Месяца сентебрия в 1-й день
Пра́зднование Пресвяте́й Влады́чице на́шей Богоро́дице и Присноде́ве Мари́и ра́ди чудотво́рныя ико́ны Ея́, имену́емыя «Жасми́нная»
НА МА́ЛОЙ ВЕЧЕ́РНИ
На Господи воззвaх, стихиры на 4, глaс 4:
Прииди́те, я́же в равноа́нгельнем о́бразе спасе́ние взыску́ют,/ приди́те и вси ве́рнии христолюби́вии!/ Воспои́м всем се́рдцем Де́ву Чи́стую Богоро́дицу,/ И́же от ико́ны Своея́ Жасми́нныя нам Ми́лости неоску́дно подае́т,// Сию́ те́пле просла́вим.
Чуде́с Твои́х, Богоро́дице, си́ла ве́лия, / я́ко мно́ги, то́кмо воззва́вшия к Тебе́,/ от неду́гов тя́жких спасла́ еси́, Влады́чице, / ве́рныя благода́тною по́мощию утверди́ла еси́/ и во тьме неве́дения бы́вших к ве́ре обрати́ла еси́.
Ублажа́ем ны́не Го́ру Ту́чную,/ воспева́ем Свещу́ Злату́ю Де́ву Богороди́тельницу, и на́шу Влады́чицу,/ зане́ дре́во благоуха́ющее, и́же ико́ну ли́ствием облача́ет, ме́стом основа́ния монастыря́ Палиа́ни соде́яшася,/ я́ко пребыва́ние сла́вы Присноде́вы зде яви́ся.
Сла́ва, и ны́не, глас 2:
Ны́не оби́тель на́ша о Тебе́ хва́лится и весели́тся,/ име́ющи Тя Засту́пницу Непосты́дную/ и Сте́ну Неруши́му,/ Непоколеби́мое Основа́ние,/ Всесвята́я Де́во, / Не преста́й ны́не Твои́ми, Госпоже́, моли́твами/ избавля́ти лю́ди правосла́вныя от всех бед.
На стихо́вне стихи́ры, глас 1:
Упова́ние на Тя́, Богоро́дице, возлага́ем, /о е́же Ми́лости Сы́на Твоего́ сподо́битися, /и умиле́ния сердца́ на́ша исполня́ются/ днесь бо возно́сится моле́ние те́плое пред о́бразом Твои́м чудотво́рным, Пречи́стая Де́во,/ от христиа́н правосла́вных/ Ты бо о нас мо́лиши Христа́ Бо́га.
Стих: Слы́ши, Дщи, и виждь,/ и приклони́ у́хо Твое́.
Прозябе́ние купины́ ми́рта, жасми́нного благоуха́ния испо́лненное и ли́ка Твое́го сокры́тие сбы́вшееся зде зрим, Влады́чице:/ вси бо а́нгели Тебе́ дивя́тся и ра́достно ублажа́ют./ Те́мже воззове́м Ти, ча́юще вкуси́ти плодо́в Ве́чныя Жи́зни Сла́дости:/ благослове́на Ты в жена́х, Богоро́дице Де́во, / и благослове́н Плод чре́ва Твоего́.
Стих: Лицу́ Твоему́ помо́лятся/ бога́тии лю́дстии.
Вои́стинну блаже́но чре́во, носи́вшее Тя, Го́споди,/ нам же, соверша́ющим пра́зднество Твоея́ Пречи́стыя Ма́тере,/ моля́щимся пред иконою Твое́ю многосла́вною,/ и́же Жасми́нною нарица́ется,/носи́ти Тя в сердца́х на́ших помози́,/ да и мы блаже́нства сего́,/ по сло́ву Твоему́, причасти́мся.
Сла́ва, и ны́не, глас 5:
Ра́дуйся, Преблагослове́нная Богоро́дице Де́во;/ ра́дуйся, бы́строе моля́щихся услы́шание;/ ра́дуйся, бесо́м устраше́ние и ка́ющимся прибе́жище;/ ра́дуйся, исто́чник благода́ти в чудотво́рнем Твое́м о́бразе/ на стволе́ дре́ва жасми́нного ди́вно явле́нного/и по́слежде оби́тели на́шей сей Дарова́вшая.
Тропарь, глас 8-й:
Гла́с Пречи́стыя Де́вы над дубра́вою возвыша́ется, глаго́ля: / прииди́те, лю́дие, спасе́ние да́ти о́бразу Моему́,/ и́же посреде́ дре́в лесны́х огне́м объя́тых, /в дре́ве ми́ртовом пресла́вно Мно́ю сокрыва́ется. / Пред се́ю ико́ною моля́щеся ве́рнии взыва́ют:/изба́ви, Влады́чице, огня́ неугаси́мого ду́ши на́ша.
НА ВЕЛИ́ЦЕЙ ВЕЧЕ́РНИ
На Го́споди, воззва́х: поста́вим стихо́в 8 и пое́м стихи́ры, глас 5:
Прииди́те, ве́рнии, Всесвяту́ю Влады́чицу Богоро́дицу восхва́лим,/ и у́зрим ико́ну Ея́ пресла́вную,/ я́же во о́гне пыла́ющем на столпе́ дре́ва жасминного яви́ся и неврежде́нна бысть,/ и от нея, я́ко от исто́чника,/ ве́рою благода́ть прии́мем,/ и Бо́жией Ма́тери пред чудотво́рным образом Е́я́ поклони́мся,/ проще́ния прегреше́ний на́ших прося́ще,/ и душа́м на́шим ве́лия ми́лости.
