АКАФИСТ ПРЕСВЯТОЙ ВЛАДЫЧИЦЕ БОГОРОДИЦЕ, ЧТОМЫЙ ПРЕД ЕЯ ОБРАЗОМ «КЛЮЧ РАЗУМЕНИЯ»
Краеграсие сего неседального пения:
СМАРАГД ЧИСТУЮ ДЕВУ ПОЕТ УМНО
Кондак 1
Сила Вы́шняго осени́ла Тя, Пренепоро́чная Де́во, егда́ Дух Святы́й наше́д на Тя, се бо мы дерза́ем проси́ти, е́же пода́ти нам приседя́щую Престо́лу Госпо́дню прему́дрость, и всади́ти ю́ в сердца́ на́ша, да позна́ем, что́ есть благоуго́дное пред Сы́ном Твои́м и Бо́гом и благода́рно пое́м, Влады́чице: Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Икос 1
Ма́ти у́бо позна́лася еси́, па́че естества́, Богоpо́дице, пpебыла́ же еси́ Де́ва, па́че сло́ва и pа́зума. Те́мже мо́лим Тя, Чи́стая, отве́рзи ум на́ш, е́же разуме́ти благо́е, уче́ния легко́ приима́ти, Сло́вом И́стины же обогаща́тися, и умудри́ ны взыва́ти пред ико́ною Твое́ю похвалы́ сицевы́я:
Ра́дуйся, Тебе́ моля́щихся Благословля́ющая.
Ра́дуйся, по́мыслы Очища́ющая.
Ра́дуйся, от тьмы грехо́вныя Изыма́ющая.
Ра́дуйся, И́стины Воплоще́нием мир Обогати́вшая.
Ра́дуйся, ра́дости нас Исполня́ющая.
Ра́дуйся, зна́нием благи́м Венча́ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 2
Арха́нгельское благове́стие прия́ла еси́, Присноде́во Чи́стая, те́мже недоуме́ния и ра́дости испо́лнися се́рдце Твое́. Мы же, дивя́щеся стра́шней та́йне Боговоплоще́ния, пое́м о Тебе́ ра́достно Христу́: Аллилу́йя.
Икос 2
Ра́зумом и се́рдцем воспе́ти Тя, Всесвята́я Влады́чице Богоро́дице, сподо́би нас. Ты бо смысл и бытие́ ми́ру Да́вшему Бо́гу плоть от утро́бою Дарова́вшая. Приими́ у́бо дерзнове́ние на́ше восхвали́ти Твое́ при́сное заступле́ние ро́да христиа́нского и му́дрости испо́лни Тя пою́щих си́це:
Ра́дуйся, Упова́нием мир Богатя́щая.
Ра́дуйся, я́ко Ми́лость обрета́ют вси у Тя сию́ прося́щия.
Ра́дуйся, неду́жных Исцеля́ющая.
Ра́дуйся, смире́нных в ра́дость Облача́ющая.
Ра́дуйся, умо́м све́тлым уча́щих Осеня́ющая.
Ра́дуйся, благодари́ти Го́спода Науча́ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 3
А́нгелов Удивле́ние Пресла́вное, Богоро́дице Де́во, низпослѝ нам от Сы́на Твоего́ и Бо́га дух ра̀зума и благочѐстия, милосѐрдия и кро̀тости, чистоты̀ и пра̀вды, да сих улучи́вше пое́м Ему́: Аллилу́йя.
Икос 3
Горе́ возно́сим ум, предстоя́щии пред ико́ною Твое́ю, Влады́чице и Ма́ти Сло́ва, мо́лимся Ти приле́жно: отве́рзи на́ша устне́ и испо́лни я славосло́вия Бо́гу и хвале́ния Тебе́, Присноде́во, такова́го:
Ра̀дуйся, Сы̀на Твоего̀ о спасѐнии вѐрных Умоля̀ющая.
Ра̀дуйся, от неду̀г многообра̀зных Исцеля̀ющая.
Ра̀дуйся, моли́твенным покро̀вом Твоѝм нас Осеня̀ющая.
Ра̀дуйся, сердца̀ к За̀поведям Бо̀жиим Расширя̀ющая.
Ра̀дуйся, надѐжду вѐрных николѝже Посрамля̀ющая.
Ра́дуйся, роди́телей до́бре Утеша́ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 4
Дѐва Ты еси́ при́сно и Ма́ти благода̀тию Украшѐнная, из пло̀ти бо Твоея̀ истка̀ся Пло̀ть Изба̀вителя мѝра, Де́вство Твое́ це́ло Сохра́ншаго, всех к обо̀жению Зову̀щаго, наипа́че моли́твами Твои́ми, Богоро́дице, пою́щих Ему́: Аллилу́йя.
