуйся, силы Божия всеславное явление,

Радуйся, Церкве Христовыя похвало и утвержение;

Радуйся, святый мучениче Данииле, подвигом своим веру нашу утверждающий.

Кондак 4

 

Бурю вселукавых искушений воздвиже враг рода человеческаго, немощныя сосуды нечестивых иереев употребив, ты же, богомудре, яко адамант крепкий противостал еси ярости безбожных, Господа имуще помощника и непрестанно Сему вопиюще: Аллилуиа.

 

Икос 4

 

Слышал еси, всеблажененне Данииле, глас Господень глаголющий: отвергнися себе и возьми крест свой, отверглся еси суемудреннаго мира и даже до Голгофы последовал еси Подвигоположнику твоему. Сего ради, яко добраго последователя Христова по долгу ублажаем тя:

Радуйся, истиннаго учения церковнаго твердый хранителю,

Радуйся, ересей и расколов обличителю;

Радуйся, Путем Господним присно ходивый,

Радуйся, многих от путей погибельных отвративый;

Радуйся, Премудрости Божественныя возжелавый,

Радуйся, Разума Божественнаго взыскавый;

Радуйся, суету тленную мира сего отринувый,

Радуйся, страстей пламень кровьми мученическими угасивый;

Радуйся, святый мучениче Данииле, подвигом своим веру нашу утверждающий.

 

Кондак 5

 

Божиим велениям последующе, отвергл еси безбожное веление беззаконующих мучителей, Данииле всеславне, и дерзновенно исповедал еси веру истинную Православную, в ней же и нас утверди, да молитвами твоими даже до смерти сподобимся Господа исповедати и Ему непрестанно пети: Аллилуиа.

 

Икос 5

 

Видяще твердость твою во исповедании, мучители, злобою распаляеми, потщалися муками и страданьми поколебати твое во Православии исповедание. Ты же, страстотерпче всеславне, терпением своим посрамил сих нечестивое злоумышление, сего ради воспеваешися похвалы сицевыми:

Радуйся, Православия утверждение,

Радуйся, злобы адския обличение,

Радуйся, столпе недвижимый благочестия,

Радуйся, всеславное посрамление злочестия,

Радуйся, волю Господню о себе всецело исполнивый,

Радуйся, венец мученичества приявый;

Радуйся, коварства лукавых мучителей посрамивый,

Радуйся, немощныя дерзости врага нашего поправый;

Радуйся, святый мучениче Данииле, подвигом своим веру нашу утверждающий.

 

 

Кондак 6

Проповедует земля Черкасская славу твоего подвига, имже веру Православную утвердил еси, нечестивых совети разорил еси, еретическое шатание посрамил еси, нас же наставил во еже взывати непрестанно Дивному во святых Своих Богу: Аллилуиа.

 

Икос 6

 

Возсиял еси людем православным во дни соблазнов и искушений, яко лампада всесветлая, освещающая путь к Небесному Отечеству и отгоняющая всякую тьму еретическаго злочестия. Темже молитвами твоими и нас во Православии утверди, да возможем Господа нелестно славословити и тя, преблаженне, воспевати неленностно:

Радуйся, огнем Божественным всеразженный,

Радуйся, светом Истины осиянный;

 

Радуйся, росо, еюже огнь искушения и соблазнов угашается,

Радуйся, море, имже зловерие потопляется;

Радуйся, всеразженныя стрелы ересей и расколов отражающий,

Радуйся, всезлобное коварство врага древняго разрушающий;

Радуйся, от страстей лукавых мира сего защищающий,

Радуйся, всех нас, чтущих тя, от бед и скорбей покрывающий;

Радуйся, святый мучениче Данииле, подвигом своим веру нашу утверждающий.

 

Кондак 7

Хотяще веру отеческую православную соблюсти неврежденно, не убоялся еси, страстотерпче всеславне, мучения от нечестивых ти уготованаго, но грядущая обетования умныма очима зряще, Подвигоположнику твоему воспевал еси: Аллилуиа.