Ко Твоему́ заступле́нию притека́ем, Пречи́стая, и пред о́бразом сим ди́вным дне́сь умиле́нно пое́м: изба́ви ны от огня́ негаси́мого гее́ны, Влады́чице, я́коже не́когда ико́ну Твою́ из пла́мени неврежде́нной сохрани́ла еси́, та́кожде нам, моля́щимся Тебе́, пода́ждь ве́лию ми́лость.
Моли́твенная воздыха́ния пред о́бразом Твои́м душ на́ших слы́шащи, Присноде́во Мари́е, и от А́нгел у́бо пе́ние прие́млющи, Ра́ю Мы́сленный Богома́ти, насади́ в сердца́х на́ших Дре́во Жи́зни — Христа́ Бо́га, во е́же прия́ти на́м ве́лию ми́лость.
И́ны стихи́ры, глас 2:
Ме́сто явле́ния о́браза многочу́дного свя́то бы́сть, та́мо бо оби́тель Успе́ния Всесвяты́я Влады́чицы сла́вно Про́мыслом Бо́жиим устро́ися, Палиа́ни нарече́нная. Отону́дуже ще́дрым дожде́м благода́ть к нам проистека́ет ны́не благослове́нием Де́вы и Ма́тери Всепе́тыя Бо́га на́шего.
Твою́ ико́ну целу́юще, Влады́чице, и Тебе́ покланя́ющеся, Богоро́дице Де́во Пресла́вная, досто́йных слове́с о прославле́нии Тебе́ не обрета́ем, но, благогове́йныя сле́зы Тебе́ прино́сим, моля́ще: спаси́ Тебе́ велича́ющия.
Купину́ Неопали́мую на па́мять лю́дем приводя́щи, я́ко покро́в Твой яви́ла еси́, Присноде́во, о́браз Свой честны́й, и́же на стволе́ дре́ва обрета́лся мно́гажды. и егда́ в храм Госпо́день вноси́м бысть сей, па́ки та́кожде на куст ми́рта возвраща́шеся преди́вно. Нас же, Тебе и́стово моля́щихся, све́том от ико́ны сия́ духо́вным озари́ и спаси́ Тя велича́ющия.
Сла́ва, и ны́не, глас то́йже:
Сокрове́нная Та́йно, смире́нием Свои́м ве́лиим избавле́нию ми́ра Послужи́вшая/ Благослове́нная Богоро́дице Де́во,/ приими́ моле́ния на́ша/ и принеси́ Твоему́ Сы́ну и Бо́гу,/ да спасе́т Тобо́ю ду́ши на́ша.
Вход. Проки́мен дне. И чте́ния.
Бытия́ чте́ние (глава́ 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо:/ за́йде бо со́лнце./ И взят от ка́мения ме́ста того́, и положи́ возгла́вие себе́,/ и спа на ме́сте о́ном./ И сон ви́де:/ н се ле́ствица, утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху н низхожда́ху по ней./ Госпо́дь же утвержда́шеся на ней и рече́:/ Аз Бо́г Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю,/ сохраня́яй тя на вся́ком пути́, а́може а́ще по́йдеши,/ и возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем,/ аз же не ве́дех./ И убоя́ся, и рече́:/ я́ко стра́шно ме́сто сие́;/ несть сие́, но дом Бо́жий,/ и сия́ врата́ Небе́сная.
Исхо́да чте́ние (глава́ 3):
Вни́де Моисе́й в го́ру Бо́жию Хори́в./ Яви́ же ся ему́ А́нгел Госпо́день в пла́мени о́гненне из купины́./ И ви́де, я́ко купина́ горя́ше огне́м, и купина́ не сгара́ше./ Рече́ же Моисе́й:/ преше́д, узрю́ виде́ние вели́кое сие́,/ что я́ко не сгара́ет купина́?/ Я́коже ви́де Госпо́дь, я́ко приступа́ет ви́дети,/ призва́ его́ Госпо́дь из купины́, глаго́ля:/ Моисе́е, Моисе́е./ Он же рече́: что есть?/ И рече́: не прибли́жися се́мо;/ изу́й сапо́г от ногу́ твое́ю:/ ме́сто бо, на не́мже ты стои́ши, земля́ свята́ есть./ И рече́ ему́:/ Аз есмь Бог отца́ твоего́,/ Бог Авраа́мов, и Бог Исаа́ков, и Бог Иа́ковль./ Отврати́ же Моисе́й лице́ свое́:/ стыдя́ше бо ся зре́ти пред Бо́гом./ Рече́ же Госпо́дь к Моисе́ю:/ ви́дя, ви́дех озлобле́ние люде́й Мои́х, иже во Еги́пте,/ и вопль их услы́шах от наси́льствующих в де́лех,/ вем бо боле́знь их,/ и снидо́х, е́же изъя́ти их от руки́ еги́птян,/ и извести́ их от земли́ о́ныя,/ и ввести́ их в зе́млю бла́гу и мно́гу,/ в зе́млю, точа́щу мед и млеко́.