Икос 4
Чи́стая Свечѐ Свѐта Невечѐрнего и Тѝхого, Христа̀ Бо̀га на̀шего, Мари́е Присноде́во, просвети́ нас луча́ми многосве́тлыми Ева́нгельския И́стины Сы́на Твоего́, да разуме́ем та́йну глубины́ Любве́ Бо́жией и благода́рно взыва́ем Ти, смире́нием спасе́нию на́шему Послужи́вшей, си́це:
Ра́дуйся, му́дростию ны Обогаща́ющая.
Ра́дуйся, сердца́ на́ша Смягча́ющая.
Ра̀дуйся, умы̀ от греха̀ Исцеля̀ющая.
Ра̀дуйся, ду̀ши от страстѐй Врачу̀ющая.
Ра̀дуйся, телесѐм здра̀вие Посыла̀ющая.
Ра̀дуйся, вѐрным слѐзы Утира̀ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 5
И́мамы в Тебѐ, Богома̀ти, Утешѐние нело̀жное, я̀ко гла̀сы отовсю̀ду приносѝмые Ти слы̀шиши и полѐзное ко спасѐнию подаѐши, пою̀щим о Тебѐ Спаси́телю ми́ра: Аллилу́йя.
Икос 5
Созда́теля и Творца́ вся́ческих пло́тию Ро́ждшая и Сему́ серде́чныя воздыха́ния о нас прино́сиши, Де́во и Ма́ти. Те́мже мо́лим Тя, Вседержи́теля Ма́ти и Присноде́во, украси́ ны му́дростию и обогати́ ра́зумом, да позна́ем уста́вы мирозда́ния и зна́ния и́мамы поле́зныя, взыва́ющии Ти пе́сни таковы́я:
Ра́дуйся, зна́ния и́щущих Благословля́ющая.
Ра́дуйся, тружда́ющихся Награжда́ющая.
Ра́дуйся, от неразу́мных дея́ний Сохраня́ющая.
Ра́дуйся, Све́том Сы́на Твоего́ всех Просвеща́ющая.
Ра́дуйся, заблу́ждших Вразумля́ющая.
Ра́дуйся, злом очерне́нных ду́ши Убеля́ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 6
Твои́м Покро́вом осени́, Всесла́вная Богоро́дице, уче́ние преподаю́щих и зна́ние прия́ти иму́щих воспи́танников, ученико́в и студе́нтов, да пою́т благода́рно: Аллилу́йя.
Икос 6
Учи́теля и Спаси́теля на́шего Ро́ждшая, Де́во и Ма́ти, благослове́ние пода́ждь Свое́ ласкосе́рдное всем уча́щим и уча́щимся моли́твами Твои́ми при́сными, е́же поле́зное душа́м приима́ти, зла́го же наве́та вся́каго отвраща́тися и терпе́нием и му́дростию украси́тися, и пе́ние приноси́ти Ти сие́:
Ра̀дуйся, к благочѐстию Призыва̀ющая.
Ра̀дуйся, мѝлость уча́щимся Явля̀ющая.
Ра̀дуйся, учителя́м Благопоспѐшствующая.
Ра̀дуйся, неду̀ги Врачу̀ющая.
Ра̀дуйся, Нѐбо и зѐмлю Примиря̀ющая.
Ра̀дуйся, Рождество̀м Твоѝм мир Велича̀ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 7
Ю́ница Чи́стая, Богоизбра́нная Отрокови́це, навы́кшая Боже́ственной И́стине, вся поле́зная ко спасе́нию Прия́вшая, научи́ ны ум блюсти́ чист и поле́зная уче́ния приима́ти, во е́же зва́ти Тро́ице Святе́й: Аллилу́йя.
Икос 7
Девѝце серафѝмов Славнѐйшая, благода́ть Бо́жию неоскудева́емо подава́й и́щущим ра́зума освяще́ния от Боже́ственного Сы́на Твоего́ и хва́лящих Мѝлости Твоя̀ зва̀ниями сѝми:
Ра̀дуйся, Отра̀ду вѐрным Посыла̀ющая.
Ра̀дуйся, скорбя̀щих Утеша̀ющая.
Ра̀дуйся, в вѐре Укрепля̀ющая.
Ра̀дуйся, Богоневѐсто, мир Чистото̀ю Озаря̀ющая.