 

Икос 7

Новый исповедниче веры отеческия явился еси, Данииле всеблаженне, течением бо кровей твоих угашаеши бесовский пламень нечестия, верных же ободряеши веру хранити, тебе же похвальная воспевати:

Радуйся, веры православныя твердый ревнителю,

Радуйся, мучеников древних подражателю;

Радуйся, бронею правды облеченный,

Радуйся, венцем нетления увенчаннный;

Радуйся, ризы своя кровию мученическую убеливый,

Радуйся, порфирою страдания за Христа душу свою украсивый;

Радуйся, Хлебом жизни вечныя насыщенный,

Радуйся, питием безсмертия напоенный;

 

Радуйся, святый мучениче Данииле, подвигом своим веру нашу утверждающий.

 

 

Кондак 8

Странное чудо зрим на тебе, богомудре Данииле, старец бо сый многотрудный, якоже юный подъемлеши на ся подвиг мученический и дерзновенно обличаеши нечестивых пресвитеров, уста своя ядом исполнивших и не ведущих пети право и истинно: Аллилуиа.

 

Икос 8

 

Всех Господь и Создатель венцем мученическим увенча главу твою, страстотерпче всеславне, Церковь же Христова, мученическими подвиги твоими украшаема, вопиет ти сице:

Радуйся, терпения столпе непоколебимый;

Радуйся, исповедания адаманте всекрепкий;

Радуйся, Бога всем житием твоим прославивший,

Радуйся, человекозавистца подвигом своим посрамивший;

Радуйся, язвами телесе своего диавола уязвивый,

 

Радуйся, течением кровей своих огнь еретическаго суемудрия угасивый;

Радуйся, яко о тебе Церковь ликует;

Радуйся, яко пение тебе людие христоименитии приносят;

Радуйся, святый мучениче Данииле, подвигом своим веру нашу утверждающий.

 

Кондак 9

Всякия злочестивыя козни немощны явишася о тебе, Данииле всеславне. Сего ради восплакаша демонския полки, завистию растерзаеми, егда узреша тя на небеса восходящаго и Крест яко победы знамение носящаго, и песнь всерадостную воспевающего: Аллилуиа.

 

Икос 9

 

Витийство пребезумных лжеучителей простотою и твердостию веры своея посрамил еси, Данииле всеславне, верныя же утвердил еси Бога прославляти и Церковь святую почитати, темже приими от нас похвалы сия:

Радуйся, путем тесным в радость Господа возшедший,

Радуйся, вся красная мира сего во уметы вменивший;

Радуйся, учениче Премудрости Божественныя;

Радуйся, грозде всесладкий Лозы Благоплодныя,

Радуйся, звездо пресветлая неба церковнаго,

Радуйся, цвете всеславный вертограда небеснаго;

Радуйся, подвиги своими всю землю осиявший,

Радуйся, терпением своим всех наставляющий;

 

Радуйся, святый мучениче Данииле, подвигом своим веру нашу утверждающий.

 

Кондак 10

Спасения нашего ходатай буди, Данииле всеславне, в земли нашея всеславно просиявший, да ни один от призывающих тя на молитве погибнет, но вси причастницы будем Царства вечнаго всех Царя и Владыки, идеже песнь поется славно: Аллилуиа.

 

Икос 10

 

Стена искушений обстоит нас, лести же и клеветы вселукавое нашествие ополчается, ты же, мучениче всеславне, молитвами твоими всякое злоухищрение вражие далече отжени от нас, память твою сице воспевающих:

Радуйся, подвигом своим ангелов удививый,

Радуйся, терпением своим бесовския дерзости посрамивый;

Радуйся, пещи вавилонския не устрашивыйся,

Радуйся, прещения мучителей не убоявыйся;

Радуйся, росо, еюже огнь безбожия угашается,

Радуйся, море, имже зловерие потопляется;

Радуйся, мечу, злочестие посекающий,

Радуйся, щите, верных защищающий;

Радуйся, святый мучениче Данииле, подвигом своим веру нашу утверждающий.

Кондак 11

 

Пения наша похвальная и гласы молебныя приими, мучениче всеславне, и предстательством твоим град и землю нашу во Православии неврежденны сохрани, молитвами же твоими и нас чада Света быти сподоби, да с тобою песнь всерадостную поем: Аллилуиа.