Проро́чества Иезеки́илева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотвори́т иере́и на олтари́ всесожже́ния ва́шего/ и и́же спасе́ния ва́шего, и прииму́ вы,/ глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки,/ и сии́ бя́ху затворе́на./ И рече́ Госпо́дь ко мне:/ врата́ сии́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь, Бог Изра́илев, про́йдет и́ми, и бу́дут затворе́на./ Я́ко Игу́мен си́дет в них сне́сти хлеб,/ по пути́ ела́мских врат вни́дет и по пути́ его́ изы́дет./ И́ введе́ мя по пути́ врат святы́х, су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.
На лити́и стихи́ры, глас 2. Самогла́сны:
Пла́мень страсте́й на́ших угаша́еши моли́твою Твое́ю, Богоро́дице Де́во,/ предста́тельствующи за нас непреста́нно у Престо́ла Сы́на Твоего́ и Бо́га на́шего,/ я́ко вои́стину ве́лие дерзнове́ние и́маши к Нему́/ и ничто́же невозмо́жно есть хода́тайству Твоему́./ Ибо само́й ико́не Твое́й дарова́ Он си́лу Боже́ственную/ соверша́ти мно́гая и преди́вная чудеса́,/ си́ми уверя́я нас,/ я́ко никто́же прибега́яй к покро́ву заступле́ния Твоего́ посра́млен оты́дет./ Сего́ ра́ди пое́м моли́тв Твои́х си́лу/ и ублажа́ем Тя, Наде́жде христиа́н,/ ро́ждшую Спа́са и Изба́вителя душ на́ших.
Предстоя́т честне́й ико́не Твое́й христолюби́вии лю́дие/ и с любо́вию ей покланя́ются, Богоро́дице Влады́чице,/ почерпа́юще оби́льныя от нея́ да́ры щедро́т Твои́х:/ в неду́зех врачество, в беда́х избавле́ние,/ в ско́рбех утеше́ние,/ и́бо всем вся блага́я и душеполе́зная да́руеши/ с ве́рою прося́щим пред пречи́стым о́бразом Твои́м./ Сего́ ра́ди се́рдцем и усты́ благогове́йно лобыза́ем/ Боже́ственнаго ли́ка Твоего́ подо́бие/ и мо́лим Ти ся приле́жно:/ умири́ мир и спаси́ ду́ши на́ша/ всеси́льными моли́твами Твои́ми к Ро́ждшемуся от Тебе́,// Еди́на Благослове́нная.
Ви́дяще, Всесвята́я Де́во, де́йство чуде́с мно́жества,/ от ико́ны Твоея́ Жасми́нныя явле́нное и присноявля́емое по всей вселе́нней,/ немо́лчными славословле́нии Тя ублажа́ем/ и мо́лим Ти ся приле́жно:/ умири́ мир и спаси́ ду́ши на́ша/ благоприя́тным хода́тайством Твои́м к Ро́ждшемуся от Тебе́,// еди́на Благослове́нная.
Сла́ва, и ны́не, глас то́йже: Самогла́сен:
Да ра́дуется творе́ние все́,/ да лико́вствует естество́,/ я́ко Твоим, Чи́стая, честным о́бразом/ оби́тель на́ша духо́вно украша́ется,/ раби́ Твои́, от одержа́щия ну́жды избавле́ние прие́млют,/ и Тебе́, Чи́стая, взыва́ют:/ ра́дуйся, до́брых вино́вная,/ и Засту́пнице непосты́дная,/ и спасе́ние душ на́ших.
На стихо́вне стихи́ры, глас 2:
Удивля́еши нас пресла́вными чудесы́,/ и́хже источа́ет ико́на Твоя́ свята́я,/ во о́бразе Прекраснем Тя, Богоро́дице, изобразу́ющая/ ветьми древа миртового облаченная, /и о́гненнаго естества́ си́лу утиша́ющая/ си́лою Твое́ю Боже́ственною./ Ю́же с весе́лием прие́млюще,/ Тя, Чи́стую Богоотрокови́цу,// достодо́лжно пе́сньми почита́ем и ублажа́ем.
Стих: Слы́ши, Дщи, и виждь,/ и приклони́ у́хо Твое́.
Я́ко одушевле́нный киво́т Божества́,/ пе́нии хвале́бными честву́ем Тя,/ и велича́ем Тя, Богоро́дице Де́во,/ Еди́ну Избра́нную и Благослове́нную в жена́х:/ ложесна́ бо Твоя́ престо́л Себе́ сотвори́/ Сый Бог наш,/ спаса́яй при́сно Тя велича́ющия.
Стих: Лицу́ Твоему́ помо́лятся/ бога́тии лю́дстии.
Засту́пницу усе́рдную ро́да христиа́нскаго./ Тя велича́ем, Богоро́дице Де́во,/ Се бо ико́на Твоя́ свята́я,/ жасминного благоухания исполненная и дивно в листвиях сокровенная,/ чуде́с мно́жество источа́ет,/ я́ко сокро́вище драгоце́нное, Це́ркви Христо́вой дарова́ся бла́гостию Творца́,/ Все́льшагося в Тя пло́тию и просла́вльшаго Тя сла́вою Божества́./ Из Тебе́ бо вои́стину, а не привиде́нием/ воплоти́ся Сый Бог наш,// спаса́яй при́сно Тя велича́ющия.
Сла́ва, и ны́не, глас 2:
От ико́ны Твоея Жасми́нныя,/ Влады́чице Всесвята́я,/ исцеле́ний струи́ истека́ют,/ и́миже напая́ются благода́тно ду́ши на́ша/ и врачу́ются безме́здно телеса;/ те́мже Тя, Целе́бницу Ми́лостивую,// при́сно в пе́снех велича́ем.
