Егоже краеграсие: СЛАВНОЕ ОСИЯНИЕ ОБРАЗА ДЕВО
Кондак 1
Смирение Твое, Всесвятая Влады́чице, дольних в горняя воздвизает, /неверных страха исполняет, заблу́ждших ко Христу Свету Истины обращает, /благодатную помощь верным низпосылает. Се бо пред иконою Твоею Тывровскою молящиися исцелений сподобляются, вопиюще: Радуйся, Пресвята́я Богородице Дево, Славы Божия дивное Сияние.
Икос 1
Ликуют радостно ныне иноцы православные и народ боголюбивый о Богородице Всесвятей плоть давшей Воскреси́вшему па́дшаго Ада́ма Христу Спасителю. Се бо от образа чудотворного Преблагословенныя Приснодевы Марии обильно благодать проистекает, немощная врачующи и оскудевающая восполняющи. Во обители, юже Царица Небесная благословила иконою Своею, похвала приносится Чистой сицевая:
Радуйся, Пречиста́я Дево, Светом Невечерним мира озарение.
Радуйся, Всеславная Царице Небесная, верным благословение.
Радуйся, Богородительнице, Рождеством Твоим даровшая всем Воскресение.
Радуйся, Мати Живота, Давшего миру нетление.
Радуйся, Диадимо Многоценная, творению Божию Прекрасное Украшение.
Радуйся, Всесвята́я Богородице, неверных ко Христу обращение. Радуйся, Приснодево, Сыном Твоим Подающая миру спасение.
Радуйся, Богородице Владычице, скорби утоление.
Радуйся, Мати Милостивая, подающая недугов исцеление.
Радуйся, Богоизбранная Отроковице, многосуетным людем Дающая утешение.
Радуйся, Владычице Радостотворная, Отгоняющая отчаяние.
Радуйся, Пресвята́я Богородице Дево, Славы Божия дивное Сияние.
Кондак 2
Ангели поют на небесах Воскресение Христа Спаса, и мы в радости пасхальней поем Богу от Тебе, Богородице, Пречистую Приявшего: Аллилуйя.
Икос 2
В день святый преславного Рождества Твоего, Преблагословенная Владычице, в Ченстохово поклонитися святому Тоя лику, святым Лукою написанному, хорунжий Брацлавский приступи, и девицу убогую не презрев, куплю содеях благопотребную дому и ему самому — икону Богородичну, ко образу Ченстоховскому приложи святыню приобретенную. Ею же Тывров благодатное благословение приях. Пред сею иконою, яко сокровищем духовным поем Царице Небесней:
Радуйся, неверных обращение.
Радуйся, земле Винницкой благословение.
Радуйся, светом неземным озарение.
Радуйся, молитв многих исполнение.
Радуйся, Похваляющая благоговение.
Радуйся, слепых прозрение.
Радуйся, хромых исцеление.
Радуйся, убогих слышание.
Радуйся, чудес моря излияние.
Радуйся, Славы Божия блистание.
Радуйся, водворяяй упование.
Радуйся, Пресвята́я Богородице Дево, Славы Божия дивное Сияние.
Кондак 3
Николая святителя перенесение честных мощей память чествуя, образ Богоматери поставих убо помещик в столовой дома своего. В сей же день кравцы приидохом в сей дом Михайлов, пришествие сих чудо предварихом. О сем же ведуще чуде поем: Аллилуйя.
Икос 3
Осияла двор весь дома Калитинскаго, всех тамо бывших удостоих быти свидетели великого знамения благодати, Приснодево. Первее убо еврей, субботу чтущий страхом объят бысть, егда Писание читах, узрев сияние преславное от Лика Твоего Богородице. Иудей сей со страхом вопияше глаголы сия: «Микуленко! Микуленко! Зри, яко образ сей вид свой изменяет». Воззревши убо на образ Божия Матери, Иоанн такожде сияние видех, от иконы исходящее. Узрех и священник, иже служити готовихся Литургию в домовой каплице удивися знамению сему страшному, помещика о сем возвестил есть. Богу благодарение о явлении чуда сего принося, воспеваем Тя, Богомати, званиями сими:
Радуйся, подвизающая к молитве со благоговением.
Радуйся, Научающая Богу имети доверие.
Радуйся, забвение отчаяния.
Ра́дуйся, Успокоение благое слез стенания.
Радуйся, неплодным благочадия дарование.