Ра̀дуйся, Голубѝце, херувѝмов Честнѐйшая.
Ра̀дуйся, Небѐсная Царѝце, Бо̀га Прославля̀ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 8
Едѝному Ча̀ду Твоему̀ Христу́ Бо́гу на́шему внѐмлеши, и нас та́ко твори́ти науча́еши и Ма̀тернее Твоѐ благословѐние нам преподаѐши, мир сохраня̀юши, неду̀гующим исцелѐние посыла̀еши, и жаждущим знаний сии́ Посыла̀ющая зову́щим: Аллилу́йя.
Икос 8
Возвыша̀ющая смирѐнных, Богоро́дице Влады́чице, смире́нием Свои́м ве́лиим Та́йне Неизрече́нней Воплоще́ния Бо́га Послужи́вшая, да́руй немощны́м умо́м возмо́чь кре́постию и разуме́ние до́брое на всех путя́х свои́х име́ти пою́щим Ти та́ко:
Ра̀дуйся, го̀рдых Смиря́ющая.
Ра̀дуйся, малоду̀шных Окормля̀ющая.
Ра̀дуйся, лжѝвых Посрамля̀ющая.
Ра̀дуйся, Бо̀га и́щущих Защища̀ющая.
Ра̀дуйся, Диадѝмо Цѐркви Блиста̀ющая.
Ра̀дуйся, Мо̀лние тьму невѐдения Озаря̀ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 9
Утешѐние и́стовое и Всеще́дрое ста́ла еси́ христиа́ном, Богоро́дительнице, ско́рби в ра́дости мно́гажды обраща́юще. Тем же слы́шиши, Всепе́тая Влады́чице, благода́рное пе́ние о Тебе́: Аллилу́йя.
Икос 9
Па́че вся́каго челове́ка скорбь Прие́мшая, егда́ ору́жие проше́д се́рдце Твое́ Страда́ниями Кре́стными Сы́на Твоего́ и Бо́га, Всепе́тая Ма́ти, и ра́дость па́че всего́ творе́ния Прия́вшая Сего́ Пресла́вным Воскресе́нием, утоли́ печа́ли и ра́дости надми́рной испо́лни к Тебе́ притека́ющих и моля́щихся пред ико́ною Твое́ю со упова́нием бы́ти услы́шанными и пою́щих Ти сицева́я:
Ра́дуйся, дете́й ма́лых Сохраняющая.
Ра́дуйся, неду̀ги Врачу̀ющая.
Ра́дуйся, дете́й Со́лнца любо́вию Обнима́ющая.
Ра́дуйся, дете́й дождя́ Утеша̀ющая.
Ра́дуйся, сле́зы ма́терей Утира̀ющая.
Ра́дуйся, отцо́в в благоче́стии Укрепля̀ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 10
О́браз Твой, Пречи́стая Де́во, источа́ет то́ки благода́ти, и я́ко роса́ ороша́ет бла́гостно с ве́рою притека́ющих ко Пресла́вней Влады́чице во святе́й ико́не Ея́ Ми́лость Бо́жия: ра́зум быстр и чист от скве́рны обрета́ют пою́щии о Тебе́: Аллилу́йя.
Икос 10
Е́же от ве́ка утае́нное, и А́нгелом несве́домое та́инство, Тобо́ю, Богоро́дице, су́щим на земли́ яви́ся Бог, в несли́тном соедине́нии и, Крест во́лею нас ра́ди восприи́м, род челове́ческий Тебе́ поручи́ на попече́ние. Се бо Ты не оставля́еши нас си́рыми от по́мощи Твоея́ и заступле́ния пою́щих ти си́це:
Ра́дуйся, бо́дренно за ны Бо́га Моля̀щая.
Ра́дуйся, о гресе́х на́ших Скорбя̀щая.
Ра́дуйся, па́дающих Восставля́ющая.
Ра́дуйся, пра́ведных в ра́дость Облача́ющая.
Ра́дуйся, Чи́стая, су́етных помысло́в во́лны Укрощающая.
Ра́дуйся, наде́жду ненаде́жным Да́рующая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 11
Тво́й покро́в вемы, Богоро́дице, яко дар драгоценный: ино́го бо не и́мамы, грешнии к Бо́гу в беда́х и ско́рбех при́сно избавле́ния, обремене́ни грехи́ мно́гими, Ма́ти Бо́га Вы́шняго. Темже Ти́ припа́даем: изба́ви от вся́каго обстоя́ния рабы́ Твоя́, поющия: Аллилу́йя.