На благослове́нии хле́бов тропа́рь, глас 8-й:
Гла́с Пречи́стыя Де́вы над дубра́вою возвыша́ется, глаго́ля: / прииди́те, лю́дие, спасе́ние да́ти о́бразу Моему́,/ и́же посреде́ дре́в лесны́х огне́м объя́тых, /в дре́ве ми́ртовом пресла́вно Мно́ю сокрыва́ется. / Пред се́ю ико́ною моля́щеся ве́рнии взыва́ют:/изба́ви, Влады́чице, огня́ неугаси́мого ду́ши на́ша. Трижды
На у́трени
На Бог Госпо́дь: тропа́рь Богоро́дицы трижды на глас 8-й: Гла́с Пречи́стыя Де́вы над дубра́вою возвыша́ется, глаго́ля: / прииди́те, лю́дие, спасе́ние да́ти о́бразу Моему́,/ и́же посреде́ дре́в лесны́х огне́м объя́тых, /в дре́ве ми́ртовом пресла́вно Мно́ю сокрыва́ется. / Пред се́ю ико́ною моля́щеся ве́рнии взыва́ют:/изба́ви, Влады́чице, огня́ неугаси́мого ду́ши на́ша.
По 1-м стихосло́вии седа́лен, глас 4: Яви́ся в огнепа́льнем лесу́/ Твой, Влады́чице, о́браз,/ огне́м неопали́мый,/ Та́ко и Ты, Богоро́дице Де́во, Огнь Божества́ во чре́ве Твое́м неопа́льно носи́ла еси́,/ Вопло́щшагося от Тебе́ Бо́га Сло́ва,/ Его́же моли́ спасти́ся нам, пою́щим Тя. Сла́ва, и ны́не, то́йже.
По 1-м стихосло́вии седа́лен, глас 4: Я́ко звезда́ многосве́тлая, взы́де на тве́рди церко́вней ико́на Твоя́ Жасми́нная, Богома́ти,/ озари́ Све́том Сы́на Твоего́ Христа́ Бо́га ско́рби тьмо́ю одержи́мых, и преще́ния враг изба́ви,/ и, вся тех се́ти разруши́в, яви́ся Предста́тельница кре́пкая,/ ору́жие непобеди́мое на враги́ ми́ру всему́:/ из Тебе́ бо всех Влады́ка плоть прии́м, вся челове́ки обожи́. Сла́ва, и ны́не, то́йже.
Величание:Велича́ем Тя, / Пресвята́я Де́во / Богоизбра́нная Отрокови́це / и чтим о́браз Тво́й святы́й, / и́мже то́чиши исцеле́ния / всем с ве́рою притека́ющим.
ПСАЛО́М ИЗБРА́ННЫЙ:
Отры́гну се́рдце мое́ сло́во бла́го./ Глаго́лю аз дела́ моя́ Царе́ви./ Язы́к мой трость кни́жника скоропи́сца./ Красе́н добро́тою па́че сыно́в челове́ческих./ Препояши мечь Твой по бедре́ Твое́й, Си́льне./ И наляцы́, и успева́й, и ца́рствуй,/ И́стины ра́ди, и кро́тости, и пра́вды./ Возлюби́л еси́ пра́вду, и возненави́дел еси́ беззако́ние./ Слы́ши, Дщи, и виждь, и приклони́ у́хо Твое́,/ И забу́ди лю́ди Твоя́, и дом отца́ Твоего́./ И возжела́ет Царь добро́ты Твоея́,/ Я́ко той есть Госпо́дь Твой, и поклони́шися Ему́./ Лицу́ Твоему́ помо́лятся бога́тии лю́дстии./ Госпо́дь во хра́ме святе́м Свое́м; Госпо́дь на небеси́ престо́л Его́./ Ви́дена бы́ша ше́ствия Твоя́, Бо́же,/ Ше́ствия Бо́га моего́ Царя́, И́же во святе́м./ Свят храм Твой, ди́вен в пра́вде./ До́му Твоему́ подоба́ет святы́ня Го́споди, в долготу́ дний./ Помяну́ и́мя Твое́ во вся́ком ро́де и ро́де.// Я́ко бла́го пред преподо́бными Твои́ми.
По полиеле́и седа́лен, глас 6:
Лю́дие дивля́хуся Ти, Всесвята́я,/ ка́ко ико́на Твоя́, Присноде́во, на стволе́ дре́ва обрета́лася мно́гажды./ Егда́ же в храм Госпо́день вноси́м бысть о́браз многочу́дный, / па́ки та́кожде на дре́во жасми́нное возвраща́шеся преди́вно./ А́нгельския бо Си́лы боголе́пно Тебе́ слу́жат, Небесе́ и земли́ Цари́це Богоро́дице,/ и Твой пресвяты́й о́браз обстоя́т неви́димо./ Тех бо Творца́ и Го́спода воплоти́ла еси́ и на руку́ Твое́ю, я́ко Младе́нца, носи́ла еси́,/ Иже го́рняя с до́льними совокупи́ и А́нгелы с челове́ки ликовствова́ти устро́и,/ пою́щия во гла́сех ра́дования Твое́ нетле́нное Рождество́.