Радуйся, младенцам здравия подаяние.
Радуйся, болящих исцеление.
Радуйся, жаждущих напоение.
Радуйся, алчущих насыщение.
Радуйся, немощны́х укрепление.
Радуйся, молитв многих исполнение.
Радуйся, Пресвята́я Богородице Дево, Славы Божия дивное Сияние.
Кондак 4
Едина Чистая и Преблагословенная, Богородице, вся чудеса Твоя сказати язык не может, ниже глубину любве к роду христианскому описати словом возможем. Смиренно поем о Тебе Христу Богу: Аллилуйя.
Икос 4
О чуде извещен бых хорунжий Брацлавский, тотчас повелел перенести икону из зала в каплицу, идеже совершена бысть Литургия Божественная. По сем же Гавриил священник с сонмом духовенства и верными торжественно икону Твою, Богомати, из каплицы домовыя Калитинского в храм святителя Николая, иже в Тыврове перенесенна бых и поставлена на горнем месте. Благодаряще Богоро́дицу о чудесех многих, восхваляем Ю званиями сими:
Радуйся, земли Винницкия благословение.
Радуйся, сердец наших увеселение.
Радуйся, неверных обращение.
Радуйся, Православия украшение.
Радуйся, слепых прозрение.
Радуйся, иереев благоговение.
Радуйся, монахов радование.
Радуйся, бельцам дарование.
Радуйся, яко образ Твой благое приобретение.
Радуйся, яко совершися славное в Церкви Никольстей образа Твоего поставление.
Радуйся, от него же чудес многое бысть проистечение.
Радуйся, Пресвята́я Богородице Дево, Славы Божия дивное Сияние.
Кондак 5
Славы премирныя приобщаеши род христианский, Преславная Присноде́во и Мати, всякаго человека Светом Сы́на Твоего просвещающи. О сем благоговейно поем: Аллилуйя.
Икос 5
Истинную Богоро́дицу вемы и почитаем Тя, Всепетая Влады́чице, в День Духа Святаго, празденство Твоего образа прежде чествовашии, вернии песни набожныя слагаше, обращению в Православие иноверцев, свидетелями чудес бывших, явленных образом дивляшеся, словесы песенными: «А жиды-кравцы, видя сияние, стали кричати, с женами, детьми крещение требовати». Мы Тебе, Приснодево, похвалы жаждуще вознести, поем сице:
Радуйся, Рождшая человеком спасение.
Радуйся, иноверцев обращение.
Радуйся, радости умножение.
Радуйся, Светом Христовым озарение.
Радуйся, молитв многих исполнение.
Радуйся, Сеющая благоговение.
Радуйся, чистоты Прозябение.
Радуйся, Утишающая суетное треволнение.
Радуйся, православным великая Отрадо и Утешение.
Радуйся, чистоты веры нашея похваление.
Радуйся, отсечение отчаяния.
Радуйся, Пресвята́я Богородице Дево, Славы Божия дивное Сияние.
Кондак 6
Яко разум утратившии безбо́жники на храм посягнуша, идеже образ на месте горнем благочинно стояху. Огнь злочестия распалиша, но святыня образа Твоего не погибе. О сем поют вернии Христу Богу: Аллилуйя.
Икос 6
Николиже благодать Духа Святаго оскуде образа Твоего, Богоро́дице, исходящая. Промысла Божия волением из огня верных дерзновением исхищена бысть икона. И с велиим благоговением инокинями хранима до дней наших дошла есть. Пред сею святынею поем Богородице:
Радуйся, яко иконы Твоея из огня Устроившая исхищение.
Радуйся, безбожных посрамление.
Радуйся, монахов сохранение.
Радуйся, обители Лемешевския благословение.
Радуйся, многоценное Церкви Украшение.
Радуйся, верных освящение.
Радуйся, благодати Сла́вное Селение.
Радуйся, радостию озарение.
Радуйся, Милости Божией явление.
Радуйся, болезней на здравие пременение.
Радуйся, православным благое поспешение.
Радуйся, Пресвята́я Богородице Дево, Славы Божия дивное Сияние.
Кондак 7
Истовая молитва пред образом Пречистыя Влады́чицы и ныне возносима во обители Лемешевстей святаго апостола любве Иоанна Богослова, идеже монаси спасение совершают со страхом Божиим и любовию, поя Христу Богу: Аллилуйя.