Икос 11
У́мная Пала́то Божества́ Матероде́во, восхваля́ем Тя дерзнове́нно за Неисчерпа́емое мо́ре Любве́ Матери́нския, ея́ же мы наслажда́емся при́сно, и му́дрости ева́нгельския Ча́шу, от нея́ же напая́емии Тобо́ю благода́рно пое́м Тебе́:
Ра̀дуйся, скорбь Отгоня́ющая.
Ра́дуйся, надѐжду на Бо́га Вселя́ющая.
Ра́дуйся, ра́дости и́стовыя Исполня́ющая.
Ра́дуйся, смире́нных се́рдцем Возвыша̀ющая.
Ра́дуйся, Боже́ственная трапе́зо, му́дростию нас Насыща́ющая.
Ра́дуйся, дете́й ма́лых любо́вию Согрева́ющая.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 12
Мольба́ми Твои́ми, Богоро́дице Всеблагая, от обдержа́щих на́с изба́ви искуше́ний, и бед, и обстоя́ний, Еди́на христиа́н Прибе́жище, и моли́ Сы́на Своего́ и Бо́га, да сподо́бит нас во Ца́рствии Его́ при́сно пе́ти: Аллилу́йя.
Икос 12
Небе́сную две́рь и Киво́т, Всесвяту́ю Го́ру, Светоза́рный Кла́дязь, Ключ разуме́ния до́браго, восхваля́ем Тя, Богоро́дице, Всепе́тая и Преблагослове́нная, ча́юще прия́ти благода́ть Ду́ха Свята́го и благослове́ние Твое́, и пое́м Ти похвалы́ сии́:
Ра́дуйся, умо́м сла́бых Укрепля̀ющая.
Ра́дуйся, уча́щим терпе́ние Подаю́щая.
Ра́дуйся, за уча́щихся Предста́тельствующая.
Ра́дуйся, Лю́бящая Тя пою́щия.
Ра́дуйся, Влады́чице, на ны́ Милосе́рдующая.
Ра́дуйся, правосла́вных сла́во Честна́я.
Ра́дуйся, Всепе́тая Богоро́дице, Ключ разуме́ния притека́ющим к Тебе́ ми́лостивно Даю́щая.
Кондак 13
О, Пресла́вная и Преблагослове́нная Влады́чице Богоро́дице, не отврати́ лица́ Твоего́ от нас умиле́нно моля́щих Ти ся, но да́руй нам Ключ разуме́ния Неизрече́нныя Бла́гости Бо́жией и ум трезв и се́рдце соде́лай чи́сто в нас, да пое́м о Тебе́ ра́достно Сы́ну Твоему́ и Бо́гу: Аллилу́йя.
(этот кондак читаем трижды, затем 1-й икос и 1-й кондак)
МОЛИТВА ПРЕСВЯТОЙ ВЛАДЫЧИЦЕ БОГОРОДИЦЕ ПЕРЕД ЕЯ ИКОНОЮ “КЛЮЧ РАЗУМЕНИЯ”
О, Пресла́вная Де́во и Ма́ти, Богоизбра́нная у́мная Пала́то Божества́, Е́йже а́нгелы удивля́ются! Приими́ моли́твы на́ша усе́рдные, пред о́бразом Твои́м Честны́м возноси́мыя, и да́руй нам разуме́ние Боже́ственного Про́мысла о нас [и ча́дах на́ших], (приходя́щих в оби́тель на́шу и) притека́ющих к Твоему́ Всеблаго́му Покро́ву: испроси́ у Сы́на Твоего́ и Бо́га на́шего, да да́рует власте́м на́шим му́дрость и си́лу, к Це́ркви Правосла́вной благорасположе́ние, судия́м пра́вду и нелицеприя́тие, па́стырем му́дрость духо́вную, ре́вность и бде́ние о душа́х на́ших, наста́вником смиренному́дрие, ча́дом ра́зум чист и нескве́рен и послуша́ние, нам же всем дух ра́зума и благоче́стия, дух смире́ния и кро́тости, дух чистоты́ и пра́вды. И ны́не, Многоми́лостивая Ма́ти Жи́зни на́шея, изба́ви моли́твами Твои́ми, Влады́чице, ны от ро́пота, отыми́ ско́рби, утоли́ гнев и раздражи́тельность угаси́, стра́ху Бо́жию, воздержа́нию и трудолю́бию наста́ви, сло́во прему́дрости и душеполе́зное зна́ние и преспе́яние в душеполе́зном науче́нии прося́щим да́руй, осени́ нас ве́чною ра́достию, Ра́дость ми́ру Христа́ Спа́са Ро́ждшая, да Твое́ю Многоси́льною По́мощию житие́м на́шим сла́ву, хвалу́, благодаре́ние и поклоне́ние Еди́ному в Тро́ице сла́вимому Бо́гу и всех Созда́телю и Промысли́телю, Отцу́ и Сы́ну и Свято́му Ду́ху возсыла́ем, ны́не и при́сно и во ве́ки веко́в. Ами́нь.