Сла́ва, и ны́не, Богоро́дичен:Ма́терь Бо́жию и Де́ву Чи́стую Нескве́рную воспева́ем Богоро́дицу, о неусы́пном предста́льстве Сию́ благодаря́ще, предстоя́ще пред ико́ною Ея́ чудотво́рною, я́же Жасми́нною имену́ется.
Степе́нна, 1-й антифо́н 4-го гла́са.
Проки́мен, глас 4: Помяну́ и́мя Твое́// во вся́ком ро́де и ро́де. Стих: Слы́ши, Дщи, и виждь, и приклони́ у́хо Твое́.
Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 4:Весели́тся днесь селе́ние Палиа́ни и оби́тель на́ша све́тло торжеству́ет,/ Ма́тери Госпо́дни светоно́сное пра́зднество соверша́ющи на ме́сте том,/ иде́же неопали́ма бысть ико́на в ми́рта купине́,/ благоуха́ния жасми́на преиспо́лненней./Да ра́дуется с на́ми вы́шних ликостоя́ние, / да весели́тся собо́р ве́рных, / я́ко всех Зижди́теля Ма́терь, / И́стинная Присноде́ва и Су́щая Богоро́дица, / яви́ нам Свое́ благоутро́бие прише́ствием, / чудесы́ просла́вленнаго о́браза Своего́, / подая́ благода́тное освяще́ние, / мир и ве́лию ми́лость.
Кано́н, глас 8. Егоже краеграсие:
ИКОНА БОГОМАТЕРИ, ЛИСТВИЕМ ОБЛАЧЕННА
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Припев: Пресвята́я Богоро́дице, спаси́ на́с.
Испо́лни, о Де́во, бла́гих Твои́х, Це́рковь Святу́ю и страну́ на́шу, и вся́кому гра́ду и стране́ потре́бная свы́ше ниспосыла́й, Ты бо еси́ Ма́терь небеси́ и земли́ Царя́, и вся от Него́ ели́ка про́сиши, восприе́млеши в по́льзу рабо́м Твои́м.
Припев: Пресвята́я Богоро́дице, спаси́ на́с.
К ико́не Твое́й, Госпоже́, благогове́юще, лю́дие ве́рнии гряду́т вопия́ше Ти со слеза́ми: ви́ждь, Влады́чице, исполне́ние во́ли Твоея́: благоволи́ удосто́ити нас спаса́емых ча́сти, Матери́нски о сем умоля́ющи Твоего́ Сы́на и всех Творца́.
Припев: Пресвята́я Богоро́дице, спаси́ на́с.
Отъя́ла еси́ прише́ствием во оби́тель на́шу свята́го о́браза Твоего́, Всеблага́я Де́во, от рабо́в Твои́х уны́ние и окружа́вшия на́с прегра́ды, и вме́сто сих ра́дость и благоде́нствие ста́ду Своему́ дарова́ла еси́, сла́ва Твоему́ о нас смотре́нию.
Сла́ва, и ны́не, Богоро́дичен: Неду́гующа страстьми́ многоразли́чными, от Жасми́нныя ико́ны Твоея́ исцеле́ния сподо́би мя, о Богома́ти Влады́чице, да сла́влю чудеса́ Твоя́ и пою́ Тя, благи́х вино́вную, Ве́чную Бла́гость воплоти́вшую, ми́ра благу́ю Засту́пницу.
Песнь 3
Ирмо́с: Небе́снаго кру́га/ Верхотво́рче, Господи,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний Кра́ю, ве́рных Утвержде́ние,// Еди́не Человеколюбче.
Припев: Пресвята́я Богоро́дице, спаси́ на́с.
А́нгелов благода́тию Превы́шую прославля́ем и велича́ем Тя, Де́во, Промысли́тельницу на́шу, Попечи́тельницу и Покрови́тельницу, я́ко изво́лила еси́ чудотво́рный о́браз Твой посла́ти се́мо во утеше́ние на́ше и в Покро́в необори́мый.
Припев: Пресвята́я Богоро́дице, спаси́ на́с.
Богоро́дицеДе́во,Вели́чия Твоя́ кто испове́сть? Явле́нием бо на стволе́ дре́ва ико́ны Твоея́ возвесели́ла еси́ ду́ши правосла́вных, мно́гия неду́ги е́ю врачу́ющи, и́же по Бо́зе на Тя упова́ние возлага́ют.
Припев: Пресвята́я Богоро́дице, спаси́ на́с.
О Всеми́лостивая Влады́чице, не лиши́ у́бо и нас Твоего́ заступле́ния, спаси́ правосла́вных христиа́н от вся́каго зла, да Тобо́ю хва́лящеся, не постыди́мся во ве́ки.
Сла́ва, и ны́не, Богоро́дичен:
Го́спода Бо́га Ма́ти и Де́во, о́браз Свой на дре́ве жасми́ннем Я́вльшая, стра́нна мя любоче́стия сотвори́, молю́ Тя и чу́жда любопы́тства о челове́ческих согреше́ниих, де́рзость и изли́шнее на ми́лость Сы́на Твоего́ упова́ние отдали́ от мене́, да досто́йны Ему́ плоды́ принесу́, Еди́на Пречи́стая.
Седа́лен, глас 6:
Исполне́ние Зако́на и проро́ков, Ро́ждшая Христа́ Бо́га, испо́лни ра́дости и весе́лия всех, чту́щих святу́ю ико́ну Твою́, Влады́чице, да Тя ра́достно воспое́м, и любо́вию И́мя Твое́ просла́вим, я́ко Ты́ еси́ Еди́на от всех родо́в Избра́нная, Благослове́нная и Препросла́вленная.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.
