Егоже краеграсие: БОГОРОДИЦЕ, ДАР ЖИВОТА ПОСЛИ
Кондак 1
Богородицу и Матерь Света в песнех возвеличим, яко Госпожа ангелов послужи смирением Своим велиим Воплоще́нию Бога. Сия главизна спасения совершися и мир от греха Крестом и Воскресением свободися. Владычице Всесвятей, Иже нас от бед и скорбей молитвами выну свобождает, со умилением взываем: Радуйся, Преди́вная Дево и Мати, благочадия благословение и жизни вечныя сладости вкушение.
Икос 1
Образ Твой, Царице Всеблагая, чудесами велиими украсился еси благолепно. Благодарная убо жена прежде слезы лившая, яко не сподобльшаяся благословения. Но о, Милостивая Мати, сокрушение сердца ея зряще, утешение даровала еси плачущей — яблоко благословением иерейским. Темже Милости Христовой и радости неизреченныя о даровании младенца исполнися сердце жены упование на Тя, Богоро́дице, возложившей и иконе Твоей благодатней яблоко златое принесла сия материю ставшая. С нею же поем Ти, Богомати, радостно сицевая:
Радуйся, смиренных благословение.
Радуйся, скорбящих жен утешение.
Радуйся, уны́нием скованных свобождение.
Ра́дуйся, молитвы исполнение.
Радуйся, радости умножение.
Радуйся, верных благодатию осенение.
Радуйся, веры укрепление.
Радуйся, говеющих целование.
Радуйся, маловерных ободрение.
Радуйся, неверных уверение.
Радуйся, дарующая терпение.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 2
Гобзования щедрот ищуще, Всемилостивая Мати, благословение Твое приемлем молящеся пред образом Твоим многославным. Чающе радости вкусити вечныя, поем Ти похва́льныя песнь: Аллилуйя.
Икос 2
Осиявает славою горнею Твоя икона честная, Влады́чице, верных к Тебе притекающих, егда благодатию Божиею чудеса обильные проистекают, яко от источника воды чистыя. Жажду духовную утолити хотящии поют Тебе, Богоро́дице песни таковая:
Радуйся, упования исполнение.
Радуйся, верных спасение.
Радуйся, уны́ния отгнание.
Ра́дуйся, благостию осенение.
Радуйся, Избавляющая от тления.
Радуйся, Дающая трезвение.
Радуйся, скорби забвение.
Радуйся, православных умиление.
Радуйся, верным спасение.
Радуйся, неверных вразумление.
Радуйся, заблу́ждших покаяние.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 3
Радости исполняются вернии, яже на Тя упование о Господе возлагают. Молитвы их слышиши, Благодатная Дево и Мати, и Сыну Твоему и Богу приносиши. Любовию чтуще Тя, Богоро́дице, поем Спасу мира о Тебе: Аллилуйя.
Икос 3
Обрадованней Архангелом Гаврии́лом Пречистей Деве припадаем, исцеления страстей душевных алчуще. Со умилением на образ Владычицы взираем и благоговейно просим от бед избавитися и скорбей молитвами Ея неусыпными. Благодарим, Всесвятую Богородицу, поюще песни похвальная:
Радуйся, Богу благое приношение.
Радуйся, молитвы возношение.
Радуйся, приятное благоухание.
Ра́дуйся, щедрот гобзование.
Радуйся, Милости Божией излияние.
Радуйся, скорби отгнание.
Радуйся, Света Истинного Сияние.
Радуйся, к покаянию воззвание.
Радуйся, врачующая отчаяние.
Радуйся, благое умиление.
Радуйся, скорби избавление.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 4
Деву Пренепорочную восхваляем о благодеяниях бывших на нас явленных и неявленных. Благодарения возносим о сих, упования на Богородицу исполнении о грядущих Милостех дождем щедрым изливаемых пред образом благодатным, устнами людей православных Златым яблоком нареченным, поем Христу Богу: Аллилуйя.
Икос 4
Иныя толико пламенныя предстательницы не имамы, токмо Тебе, Богоро́дице. Гласу бо Твоему материнскому Сам Бог внемлет. Не ради правд наших, не бо сотворихом что благое на земли, но молитвами Твоими, Матерь и Дево, Милости Божия сподобляемся. Посему же поем Ти благодарственно сицевая:
Радуйся, ненадеждных надеяние.
Радуйся, нагих одеяние.
Радуйся, Ходатаице спасения.
Ра́дуйся, молящихся умиление.
Радуйся, сердечное утешение.
Радуйся, о роде нашем попечение.
Радуйся, праведных радование.
Радуйся, жизни присныя знамение.
Радуйся, Богу приятное каждение.