Икос 7
Елицы образ сохраншии инокини благочестивии даровали игумену обители Лемешевския Феодосию сокровище сие, еже Богородицы благословением бысть монастырю. О чудесех от иконы Тывровския бывших поем Владычице Всесвятей благодарно:
Радуйся, братиям велие утешение.
Радуйся, к молящимся Тебе щедрое благоволе́ние.
Радуйся, радостей многих устроение.
Радуйся, согбенных распрямление.
Радуйся, слепых прозрение.
Радуйся, просящих помощи слышание.
Радуйся, смиренных посещение.
Радуйся, гордых усмирение.
Радуйся, неразумных умудрение.
Радуйся, от стрел лукавого верных защищение.
Радуйся, чудес многих изобильное излияние.
Радуйся, Пресвята́я Богородице Дево, Славы Божия дивное Сияние.
Кондак 8
О почитании образа Твоего, Богоро́дице, архиерей Винницкий Макарий попечение имуще, благословение даде, да в радости дней Пасхи Христовыя поют людие православныя о Присноде́ве песнь: Аллилуйя.
Икос 8
Богоро́дице Дево, христианам Непреложное Упование, Мати Всемилостивая чтущим Тя, Благосердия Пучина, Покров и Соблюдение Церкви, сподоби нас пред образом Твоим чудотворным воспети песни сицевая:
Радуйся, верных от всякого зла сохранение.
Радуйся, постников укрепление.
Радуйся, радости умножение.
Радуйся, ко Христу имеяй дерзновение.
Радуйся, молитв многих исполнение.
Радуйся, ангелов удивление.
Радуйся, сил безплотных благодатию превосхождение.
Радуйся, помощи низпослание в житейских попечениях.
Радуйся, православным душам умиление.
Радуйся, твари всей послужившая обнолению.
Радуйся, благотворение всему созданию.
Радуйся, Пресвята́я Богородице Дево, Славы Божия дивное Сияние.
Кондак 9
Радость миру смирением Своим Давшая, яко, действительно Невместимаго вместивши во утробе Твоей, Боговоплощению послужила еси, Присноде́во. Се бо и мы ныне радостно поем о Тебе Богу: Аллилуйя.
Икос 9
Ангельское благовестие прияти сподобилася еси, Дево Чистая, и ангельски на земли поживше, благодатию стала Честнейшей Херувимов и Славнейшей Серафимов, и ныне радость ангельскую подаеши всем похваляющим Тя песньми благодарными:
Радуйся, мира горнего украшение.
Радуйся, заблуждших обращение.
Радуйся, обратившихся к Богу мучений избавление.
Радуйся, подъятие подвига покаяние.
Радуйся, христиан доброе назидание.
Радуйся, благорастворения воздухов подаяние.
Радуйся, обилия плодов земных испрошение.
Радуйся, благочадия дарование.
Радуйся, о грешных молитвенное воздыхание.
Радуйся, скорбящих радование.
Радуйся, Царствия Небесного блистание.
Радуйся, Пресвята́я Богородице Дево, Славы Божия дивное Сияние.
Кондак 10
Защиты, Покрова и предстательства Твоего, Богома́ти, ищут люди православныя. И сия получающе выну поют Творцу и Промыслителю мира: Аллилуйя.
Икос 10
Апостола и евангелиста Иоанна обитель славно украсилася еси образом Твоим, Всеславная Богородице, благохваления Тебе радостно братия творит и вернии тщают фимиам молитвы вознести пред иконою Твоею Тывровскою, поюще со умилением таковая:
Радуйся, Пресвята́я Дево, верных ограждение.
Радуйся, Хлеба Жизни дивное насаждение.
Радуйся, присное Богу угождение.
Радуйся, праведных похваление.
Радуйся, грешных обличение.
Радуйся, Чистоты прозябение.
Радуйся, Венчающая радостию моления.
Радуйся, недугов тяжких исцеление.
Радуйся, Умножающая терпение.
Радуйся, Церкви драгоценное Украшение.
Радуйся, мрежей рыбарских наполнение.
Радуйся, Пресвята́я Богородице Дево, Славы Божия дивное Сияние.
Кондак 11
Драгоценный бисер веры православныя благолепия исполненный духовнаго, ста благодатно образ Твой, Всепетая Влады́чице Богоро́дице. Пред ним мы воспеваем о Тебе Всевышнему Богу: Аллилуйя.