Припев: Пресвята́я Богоро́дице, спаси́ на́с.
Облаче́нна ве́твием дре́ва ико́на Твоя́, Богома́ти, Ми́лости источа́ет неизрече́нныя: неду́гующие исцеле́ния прие́млют, безча́дныя обрета́ют благоча́дие, те́мже пое́м Тя́, Всесвята́я Де́во, во ве́ки.
Припев: Пресвята́я Богоро́дице, спаси́ на́с.
Ми́ртового дре́ва ве́тви лик Твой, Всечи́стая, от гре́шников нераска́янных взо́ров сокрыва́ют, но де́ти чи́стии се́рдцем сей ви́дят я́вно. Сим зна́мением нас к житию́ благоче́стному, Богоро́дице, подвиза́еши, те́мже пое́м Тя́, Всесвята́я Де́во, во ве́ки.
Припев: Пресвята́я Богоро́дице, спаси́ на́с.
А́нгели Госпо́дни мно́гажды возвраща́ху ико́ну Твою́, Богоро́дице, на ме́сто чуде́снаго явле́ния ея́, две́ри же хра́ма Бо́жия при сем бы́ша затворе́ни, те́мже мы, дивя́щеся Твоему́ произволе́нию о святы́не, естество́ превосходя́щему, пое́м Тя́, Всесвята́я Де́во, во ве́ки.
Сла́ва, и ны́не, Богоро́дичен:
Тя молю́, Богоро́дице, ум мой благоустро́й к позна́нию ве́чных и́стин Христо́ва Ева́нгелия, к разсмотре́нию тле́нности вре́менных благ напра́ви мой по́мысл и щедролю́бие да́руй ми неоску́дное, да благода́тию Христо́вою укра́шен, пою́ Тя́, Всесвята́я Де́во, во ве́ки.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколюбче.
Припев: Пресвята́я Богоро́дице, спаси́ на́с.
Еди́на па́че всех святых Иму́щая дерзнове́ние, Богоро́дице, моли́ Сы́на Твоего́ о всех нас, да не помяне́т грехо́в на́ших, приле́жно мо́лим Тя́.
Припев: Пресвята́я Богоро́дице, спаси́ на́с.
Ро́ждшая всех святы́х Святе́йшее Сло́во, Де́во Богоро́дице, да́руй сердца́м на́шим благопло́дными доброде́тельми бы́ти, приле́жно мо́лим Тя́.
Припев: Пресвята́я Богоро́дице, спаси́ на́с.
Испо́лни се́рдца на́ша ра́дости, Всенепоро́чная, мо́рем бла́гости Твоея́ потопля́я огнь нечистоты́ и вся́кия скве́рны в нас, и мглу грехо́вную разгоня́ющи, приле́жно мо́лим Тя́.
Сла́ва, и ны́не, Богоро́дичен:
Лю́тая беззако́ния оста́вити и плоды́ покая́ния и́стиннаго принести́ сподо́би нас, Законода́теля Бо́га пло́тию Ро́ждшая, Мари́е Присноде́во, приле́жно мо́лим Тя́.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.
Припев: Пресвята́я Богоро́дице, спаси́ на́с.
Изба́ви, Всесла́вная Богоро́дице, безсла́вных поползнове́ний жития́ моего́ и та́йная моя́ посты́дная дея́ния очи́сти, приле́жно молю́ Тя пред ико́ною Твое́ю Жасми́нною, Всенепоро́чная Де́во.
Припев: Пресвята́я Богоро́дице, спаси́ на́с.
Су́етнаго весе́лия, к преогорче́нию бли́жняго приводя́щаго, чу́жда мя соде́лай, Пречу́дная Цари́це, даждь ми сопеча́ловатися и́скреннему моему́ в бе́дствиих, Человеколюби́вая Влады́чице, и памятозло́бия изба́ви мя, приле́жно молю́ Тя пред ико́ною Твое́ю Жасми́нною, Всенепоро́чная Де́во.
Припев: Пресвята́я Богоро́дице, спаси́ на́с.
Тя, Богоневе́сто, недосто́йнии раби́ сла́вим, лобыза́юще бре́нными устна́ми о́браз Твой святы́й, и Тебе́ мо́лимся со слеза́ми: сохра́ни ны от лю́тых грехопаде́ний, да изба́вимся от ве́чныя му́ки.
Сла́ва, и ны́не, Богоро́дичен:
Ви́дя благода́тную си́лу, явле́нно пребыва́ющую при святе́й ико́не Твое́й Жасми́нней: исцеле́ние боле́зней, от суда́ непра́ведного избавле́ние, от огня́ спасе́ние и ина́я чудеса́, благода́рственно взыва́ем: сла́ва и че́сть Тебе́, Присноде́во Богоро́дице.
Конда́к, глас 8:
Я́ко Де́ву и еди́ну в жена́х, / Тя, без се́мене ро́ждшую Бо́га пло́тию, вси ублажа́ем, ро́ди челове́честии: / Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода. /Те́мже убо и дре́во жасми́нное/ удивляет мир А́нгельский и челове́ческий род,/яко послуша́нием Матероде́ве лик Ея́ сла́вный ди́вно сокрыва́ет./ Ве́рнии же досто́йно сла́вим Тя Богоро́дице, / и согла́сно вопие́м Ти: / моли́ Христа́ Бо́га согреше́ний оставле́ние дарова́ти покланя́ющимся ве́рою честно́му образу Твоему́.