 

Икос 11

 

Света сын и наследник вечных благ явился еси, Данииле богоблаженне, подвигом бо добрым подвизался еси, течение скончал еси, веру соблюл еси, темже и венец приял еси мученический и от верных пением сицевым прославляешися:

Радуйся, Господа всем сердцем возлюбивый,

Радуйся, даже до смерти Ему последовавый;

Радуйся, Христу сораспявыйся всерадостно,

Радуйся, страдания приявый безропотно;

Радуйся, Крест Господень на рамена своя вземый,

Радуйся, на Голгофу ликующе восшедый;

Радуйся, страданий Христовых Соучастник,

Радуйся, Воскресения Его сопричастник;

 

Радуйся, святый мучениче Данииле, подвигом своим веру нашу утверждающий.

 

Кондак 12

 

Благодати Божия     сосуде      златокованный,    адаманте

 

всекрепкий веры Православныя, земли Черкасския богодарованное сокровище, града Млиева заступление и похвало, мучениче досточудне Данииле, моление наше приими и молитвою твоею на путь спасения настави, да сподобимся во веки со ангелы воспевати: Аллилуиа.

 

Икос 12

 

Поюще подвиг твой, величающе страдания твоя и возвещающе, яже ко Христу любви крепость неодолимую, песни и пения духовная от любви ти днесь сплетаем:

Радуйся, душу свою за Христа положивый,

Радуйся, подвигом своим нас в Православии укрепивый;

Радуйся, муки и скорби ни во чтоже вменивый;

Радуйся, узами темничными узы злобы сокрушивый;

Радуйся, путь к небеси нам присно указующий;

Радуйся, благословением твоим нас ныне осеняющий;

Радуйся, молитвенниче о нас усердный;

Радуйся, ходатаю пред Господом непрестанный;

 

Радуйся, святый мучениче Данииле, подвигом своим веру нашу утверждающий.

 

Кондак 13

 

О, всеславне и допропобедне страдальче Христов, достоблаженнне и благославне Данииле, приими ныне усердное моление наше и предстательством твоим от всякаго зла душевреднаго и еретическаго поползновения сохрани нас, да молитвами твоими в Православии утвердившеся, во веки веков сподобимся пети Богу Спасителю нашему: Аллилуиа.

 

(Сей кондак глаголи трижды, посем икос 1 и кондак 1)

 

 

 

Молитва святому мученику Даниилу

 

О, всеславне и богомудре мучениче Данииле, земли Черкасския похвало, селения Млиевскаго украшение и всех христиан православных радость и утверждение. Воспевающе предивныя подвиги твоя, сладце ублажаем твердость исповедания твоего и страдания, яже за Христа и Церковь святую достославно воспеваем, яко не устрашился еси веления нечестивого, но богомудренне сохранил еси от поругания святыни церковныя и Святыя Тайны Тела и Крови Христовыя, и даже до смерти не убоялся еси исповедовати веру отеческую Православную, яже вселенню утверди. Темже днесь припадаем и тепле вопием: не забуди нас, убогих, пред Престолом величествия славы Божия, но присно молися ко Господу сохранити нам неврежденне веру Православную, мир же подати душам нашим и вся, яже ко спасению полезная, да предстательством твоим сподобимся на земли добре пожити во всяком благочестии и чистоте, покаянием души своя убелити и наследити Чертог Небесный, идеже присещает свет лица Божия, Троицы Единосущныя и Нераздельныя, Отца и Сына, и Святаго Духа. Аминь.

 

Тропарь, глас 4:

 

Мучениче преславне Данииле, веры православныя столпе непоколебимый, терпения столпе и благочестия правило, святынь церковных блюстителю богомудрый, за веру истинную страдальче всехвальне, молися ко Господу, землю нашу во Православии сохранити неврежденно, мир умирити и спасти души наша.

 

Кондак, глас 4:

 

Страдальче достоблаженне Данииле, сохранивый от поругания Тайны Божественныя, сохрани ныне молитвами твоими землю нашу [Черкасскую] от всякаго зла, еретическое и безбожное угаси восстание и мир подаждь людем православным, молитвенниче всеславне и богомудре.