Икос 11
Естество наше обновил Господь Иису́с Христос сверх естества от Тебе, Дево Марие, родитися изволив. Спасения нашего главизну смирение Твое соделало есть, Богоро́дице. Се бо благодарно пред иконою Твоею к Первообразу ум сердце возносим, поя:
Радуйся, Адама воззвание.
Радуйся, Плоде истового моления.
Радуйся, пути Евы Исправление.
Радуйся, Богу от человечества благое Приношение.
Радуйся, Сотруднице нашего спасения.
Радуйся, Рождшая Давшего миру обновление.
Радуйся, духовного веселия устроение.
Радуйся, радости о Господе умножение.
Радуйся, истинности Православия удостоверение.
Радуйся, лекарство от страстей многоценное.
Радуйся, Мира Драгоценнаго Благоухание.
Радуйся, Пресвята́я Богородице Дево, Славы Божия дивное Сияние.
Кондак 12
Волею Отчею безсеменно от Божественнаго Духа Божия зачала еси Сына и плотию родила еси, Богоро́дице, из Отца безматерня и нас ради из Тебе безотча. Тайне сей преславней дивящеся, поем Богу: Аллилуйя.
Икос 12
Осанну поем, Богоро́дице, смерть Поправшему и вереи адовы Сломившему Сыну Твоему и Богу нашему Христу Вседержи́телю. Его же Светом просвети нас, Приснодево, да достойно величаем Тя, Царице Небесная, песньми духовными:
Радуйся, Дево и Мати Превосходящая всякое разумение.
Радуйся, Рождеством Сына Твоего Содеявшая аду разорение.
Радуйся, радости исполнение.
Радуйся, власти диавола упоазднение.
Радуйся, природы нашея от греха исцеление.
Радуйся, слез Евиных избавление.
Радуйся, Милости Божия водворение.
Радуйся, Чистоты изрядное изобилие.
Радуйся, врачевание скорое уныния.
Радуйся, алчущим доброе Питание.
Радуйся, печали мирския отгнание.
Радуйся, Пресвята́я Богородице Дево, Славы Божия дивное Сияние.
Кондак 13
О всепетая Мати, рождшая всех святых Святейшее Слово, нынешнее приемши приношение, от всякия избави напасти всех, и будущия изми муки, Тебе вопиющих: Аллилуиа.
Сей кондак глаголем трижды. И паки чтется 1-й икос и 1-й кондак.
Тропарь, глас 1-й:
Сокровенныя тайны явление,/ неверных благодатию Крещения просвещение,/людем православным благословение,/ обители Лемешевския украшение,/ икона Твоя, Богоро́дице, показася,/пред нею же взываем Ти, Всесвятая:/ просвети умы наша сиянием благодати, /да избавиши от смерти души наша.
Кондак, глас 5-й:
Смирение Твое, Всесвятая Влады́чице, /дольних в горняя воздвизает, /неверных страха исполняет,/заблу́ждших ко Христу Свету Истины обращает, /благодатную помощь верным низпосылает/. Се бо пред иконою Твоею Тывровскою молящиися исцелений сподобляются,/ вопиюще: Радуйся, Пресвята́я Богородице Дево, Славы Божия дивное Сияние.
Молитва Пресвятой Богородице перед образом Ея Честным “Тывровская”, иже в Лемешевской обители пребывает
Милости Христовой взыскующе, прибегаем под честный Покров Твой, Всепетая Владычице! Се бо Солнце Правды, Истинный Бог наш, Плоть заимствовав от Тебе, Богоро́дице, миру возсиял есть, Мари́е Де́во, и тля многобо́жия поги́би до конца. Светом, Дево Марие, уны́нием нас омраче́нных, просвети́ и наста́ви на путь благодея́ния. Ей, Пресвята́я Влады́чице Богоро́дице, Царице Небесная, просвети нас лучами света благодати нетварныя, да православно воспоем Твое теплое заступление и присное ходатайство молитвенное о спасении душ человеческих. Людей Церкви соблюди в вере православней непоколемых, в любви им пребывати даруй нелицеме́рней, надежду укрепи и яко адамант тверду сию соделай. Расколы, яко раны Тела Христова уврачуй, покаяние любобрагоутробное даруя заблудшим, ереси искорени.Недужных исцели и всех чтущих образ Твой не остави сирыми Благости Твоея, яко благословенна во веки веков. Аминь.