Икос:А́нгелов превы́ше благода́тию Де́ву Нескве́рную и Небла́зную Ма́терь Сло́ва воспева́ем, прибега́юще под Ми́лость Ея́. Сего́ ра́ди пред и́коною, и́же в лесу́ непрохо́днем чуде́сно явле́на бы́сть в кусте́ жасми́на, пла́менем невреди́ма, упова́юще на благослове́ние Цари́цы Небе́сныя прино́сим пе́сни сицевы́я:Ра́дуйся, челове́ков спасе́ние. Ра́дуйся, Ада́ма и Е́вы увеселе́ние. Ра́дуйся, Ми́лости Бо́жией явле́ние.Ра́дуйся, упова́ющих на Тя до́брое хране́ние. Ра́дуйся, благода́тию Ду́ха Свята́го Преосене́нная. Ра́дуйся, я́ко ико́на Твоя́ ве́твьми благоуха́нными ди́вно украше́ннная. Ра́дуйся, Всепе́тая Влады́чице Богоро́дице, Сокро́вище благо́е христиа́н правосла́вных.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
Припев: Пресвята́я Богоро́дице, спаси́ на́с.
И́стовыя моли́твы и сле́зы покая́ния принося́щим Ти, Де́во Нетле́нная, пред о́бразом Твои́м Жасми́нным да́руй нетле́нную ра́дость с пою́щими: отце́в Бо́же, благослове́н еси́.
Припев: Пресвята́я Богоро́дице, спаси́ на́с.
Еди́на ми́ру Спаси́теля Бо́га Ро́ждшая, Де́во и Ма́ти Христа́, пред о́бразом Твои́м Жасми́нным сле́зы умиле́ния иму́щим да́ждь нетле́нную ра́дость с пою́щими: отце́в Бо́же, благослове́н еси́.
Припев: Пресвята́я Богоро́дице, спаси́ на́с.
Ми́лость неизглаго́ланная проистека́ет благода́ти струя́ми от ико́ны Твоея́ Жасми́нныя, Влады́чице. Сия́ ча́ющих сподоби, Богоро́дице, нетле́нную ра́дость прия́ти с пою́щими: отце́в Бо́же, благослове́н еси́.
Сла́ва, и ны́не, Богоро́дичен:
О́бразу Твоему́ преди́вному почте́ние воздаю́щим, Тебе́ же, Чи́стая Влады́чице Сла́ву и поклоне́ние, я́ко Бо́жией Ма́тери, пода́ждь жела́ние ве́чных благ и нетле́нную ра́дость с пою́щими: отце́в Бо́же, благослове́н еси́.
Песнь 8
Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.
Припев: Пресвята́я Богоро́дице, спаси́ на́с.
Благода́тныя исцеле́ния от боле́зней и неду́гов неисце́льных да́руеши, Пресла́вная Богоро́дице, моля́щимся пред ико́ною Твое́ю, Жасми́нною нарече́нною, те́мже вси ве́рнии о Ми́лостях сих благословля́ем во ве́ки.
Припев: Пресвята́я Богоро́дице, спаси́ на́с.
Ли́ствия и ко́ра от дре́ва ми́ртового, на не́мже о́браз Твой, Влады́чице, яви́ся, благода́тно у́бо ско́рби отгоня́ют, чрез них бо моли́твами Твои́ми, Богома́ти, здра́вие теле́сное ще́дро подае́ши, те́мже Тя, Де́во, благословля́ем во ве́ки.
Припев: Благослови́м Отца́, и Сы́на, и Свята́го Ду́ха Го́спода.
А́нгельски да воспои́м Трисо́лнечное Богонача́лие, дарова́вшее ве́рным Те́плую Хода́таицу Присноде́ву Богоро́дицу, о́бразом Свои́м осеня́ющую ны́, гре́шныя рабы́ Своя, да измени́мся скве́рны, пою́ще Пресвяту́ю Тро́ицу и Тя, Чи́стая, благословля́ем во ве́ки.
И ны́не, Богоро́дичен:
Чи́стая Присноде́во и Пренепоро́чная Богоневе́сто,кро́тким о́ком Твои́м виждь мое́ смире́ние, и приклони́ у́хо Твое́ к моли́тве се́рдца моего́, кро́тостию и незло́бием благоукраси́ мя, помраче́ннаго безобра́зием зло́бных страсте́й, и сотвори́ прича́стника блаже́нства, кро́тким обетова́ннаго, да ра́дуяся прославля́ю и благословля́ю Тя во ве́ки.
Песнь 9
Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.
Припев: Пресвята́я Богоро́дице, спаси́ на́с.
Ева́нгельскими доброде́тельми напиши́ в души́ мое́йОбраз Христо́в, Богоблагода́тная, укрепи́ и утверди́ мя во вся́ком де́ле бла́зе, от вся́кия же зло́бы отврати́ се́рдце мое́, да ми́рными усты́ прославля́ю Тя, Чи́стая, непреста́нно.
Припев: Пресвята́я Богоро́дице, спаси́ на́с.
Неизглаго́ланная бла́госте! Кто не изуми́тся благодея́ниям Твои́м, Богоро́дице, изочте́м бо, и па́че песка́ умно́жатся, благодари́м у́бо Тебе́, Всеблага́я, на небеси́ и на земли́ Воспевае́мая Влады́чице.