Тропарь, глас 3:
Богоро́дице Де́во, /Прему́дрости Бо́жия Прия́тилище,/ Христа́ Бо́га пло́тию нетле́нно Ро́ждшая,/ тли́теля смы́слов Упраздни́вшаго,/ и Де́вство це́ло Сохра́ншая,/ мно́ги в ра́зуме Просвеща́ющая,/ благослови́ ны моля́щихся Тебе́ усе́рдно пред ико́ною Твое́ю,/ клю́ч Богопозна́ния да́руя,/ да правосла́вно велича́ем Тя́// во ве́ки воспева́юще Неизрече́нную Матери́нскую Бла́гость и́щущим благода́ти.
Кондак, глас 4:
Прему́дрости Наста́внице и смы́сла Пода́тельнице,/ нему́дрых Вразуми́тельнице и ни́щих Заступи́тельнице, /Бо́га Сло́во па́че ума́ Ро́ждшая, /Его́же моли́, мо́лим Тя усе́рдно, Ма́ти Неневе́стная, /да очи́стит сердца́ на́ша,/ и ра́зум я́сный да́рует Христо́с Све́т И́стины, //моля́щимся пред ико́ною Твое́ю многосла́вною благогове́йно.
ИКОНА ПРЕСВЯТОЙ ВЛАДЫЧИЦЫ БОГОРОДИЦЫ «КЛЮЧ РАЗУМЕНИЯ»
Матерь Божия прославилась во многих Своих чудотворных образах, через которые изобильно подается благословение Пречистой Девы молящимся.
История иконы Пресвятой Богородицы «Ключ разумения» тесно связана с историей очень схожего образа «Прибавления ума», который пришёл на Русь с католического запада в XVI веке. Прототипом для его написания стала статуя Девы Марии из итальянского города Лорето, о чём существует множество доказательств. Несмотря на смысловую схожесть, внешне иконы «Ключ разумения» и «Прибавление ума» совершенно различны: на последней Богоматерь изображается в далматике — длинном плаще без рукавов (как и статуя Девы Марии из Лорето) и с Младенцем Иисусом на руках, ключ же на композиции образа отсутствует.
Однако существует несколько фактов, которые свидетельствуют об общих истоках этих двух икон. Сегодня в Лорето, подле знаменитой статуи, можно купить икону Девы Марии (внешне соответствующую образу «Прибавление ума») с такой надписью: «Богоматерь Лоретская. Русская икона XVIII века. Старославянская надпись гласит: «Икона Пресвятой Матери Божией, Пречистой Девы Марии, называемая Ключ мудрости»». Примечательно, что на образах с именем «Ключ разумения» важной частью композиции является арка, под сводом которой разворачивается сюжет иконы. Обитель статуи Пречистой Девы из Лорето – резная ниша, где хранится святыня – также имеет форму арки.
В центральной части иконы «Ключ Разумения» изображена стоящая во весь рост Божия Матерь; в нижней части этой иконы изображён ключ.
В книге Евгения Поселянина “Сказания о чудотворных иконах Богоматери”. (1919г.) указано: «образ этот чтится местно и находится ныне в кладбищенской церкви г. Балахны Нижегородской губернии».
Местночтимая икона с таким названием благодаря заботе игумена архимандрита Варлаама находится в главной церкви Свято-Благовещенской обители г. Киева, что в Бортничах. Пред этой иконой совершаются молебны при начале учения отроков и молятся о даровании способностей к учению, а также призывают Милость Божию для тех деток, которые имеют особенности развития. Сама Пречистая Владычица Богородица ниспосылает Свою благодатную помощь всем, кто требует очищения и обогащения ума, мудрости, рассудительности и ответственности в жизненных поступках.
Как дети, к искренней Любящей Матери притекают сегодня православные люди в монастырь Благовещения за утешением и не отходят неуслышанными в своих молитвенных воздыханиях.
Пресвятая Богородице, спаси нас!