Радуйся, благоухания Честное Селение.
Радуйся, Церкви Украшение.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 5
Царицу Небесную, горних чинов радование и земнородных хваление, Богоро́дицу и Присноде́ву Марию пред образом Ея благолепным молитвенно поем, взывая о Ходатаице нашего спасения Дивному во святы́х Богу: Аллилуйя.
Икос 5
Едина Чистая и Преблагословенная Мати Неневестная, Плод Живоносен миру, яко лоза благая Давшая, Избавителя и Спасителя рода человеческого Христа Бога нашего. Чистота, смирение и молитва суть три нити, Богоневесто и Дево, прекрасныя души Твоея. Не иму́ще по достоянию воспети Тя, умоляем прими от уст грешных хвалы сицевая:
Радуйся, Источниче Милосердия.
Радуйся, к Богу теплое моление.
Радуйся, Ходатаице благочадия.
Ра́дуйся, безплодия разрешение.
Радуйся, сердечное умиление.
Радуйся, покаяния дарование.
Радуйся, уны́ния отгнание.
Радуйся, человечеству благое дарование.
Радуйся, утишающая стенание.
Радуйся, подвизающая на бдение.
Радуйся, святых увеселение.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 6
Даровати благочадие у Бога просят вернии с упованием велиим на Твое, Всесвятая Богомати, предстательство. На бдение молитвенное подвизатися хотящии благословение Твое, Чистая, приемлют и во смирении пояс треми нитьми плетен до времен разрешения безплодия нося, Сыну Твоему и Богу поют: Аллилуйя.
Икос 6
Архангела Божия послушала еси со смирением прием Благовестие, Всепетая Дево, отвечая рекши:”Се раба Господня, буди Ми по глаголу твоему”. Просим Тя, Богоро́дице, научи и нас смиренно Волю Божию приимати, да радости исполнившись поем песни похвалы сии:
Радуйся, образе смирения.
Радуйся, воли Божия исполнение.
Радуйся, радости прозябение.
Ра́дуйся, сосуде Боговоплощения.
Радуйся, Бога Слова селение.
Радуйся, земли и Неба примирение.
Радуйся, Царства Божия отверзение.
Радуйся, душ скорбящих утешение.
Радуйся, сирот заступление.
Радуйся, недужных исцеление.
Радуйся, смиренных возвышение.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 7
Радостотворный образ Твой, Пречистая Дево, источает токи благодати, да живот имут молящиися и лишше имут. Чудеса бо проистекают от него мановением Божественным и яко роса орошает благостно с верою притекающих ко Преславней Влады́чице во святей иконе Ея Милость Божия. О Ней же радостно поем: Аллилуйя.
Икос 7
Жимолость снедная ста икона Твоя, Богоро́дице, златым яблоком нареченная. Вернии убо к ней притекают, яко пчелы нектар собирающии, благодати мед сладок для душ своих получити хотяще. По вере истей и пламенней благословение Твое, Всесвятая, приемлют и поют умиле́нно сицевая:
Радуйся, благости подаяние.
Радуйся, отнимающая отчаяние.
Радуйся, скорби утоление.
Ра́дуйся, радости насыщение.
Радуйся, умиления исполнение.
Радуйся, Дающая терпение.
Радуйся, молитвы телое возношение.
Радуйся, Церкви Украшение.
Радуйся, о христианах горячее дерзновение.
Радуйся, Дарующая воли укрепление.
Радуйся, Посылающая ко благу произволение.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 8
Иже Тебе ради, Матеродево, Давид псалмопевец возгласи:”Предста Царица одесную Тебе в ризах позлащенных преиспещренна”, величие и Чистоту надмирную описати дерзая, Влады́чице. О сих же и мы бренными усты поем: Аллилуйя.
Икос 8
Винницкая земля украсилася убо образом Твоим, Всеславная Богомати, яко златом многоценным. По молитвам православных людей пред иконою сею чад Церкви множество обретается. О сих и прочиих благодея́ниях поем Тебе, Царице Небесная, благохваления сии:
Радуйся, Церкви благородное Украшение.
Радуйся, благих отраслей насаждение.
Радуйся, земле Винницкой благословение.
Ра́дуйся, Зовущая совершати в Заповедях хождение.
Радуйся, унылых ободрение.
Радуйся, Радости премирной рождение.
Радуйся, Благословляющая приходящих к иконе Твоей на поклонение.
Радуйся, верных сладкое Лобзание.
Радуйся, Дарующая младенцев взыграние.
Радуйся, материнства дарование.
Радуйся, в супружестве живущих радование.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 9
Облагодати́, Чистая, умы верных, на Тя, Богоро́дице, о Христе упование возлагати, и веру православную тверду, яко адамант имети, поюще Триединому Богу: Аллилуйя.
Икос 9
Твоя утроба, Пречистая Влады́чице, вместила еси Невместимаго Бога Слова, мир из ничего Создавшаго, и из небытия в бытие творение все Приведшаго. Предвечный Господь плотию родися яко совершен Человек от Твоих чресл, Присноде́во. Мы же земнороднии песни славления Тебе приносити дерзаем:
Радуйся, Бога Слова Селение.
Радуйся, Любящая Господне творение.
Радуйся, тьмы житейския озарение.
Ра́дуйся, сердец освящение.
Радуйся, образе терпения.
Радуйся, печалей горьких утоление.
Радуйся, супругам благословение.
Радуйся, младенцев взыграние.
Радуйся, отроков соблюдение.
Радуйся, иереев благоговение.
Радуйся, иноков похваление.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 10
Ангелов удивление Тайна Бовоплощения бысть, Всесвятая Дево, ей же Ты глубиною смирения послужити изволила еси. Се бо пред святою Твоею иконою, Богоро́дице, благодарно о спасении рода человеческого поем Единому во Святей Тро́ице Славимому Богу: Аллилуйя.
Икос 10
Пресвята́я, Пречистая, Преблагослове́нная Влады́чице Богоро́дице, недоумеет всяк язык воспети Тя по достоянию, ниже ум постигнути может Тайну Рождества Сына Твоего и Бога и Присноде́вство Твое пояснити, Вседержи́теля Мати. Токмо благоговейно пред иконою Твоею дивною православно хощем пети:
Радуйся, Неудобозримая глубино смирения.
Радуйся, ниво Неоранная спасения.
Радуйся, суеты житейския избавление.
Ра́дуйся, смыслов освящение.
Радуйся, яко житие твое миру есть благодея́ние.
Радуйся, болезни естества нашего исцеление.
Радуйся, природы нашея обновление.
Радуйся, младенцев радование.
Радуйся, отроков воспитание.
Радуйся, юных буести отгнание.
Радуйся, сил духовных укрепление.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 11
О дольних никогдаже попечения оставляеши, Всемилостивая Богоро́дице,
сильна́ е́сть моли́тва Твоя, Присноде́во, яко и гроб и умервщление не удержаста ю. Мы́ же, о Твое́м всемо́щнем заступле́нии до́бре ве́дуще, со умиле́нием зове́м Богу: Аллилуйя.
Икос 11
Сына Твоего и Бога видела, Дево, пелены обвитаго, яко Младенца. О Нем же, мир весь Сотворшем, оружие прошло Тебе сердце, Богомати. По Распятии убо воскресл есть Христос Бог наш Тридневен, радость неизреченную души Материнстей давше. Сподоби и нас, Всечи́стая, радости лепту принести Тебе поющим:
Радуйся, к покаянию наставление.
Радуйся, грешников изменение.
Радуйся, скорби утоление.
Ра́дуйся, Посылающая златое терпение.
Радуйся, любве умножение.
Радуйся, младенцам здравия подаяние.
Радуйся, юных воспитание.
Радуйся, зрелости воззвание.
Радуйся, старости поддержание.
Радуйся, немощны́х укрепление.
Радуйся, сердцам благое утешение.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 12
Лик Твой многосвесветлый, Богоро́дице Всеблагая, зрети имамы Милость велию, взор умилением услаждая. Ты еси Дарование миру, яко от Тебе произыде плотию Одеющийся Светом яко ризою Зиждитель и Спаситель всея твари Христос, Ему же с Тобою поем: Аллилуйя.
Икос 12
Ихже воспита манною, приносят Спасу желчь купно и оцет. Что убо принесем мы Сыну Твоему, Преблагослове́нная Влады́чице Богоро́дице? Грехов ли черную мерзость, житие ли чистое по Заповеди на браце в Кане Галилейстей, Твоими усты многоценными изреченней: “Еже аще глаголет вам Господь Иису́с, сотворите”. О перетворении воды в вино и о неисчетных чудесех предстательством Твоим содеянных поем Ти, Присноде́во, сицевая:
Радуйся, подвизающая к молитве со благоговением.
Радуйся, Научающая Богу имети доверие.
Радуйся, забвение отчаяния.
Ра́дуйся, Успокоение благое слез стенания.
Радуйся, неплодным благочадия дарование.
Радуйся, младенцам здравия подаяние.
Радуйся, болящих исцеление.
Радуйся, жаждущих напоение.
Радуйся, алчущих насыщение.
Радуйся, немощны́х укрепление.
Радуйся, молитв многих исполнение.
Радуйся, Преди́вная Дево и Мати, благочадия благословение и жизни вечныя сладости вкушение.
Кондак 13
О всепетая Мати, рождшая всех святых Святейшее Слово, нынешнее приемши приношение, от всякия избави напасти всех, и будущия изми муки, Тебе вопиющих: Аллилуиа.
Сей кондак глаголем трижды. И паки чтется 1-й икос и 1-й кондак.
Тропарь, глас 3-й:
Златая Стамно, Мати Неневестная, Всесвятая Дево, радость миру Давшая, Богу плоть даровавши, молим Тя раби Твои: благослови нас причастниками сладости бытия нетле́нного стати, поющих Тя, Богоро́дице Истинная.
Кондак, глас 8-й:
Образ Твой украсися, Владычице, Всеславная, златое яблоко, благодарения знамя бысть на нем:благочадия исполнися жена, с верою тебе поклоньшася. Ныне же венцы плодовые тебе приносим, да благоплодием облачатся души наша.
Молитва пред образом Пресвятой Богородицы “Златое яблоко”
О, Преблагословенная Присноде́во и Мати, усты бренными дерзаем молитву Ти приносити, взывающе: Заповедь едину Давшая, Богоро́дице, яко Законодавца Божественного Мати, да творим, еже глаголет Сын Твой, научи ны ходити ходити путем благочестия и творити Волю Божию во вся дни живота нашего. Благослови люди Твоя Милостями от Вседержи́теля Христа, даруяй здравие духовное и телесное всем Тя чтущим, яко Госпожу Богородицу истинную, мир Церкви Православной во всем мире сущей подаждь, ереси отгоняяй, хитона Тела Христова единство соблюдаяй, благосостояние народу нашему. Избави всех, Обрадованная, от скорбей и обстояний, уврачуй болезни, и в вере православней и благочестии народ наш утверди. Не попущай, Пречистая, воли нашей совершатися, не угодна бо есть, но да будет воля Сына Твоего и Бога нашего: да ны спасет, и вразумит, и подаст благодать Святаго Духа, да бых отселе престали сквернодейства, и прочее пожили в повелении Сына Твоего, Емуже подобает всякая слава, честь и держава, со Безначальным Его Отцем, и Пресвятым и Благим и Животворящим Его Духом, ныне и присно, и во веки веков, аминь.
Молитва о благословении супруг не иму́щих чад, пред иконою Преблагослове́нныя Влады́чицы Богородицы “Златое яблоко”, чтомая
Что Ти принесе́м, или́ что Ти воздади́м, о Преми́лостивая Госпоже́ Влады́чице, засту́пнице ро́да христиа́нскаго, за вся́ Твоя́ неисче́тная благодея́ния, я́же при́сно явля́еши всем призыва́ющим и́мя Твое́ и Твоея́ по́мощи прося́щим. Кто бо притека́яй к Те́бе посра́млен и неуслы́шан от Тебе́ отхо́дит, о премилосе́рдая Ма́ти? Ве́мы, Пречи́стая, я́ко за мно́жество грехо́в и беззако́ний на́ших не́смы досто́йни ниже́ и́мя Твое́ пресла́дкое нарещи́, не то́чию песнопе́ния от оскверне́нных усте́н Тебе́ приноси́ти, и удо́бее есть нам молча́ние люби́ти. Но паки дерза́ем приноси́ти Тебе́, Мари́е Мати Неневестная, сие́ коленопреклоне́нное моление, упования преисполненное:
Благослови, Богоро́дице, плод сей яблочный (и зде указует иерей десницей на плод), иже благорастворением воздушным, и каплями дождевными, и тишиною временною, волею Сына Твоего нам даровася, да будет в нас от того рождения во утешение, в веселие, благодарение и приношение славословия Тебе, Чистая.
Премилосе́рдая Ма́ти, даруй благочадия восприятие супругам сим честным браком сочетавшимся и чад не иму́щих и́мярек плод яблочный, иже украшением образа Твоего бысть, вкушающим, я́ко от избы́тка лю́бящих Тя серде́ц приноси́мый.
Сама́ Ты, Влады́чице, благода́тию Твое́ю косни́ся серде́ц на́ших и сих верных чад Твои́х Милости чающих, да просимое прияти сподобятся, и веры моления пролию́тся пред иконою Твоею и в благодаре́ниих и славосло́виих притека́ют к Тебе́, Богоро́дице, еди́ней непосты́дней Засту́пнице ро́да христиа́нскаго, и да немо́лчно славосло́вят Тя, Всепе́тую, во ве́ки веко́в. Ами́нь.
По сем же бывает дробление и раздаяние яблок верным, благочадия чающим.