Припев: Пресвята́я Богоро́дице, спаси́ на́с.
Насле́диеве́чных бла́г слеза́ми покая́ния и умиле́ния и сокруше́ние к исправле́нию даждь ми, Де́во, да с ли́ки избра́нных Бо́жиих воспою́ Тя, Хода́таицу моего́ спасе́ния.
Сла́ва, и ны́не, Богоро́дичен:
А́нгелов Превзоше́дшая благода́тию и бла́гостию, Сла́внейшая Де́во и Ма́ти, вся́кий вид зло́бы, гнездя́щийся в се́рдце мое́м, искорени́, да Тя прославля́ю, Чи́стая, и Благословенная.
Свети́лен:
Ико́ну Твою́ всечестну́ю в зало́г благоволе́ния Твоего́ ве́рным дарова́ла еси́, Влады́чице,/ покрыва́ющи и сохраня́ющи е́ю от о́гненнаго запале́ния на Тя упова́ющия./ О Ма́ти Царя́ Христа́ Бо́га, бу́ди и нам, гре́шным,/ прибе́жище спасе́ния в неча́янных беда́х и Хода́таица ве́чныя жи́зни.
Сла́ва, и ны́не, Богоро́дичен:
Прибе́жище еси́ непосты́дное упова́ющих на Тя, Богоневе́стная: находя́щих бо на ны искуше́ний избавля́емся, моля́щиися пред Честно́ю ико́ною Твое́ю Жасми́нною, с ве́рою призыва́юще Твое́ Ма́тернее заступле́ние.
На хвали́тех стихи́ры на 4, глас 6:
Влады́чице, Ма́ти Изба́вителя,/ приими́ моле́ние рабо́в Твои́х,/ со упова́нием и́стовым предстоя́щих пред ико́ною Твое́ю Жасми́нною,/ а́ще и недосто́йне моля́щихся Тебе́,/ да мо́лишися за ны к Ро́ждшемуся из Тебе́, Влады́чице ми́ра,/ бу́ди нам Изба́вительница.
Тле́ние и боле́знь потреби́ла еси́, Всепе́тая,/ дре́внюю всю рождество́м Твои́м,/ Живо́т ми́ру ро́ждши, смерть разруши́вший,/ боле́зни, Блага́я, исцеля́еши/ ве́рно Твой чуде́сный о́браз воспева́ющих,/ и любо́вию кла́няющихся,/ и чту́щих Тя, Чи́стую, Наста́вницу.
О, Богоро́дице Ма́ти Благосе́рдая, / ди́вную ико́ну Твою́/ посыла́еши нам в по́мощь и защи́ту/ и е́ю укроща́вши свире́пство огня́,/ я́ко Ма́ти су́щи/ стихи́ями облада́ющаго Влады́ки Христа́./ Благода́тию Бо́жиею ро́пота пожа́ры га́сиши/ благоча́дие и ра́дость духо́вную лю́дем посыла́юще./ Те́мже велегла́сно пропове́дуем Твоя́ чудеса́/ и ми́лость мно́гу к ро́ду христиа́нскому/ и пе́сньми хвале́бными// немо́лчно Тя велича́ем и ублажа́ем.
Я́ко пресве́тлая звезда́ / дарова́ся ико́на Твоя́, Влады́чице, оби́тели на́шей /, да Тобо́ю благода́тно просвеща́емся, / пое́м и сла́вим Тя, / Благослове́нную Ма́терь Сы́на Бо́жия, / Иису́са Человеколю́бца, Спа́са ду́ш на́ших.
Сла́ва, и ны́не, глас то́йже: О , Богоневе́стная Ма́ти и Де́во!/ Чудотвори́ти не престае́ши и ны́не/ ико́ною Твое́ю пречестно́ю Жасми́нною,/ отра́ду и утеше́ние е́ю да́руеши/ благоча́дия ра́дость низспосыла́еши./ Из Тебе́ бо воплоти́ся/ Обнови́тель па́дшаго естества́ челове́ча,/ сый Бог наш,/ дарова́вый нам Тебе́ в покро́в и защи́ту,/ Иже слы́шит моли́тву Твою́,/ за нас приноси́мую,/ и преклоня́ется к моле́нию Твоему́ Ма́тернему,/ егда́ умоля́вши бла́гость Его́ за лю́ди согреши́вшия./ Те́мже не преста́й, благосе́рдая Влады́чице,/ предста́тельствовати за вся ны, чту́щия Тя,// я́ко вои́стину еси́ Хода́таица непосты́дная на́шего спасе́ния.
Славосло́вие вели́кое, ектении́ и отпу́ст.
На Литурги́и:
Блаже́нны от кано́на, пе́сни 3-я и 6-я.
Проки́мен, глас 3, песнь Богоро́дицы: Вели́чит душа́ Моя́ Го́спода,// и возра́довася дух Мой о Бо́зе, Спа́се Мое́м. Стих: Я́ко призре́ на смире́ние Рабы́ Своей, се бо от ны́не ублажа́т Мя вси ро́ди. Апо́стол к Филипииси́ем, зача́ло 240.
Аллилу́йя, глас 8. Стих: Слы́ши, Дщи, и виждь, и приклони́ у́хо Твое́. Ева́нгелие от Луки́, зача́ло 54.
Прича́стен: Ча́шу спасе́ния прииму́: